• ×
الجمعة 29 مارس 2024 | 03-28-2024
بابكر سلك

عربية الجمعية

بابكر سلك

 8  0  2759
بابكر سلك
في الفاضلاب عندهم عربية ملك الجميع
* تمثل مظهراً من مظاهر التكافل والعون الذاتى
* ولأن ملكيتها تتبع للجمعية المنشأة لمثل هكذا أغراض
* سموها عربية الجمعيه
* ولأننا لا نهتم بالملكية الشائعه
* نتعامل معها بجلداً ما جلدك جر فيهو الشوك
* ولجر الشوك أصاب الإهمال عربية الجمعية
* فتدهورت شأنها شأن الوطن الذى نمتلكه على الشيوع
* او قل الوطن الذى يفترض فيه ان تكون ملكية شائعه بيننا جميعاً
* أصاب عربية الجمعيه الإهمال برغم أسباب إنشاء الجمعية الإنسانية الراقية
* العربية بقت كركعوبة لكن ماشه
* سبب منطقى بخليها ماشه مافى
* زى حياتنا دى
* وأهو عايشين
* المهم فى المناسبات المحتاجة مشوار لا تتخلف عربية الجمعية بالفاضلاب عن دورها الإجتماعى والإنسانى
* تقل الناس وتتوجه بهم صوب الهدف الإجتماعى الكبير أو الدينى
* فى فاضلاب كده مغندلين ومفلهمين بيمشوا بعرباتهم ذات الدفع الرباعى
* وواحدين بمشوا بى بكاسيهم
* ام البقية فلا مفر من ركوب عربية الجمعية
* يكونوا ماشين لى مناسبة دينية وزيارة الشيخ
* الجماعه يمشوا ويحتفلوا ويجوا راجعين على الفاضلاب
* فى نص الدرب تقابلهم عربية الجمعية يا دوبك ماشة وعلى ظهرها أرتال من البشر
* حيوا معى عربية جمعية الفاضلاب
* لكن عربية الجمعية دى بتذكرنى الهلال
* الناس دخلوا معسكر والأهلة لسه فى التسجيلات
* جينا راجعين قابلناهم فى نص الدرب يا دوبك ماشين
* وسواقهم قاعد خلف عجلة القيادة وتحت الكسكتة يا دوبك ماشين للشيخ وعلى ظهرها لمحنا روشا وصحبه مرصوصين صفوف وفطومة راكبة قدام والكترابة قايمة
* المهم
* الهلال سجل أوكراه
* وعندو شيبولا
* وأطهر الطاهر
* يعنى الموسم الجديد ده لاقدر الله لو قالوا ليك الهلال جاب قون من رأسية أعرف إنو العكسية كانت أرضية
* الأخوة الأهلة الشرفاء حتى فى أحلامهم التى هى جزء من ماضينا
* يشبهوا لى عربية الجمعية
* نحنا راجعين من منصات التتويج الأفريقية وهم فى عربية الجمعية يا دوبك ماشين على تلك المنصات والدنيا ضلمت وعربية الجمعيه الهلالية عدمانة النور
* حاتبيتو فى الخلا يا روشا
* ده درب طويل ووعر وصعب المشة فيهو ما بتقدر عليهو عربية جمعية
* أسألوا مجرب
* المهم
* تسجيلاتنا إنتهت
* إختصاصيين هم من ما قاموا بها
* فى حاجتين ما داخلات راسى
* سكت عليهم عشان ما أشوش على الغرفة
* أسى الأمر إنتهى ممكن أقول كلامى
* لماذا تم شطب عمر بخيت وهو أكثر محاورنا خبرةً بل أكثر لاعب نجومية المباريات من المريخ فى الدورى !!!!
* ومتى قدم راجى وماذا سيقدم كى نحتفظ له بخانة وهو سفير المريخ الدائم لدى جمهورية مصر العربية ؟؟؟
* أما النقطة الثانية فهى لماذا تم تسجيل أبوعشرين ؟؟؟
* هذا لأبوعشرين ولجت شباكه خمسطاشر هدف فى مباراتين فكيف يكون فنياً مفيداً !!!
* ولماذا تمت إعارته ؟؟؟
* طالما أعرناه يبقى ما بيلزمنا
* طيب مسجلنوا لييييييييييه ؟؟
* على كل بالنسبة للتسجيلات لانقول غير الكمال لله وحده
* أيها الناس
* إن تنصروا الله ينصركم
* أها
* نجى لى شمارات والى الهرتوم
* أكان شفت يا والينا
* واحد حكيم قال لينا
* كترت الحبون سكرى
.
سلك كهرباء
.
*ننساك كيف والكلب قال الحبن لو لبختوا بالحلبة بيفتح سريع ولو ما لبختوا بالحلبة بياخد زمن لكن برضو بفتح..من ناحية بفتح بفتح هى مسألة زمن بس؟!!!
والي لقاء
سلك .
امسح للحصول على الرابط
بواسطة : بابكر سلك
 8  0
التعليقات ( 8 )
الترتيب بـ
الأحدث
الأقدم
الملائم
  • #2
    سيف المدثر 11-23-2016 12:0
    افتكر من تسلية الفالصو دة يوحي الي انك اجهل من ضب يا ضب
  • #3
    الامين محمد نور 11-22-2016 05:0
    الخيل الاصيلة بتجي في اللفة يا زنطور . و الدرب الوعر دا نحن يا ترلات الوريناكم ليهو .بتتفاصح كمان . وانت راسك فاضي قرعوبة ما بتعرف تكتب الا تكسر تلج لسيد نعمتك الرئيس طوالي والاساءة للهلال .كان ممكن تتكلم عن فريق الشباب . لانها سانحة للخروج من النظرة الضيقة الوالية المريخية يا صحفي اخر زمن .
  • #4
    abdelhadinasr 11-22-2016 05:0
    كان شفت ياسلكوناانت فكت منك والهلال عملك هضربة ... الحكاية شنو ما كلها كورة وكورتنا دي ما كورة
  • #5
    أبو معز 11-22-2016 04:0
    أبوعشرين لسع عندوا صلاحية و باقي ليهو سته أقوان تدخل فيه ويتجاوز العشرين وىكون حارق يا عمك. موضوع أبوعشرين ما محير كون أن المبلغ الاتسجل بيهو يساوي كسر عشري من تسجيلات ورواتب الاجانب. الجانب الاكثر حيره الفيلم الهندي والجعجعه بتاعت تأخر الاجانب وبالذات جمال سالم. الراجل سلم العقاب وأكثر من الغياب وما أظن أن هنال لائحة عقوبات في المريخ أو السودان ككل بل لائحة الجودية وتدخل وتداخل الاختصات في العمل وانفاذ اللوائح ان وجدت ولا تحزن يا قلب في بلد يدار بعقلية القرون الوسطى.
  • #6
    ابو الهل 11-22-2016 04:0
    غاييتو ى سلك انت ومزمز ومعاكم تانى واحد طالب جديد فى الصحافة الرياضيه اسم هيثم كابو ماعندكم علاقة بالصحافية انا بفتكر تشوفو السمسره لانو بتجدو نفسكم فيها وهى زاته بتحتاج لى السنه طويله وضحك على الدقون فى الفاضى وخاصة السمسرة بانواعها كان عقارات ولاتجارة سيارات او سمسرة لعيبة فى كورة القدم
  • #7
    Hassan 11-22-2016 04:0
    يا سلك

    من ضحك أخيرًا ضحك كثيرًا

    البص بتاعنا البسكع دا زي ما إنت بتقول
    حيجي ماري بي بصكم المقلوب حيث النحيب والعويل
أكثر

للمشاركة والمتابعة

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019