• ×
الجمعة 29 مارس 2024 | 03-28-2024
بابكر سلك

كلموا الحالم سبانا

بابكر سلك

 16  0  3847
بابكر سلك






* التسجيلات الناجحه هي التي تتم حسب الحوجه
* يعني تشوف محتاج للاعب لي ياتو وظيفه وبي ياتو امكانيات ولي فترة قدر شنو
* عشان كده كلموا الحلم سبانا قولوا ليهو التسجيل بالخانه
* والله يكفينا شر الخانه الغبيانه
* المهم
* مهما كانت فنيات اللاعب فان امر نجاحه غير مضمون ونسبة النجاح تتأرجح من لاعب للاعب بحسب بيئة النادي وطريقة الجهاز الفني ومدي قابلية اللاعب للتفاعل والانسجام
* وقد لا يظهر اللاعب في ناديه الجديد بالمستوي العالي الذي عرف به للاسباب اعلاه او لاحدها
* ودونكم يوسف محمد في موسمه الاول مع ابي الهل
* وايداهور قبل الاعاره
* وصالح عبدالله الذي كان نجما بالموردة وماسورة بالهلال
* ومثله هيثم السعودي
* والامثلة كثيره
* وهل ادل علي ذلك من تجربة وارغو معنا دليل !
* المهم
* استغربت من تصرف الهلال
* يعير الشغيل 34 سنه ليسجل في نفس الخانه زول عمرو 36 سنه !!!
* شفت صوره لكردنه بالكسكتة والقميص الابيض ومعاهو اب سته
* كردنه طبعا. معروف
* زول بكب سيخ واسمنت قدر ده ما يكون معروف كيفن عاد
* ولن نسأل عن مصدر اموال الرجل
* جابا من بره
* اداها ليهو شيطان الجرة
* ما بخصنا
* ( ولا خسانا )
* المهم الصوره فيها اب كسكته واب سته
* عرفت اب كسكته
* وبقيت اعاين لي اب سته
* الزول ده ماغريب علي
* الزول ده انا شايفو وين يا ربي
* شايفو وين شايفو وين
* غايتو الزول ده ماغريب علي
* يا قرا معانا
* يا الدفعه القدامنا
* لكن ماغريب علي
* ايها الناس
* آخر زول في السودان لقب بابي سته هو حيدر مصطفي حسين قسم السيد المولود بالعرضه سنة 1952 وقس علي ذلك
* المهم
* كلموا فطومه واخوانا
* قولوا ليهم كلموا اب زهانه
* و قولوا ليهو التسجيل ما بالخم لكن بالخانه
* معقولة اب سته قدر اب كسكته !!!
* ومن عجائب السودان السبعه
* اب كسكته واب سته ومجاعة سنة سته
* الاربعه الفضلن ما بقدر اقولن
* سريات شديد
* لو داير تقولن في سرك تتلفت
* كلو زول يقولن لي روحو براهو
* بس يقولن في سرو لما يمشي الخلا
* الحيطان ليها ودان
* وعجائب السودان مابنسكت عليها
* ايها الناس
* تسجيلات الزعيم السنه دي تشعر انو فيها عقلانيه اكتر و نظرة اعمق وتروي ومنطقية اكثر
* فاغلب الخانات التي تعاني من نقص وضعف واحوجتنا لتوليف
* نجد ان المجلس قد ضم فيها اتنين من اللاعبين المميزين
* ونجد ان سنوات التعاقد مع الجدد كانت بقدر حوجة الفريق الزمنية لمجهوداتهم وتتناسب مع الوقت الذي يستطيعون ان يقدموا فيه شئ
* تحية لمجلسنا علي هذه النقله النوعيه في طريقة التعامل مع التسجيلات
* وتحية خاصه للجنة التسجيلات بقيادة الفريق طارق
* ايها الناس
* ان تنصروا الله ينصركم
* اها
* نجي لي شمارات والي الخرتوم
* كان شفت يا والينا
* نمشي المطاعم نلقاها مزدحمه علينا
* نمشي كاك نلقي الناس علي كتكوت وكت كات سبقونا
* الناس دي بتجيب القروش من وين يا والينا
سلك كهربا
ننساك كيف والكلب قام واتنفض وقال الاربعين حرامي عرفناهم علي بابا معاهم !! وهل ضنبو وجري
والي لقاء
سلك
امسح للحصول على الرابط
بواسطة : بابكر سلك
 16  0
التعليقات ( 16 )
الترتيب بـ
الأحدث
الأقدم
الملائم
  • #1
    Alhilaly 11-03-2016 02:0
    والله يا سلك اصبر بس الدوري يبدأ ونشوف شكاويكم تكتر المرة دي اشتكوا في ابو سته قولو الهلال لاعب بسته لاعبين
  • #2
    بكرى 11-03-2016 09:0
    اخيرا ظهر المرجفون ياخى حرام عليك تسجيلاتكم وكتين سمحه كده ومدروسة كان تخصص ليها عمودك بدل تتكلم عن الهلال جل الموضوع وتختصر الكلام على ناديك فى سطرين واين الاستحسان فى تسجيلاتكم انتم اول يوم سجلتو سبعة واردفتوهم بثامن ولسه الجاى اكثر يعنى ح تسجلوا فريق بالاحتياطى وين فريق الاحلام وين النقص الذى تمت معالجته اذا انتم كان ينقصكم فريق كامل بالاحتياطى صحى الجمل مابعرف عوجة رقبته ياخى لو ماعندك موضوع سلى نفسك باى شى الموبايل مليان العاب يمكن ان تملىء لك الفراق الانت عايشه ده .
  • #3
    أبوقصي 11-03-2016 09:0
    للاسف الشديد انت كما انت لن تتغير او تتبدل ديمة خاوية وتخوض في اعراض الناس ولكن لاتنسي ان كل ماينطق لدية رقيب وعتيد واامل ان ترتقي بكلماتك واسلوبك وتنظر لمريخك وحالو ودعك من فلوس كردنة وفطومة والله سيحاسب كل شخص وانت اولهم واستحي علي كلماتك الجارحة في حق الغير ونصيحة مني ليك اترك الصحافة الرياضية وشوف ليك شغالة تانية تنفعك لانك لست بصحفي وانما انتفاعي ومدعي الصحافة وصحي الاختشو ماتوا
  • #4
    alisheikh mohamed 11-03-2016 07:0
    يهل رجب نشوف عجب تسجيلاتكم الكل مره تقولوا نوعية يبدا الموسم نلقاها بقت طينية يا دلاقين يا جماعة تسجيلاتكم زي الطاطم بالقفة
  • #5
    ابو سدين 11-03-2016 12:0
    يا ناس الادارة علقنا اكتر من مرة وتعليقنا معلق معاكم تنشروا تعليقنا ولا نقدم استئناف فحص
  • #6
    ابو سدين 11-02-2016 11:0
    كلتشي دا عمرو كم اظنه والله اعلم الدفعة القبل العارف عزو يعني اكبر من ابو كسكتة يا ابو صلعة هههههههههه قال نوعية وعقلانية ياخي عمك دا لعب معانا قبل 10 سنوات دا دفعتو انقرصووووووووووووووو رياضيا طبعا
  • #7
    محمد زمراوي 11-02-2016 10:0
    بقيت تهضرب يا الممسوخ ما كنتوا بتغنوا غنى جماعي لاب ستة خلاص بالضربة القاضية احلاكم انتهت مقالك يحنن والله لسة ما فقتوا من الضربة الشيبوية جاءت ضربة جابسونية عرفتوا فهم التسجيلات كيف يا دار العجزة والمسنين ههههههههههه قال اخر زول لقب باب ستة كان سنة 1952م فلس تسجيلات وفلس فهم كمان طيب اخر زول لقب بسلك سنة كم كان بصراحة
  • #8
    ابو عبدالله 11-02-2016 08:0
    هههههههه حيدر ابوستة مواليد ستة وستين ما تكبر ابوستة ياسلك
  • #9
    بكري عبده 11-02-2016 07:0
    تتوقع نقول ليك شنو ؟ بالمناسبه ويييين مِنى كده م عارف الكنت هاوسنا بيها ؟
  • #10
    زاهر جعقر 11-02-2016 07:0
    اب ستة خلاك تشوف 6 6 قبل كم يوم ما قلت المريخ بقلع اي لاعب وكديس فادسي يازول والله واليكم ده لو ما الحكومة ضرس ما يقدر يقلعو خلي لاعب حركاتكم خلينا منها قال تسجيلات حسب الحوجة ولا قدر ظروفك .
  • #11
    Zaza 11-02-2016 06:0
    ظريف شدددددديد عليك الله الكبير ابوسته ولا كلتشى والتاج على بالطلاق كلتشى الاينتكل فى العارضه عشان يجيب قون ههههااااااااى.واى زول أتصور معاهو ابوكسكته اقنعو منو حتى لو تصور معاك ياسلك بكره بتقلب. عليك الله شوف الصوره مع جابسون حلوه كيف
  • #12
    Zaza 11-02-2016 06:0
    ظريف شدددددديد عليك الله الكبير ابوسته ولا كلتشى والتاج على بالطلاق كلتشى الاينتكل فى العارضه عشان يجيب قون ههههااااااااى.واى زول أتصور معاهو ابوكسكته اقنعو منو حتى لو تصور معاك ياسلك بكره بتقلب. عليك الله شوف الصوره مع جابسون حلوه كيف
  • #13
    جون سينا 11-02-2016 06:0
    والله يا حاج تنقو هسة كان صغير فى عمرك كان بنعذرك بنقول الزول دةممكن يصلح إسلوبه شوية لسة صغير والمستقبل قدامو- لكن المصيبة زول عمرو 65 سنة- ولسة بتكتب بلغة البنشر وشماسة السلسليون - وستات الشاى يعنى ما حاتعقل نهائى ودى بسموها هبالة وبلاهة الكبر.فقط بتضحك الناس عليك.
  • #14
    محمد 11-02-2016 05:0
    * ولن نسأل عن مصدر اموال الرجل
    الوالي مصدر ماله من وين - إذا كان الاثنين من مال الشعب ربنا ينتقم من الشخص البجي المال عن طريقه.
  • #15
    badr 11-02-2016 05:0
    يا سيدنا المحامي فريق يشطب 12 لاعب بجرة قلم وتقول نظرة فنية مجدي عبداللطيف كما لقبة المرشد وين عطرووووون داني الفيش ما جلس ستة شهور وتقول فنية يااااخ حرام عليكم هريتونا نفاقا وكذبا لعنتم كلما كتبتم
  • #16
    الثريا 11-02-2016 05:0
    موت بغيظك يا سلك ، والله كلماتك تشم فيها رائحة الحسرة.
    تسجلات الهلال ح تعرفها قريب لما ابطال الهلال يدكوا الارض تحت اقدامكم وان غد لناظره قريب
أكثر

للمشاركة والمتابعة

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019