• ×
الخميس 28 مارس 2024 | 03-27-2024
بابكر سلك

الحمل بقي رباع

بابكر سلك

 13  0  3403
بابكر سلك
اضحك كثيرا عند ما يتحدث ترامب
* ده دوليا
* ومحليا لدينا ترامبات كتااار
* كلهم بضحكوني
* سياسيا لدينا بحمد الله ترامبات
* ثقافيا لدينا ترامبات
* وكذلك رياضيا ترامباتنا كثر
* ولان علة البلد دي هي جلوس الرجل الغير مناسب علي المناصب
* فان المصائب تجر علينا ترامبات في العديد من المجالات
* المهم
* الوعود الخنفشارية التي يتباهي بها بعضنا وتدفعهم الهاشمية والشوفونية لاطلاقها
* عندما لا تتحقق يكون من اطلقها قد نساها فيطلق غيرها
* مابسميها كذب ولكني اسميها هوشه
* واذكر من الهوشات المرينا بيها الكثير سواء كانت هوشات سياسية (وهي كثيرة ) او رياضية
* لن اتناول السياسية لانو اي زول عارفها ومتذكرها (زي جوع بطنو )
* ولكن تحضرني هوشات رياضية
* ولن اتناول امر المدينة الرياضية لانها هوشه مختلطه تجمع بين الهوشات السياسيه وتلك الرياضية
* ولكن اتناول هوشة رياضية واحده تجعلني اضحك كلما تذكرتها
* ايام الارباب
* شطب الهلال قودوين او قل رفض قودوين التجديد او الاستمرار مع الهلال
* وقتها كان قودوين ملهم الجماهير الهلاليه
* فخرج علينا كردنه (بدون كسكته )
* وقال انه اتفق مع قودوين ودفع وقودوين جاي بكره
* جموع الاهله توجهت صوب المطار لاستقبال قودوين
* واحدين ساقوا الخرفان عشان يضبحوها فرحة وكرامه وقربانا
* احد الاهله الشرفاء ظروفو صعبه
* قام شال ليهو حميل ومشي بيهو المطار
* الحمل يا دوبك قرش
* وخرج نبأ تأخر قودوين لي بكره
* قالوا بدل نرجع نبيت في مطارنا ده ونستني قودوين لي بكره
* و بكرة جات وقودوين ما جا
* وبعد بكره
* وبعدو وقودوين ما جا
* صاحبنا بتاع الحمل حاضن حملو وراجي قودوين
* الحمل بقي جدع (اكمل سنه ) وقودوين ما جا
* بقي تني (اكمل سنتين ) وقودوين ما جا
* قودوين مشي الاسماعيلي والاهله في المطار
* الحمل بقي رباع (اكمل اربعه سنين ) وقودوين ما جا
* صاحبنا سيد الحمل فكاهو في المطار قبلو وقال ليهو بعد ده لوري فحم ما بنجضك
* وكت جبتك بي زناد تنجض
* كان حمرت ليك تنجض
* اسي حادث حركة ما بكتلك
* وعاد الاهله ادراجهم وحملهم رباعا ليهو قرون وقودوين ما جا
* ده مثل للهوشات الرياضية
* وطبعا اكبر هوشة رياضية عمرها تمنية وتمنين سنه ولسه بتتجدد
* السنة دي حانجيب الاميرة السمراء
* وتظل احلامكم يا روشا جزء من ماضينا
* ايها الناس
* المبلغ الذكرو كردنه في الجمعية العمومية يشمل المبالغ الاتشالت من المستأجرين بتاعين الدكاكين الشرقية بعد قرار وزير العدل بان المباني ليست من المباني العامه التي استثناها القانون ولا المبالغ دي بره القانون اقصد بره الحساب !!!!!
* وياتو قانون اعطي كردنه حق الغاء العقودات الساريه و استبدالها باخري جديده كمان فيها دعم ????
* وهل مارس المستأجرون للدكاكين الشرقية الصمت (الما نبيل ) ام لديهم صرخة يحتفظون بها لاطلاقها داوية في ساعة الصفر ?????
* وتاني ????????
* المهم
* تسجيلاتنا عاجباني شديد
* وختامها ممكن يبقي مسك بالتجديد لجمال سالم
* ولا ننادي بان يصبح الفريق خارقا من اول مباراه
* فالقادمون كثر
* والانسجام يحتاج لزمن
* والصبر شيمة الانبياء
* والبناء يبدأ بطوبه
* ومقدرة اللاعب علي التأقلم تختلف من لاعب للاعب
* ووقفة الجماهير هي التي تساعد علي بناء فريق قوي
* وادارة ملفات اللاعبين تحتاج لجدية ومرونه
* واعادة الروح المفقوده ضروره
* وروح المدرجات في عودة المعلم
* وغرزه يعشق المدرجات
* فهل قدمتم للمدرجات اغلي هدية ياجيمي واعدتم غرزه !!!
* المهم
* هلالابي رائع قابلتو في السوق
* قال لي السنة دي خميتوا التسجيلات خم
* قلت ليهو قالوا جايبين ليكم محترفين من العيار التقيل
* في اللحظه دي جا واحد فاطي سطر وبضحك براهو
* مربي شعرو ومضفرو بوب
* قال لي الخوف يلبسوا لينا ده كسكته و يقولوا لينا ده القنبلة الوعدناكم بيها
* المجنون ضحك وقال
* البس الكسكته ?? مالي جنيت !!
* ايها الناس
* ان تنصروا الله ينصركم
* اها
* نجي لي شمارات والي الخرتوم
* والينا
* عليكم الله في اجهزة الاعلام كلها تشغلوا لينا
* قمحنا كتير مكفينا ومادايرين دقيق فينا
* اما حكاية ناكل مما نزرع دي يا والينا
* حققناها لاننا قررنا نزرع في حيشان بيوتنا الرجله والخضرة والباميه والجرجير البكفينا
سلك كهربا
ننساك كيف و الكلب قال بعد زرعتوا خضاركم في بيوتكم ماتنسوا دمعة الكديس احلي وجبة لاحلي ناس والغريبه الملوخيه بالجقور
والي لقاء
سلك
امسح للحصول على الرابط
بواسطة : بابكر سلك
 13  0
التعليقات ( 13 )
الترتيب بـ
الأحدث
الأقدم
الملائم
  • #1
    محمد الحسن 11-13-2016 12:0
    اخي بابكر سلك
    السلام عليكم
    انا هلالابي ميلون في المية ولكني معجب بعمودك طبعا بعد قراية عامود محمد عبد الماجد والشوربجي وبقية الاهلة.ايها الناس مريخكم السنة دي طلع من المولد بدون حمص ودا حال الكورة ولكن بعد الكوامر والاسكانيات التي تم التعاقد معها الله يستر من السنتر لليق.وانشاء اللة السلك يكون من كوابل الشرق علشان ما ينقطع في بداية دوري الابطال وما تنسي تطعم الكلب من داء السعر. متعك الله بالصحة والعافية ولا حرمنا من ابداعتك ودمتم فب حفظ المولي
    اخوك محمد الحسن كوبر (ما المصحة ولا السجن)
  • #2
    سامي 11-13-2016 08:0
    عمك سلكوني يهذي من زمن ضربة الدوري وضربة الكأس وتقوولوا سجلتو واوا ومعطوبي افريقيا رخيصي التمن وكلتشي المن زمن النجمة ام ضنب ههههه الفلس راجلا كلس وناس جابسون واوكرا حنمهد ليهم يمشوا الفيفا يشيلوا حقهم بالقانون
  • #3
    ابو احمد 11-13-2016 12:0
    غايته يا سلك عملت للجماعة وجع فشفاش
    الله ينصر دينك
    حسين عزالدين
  • #4
    Mustafa Ali 11-12-2016 11:0
    كردنم ياكردنة الناس ديل اتارى انت هاريهم
    ومامخلى ليهم جمبة يرقدوا عليها سمحة المقدرة .
  • #5
    عاشق الهﻻل 11-12-2016 09:0
    بكرة الموسم ببده وتسجيلاتكم بتظهر ياخي كفاية ضحك وتضليل لي الجماهير الغلبانة ﻻ كاس ﻻ دوري يامجلس اﻻدارة انشر تعليقي ده كلويوم نعلق مابتنشرو لي شنو ننساك كيف وجمال الوالي لوقال ماشي كلكم بتسكلبو وتلبسو طرح زي نسوانكم
  • #6
    عاشق الهﻻل 11-12-2016 09:0
    بكرة الموسم ببده وتسجيلاتكم بتظهر ياخي كفاية طحك وتضليل لي الجماهير الغلبانة ﻻ كاس ﻻ دوري يامجلس اﻻدارة انشر تعليقي ده كلويوم نعلق مابتنشرو لي شنو ننساك كيف وجمال الوالي لوقال ماشي كلكم بتسكلبو وتلبسو طرح زي نسوانكم
  • #7
    Zaza 11-12-2016 06:0
    إنت عارف قروشكم السجلتو بيها الخمسة عشر لاعب في الموسم الحالي كردنه بيدفعها لمستشفى فى أحد وليات السودان وكل الناس.عارفه قروش المريخ جايه من رفع الدعم يعنى من جلد المواطن الغلبان
  • #8
    ودعقيده خلف 11-12-2016 04:0
    هههههههخهخخخاخههه والله يا عمك من الضحك ماقادر اكتب زاتو انصر دينك والله ههههههههخههخخخههخخههها
  • #9
    ودعقيده خلف 11-12-2016 04:0
    استاذي الفاضل لك التحيه دوما ومشتاقين والله وكثر الله من امثالك وحفظك الله من عين الصفراب بس اضحكتني احد الاهله الشرفاء ظروفو صعبه قام شال ليهو حميل مشي بيهو المطار بس لايكون الحميل اكرت
  • #10
    ودعقيده خلف 11-12-2016 04:0
    استاذي الفاضل لك التحيه دوما ومشتاقين والله وكثر الله من امثالك وحفظك الله من عين الصفراب بس اضحكتني احد الاهله الشرفاء ظروفو صعبه قام شال ليهو حميل مشي بيهو المطار
  • #11
    بهاء الدين سعدالله محمد 11-12-2016 03:0
    مافى ترامب فى الصحافة السودانية غيرك!!!
    وترامب ذاتها كتيرة عليك؟؟؟؟؟
  • #12
    الرهيب 11-12-2016 03:0
    هههههههه بعد ده لورى فحم مابنجضك الله يجازى محنك ياسلك ههههه
  • #13
    الامين محمد نور 11-12-2016 02:0
    و نسيت هوشة مرشدك حيث قال متفقين مع لاعب هلالي غير محمد عبد الرحمن . وواحد عايز الشهرة اظن اسمو الفادني قال ح يرد صاع شيبوب بلاعب من الهلال . وقال نحن متفقين مع اللاعب و حيتم تسجيله في اول يوم في التسجيلات . و بمناسبة ترمب انت ترمب الصحافة الرياضية .
أكثر

للمشاركة والمتابعة

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019