• ×
الثلاثاء 20 أبريل 2021 | 04-19-2021
محمد عثمان الجعلي

أبوستة وجابسون حلاتو بالكسكتة

محمد عثمان الجعلي

 9  0  3392
محمد عثمان الجعلي

الهلال رفع شعار أن هدفه أن ينال بطولة كأس أبطال أفريقيا 2017 ورفع هذا الشعار تفاؤل طيب لكنه يحتاج إلى خطوات عملية والتعامل بإحترافية وأول هذه الخطوات تتضمن إستقرار فني وإداري وسد ثغرات الفريق بالتسجيلات في الخانات المطلوبة بواسطة الخبراء وأهل الإختصاص بعيداً عن سماسرة الموسم ، جميل أن يعيد الهلال التعاقد مع المدرب القدير غارزيتو الذي يعرف الساحة الرياضية السودانية والأفريقية ويجب أن نوطن أنفسنا ونعلم أن غارزيتو بشر له إيجابيات وسلبيات وله ضحايا من اللعيبة مثله مثل أي مدرب ويجب الصبر على ذلك ، و للأسف الشديد لدينا إعلام رياضي يجعل نفسه في بعض الأحيان أفضل من المدرب لأنه ينتقد بعد نهاية المباراة وهذه مهمة سهلة لأن بعد كشف الإمتحان يمكن للطيش أن يكون أول السودان ، وهنا يأتي دور الإدارة الواعية التي ( تعطي العيش لخبازه ) ولا تهتم بردود الأفعال مهما كانت إنتقادات الصحافة وصيحات جمهور المدرجات ، ويحضرني في هذا المقام موقف رئيس الهلال الأرباب صلاح إدريس عندما خسر الهلال عام 2009 من مازيمبي في الأبطال بخماسية مقابل هدفين في أم درمان وهتفت الجماهير ضد المدرب البرازيلي كامبوس ولكن الأرباب بعناده الإيجابي تمسك بالمدرب وهتفت الجماهير ضد رئيس النادي ( استقيل ياثقيل ) ، وبعد إسبوعين فاز الهلال على مازيمبي بثنائية سادومبا النظيفة في لوممباشي وفي فبراير 2010 أحرز الهلال كأس أبوظبي الجوية وهتفت نفس الجماهير ( تيمك صاح ياصلاح !! ) ، نحترم رؤية الجهاز الفني للهلال ولكن لو كان الأمر بيدي لما شطبت سادومبا أو تخلصت منه بالإعارة لأن سادومبا لاعب جماهيرى أعاد للمدرجات حيويتها ونشاطها ، وكما نعلم أن الإعارة في مفهومنا السوداني ( شطب بطريقة ظريفة ) ، وفريق الهلال الحالي يحتاج لإضافات بسيطة في قلب الدفاع والمهاجم الصريح الذي يستثمر الفرص التي تتاح له ويحرز من أنصاصها أهدافاُ ، ولو وجدنا لاعب إضافي في الطرف اليمين يكون زيادة الخير خيرين ، ويجب ألا نجاري المريخ في التسجيلات لأن المريخ ( ظروفه مقدرة !! ) ، كنت أتمنى أن نستفيد من العميد مساوي في الوسط خاصة والعميد صاحب ضربات رأسية مميزة بدل التلميح بسيف الشطب لسيف الهلال ، جميل أن يتعاقد الهلال مع يوسف أبوستة ومع لاعب المريخ سالمون جابسون وهذا الثنائي سوف يفيد الهلال في مشواره الأفريقي ، ( وأبوستة وجابسون حلاتو بالكسكتة ) أنا عندي إحساس أن كسكتة الكاردينال أضحت مصدر ( فوبيا ) للصفوة منذ أن لبسها شيبون ، أنا لو كنت مكان الكاردينال كنت ألبس عمة جمال الوالي وأدي جمال الكسكتة وناخد صورة تذكارية ... باقي لك كان بيحصل شنو يامحمد الفاتح ( كتاحة ) !! ... وجمال ولدنا منذ دراسته الجامعية بمصر ومباراة الهلال والأهلي القاهري في نهائي أبطال 1987 خير دليل .
*** تسجيلات المريخ الصريحة وشراء الطماطم بالصفيحة
الأستاذ ياسر فضل المولى ( صاحب عمود جملة مفيدة ) لديه مقولة مشهورة عن تسجيلات المريخ التى تتم ( بالمكاورة والكوتة ) ودون رؤية فنية حيث يقول ... ناس المريخ كان إشتروا طماطم بشتروها بالصفيحة !! إتصلت علي الأخ ياسر بأني أريد أن استخدم مفردته الجميلة في هذا الرحيق فأجابني ضاحكاً ( ناس المريخ إتطوروا يا أخوي وأصبحوا يشتروا الطماطم بالدفار !! ) ...وكما يقول أهل الخليج ( صح الله لسانك يا أبومحمد ) لأن تسجيلات المريخ الحالية تحتاج لمراجع قانوني ليحصي عددها معقول في يوم واحد فريق يسجل 8 لعيبة ويشطب مثلهم !! كدي عليكم الله أمسكوا معاي الحساب ... هناك 3 حراس مرمى منجد النيل حارس هلال كادوقلي وعبدالله أبوعشرين حارس الأمير البحراوي وعصام عبد الرحيم حارس أهلي شندي المعار لمريخ نيالا ... معقول مريخ نيالا تشيلوا منه 3 نقاط بهدف تسلل واضح وكمان بعد كدة تلحقوا الحارس تشيلوه !! أريتكم كان شلتوا العراضات ( فد مرة ) عشان تتموا الناقصة !! ورابعهم السماني الصاوي ومحمد حقار والتاج إبراهيم وعاطف خالد ومحمد عبدالرحمن وهناك كلاتشي وباسكال واوا والمصرى أدهم عاشور وهناك محاولات لضم إتنين من لعيبة الخرطوم الوطني هما أحمد آدم وأحمد حامد ولاعب أهلي شندي صدام أبوطالب ، وكمان مامون أبوشيبة لفت نظر المريخ لتسجيل لاعب الوسط العاجي مايكل ليبري لاعب عزام التنزاني وشقيق المهاجم ( تشي تشي ) الذي حاول المريخ ضمه قبل 6 سنوات ( حقو عشان إسم أخوه تشي تشي ماتسجلوه !! إنتوا الأسامي العجيبة بتجيبوها من وين !! ) وهناك محترفين من نيجيريا في الطريق ، أعذروني ( جاتني خمة نفس ... ياقول الحبوبات ) وتسجيلات المريخ عايزة ليها زول رائق وفائق .
*** إنت كلك زينة وعائمة كالوزينة ... ياتفرغ زينة
الشاعر الراحل إبن توتي بر محمد نور عليه رحمة الله له قصائد جميلة لم تجد حظها من النشر لأن الديوان الوحيد للشاعر ( إختفى في جوف غنماية ) وسمع الناس بأغنية ... من أوصاف عديدة ... ظهرت بي قوافي وأفكار جديدة ...التي غناها كرومة وإبراهيم خوجلي ، ومن أشهر أغاني الراحل إنت كلك زينة التي غناها حمد الريح ، ويكمن جمال الكلمات في بساطتها حيث شبه الشاعر مرارة الحب مثل حبة الكينا التي تعالج الملاريا ، وتقول الأغنية *** إنت كلك زينة ... وعائمة كالوزينة ... ويحفظ مولاك
*** بالسموم تسقينا ... ومرة حبة كينا ... وجلّ من أنشاك
*** بي قدومك أهلاً ... عومي شيشك مهلاً ...وأطربي العشاق
*** عمري ضائع جهلاً ... يادموعي أنبهلن ... وقلبي ليك مشتاق
*** خضرتك ليمونة ...وتينة بل زيتونة ...وساحرات عيناك
*** العباد مفتونة ... بيكي يامحصونة ...وربحت الوالداك
أغنية إنت كلك زينة وعائمة كالوزينة تذكرنا بفريق ... تفرغ زينة الموريتاني الذي يلعب ضده المريخ في البطولة العربية إذا تخطي في التمهيدي فريق إتصالات جيبوتي ومباراة الذهاب في جيبوتي يوم 20 يناير والرد في الخرطوم في الرابع من فبراير ومباراة المريخ وتفرغ زينة في نواكشوط يوم 17 فبراير والرد في الخرطوم في الرابع من مارس ووقتها أبو الهل يكون قطع مشوار في أبطال أفريقيا والمريخ ( يعافر ويقع ويقوم ) في جيبوتي وموريتانيا وإحتمال يلعب في الأبطال بالصف التاني ، بارك الله في إتحاد اللقيمات الذي أبعدنا من إتصالات جيبوتي وتفرغ زينة الموريتاني وكنا فاهمين الموضوع غلط ، وفريق تفرغ زينة شعاره ( أخدر ليموني ) ومقاطعة تفرغ زينة إحدى بلديات العاصمة نواكشوط ، بالمناسبة عمدة بلدية تفرغ زينة ( ولية ) إسمها فاطمة بت عبدالملك !! لذا لزم التنويه .
*** همسة الوداع
حبايبنا الحلوين في بداية مشوارهم في البطولة العربية يلعبون مع تليفونات جيبوتي ( نسأل الله السلامة ) وعلى نياتكم ترزقون ، هسه دي ماسيكاافا ست الإسم ، مفروض مباريات الإعداد للمريخ تكون مع موباتل وشركة سوداني وأريبا ، ياها كلها التلفونات !! وإذا تخطى الوصيفاب مرحلة التمهيداب يلعبون مع تفرغ زينة !! الواحد لما يسمع إسم تفرغ زينة يتذكر طوالي زينة السيارات للعرسان ، وبهذه المناسبة نهمس في أذن الإعلام الأحمر إنتوا تفرغ زينة ده إسم فريق كورة ولاّ محلات كوافير ؟ مجرد سؤال .
امسح للحصول على الرابط
بواسطة : محمد عثمان الجعلي
 9  0
التعليقات ( 9 )
الترتيب بـ
الأحدث
الأقدم
الملائم
  • #1
    ابو حازم 11-06-2016 10:0
    بوركت يا جعلينا وانت تواصل الكتابة الرائعة عن عشقك الأبدي وكل الامنيات لهلالك بالتفوق والفوز بالأميرة السمراء.
    فعلا المريخ شقاوتهم شقاوة من فاطمة لفاطمة ، وخوفي يفشلو في تخطي الجيبوتي ويبقى الطيران من وقتا بدري.
    هلالك هذا العام سيكون زينة وكلو زينة وسيواصل سباحته في ادغال افريقيا ويهزم كل فريق يلتقيه .
    نشكرك مرة أخرى على التواصل وفي انتظار مفكرة الربعاء.
    ولك التحية
  • #2
    منعم ابوناصر 11-05-2016 03:0
    تحياتى جعلينا بعدين ياخوى مزعل صاحبك الاحمر ودعقيده ليه يعنى هوزعلان فى الدفار طيب اقوليك الدفار متعب شويه العدد دا ياوعقيده عايز ليهو قلاب عشان يكوبوهم قدام اتحادكم الاحمر الذى تبرأتم منه وانكرتو الجمائل التى قدمها ويقدمها لكم دوما وماتتويج الموسم السابق ببعيد لكن ياجعلى انت كلك زينه مابالقت فيها وكانت عايزه تعمل مشكله بينى والمدام لاتنى دخلت فى نوبه ضحك متواصله وظنت انى مع احد حسناوات التواصل الاجتماعى بس الحمدلله عدت على خير بس بصراحه ناسك الحمر جعجاعين فى الفاضى قالو عندهم تاريخ اى تاريخ الجماعه مااحترموكم ومستواكم وتفرغ زينه واتصالات جيبوتى وفعلا دا حجمكم الطبيعى اها عاد صنغعو للسماء بطيرو ولا بتجرو احسن تنسحبو عاد الانسحاب اخير ليكم من زينة السيارات ......ونشكرك كتير لمعلومة شاعر توتى وتحياتى للاخ الامين جيفارا ومافى مفر لقيادة حزب القفه لانك دوما مناصر للكادحين وبينى وبينك جعليك فيه ريحه مؤتمر اما حبيبنا كتاحه نبصم بالعشره
  • #3
    الامين عبد القادر السمانى 11-05-2016 10:0
    التحية والسلام اخوى الجعلى واليومين ديل مبسوط بالدورى والكاس واخر فنجرة ولوتمت بالاميرة الافريقية تكون انت وكل الاهلة فى اخر سعادة وحتى التسجيلات لها فعل السحر مين كان يتوقع ابراهومة هذا الشاب يكون خارج دائرة الوصيفاب ---
    فعلا نحتاج لهداف بمواصفات افريقية لايخطى الشباك ويحرز من انصاف الفرص والا اولى الوطنيين ومدافع يريح الاعصاب وصمام امان فى قلب لدفاع وحديثك عن مساوى حديث العارفين ببواطن الامور ووجود الخبرة لها ايجابياتها فى الفريق ---
    ولابد ان نشكر اخى منعم ابو ناصر للثقة الغالية التى طوقنابها ولكن لماذا لاتعلقها للجعلى فى رقبتو و معه حبيبنا كتاحة التفاحة ---
    ودمتم للوطن والهلال فى حفظ الرحمن ورعايته
  • #4
    ابوحسن 11-05-2016 10:0
    لك التحية استاذنا محمد عثمان الذا حاجه يا الجعلي ناس الصفوة لمن يكونوا يعايزين واحد يعظمه ويرفعه في السماء زي كلاتشي
    اول قالوا عجزوانتهي تاني سجلوا ولاعب التبلدي السجلوا الهلال ناس الصفوة زعلانين قالومايسوي المبلغ دا وماعندو حاجه دا كلام ياناس الصفوة زي المثل مابيقول الكديسي لمن ما تلقي البن بتقول غفن ههههههه وغيرها كتير
  • #5
    سيف الدين خواجه 11-05-2016 09:0
    اخي الحبيب احد اقلام المريخ ويبدو انه سمسارقال لجماهير المريخ (ما تخافوا من التسجيلات طالما عضم المريخ موجود )احد الهلالاب علق ساخرا (والله المريخ ما فضل فيهو عضم يشيلوا الكلب عضم شنو يا ابو عضم انت لم السمسرة واسكت )
    اما هزيمة مازيمبي في لوممباشي سرها في بير !!!!!!!!!!!!!!!!!
  • #7
    ودعقيده خلف 11-04-2016 06:0
    استاذي الفاضل لك التحيه دوما وش دخلك في تسجلات الزعيم بالجمله ولا القطاعي خليك مع تسجيلات هليلك ابو صفر وبعدين وش دخلك في البطوله العربيه الزعيم لاعب مع منو ويوم شنو من المفترض تكون عندك وطنيه لان الزعيم ممثل الوطن وتكتب في الصاح والخطاء مش تبخس يا صفرابي يا مغيور
  • #8
    السما الأحمر 11-04-2016 06:0
    الظاهر انت لسه نائم وزيد في نوم العسل وخليك مع الكسكتة وصور جيسون وابراهومة وحتى غارزيتو الوصل مع الصفوة لنصف النهائي وباقي مشاطيب المريخ وانتظر اول مشاركة في دوري الابطال وانسى تفرع زينة وجيبوتي وخليك في كاردلينالك وارجى الراجيك من اوجاع ووصيتي لك ان تحافظ على صحتك واسال الله ان يمتعك بالعافية والصحة فنحن اخوة قبل الاختلاف في الرياضة وبعدين المريخ فريق كبير وسترى في قادم الايام تيم يزلزل الارض في افريقيا وداخليا نسال الله ان يزيح صلاح صالح وزمرته الطالمة والتي ترونها عادية نظرا للدعم المتواصل وغدا ستدور الدوائر ويظهر الحق وستعلمون الحقيقة المرة
  • #9
    السما الأحمر 11-04-2016 05:0
    الظاهر انت لسه نائم وزيد في نوم العسل وخليك مع الكسكتة وصور جيسون وابراهومة وحتى غارزيتو الوصل مع الصفوة لنصف النهائي وباقي مشاطيب المريخ وانتظر اول مشاركة في دوري الابطال وانسى تفرع زينة وجيبوتي وخليك في كاردلينالك وارجى الراجيك من اوجاع ووصيتي لك ان تحافظ على صحتك واسال الله ان يمتعك بالعافية والصحة فنحن اخوة قبل الاختلاف في الرياضة وبعدين المريخ فريق كبير وسترى في قادم الايام تيم يزلزل الارض في افريقيا وداخليا نسال الله ان يزيح صلاح صالح وزمرته الطالمة والتي ترونها عادية نظرا للدعم المتواصل وغدا ستدور الدوائر ويظهر الحق وستعلمون الحقيقة المرة
أكثر

للمشاركة والمتابعة

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019