• ×
الثلاثاء 3 أغسطس 2021 | 08-02-2021
شوربجي

طار الحمام وهلالين تمام التمام

شوربجي

 11  0  2701
شوربجي
طار الحمام وهلالين في تمام التمام

((())) الوصيف طار بسبب النار :

ومرحب كردفـــــــــــــــــانْ والله ما ناسيكي

كيف أنسى الدلالْ أنسى السماح الفيكي

ما يوتْ في حَشَـــــــايْ قايلاني ما طاريكي

بهــواكْ كـــــــــردفان وكتينْ يفيض واديكي

ديل أهَــــــــــلِكْ عُزازاً بالكرمْ إتحلُّوا

حين يحمى الوطيـــسْ واللهِ ما بتذلُّوا

ناسْ قدحاً كبيرْ كِتْرَ الضيـــوفْ أو قلُّوا

ديـــــــلْ ناسْ الذِّكرْ لا كلُّو تَبْ لا ملُّو

تحيه لكل اهل كرفان

تحيه للابيض الجميله

تحيه هللال الابيض وهو يصرع الوصيف مرارا وتكرارا

وكل مره علقه سخنه

وفي نشرة الساعه الثالثه عصر اليوم :

خرج الوصيف الواهن من منزله في العرضه جنوب واوصافه كالتالي :

سمين وضعيف طويل وقصير مختل العقل لابس بلوزه حمراء وسفنجه صفراء شاحب الوجه منكوش الشعر عليه آثار حريق ويحمل اوراق شكاوي تمتام ودائم التكرار ( فوزي فوزي )

من يجده يسلمه لاقرب نقطة بوليس

او الاتصال ببص الوالي

او بفوزي المرضي

وفوق الجروح التبلديه هزيمة صواريخ جديده وبلنتات كردفانيه

ومع الخماسيه القونقليزيه خماسيه اضافيه كردفانيه هارونيه

وسجل سجل يا تاريخ التبلديه اس ٢ في المريخ

وستظل الذكري باقيه في الوجدان السوداني

وكردفاني الجوه وجداني بر يدو

وموكورو الجوه وجداني بر يدو

برافو ايها الشيخ الجميل

وبرافو مهند يا ورده في القلب النبيل

وبرافو زكريا حيدر اسد التبلدي

وبرافو كل لاعب قونقليزي ابدع وامتع

وبرافو احمد هارون كبير القعده وتستاهل مولانا
وتبا للحكم الامين الهادي وقد لعب مع الوصيف بالفانيله الصفراء

فرغم سيمليشن بكري ظل رحيما ببكري

ورغم سوء سلوك بكري ظل لطيفا ببكري

وعلي كل حال فقد رد كيدهم في نحرهم

والقونقليز ملأ كل شوارع العرضه جنوب

ولابد من عرض هذه الهزائم التبلديه في معرض الخرطوم الدولي

ويجب عرضها في المعارض الدوليه

ويجب عرضها في الميادين السودانيه
ولابد من وضع لافته كبيره مكتوب عليها امسح واكشح وقشو وجيبو حي

وفعلا اتمسح المريخ

واتكشح المريخ

واتقش المريخ

واولاد هارون جابوه مقيد اليدين

لقد كتم التبلديون انفاسه

وكنا علي ثقه بانه لن يخرج سالما من اولاد احمد هارون

واضحكوا معي علي ضربة جزاء جمال سالم
لقد وجب الآن تحويل نادي المريخ الي مكتب للشكاوي
ولابد من ايقاف المريخ من التمثيل في بطولة العرب

والله حتفضحونا يا جماعه

ونحن ما ناقصين

والوحدات الاردني آخر انبساط

والمريخ فريق ضعيف وواهن

والسبب كله من الخوف

و كله من الرجفه

وكله من فوزي

وبص الوالي هو المسئول
وجمال الوالي هو المسئول

واعلام النفاق هو المسئول

ومزمل هو المسئول

وسلك هو المسئول

وابوشيبه هو المسئول

والنفرات هي المسئوله
ومول المريخ الوهمي هو المسئول
وبالامس ابلي اولاد احمد هارون بلاء حسنا

وكان لهم ما ارادوا

فهنيئا لاهلنا في الابيض

وده كله منك يا فوزي

وان تأجل الحريق الي ٢٠١٧

بس عليك الله احفظ لينا الكبريته وجالون البنزين في المخزن

والتهنئه كل التهنئه لكل عشاق هلال امدرمان

والتهنئه كل التهنئه لعشاق هلال الابيض

وما احلي لقاء الاب بالابن

وما احلي ان يهزم الاب الابن

او ان يهزم الابن الاب

ونحن حرين في بيتنا


((())) نعي اليم :

توفي اليوم بالعرضه جنوب مريخ الوالي

لقد عاني الوصيف من مرض عضال اثر تناوله كميات كبيره من عصير التبلدي

ولظروف سفر الهلال الي مدني نعتذر لكم لعدم المشاركة شخصيًّا في الدفن

سائلين المولى أن يمنَّ على الفقيد بالرحمة والرضوان،

ولكم من بعده الصبر والسلوان..

إنَّا لله وإنَّا إليه راجعون


((())) طيران بالتبلدي :

شكرا شعراء الهلال ود البشري وود المجذوب ومبروك

==

ود المجذوب

يا هلال الابيض غايتو كتر خيرك

واصل في مسيرتك وما توقف سيرك

فوزي المرضي. .ماف زولا مخوفو غيرك

مما جبت ليهو.. السيرة فكا البيرك

...

ود البشري

اوعااااك تنفعل ،،،، في الجوطة ، اقفل فمك

احسن تبتعد ،، ما تزيد مشااكلك ،،، وهمك

ابرد يا ظريف ،،،، ما تدق جرس يا عمك

هاك اشرب (تبلدي) ،،،، وبيهو ،، رووق دمك

...

ود المجذوب

اشرب يا وصيف من التبلدي البارد

انساها الهموم في الحارة خليك مارد

الخبر الوصلنا من المصادر وارد

قالو من الهلال الاصلي تيمك شارد

...

ود البشري

ياااا حليلو الوصيف ،،، الليلة راحت ، ليهوو

كورتو اتعكست ،،، والحالة صعبة ،، عليهو

عااااد يا (اب نجمة ) جمهوركم حفت كرعيهو

كتر في التبلدي ،،،، وهسة ،، هااايم بيهووو

..

ود المجذوب

وهلال الابيض..بالتاهل احقة

ابدع وانتصر قهر الوصيف واترقي

شربهم التبلدي ..ودقه تيمهم دقة

روق يا غزالنا ..كدا الوصيف بتشقي

...

ود البشري

كان احسن تزوووغ ،،، وتقول عديل مو داير

افضل من يقولو ، الليلة ،، تيمك طااااير

حذرناك قبييل ،،،، من الفريق الزاااير

كورة كردفاااان يا (اب نجمة ) ،،، سمها فااير

...

ود المجذوب

ود بشري الحبيب ..ادينا رايك هسي

ود مجذوب اخوك من الحصل متاسي

عندي سؤال وجيه ...شاغل خيالي وحسي

ليه يعني الوصيف من الهلال متدسي

...

ود البشري

شيبولا الحريف ،، ،، الفنو ما بنقااااس

دا خلى الناس تفحط ، وتفقد الأحساس

هدفو الجابو داك سبب وجع في الراس

خايفين تااااني يظهر في نهائي ، ،،، الكاس


محمد حسن شوربجي
امسح للحصول على الرابط
بواسطة : شوربجي
 11  0
التعليقات ( 11 )
الترتيب بـ
الأحدث
الأقدم
الملائم
  • #1
    علي المعيلق 10-25-2016 06:0
    اجلدوهم يستاهلوا الضرب حمام الوالي والسنة دي لا المكاتب لا الميادين جابت ليهم حاجة
  • #3
    SAYED ABDOUN 10-25-2016 02:0
    اعلام النفاق ده اسلوب شوارع وليس اسلوب زمالة اذا كنت حقاً صحفي
  • #4
    جعفر صالحين 10-25-2016 10:0
    وطار الزمالك يا شوربة ... هذا هو الخبر الذى يهمك ولكن نقول شنو لى ناس بتتدخل فيما لا يعنيه ... عجبى !!!!!!!!
  • #5
    الشيخ الحسين رشوان 10-25-2016 10:0
    اخونا شوربجي من هسع سلمت الراية وقلت الابن يغلب الاب معقولة . ده معناه ان ينطبق كل ما كنبت عن المريخ ينطبق علي الهلال . والتبلدية محمداكم ..فاذا كان المريخ ضعيف فالهلال اضعف .. ولا ادل علي ذلك صعودكم امام ودهاشم سنار بضربات الحظ وانتم الهلال مش فريق نكرة ..ثم تخطيكم اهلي شندي بالبركة .رغم ان اهلي شندي كان يلعب بالصف الثاني .. وبرضو تقولي شنو تقولي منو
  • #7
    ابواحمد المريخابي 10-25-2016 09:0
    ياكاتب المقال انت عندك فوبيا اسمها المريخ عادي تخرج أي فريق هي كوره قدم لكن لاننا في السودان غير منطقي خروج أي من هلال مريخ وهذا للأسف سبب بلاوي كورتنا المتخلفه عن باقي الدول
  • #8
    السما الأحمر 10-25-2016 09:0
    اللهم اكتب الشفاء العاجل لهذا الموبوء بداء كراهية زعيم البلد وبعدين الكرة نصر وهزيمة والدنيا يوم لك وآخر عليك والحمد لله الذي أوجد فرقا تقارع المريخ وطبعا الهلال مدعوم وخارج التنافس الشريف لذلك لا يقارن بالمريخ وفى يوم الخميس ورينا شطارتك بدون لجنة صلاح
  • #9
    السما الأحمر 10-25-2016 09:0
    اللهم اكتب الشفاء العاجل لهذا الموبوء بداء كراهية زعيم البلد وبعدين الكرة نصر وهزيمة والدنيا يوم لك وآخر عليك والحمد لله الذي أوجد فرقا تقارع المريخ وطبعا الهلال مدعوم وخارج التنافس الشريف لذلك لا يقارن بالمريخ وفى يوم الخميس ورينا شطارتك بدون لجنة صلاح
  • #10
    السما الأحمر 10-25-2016 08:0
    اللهم اكتب الشفاء العاجل لهذا الموبوء بداء كراهية زعيم البلد وبعدين الكرة نصر وهزيمة والدنيا يوم لك وآخر عليك والحمد لله الذي أوجد فرقا تقارع المريخ وطبعا الهلال مدعوم وخارج التنافس الشريف لذلك لا يقارن بالمريخ وفى يوم الخميس ورينا سشطارتك
أكثر

للمشاركة والمتابعة

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019