صراحة فقد عظيم أن لا يكون وصيف السنين غير متواجد في البطولة الثانية المحببة لهم .... دي البطولة الوحيدة الصبارة بتاعتهم كان !! كلما ينضربوا في الممتاز كانوابيعوضوا موسهم من الفشل بالكاس !! اسع قعدوا في السهلة ... كدا اتفرغوا لشكوة شيبوب كواي القلوب !! تاني لا شغل ولا مشغلة 28 راكب في بص الوالي تاني ما عندهم أي عمل غير يتابعوا شكوة شيبوب والشطب الجماعي !! لكن ناس سلك قالوا قبل ما نشطب اللاعبين لازم نشطب ركاب الباص واحد واحد ... قالوا بالواضحهووونا ... عاوزين نتنفس ... الغريبة ما حددوا مزمز مع المشطوبين من ركاب البص ولا معفي ؟!
أهم سؤال لاقاني من مريخابي حيران فكاهو في عدد من مواقع التواصل الاجتماعي ... قال يا جماعة أسع يوم الخميس نجشع منو ؟! طيرونا وقعدوا الهلالين الله لا تاجرهم !! واحد رد ليه قال ليه أقع البي ان سبورت وكان ما لقيت مباريات عالمية شوف الدوري القطري ... وكان ما لقيت شوف أم بي سي والدوري السعودي ... فيه مباريات بتريحك شوية ... واوع تفكر تفتح أي قناة سودانية يومي الخميس والجمعة !!
وأنا فعلا أردد سؤال الزول دا ؟؟؟ انتوحتقيفوامع مين من الهلالين ... تشجعوا منو بأمانة كدا ؟! أنا في رأيي تشجعوا هلال السودان عشان غلبكم مرة واحدة لكن التبلدي بهدلوكم السنة دي ومرمطوا بسمعتكم وعشان كدا أنا لو منكم ما بشجعهم نهائي !!
بس كمان يا جماعة الهروب عن طريق الترجيحية ظاهر .. وماعاوزليه أي درس عصر ... ما ممكن خمسة لاعبين دوليين ما يقدروا يسجلوا من نقطة الجزاء بصراحة عملوها ظاااهرة أنهم قرروا الهروب الجماعي !! معقولة في لاعب بيشوت زي جمال سالم كدا ؟! جمال سالم قال عندوا عرس لصديق عزيز في يوغندا يوم الخميس وما قاعد ليكم ... كان واضح أنه لاحق العرس !!

الحكم كان نجم اللقاء بلا منازع ... عشان رفض رفض تام يمنح أي فرصة للجماعة ... لا إنسحاب ولا خرخرة في ضربة جزاء ولا كرت أحمر ولا حتى أصفر ... عمل عين الحكم عميان !! لدرجة أن مأمون أبوشيبة عموده الراتب عن التحكيم خلا تماما من أي إشارة لحكم اللقاء ... ما عارف هل يستمر غدا أم بيكون شغال يحلل في المباراة صفارة صفارة ويبدأ من بكرة الأسطوانة !! غايتو لو حكم تاني كان خرب الكورة وطرد كم لاعب من الوصيف ... عفيت منك يا حكم الساحة !

بالكو
بصراحة أتوقع أن تكون مباراة العمر لهلال التبلدي أمام الهلال الأب! فريق محترم وفريق يلعب كرة قدم حقيقية .... شباب وحيوية مع لياقة بدنية عالية ... وأهم من ذلك التركيز الشديد والثبات الانفعالي لدرجة البرود أحيانا وفي أماكن حساسة أمام منطقة دفاعهم يتناقلون الكرة بثقة ورشاقة من أمام مهاجمي الوصيف.. والله لم اشاهد خط دفاع يلعب بهذه الثقة وهذه القوة والالتحامات الاحترافية العالية من المدافعين دون إرتكاب أخطاء كبيرة بالقرب من الصندوق أو داخله ..
التحية لمجلس إدارة هلال التبلدي الذي يسير في الطريق الصحيح والمؤسسية والاحترافية ... التحية لشباب التبلدي ... وأنصحهم بالتمسك بهؤلاء الشباب وعدم التفريط فيهم حتى لا يندموا في الموسم المقبل وعند التمثيل الخارجي ... عضوا عليهم بالنواجذ فهذا الفريق يستحق الاستمرارية بذات الطريقة وبذات الإدارة الفنية ولا اتفق مع ما كتبته فاطمة الصادق بأن إبراهومة اقل قامة من هلال التبلدي وأن الفريق يحتاج لمدرب أجنبي ... وهذا الكلام لا أساس له ولا سند له طالما أن العبرة بما يقدمه الفريق من مستويات ثابتة ويكرر الفوز على أندية القمة في قلب العاصمة وفي معاقلها ؟! أي منطق يقول ذلك ؟! كابتن إبراهومةمدرب مقتدر ويعرف كيف يوظف لاعبيه حسب الإمكانيات ويعرف كيف يتعامل معهم بأسلوب أخوي وتربوي نفتقده في كثير من المدربين الوطنيين حيث الانفعال الزائد والصراخ في وجوهم بل يصل حد الاشتباك مع اللاعبين في التمارين وهذا لا يفعله صاحب الخلق الرفيع إبراهيم حسين !!
قلبي يحدثني أن هلال التبلدي سوف يظفر بكاس السودان كحدث فريد سيكون له ما بعده !! وطبعا هلالنا في بيتنا ولا عزاء للفارين .
بعد أن يفوز هلال التبلدي بكاس السودان سوف يقام كأس السوبر في استاد الجوهر في جدة ...!!! حتى لو فاز سيد البلد فلا بد كأس السوبر يكون بين بطل الدوري ووصيف كأس السودان !!!
ختاما التحية والشكر مثنى وثلاث ورباع لمولانا أحمد هارون ... هذا الرجل الذي يتابع الفريق ويرعاه بصورة مثالية فله التحية من القلب وربنا يوفقه في جعل الرياضة مكان البندقية والاحتراب في غربنا الحبيب بما يقوم به من تأسيس للبنيات التحية الرياضية !!
نرحب بالأخ الصديق الدكتور علي قاقارين ومولانا أزهري وداعة الله في دوحة العرب وقد حضرا للتجهيز والاستعداد لمعسكر نازحي دارفور في قطر .. رغم أن التسمية غير محببة للنفس فأرجوا أن يختاروا اسم أجمل من هذا !!
والله عارف المقالدا ممكن يضايق بعض قراء خواطر زول .. لكن أعذروني قلت أفرفششوية عشان يخفف لي السكري !!