• ×
الأحد 7 مارس 2021 | 03-06-2021
بابكر سلك

ساماتا وبنزينة ..

بابكر سلك

 10  0  4291
بابكر سلك


* احلامكم جزء من ماضينا
* عبارة بتورم الفشافيش وبتخجل الخفافيش
* لانها عبارة لا جدال في صحتها
* حيث يثبتها الواقع ويسجلها التاريخ ويؤكدها صفرنا القاعد محكر على سجلات التاريخ منذ القدم
* احلامكم جزء من ماضينا خلت ليك فطومة اختي تردح بي سبب وبلا سبب
* وسمعتنا صفقة
* لكن الصفقة بدون جوية زي الضحك بلا سبب
* والضحك برا سبب زي الشرا في القندول
* والشرا في القندول زي المكابرة والفصاحة بدون خجلة
* وعدم الخجلة مصيبة
* فطومة اختي قالت الهلال اول فريق سوداني شارك افريقيا سنة 1965
* ومن 65 ولي 2016 جاب شنو يا فطومة يا اختي ؟؟
* قاعد مستمع ساااي !!!
* وقالت الهلال اول فريق سوداني شارك في البطولات العربية
* وما ورتنا اسباب هروب الهلال من الدورة العربية في ابها السعودية
* وماورتنا اسباب هروب الهلال من وفاق سطيف عربيا
* فطومة كلمينا
* عن هزيمة الهلال بالستة عربيا من الترجي في الشوط الاول ونزول قاقرين كدبلوماسي بين الشوطين مستجديا وقف سيل الاهداف
* دي ما سمعتي بيها !!!
* دي سموكم فيها اب ستة قبل ما تسجلوا اب ستة
* كلمينا عن اول وآخر فريق سوداني ضبط لاعبه بالمنشطات و شعار الفريق (بتاع عصمت) على صدره
* وهل غير الهلال سجل التاريخ حالة منشطات لفريق سوداني !!!
* فطومة ردحت جنس ردحي
* وقالت
* المريخ لما جاب مانديلا (الهارد فشافيشهم ) كانت الفرق البنزرت التونسي وقورماهيا وبندل
* في محاولة منها لتبخيس تلك الفرق
* ولكنها في الصفقة اظنها فقدت بعض سجلات التاريخ
* قورماهيا بطل كأس الكؤوس الافريقية 87
* وهو نفسه قورماهيا الذي هزمهم في استاد الخرطوم في سيكافا 85 تلاتة صفر
* وهو نفسه قورماهيا الطير الكسكتة في بورتسودان وعاد بكأسها الجوي لنيروبي
* فطومة يا بت السرور قورماهيا ما زنطور
* شوفي الزناطير وين
* اما الافريقي التونسي فهو الحائز علي كأس الكؤوس الافريقية 88
* ولما قابلناهو كان حامل اللقب
* لم يكن حامل الاصفار
* ومسجل على الشرف الافريقي
* يعني ما زنطور
* شوفي يا بت السرور وين محل الزنطور
* وتظل احلامكم جزء من ماضينا
* كل عام محاولتك لاتتم بالطريقة الصحيحة
* كرر المحاوله
* وستجد الخط مشغول بانجازات يا زنطور
* واتزنطري
* ايها الناس
* بمناسبة كلمة زنطور
* عرب شمال افريقيا ينطقونها زنطور
* موش ملاحظين بقولوا زوز لي جوز
* اما عرب الجزيرة العربية و الخليج فينطقونها زنطور
* موش ملاحظين بقولوا ظاحي لي ضاحي
* جنهم ظا
* عشان كده بنطقوها زنطور
* اما نحن فلأننا العرب الوحيدين المخلوطين بافارقه ولاننا عندنا اكبر ظنطور عربي وافريقي
* فقد جوز لنا مجمع اللغة العربية ان ننطقها زنطور وننطقها ظنطور
* عرفتي يا فطومة يابت السرور
* قال كاس الكنغو قال
* ايها الناس
* تسجيلاتنا تمضي بعقلانية
* واصحاب الاحلام يتحدثون عن ساماتا وبنزينة
* ساماتا بلعب في نادي كسكتتو قدر الضربة
* كسكتة كافرة عديل
* لا بتعرف الله ولا الرسول
* والما بخاف الله حقو تخافو
* خليكم في بنزينة
* فطومة كلمينا
* عن الفريق السوداني الوحيد الرجع من البطولة العربية باربعطاشر قون في شباكو
* حتى الصحف كتبت
* الهلال يكتمل بدرا ويبقي قمر اربعطاشر
* ده ياتو فريق يا فطومة
* وكلمينا عن الفريق الاتغلب من المقاولين سبعة اتنين وسبعة واحد خلال اسبوع
* وكان نسيتي اسألي هيثم مصطفى قاااعد
* وما كلمتينا عن الفريق الاتغلب افريقيا سبعة صفر وفي الطيارة حلفوا البعثه كلها علي المصحف
* في الخرطوم كان سألوكم قولوا النتيجة اتنين
* قاعدين يا فطومة الحلفوهم
* كان مشيتي مدني اسألي حداثة يمكن يكون عارف
* ايها الناس
* للمعلومية
* اب ستة سنة 2002 لعب مع كمال عوض مدير تحرير الانتباهة في فريق واحد
* ناس كمال وقتها كانوا صغار ما قدر ناس اب ستة
* لكن موهبتهم كانت عالية
* ايها الناس
* كان تردحوا كان تسمعونا صفقة ولو تحرقوا دفاتر التاريخ
* تظل احلامكم جزء من ماضينا
* وتظل الكسكتة في نانسي عجاج احلي واروع ومدهشة
* ايها الناس
* ان تنصروا الله ينصركم
* اها
* نجي لي شمارات والي الخرتوم
* كان شفت يا والينا
* استعمالنا للفيس بخجل فينا
* كلو يوم تظهر قروبات تزيد الخجلة فينا
* بعدما انفسخنا وانجلخنا وانبرشنا يا والينا
* ظهرت قروبات الشلب البتهتك عروضنا وتنبش فينا
* فلانة يا الساكنة في الشارع الورانا
* يا البتفعلي ويا الفعلتو والتركتو والشلبتو والشلتي قلبو
* لو تاني لقيتك جمبو
* او حتى ساي عاينتي لي شنبو
* والله افتك لي اخوك فلان واقعد جدك علان في علبو
* و انزل صورك البدون فستان
* ده غير الكريمات البتكبر وبتدور واستشارات كمان
* مفروض نستفيد من الفيس يا مان
* ولو في ضرورة نعمل قروب يبحث عن كريم يكبر المخ ويمجد الانسان
سلك كهربا
ننساك كيف والكلب دخل قروب خجل واتخارج سريع وباي الجلكسي اشتري ربيكا وحك اضانو بي كراعو الورا وقال برا قلت ادب
وإلى لقاء
سلك
امسح للحصول على الرابط
بواسطة : بابكر سلك
 10  0
التعليقات ( 10 )
الترتيب بـ
الأحدث
الأقدم
الملائم
  • #1
    ياسر الأمين ابراهيم 11-04-2016 05:0
    خليك في الماضي والحاضر فاتك ،،،،،فاتك ،،،،،فاتك بعيد ،،، وييين انت عايش يا سي سلك
  • #2
    EzzSudan 11-04-2016 02:0
    عمك تنقو دوري وكاس حرام ياناس,بقي محتاس, خفة دمك شرابات بس,شرابات ...ما...
  • #3
    Hajjam 11-03-2016 11:0
    استحي انت ياعم تنقو. فريقك عمره مائة عام وأعظم إنجازاته صعود وحيد يتيم لدوري الأربعة الكبار. ولا نسيت الهستريا والهلوسة بريحة المطار.
  • #4
    Hajjam 11-03-2016 11:0
    ساماتا ده ياهو ذات نفسو الطير ليك الهلاويس بروائح المطار وهو بطل الثلاثية النارية المازمبية الحارقة.
  • #5
    خالد 11-03-2016 09:0
    لسانكم بس طويل ... الأربعطاشر هدف إنت أخدت نصها فى مباراة واحدة ... ومن فريق لو وصفناه بالمتواضع كتير عليه ... فى حينها الوحات كان تعبان عديل ... وأحلامكم جزء من ماضينا ... ها ها ها هاااااااااى
  • #6
    بهاء الدين سعدالله محمد 11-03-2016 05:0
    يا ظنطور دورة ابها دورة ودية وتسمى دورة الصداقة!!!
    بى سرعة ضميتها لدورات العربية؟؟؟؟
    كدى هسى ورينا الظنطور منو؟؟؟؟؟؟؟؟
  • #7
    بكرى النيلين 11-03-2016 04:0
    سؤال برى...
    اب سته دا جريتو لى فى الابيض ولبستو فنيلة المريخ وقلتو قال يالمريخ يا هلال الابيض
    هسع وين اب سته ابو كسكته...على اليمين حارق فشفاشكم وبقيتو تهدربوا ساكت..والثانيه جابسون قالوا مصاب ...هاك الخمسه الف دولار دى ..وتعال بكرة ..يمكن يكون سلكك ضرب..
  • #8
    Mustafa Ali 11-03-2016 03:0
    والله كلام ده كلام زولا فشفاشو وارم
    من تف فطومة ساكت تفيهم يا فطومة
    وريهم المكشم بلا بصل ربنا يحفظك لينا
  • #9
    كردنة 11-03-2016 02:0
    ليهم حق يصفونا الآخرين بالتخلف أشكال دا ما سببالتخلف ولو قالو ليه ادفع دولار يعمل نايم. مهنة اللا مهنة له


    الوالي قال عاوز استقبل اجري حصل حنس. 7x7 فيها كم وحدات
  • #10
    alisheikh mohamed 11-03-2016 02:0
    عارف عزو ومستريح

    انتوا حاضركم هو ماضينا ولو اننا لا نحب سرقة الشعارات الخاصة بغيرنا ولكن الحقيقة ماضينا هو حاضركم بدليل كلتشي وعبده جابر والمعز وعمر بخيت وبكوري والجماعة اللعبت معانا عام 2006 واليوم يلعبون كحاضر المريخ ومستقبله في 2017
    استحوا علي دمكم
    واؤكد ليك التسجيلات القادمة تاني نسمع تسجيلات نوعية ونهواه في كل الظروف

    اصلا متعودة
أكثر

للمشاركة والمتابعة

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019