• ×
الأربعاء 21 أبريل 2021 | 04-20-2021
بابكر سلك

ترمب حايبني الجوهرة الامريكيه

بابكر سلك

 3  0  2570
بابكر سلك
* فاز ترمب
* الامريكان ديل خلي بالك منقولاب
* اي زول يتكلم دراب ويلبس كسكته بفوز عندهم
* ترمب وعد الامريكان بالقضاء علي الروس الحمر
* وقال ليهم بقطع ليكم علم الصين الاحمر ابو نجمه صفراء
* ووعدهم بالقضاء علي ( المجنسين ) واتاحة الفرصة للشباب الامريكي (الحر ) للعيش بالطول والعرض
* وعدهم بالاميرة الماسمراء
* قال حايعمل امريكا جوهرة
* ونسي ترمب ان كل الامريكان ما اصليين
* مزورين وما اولاد قلبا
* لانو امريكا اولاد قلبا هم الهنود الحمر اسياد الجلد والراس
* والكاوبويات اهل ترمب بلطجه ساي استلموا امريكا
* المهم
* يظهر انها ايام الترمباب
* وترمب هو الرئيس الخمسه واربعين
* فهل نتوقع تصريحا من المنسقه بتاعت البيت الابيض تقول فيه ان الاربعه واربعين رئيس السبقوا ترمب منقوليين ???
* وهل اذا صرحت مثل هكذا تصريح ما بتحرج تمبرلي ده ???
* المهم
* حدثتنا فطومه اختي عن اخلاق الهلال
* ومدحت مهند الطاهر الذي يزور نادي الهلال ويسلم علي العمال
* وقالت مهند الانشطب لانو ماشي اوروبا
* نكرت استغناء الهلال عن مهند
* وارجعت السبب لرغبة مهند
* المهم مدحت اخلاق الهلال التي يتحلي بها مهند الطاهر
* بس ما ورتنا الفرق بين مهند الطاهر ده ومهند الطاهر الذي رفض التجديد للهلال فنال من الشتائم والتبخيس ما نال
* ياهو مهند الطاهر زاتو ولا ده مهند طاهر تاني !!!!
* غايتو الترمباب سياسة كان رادوهو سموهو سعيد دي مابخلوها
* استعجلي يافطومه يا اختي افتتاح معهد فاطمه
* العام الدراسي انتصف وعندكم منقولاب حسب كلامك
* المهم
* تمضي لجنة تسجيلاتنا بقوة وثبات
* وكانت تكون ضربة التسجيلات وقمة نجاحاتها في التجديد لجمال سالم منذ الآن
* عشان نقفل ابواب كتيره
* ونتجنب صدامات نحن في غني عنها
* بالذات وغسيل العمله بقي اكتر من غسيل الضمائر
* وده سبب غسيل الكلي الانتشر فينا
* وثمة سؤال يطرح نفسو
* اذا كانت اعارة ابي عشرين ضروره ماهي ضرورة التسجيل من الاول ???
* مافي عمل كامل
* الكمال لله
* نعتبرها هنه لا تنقص المجهود الذي بذلته اللجنه
* وكم كنت امني النفس بسماع خبر مساهمات ركاب بص الوالي في تكلفة التسجيلات
* فالواقع يقول انو اب احمد تحمل كعادته جميع النفقات
* حتي في التسجيلات
* الكمساري يطقطق
* يقولوا ليهو قدام
* لكني اجدد امنيتي
* جددوا لجمال سالم منذ الآن
* افريقيا مليااانه اموال غسيل
* وافضل مكان تنغسل فيهو العمله وتتظهر هو المجال الرياضي
* و عشان جمال سالم مايتغسل غسيل وسخان
* نجدد ليهو من اسي يامان
* المهم
* تبدو اخلاق الهلال ظاهره يافطومه في شطب هيثم مصطفي بتلك الطريقة و اطلاق لقب سيبا عليه بعد سبعطاشر سنه كان يمثل فيها للهلال سورة الفاتحه في الصلاة
* وتأكدت اخلاق الهلال في الاستغناء عن وردة وبخيت والمعز بتلك البجاحه
* وكانت اخلاق الهلال بائنه عن طلاق كابتن الفريق الحالي مساوي بتلك الطريقة
* و الوعد بالتكريم
* يا مساوي
* لو في تكريم كان اتكرم االدحيش ومجدي مرجان والضب وكرار ابو علي البداها من البراعم ومهند الطاهر الذي يتمتع باخلاق الهلال
* المكنة ماتقسم فيك يا كابتن
* فغيرك يقف علي خط التماس ينتظر الشطب
* ما شفت بشه القالوا عجوز لما جاب القون في النسور مشي علي خط التماس كيف ???
* ايها الناس
* ضحكت لما اتفنقلت لما سمعت انو في منقولاب هتفوا يوم تكريم كردنه وقالوا
* الكاردينال الكاردينال رئيس طوالي
* ايها الناس
* التجديد لسالم قبل الغسيل يبدأ
* ومايعجبني هذه الايام
* ناس النفيات شغالين صاح
* ماخلوا لستك في الشارع
* عقبال باقي الاكياس والوسخ
* ايها الناس
* ان تنصروا الله ينصركم
* اها
* نجي لي شمارات والي الخرتوم
* كان شفت يا والينا
* قالوا الوزير قال لينا
* كان اتلاشيتوا لو ما 89 جينا
* واسي لو رجعناكم لي 89 بتمشوا المقابر يا اخينا
* افرز يا وزيرا لينا
* لو رجعتونا لي 89 بنمشي المطار يا اخينا
* شوف البمشوا المقابر وقول لينا
سلك كهربا
ننساك كيف والكلب مقتنع انو الموت حق والحياة باطلة هي وينها الحياه رددها ورقد في الطين وسط النفايات
والي لقاء
سلك
امسح للحصول على الرابط
بواسطة : بابكر سلك
 3  0
التعليقات ( 3 )
الترتيب بـ
الأحدث
الأقدم
الملائم
  • #1
    أسامه إبراهيم عبداللطيف 11-11-2016 10:0
    احلى حاجة عامل دمك خفيف ياعم التنقو رالجوهرة الكاتلاكم دى. ليهاحق تفوت بيكم وتهضرب بيكم
  • #2
    Zaza 11-10-2016 08:0
    ترااامب اليوديك سجن قونتانامو فى كوبا.امريكا لو بتسمع ليكم كان سيده العالم.اسال اى أمريكى قول ليه بتعرف سلك
  • #3
    ودعقيده خلف 11-10-2016 06:0
    استاذي الفاضل لك التحيه دوما شايفك الايام دي مبسوط 24قيراط انشالله دائما مبسوط يارب بس براحه لفطومه والصفرررااااب
أكثر

للمشاركة والمتابعة

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019