• ×
الإثنين 26 يوليو 2021 | 07-25-2021
بلل

فرح الغلابة

بلل

 2  0  914
بلل

هل تصدقوا ان اهل الوصيف تبادلوا التهانئ عبر وسائل الاتصال المختلفة.
عقب فوز الوصيف في مباراة ودية علي فريق درجة ثالثة بتركيا.
يا أخوانا كدي قولو بسم الله.
دي مباراة ودية وعارفين مع منو .. مع نادي في الدرجة الثالثة في تركيا.
وهي تركيا زاتها كورتها وينها.
قولو لينا اسم فريقين من تركيا.
تركيا عندها فريق واحد معروف.
واي بلد تلقي فيها فريق واحد بس تعرف انها الحبه دي ما عندها.
كورة اوروبا كوم وكورة تركيا كوم تااااني.
تركيا مشهورة بس بالمسلسلات وماركات الملابس المعروفة
تاني ما عندها حاجة.
عشان ما تفرحوا ساي.
معقولة حصلت للدرجة دي .. تفرحوا عشان الفوز في اول مباراة ودية.
كان ناقص تجيبوا ليكم كأس وتحتفلوا كمان.
بالجد دا كان ناقص.
يا ربي الفرح دا من شنو.
ايواااا اتذكرت .. عشان سيد البلد صادر جميع الافراح.
خلاكم قاعدين علي الحديدة.
ما خلي ليكم كأس الممتاز ولا كأس السودان.
والاخيرة مش كانت بطولتكم المحببه.
دي برضو تمت مصادرتها.
تاني إلا تمشو تفوزوا في الوديات.
رسمي ماعندكم طريقة.
طبعا طوالي الجماعة بقوا يحلموا كالعادة.
قالوا تاني مافي فريق ح يقيف قدامنا.
ولا حتي في افريقيا .. كان قابلنا حياتو زاتو ح نغلبوا.
يا اخوانا بسم الله .. كدي أصحوا .. دي اول مباراة ودية.
والموسم لسه ما انطلق.
روقوا المنقة شوية.
لسه راجيكم هلال الابيض واهلي شندي والخرطوم الوطني والرابطة كوستي وكمان فيها بورتسودان والقضارف وحتي جبل اولياء.
طبعا مافي زول جاب سيرة سيد البلد لحدي اسي.
دا كوم والبقية كوم تاني.
دا البخليكم تنسحبوا طوالي.
هروب شديد.
وما تنسوا البطولة الافريقية طبعا كالعادة طلوع من بدري.
من قبال الناس تلعب.
طبعا ح تكملوا اقوانكم كلها في الوديات.
وبعد داك صيام متواصل.
خليكم في احلامكم دي لحدي ما تصحوا منو مع اول مباراة رسمية.
السنة دي ولا تحلموا بالمركز الرابع.
في تطورات ح تحصل .. بس انتوا حاولوا اتقبلوا الموضوع دا عادي.
خلوا الجرسة.
***
في القاهرة يسير اعداد الهلال علي ما يرام.
انضباط وجدية وكل مشغول بعمله.
ودا المطلوب.
ما عايزين غير كدا.
ديل الاسباب الرئيسية لتحقيق النجاحات في الموسم الجديد.
اليوم سيكتمل عقد اللاعبين بوصول كاريكا وماكسيم.
يجب ان تخضع البعثة الثنائي لعقاب صارم.
موعد انطلاق الاعداد تم تحديده مبكرا.
فرض الانضباط يا أهلة سيقودنا للنجاح في الموسم الجديد.
خاصة علي مستوي البطولة الافريقية.
التي نستهدف لقبها بكل صراحة .. تاني مشاركة في الافريقي من اجل المشاركة فقط ما عايزين.
يجب ان يعلم الجميع ان النتائج في المباريات الودية ما مهمة.
ما نبقي زي ناس الوصيف.
المهم ان يتعرف الفرنسي لافاني علي جاهزية لاعبيه.
وبالتأكيد سيعمل علي التعرف علي امكانياتهم الفنية خلال المباريات.
وهو بدوره سيعمل علي تطبيق خططه الفنية.
يجب الاستفادة من المباريات الودية من كافة النواحي
. ***
تيتيه مكسب حقيقي.
علي الخصوم التدرب فقط لايقاف خطورة هذا اللاعب.
نحن الهلال بنريدو جد.
الهلال مفخرة داخل وخارج الجوهرة.
(صمت اخير) ..
فرح الغلابة

امسح للحصول على الرابط
بواسطة : بلل
 2  0
التعليقات ( 2 )
الترتيب بـ
الأحدث
الأقدم
الملائم
  • #1
    محمدالفاتح عمرعثمان 12-08-2016 04:0
    من أسمك وكتاباتك عربي جزيرة أبو هدومن مقطعة
  • #2
    سامي 12-08-2016 03:0
    صحح معلوماتك ، الفريق دا ما في أي درجة من الدرجات، وكمان ولا حتى من ضمن أندية الهواة.
أكثر

للمشاركة والمتابعة

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019