• ×
الأحد 28 فبراير 2021 | 02-27-2021
محمد الطيب الامين

شاب وشارب لبن أمو !!

محمد الطيب الامين

 0  0  7063
محمد الطيب الامين
الضحك في بيت البكا غير مقبول مهما كانت مبررات الإبتسامة ..
* والبكا في بيت الضحك مقبول بغض النظر عن أسباب الدميعات ..
* وفي المريخ الآن هنالك (ضحكات مُجللة) رغم أن الدار (دار بكا) ..
* يضحكون في بيت البكا ويظنون أن باسكال وعاشور وعلاء الدين يوسف سيشكلون ملامح المريخ الجديد ..
* مريخ (2017) أصغر زول فيهو هو أكبر زول ..
* مريخ الموسم الجديد ناقصو عمار مرق والضو قدم الخير ..
* حاجة تكسف ..
* يتجاهل الهلال أمر تجديد عقد أطهر الطاهر بشكل يدعو للدهشة علما بأن عقد أطهر سينتهي بعد نصف عام ..
* لا أعرف لماذا يتجاهل الهلال ملف هذا اللاعب ؟؟
* الهلال وفق أوضاع نجوم الرديف والشباب وحتى الناشئين فكيف له أن يتجاهل أمر لاعب من نجوم الصف الأولى ؟؟
* الني للنار يا كاردينال ..
* درج (الملحن) صلاح أدريس على تقديم هدية للمريخ في كل فترة من فترات التسجيلات ..
* وهدايا (الملحن) لـ(عزو) في العادة بتكون (عينية) في شكل (باسيرو ومحمد سيلا ومالك) ..
* ورغم أن مجالس المدينة تتحدث عن دعم (الملحن) للمريخ ماليا هذا العام إلا أن قلوبنا تحدثنا بأن صلاح سيُهدي جمال لاعبا من أهلي شندي في آخر أيام التسجيلات ..
* على جماهير الهلال أن لا تستغرب إذا شاهدة (والى الدين بوغبا) أو (خطاب) أو أى واحد من نجوم الأهلى شندي بصحبة رمرم في الأيام الأخيرة من التسجيلات داخل مكاتب الإتحاد العام ..
* صلاح أدريس سيُهدي جمال الوالى لاعبا من أهلى شندي وسيُهدي أغنية لحسين الصادق .. علما بأن حسين الصادق لحدى الآن ما عارف إنو صلاح أدريس عايز يهدي له أغنية ..
* وغايتو جنس غايتو ؟؟
* لا يستطيع أحد أن يمنع جماهير الهلال من (القلق) بعد تأخر حسم ملف الأجانب ..
* من حق الجماهير أن تشعر بالقلق رغم أن فترة التسجيلات لم يمضي منها حتى الأن سوى (نصف الزمن) ..
* اليوم ينتهى النصف الأول من التسجيلات ويبقى النصف الثاني ..
* وبالأمس عاد الكاردينال (خفيفا) لا معه ساماتا ولا معه الأخطر من ساماتا ..
* ولا حتى معه المدرب ..
* قد يكون هذا تكتيك من الكاردينال ولكن الخوف كل الخوف أن يكون هنالك فشل قادم ..
* التسجيلات زمنها معروف ومعلوم ولكن الكاردينال أدخل نفسه والهلال في (حتة ضيقة) وإنتظر بداية التسجيلات ثم بدأ يفكر في الأجانب ..
* وأخشى والله أن يقبل رئيس الهلال بالخيارات الضعيفة بعد أن أصبح الزمن يتسرب من بين يديه ..
* ننتظر حتى نهاية التسجيلات ومن بعد ذلك (الحساب ولد) ..
* الحساب ح يكون بالثانية .. وفي رواية أخرى الحساب بقى بالكسكتة ..
* كونو مصعب عمر داير من المريخ (500) مليون ، هذا لا يعتبر خبرا ..
* ولكن الخبر هو : بكم سجل المريخ مصعب حتى يكون المتبقي له (500) مليون ؟؟
* الزول ده سجلتو بأتنين مليار ولا شنو ؟؟
* مصعب عمر يلعب السنوات دي كلها ولسه باقي ليهو (500) مليون ..
* حاجة غريبة والله ..
* ورد في صحف الأمس أن السفاح البرازيلي يقترب من الهلال ..
* والسفاح ده يا الكاردينال من حيث العمر فهو قدر سادومبا ..
* عشان كده لو عندك محترف شاب جيبو لينا ما عندك بلاش تجارب فجمهور الهلال يحتمل الإحباط من الآن وصاعدا ..
* لا سفاح ولا ديناصور .. عايزين شاب شارب لبن أمو ..
* سجل المريخ اللاعب المصري عاشور بجنسية (الحريات الأربعة) على طريقة الحضري ..
* المريخ فعل ذلك وهو غير واثق من سلامة (الإجراء) ، بمعنى أنه إذا تم رفض (الحريات الأربعة) سيكون عاشور محترفا وإذا سمحت السلطات بذلك سيتعاقد المريخ مع محترف جديد ويبقي عاشور مجنسا بالحريات الأربعة ..
* طيب يا عماد الطيب الحريات الأربعة دي إحنا ما بنعرف ليها ولا إحنا ما سودانيين ؟؟
* الهلال يجب أن يستفيد من هذه الحريات إذا كانت موجودة ..
* نجيب مصري ونسجلو في الرديف (حريات أربعة) ..
* ونجيب واحد تاني ونسجلو في الفريق الأول (حريات أربعة) ..
* ما فيش حد أحسن من حد ..
* عماد الطيب بدل يقعد يتلفت السنة كلها من الأفضل أن يستفسر عن الطريقة التى سجل بها المريخ عاشور ..
* لو سجلوهو كمحترف ما عندنا مانع لكن كمان لو سجلوهو بواسطة الحريات الأربعة يبقي كلنا نستفيد من الحنك ده ..
* كل أندية الممتاز يجب أن تتحرك وتتحرى من موضوع الحريات الأربعة هذا ..
* في كل الأحوال يجب أن يكون الهلال جاهزا .. اما تجنيس واما حريات أربعة لأن المريخ حاليا أكمل العدد المسموح به من الأجانب ولسه بيفاوض ..
* كونو المريخ لسه بيفاوض في الأجانب ده بيعني إنو المريخ بإعتباره نادي حكومي ربما يكون قد وجد ضمانات للجنسية أو الحريات الأربعة ..
* وعلى الهلال أن ينتبه ويجهز الخيارات ..
* بالمناسبة .. قالوا عاشور قبض (350) ألف دولار ..
* يعني ما يعادل أكثر من (5) مليار بالسوداني ..
* علما بأن عاشور أصغر من مزمل أبوالقاسم بسنتين وسبعة شهور ..
* أصغر من مزمل وأكبر من كابو ..
* بالضبط بيكون قدر بابكر سلك ..
* وده كلو من جابسون ..
* نحمدالله إنو جابسون سجلناهو بـ(الحريات الخمسة) ، وأبراهومة سجلناهو بـ(الحريات التلاتة) ، أما نجم شبية القيروان السابق شرف شيبوب فسجلناهو (رجااااااااااااله وحمرة عين) ..
* نستغل هذه الفرصة ونكرر تهانينا للأخ شيبوب لاعب شبيبة القيروان السابق بمناسبة عودته لأرض الوطن سالما بعد أن أجرى عملية ناجحة على يد أكبر أخصائي في الوطن العربي ..
* حمدلله على السلامة يا قائد فريق الملكية جوبا الأسبق ..
* ونتمنى أن يبدأ شيبوب تمارين (السباحة) قبل نزول (البرد) خوفا على صحته ..
* حقو تبدأ تمارين السباحة يا شيبوب في الفترة النهارية لانو البرد بدأ ينزل ..
* أقول ليك حاجة يا شيبوب .. بلاش تمارين سباحة نوم ساكت ..
* عندي أقتراح ..
* بقترح إنو شيبوب يعمل مؤتمر صحفي يورينا لما (نطه من الطابق الرابع وقع في التراب ولا كان في سراميك) ..
* هكذا أقترح ..
* وأى زول طبعا حر في (إقتراحاتو) ..
* لازم نعرف لانو الحاجات دي مهمة على الأقل عشان الأجيال القادمة تعرف ..
* ونركب صافنات ونجيبة (حمرية) وأصلو الزول بيموت والذكرى تفضل حية ..
* و..و..
* ومن حور الجنان أم انت من .(مريخاب الجنوب) ؟؟
امسح للحصول على الرابط
بواسطة : محمد الطيب الامين
 0  0
التعليقات ( 0 )
أكثر

للمشاركة والمتابعة

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019