• ×
الإثنين 2 أغسطس 2021 | 08-01-2021
بابكر سلك

جمال لما قال مليار

بابكر سلك

 11  0  2646
بابكر سلك
فطومة تصر علي ان جمال فلس
* ولكن مع هذه المكابرة لا اظنها تنكر ان جمال لما قال مليار في ناس كده كانوا بشحتوا حق المواصلات علي طرقات الامارات
* ولما عرف المليار في ناس كانوا قايلين مليار ده اسم دواء
* ولما دفع المليار كان الدولار بمية جنيه
* شوفي يا فطومه المليار الوكت داك فيهو كم دولار
* مازي مليار الليله البجيب الف وتلتمية دولار ده
* مليار زماااان
* النوع التقيل داك
* يبقي يافطومه يا اختي مكنة فلس دي مابتقسم شوفي غيرها
* يعني مثلا قولي جمال تاجر سلاح
* او عندو مصنع موية صحه مثلا
* او باع كنيسه ولا حائط مبكي بتاع يهود
* قولي اساسا بدأ شغلو بالكباري في بكاسي الحركة الشعبية
* قولي حاجه من الحاجات دي الناس يمكن يصدقوها
* لانو في ناس كتااار عملوها
* وفي ناس كتااار بعملوها
* عشان كده الناس ممكن يصدقوها
* لكن لما تقولي جمال فلس
* الفلس زاتو بضحك يافطومه
* المهم
* تسجيلاتنا تسير علي قدم وساق وكاش مقلل النقاش وعدم فلس
* والكمال لله
* قصة التقارير الاتلخبطت دي ما بتشبه العلمية المتبعه في التسجيلات
* وان صح الخبر فاني اعيد السبب للذين يتابعون اعضاء اللجنه بفضول ودون صفه فيذهبون للاعبين المراد استقبالهم و يشكلون حضورا بالمطار عند وصول محترف وبالتالي يخمشون التقارير فتتلخبط
* لاصفة لهم سوي انهم علي علاقة باحد اعضاء اللجنة
* السماح لمثل هذه النوعيه يصبغ علي العمل لون الهرجلة وعدم الجدية والسريه
* فاذا كان المستر علاء لم يفصح بنتيجة الفحص الطبي لاحد
* كيف خرجت النتيجة للناس عبر الواتساب قبل حوالي يوم من اعلانها رسميا بواسطة المجلس !!!
* ده النوع القلتوا ليكم ده
* لكن جمال مافلس يا فطومة يا اختي و انتي عارفه كده
* جمال لما يفلس بباري ليهو سته مليار (كم الف دولار ) من هنا للابيض فرحان بيها
* جمال برسل السته مليون دولار براها ومابخاف تروح في الدرب
* اسي لو زول قال لي تعال الابيض بديك سته مليار يا سلك * تفتكري المبلغ فيهو اغراء لدرجة امشي للابيض عشان ستة مليار ????
*قلت لي مليار يا فطومه !!!
* مليار اليومين دي !!!
* ننساك كيف والدولار بلغ سن الرشد طمنطاشر سنه يافطومه
* ايها الناس
* اول امس احتفل ثوار المدرجات وشفوتها باطفاء الشمعه الاولي بدار النادي
* شفاتة معروفين
* اولاد اولمبيوس المبدعين
* فأبدعوا حتي في احتفالهم
* واكثر ما اعجبني انهم يجمعون بين فئات سنية مختلفه الكثير
* ولما شاهدت الصبية الذين لا تتجاوز اعمارهم السابعه
* ايقنت ان المريخ محمي مستقبلا
* وازدت اطمئنان علي مستقبل المريخ
* مريخ ام درمان زعيم كل السودان
* عقبال الشمعه المليون
* المهم
* الرائع الطيب علي فرح كتب بعقلانية عاليه موضوع اعجبني
* وهو موضوع الاساءات المتبادله بين الناديين الكبيرين
* الكلام ده ما بجوز
* ولكنه فشل في اختيار نموذج لتلك الاساءه من اعلام المريخ
* واختار لفظ،زنطور
* ياعزيزي الطيب زنطور ليست اساءه
*فهي كلمة تونسيه تطلق علي الفريق الذي يفشل في تحقيق بطولة قارية
* يعني زي محلي عندنا
* فهي وصف وليست اساءه
* ويستطيع الفريق الذي توجه له تلك العبارة ان يوأدها في افواه ناطقيها بمجرد حصولة علي بطولة قارية تمحو انجازه الصفري في هذا المنحي
* اذن هي ليست اساءه ولكنها وصف لحاله
* وقد يحرض ذلك اللفظ الاخوه الاهله الشرفاء علي نيل بطولة قارية بعد تمنية وتمنين سنة اخري من العمل المتواصل الجاد
* بس بعد اعترافهم بانجازات من سبقوهم حتي ينالوا البر
* ولكني اشد علي يدك اخي الطيب وعلي موضوعية طرحك
* ايها الناس
* ان تنصروا الله ينصركم
* اها
* نجي لي شمارات والي الخرتوم
* تحسين بيئة العمل في المستشفيات شئ جميل وبرضينا
* ويكون افضل لو بقي معاهو تحسين طريقة التعامل معانا ومافي زول يشخت فينا
* تعال يازول
* داخل لي شنو
* قوم فوق
* اقعد تحت
* اطلع بره
* ولو مرة في المسنشفي رحبوا بينا
سلك كهربا
ننساك كيف والكلب قال هو مستشفي ممنوع الدخول لي شنو ???
والي لقاء
سلك
امسح للحصول على الرابط
بواسطة : بابكر سلك
 11  0
التعليقات ( 11 )
الترتيب بـ
الأحدث
الأقدم
الملائم
  • #2
    ود الشرق ود دوكة شرق 11-16-2016 08:0
    الفلس حاصل وانتو تنفخو في الوالي لمن يبيع القدامو والورا وتضيعو اولادو معاكم والله انا كان في محل اولادو احجر عليه لتبزير المال في السفه هي الكورة وين
  • #3
    ابو خالد 11-16-2016 08:0
    انت خليك مصاقر الوالي عشان ملياراته يمكن تطلع ليك بي بيت بتاع طين في مرابيع الشريف ... كسر تلج زي ما تحب برضو زولك بقى على الحديدة ...
  • #4
    ود الشرق ود دوكة شرق 11-16-2016 08:0
    الفلس حاصل وانتو تنفخو في الوالي لمن يبيع القدامو والورا وتضيعو اولادو معاكم والله انا كان في محل اولادو احجر عليه لتبزير المال في السفه هي الكورة وين
  • #5
    بابكر محجوب محمد احمد 11-16-2016 08:0
    اتقي الله جمال في الاول كان ينوم في مطار الخرطوم حتى يصل صلاح ادريس ويحمل منه الشنطة ويفتح لية باب العربية جمال الوالى دة ولد المؤتمر الوطني يعني لايعرف القروش وماشافها الى في زمن هذا النظام نعم فلس لكن الان هو من الذين سرقوا مال الوطن وربن كبير وفي زمن الحساب امش اسال عن بنك الثروة الحيوانية لتدافع عن من نهب مال الشعب
  • #6
    اللدر 11-16-2016 07:0
    الزول ده القال ليهو إنت صحفي منو ؟

    قول جمال الوالي عنده مليارات الدنيا دي كلها ، ماذا أفاد بها غير إنه زاد من أطماع عاطلي الموهبة من أشباه اللاعبين من الدول الافريقية المجاورة والفقيرة والتى نتفوق عليها فى كل شي حتي كرة القدم نفسها لو وجدت الإداريين الجيدين ، لا إداريين من شاكلة الوالي وكردنة وإدريس وغيرهم من الذين لم يمارسوا كرة القدم فى حياتهم وساقتهم الأقدار بمايمكلكون من مال لإدارة أكبر صروح الرياضة فى السودان (الهلال والمريخ)
  • #7
    أبو السارة 11-16-2016 06:0
    والله صحيح الإختشوا ماتو،، قروش جمال ضاربه هو والدقير من البنك وقصة المخازن المرهونة ولما جات ساعة السداد لقوها مسجلة بأسم الوالي والدقير شرد لأثيوبيا يعني تزوير ومال حرام ، القصة دي راعي الضان عنده بيها خبر يا أحمد بدير. بعدين شابكننا الوالي بدفع ، الوالي دا لمن ترك المريخ لجنة التسير مشت ديوان الزكاة عشان تسدد الدين.
  • #8
    الامين محمد نور 11-15-2016 11:0
    انت وفاطمة ما بتختشوا . شنو يعني الوالي فلس و شنو يعني الكاردينال ثري .اخجلوا . انتما لا تستحقان الاحترام . م..مستوى في الحضيض .خواء .ملق .تضحكوا على الجماهير .ياخي استحي ( جمال لما قال مليار ...). بتفتخر كمان .دا شي مقذذ . طيب لو جمال فلس عيب يعني .ضيعنا وقتنا في كتابتك الفارغة .
  • #9
    ayman 11-15-2016 11:0
    سلك فطومة دي كرهتا العافية حرام عليك بعدين هي دخلت الصحافة الرياضية للشقوتا
  • #10
    Mustafa Ali 11-15-2016 09:0
    لما يجى يوم الدفع بتعرف العندو الكاش والعدمان الكاش لما تدور عجلة الدورى التمرد بيبدأ بعد داك
    مابينفع السكليب ولا التحانيس طريق الاتجاه واحد !!!
  • #11
    جون سينا 11-15-2016 06:0
    زول عوير وعجوز وماعندك موضوع - جمال قال إنت مالك ماتقول سلوكة قال مالك ماراجل زول عجوز يا حاج تنقو - أكبر من جمال زاتو- بطل الهبالة وإحترم نفسك - أعقل ولو إن شاء الله ليوم واحد يا جدو- يازنطور.
أكثر

للمشاركة والمتابعة

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019