• ×
الإثنين 17 مايو 2021 | 05-16-2021
محمد عثمان الجعلي

فارس أم درمان لنهائي كأس السودان

محمد عثمان الجعلي

 13  0  3749
محمد عثمان الجعلي

بعد أن نامت أميرة النيل وملكت جمال السودان ( كأس الممتاز ) قريرة العين في حضن الخزانة الزرقاء المقر الدائم للكؤوس جاء الدور على شقيقتها الصغرى كأس السودان ووصل هلال العشق الجميل نهائي كأس السودان بعد أن فاز على آرسنال دار جعل بثنائية نظيفة على مدار الشوطين حيث أحرز الهدف الأول عزيز شيبولا في الدقيقة 36 من الشوط الأول وفي الدقيقة 36 من الشوط الثاني أضاف الخلوق كاريكا الهدف الثاني ، أهداف ماشاء الله زي حقنة الساعات عندها زمن محدد وكما يقول الأستاذ محمد عبد الماجد ( كل حاجة عندنا بي نظام ) ... وكان عنوان المباراة الندية والإثارة القوية وهذا هو طابع مباريات الهلال والآرسنال والحمد لله كل نقاطنا حلال وخدمة يمين وعرق جبين ، وما أجمل الحلال عندما يختلط بحبات العرق في ميدان النزال ، ونحن ننتظر من ينازلنا ، وإحتمال كبير يكون وصيف السنين لأن إتحاد التذكرجي أسامة لن يسمح لهلال التبلدي أن يكرر فوزه علي المريخ ، والمريخ إذا إنهزم بيتشلع ومازالت موقعة ذات السحاب ( أستغفر الله ... ذات الإنسحاب ) والتولي يوم الزحف !! غصة في حلوق الصفوة ، ياربي ناس المريخ ديل عملوا شنو في دنياهم يعني إذا مرقوا من ناس مهند وديكور وموكورو يقعوا في ناس شيبولا وسادومبا وبشة وكاريكا وكما يقول مثلنا السوداني ( وقعوا في حجر وتحتو دقر !! نسأل الله السلامة ) مفروض يحاولوا ينسحبوا تاني عشان أبو الهل الأيام ديل سمو فاير وفوزي المرضي جاهز موية وزيت ، ونتقابل يوم الخميس القادم في مدني ، ومدني مدينة زرقاء بالفطرة وما بتحب الخرخرة ، عاقب إتحاد اللقيمات النسور علي إنسحابه أمام هلال الأبيض بالغرامة وخصم 3 نقاط وحرمانه من اللعب في كأس السودان ولكنه أعفى إبنه المدلل ولم يحرمه اللعب في كأس السودان وهذا هو إتحاد اللقيمات الأحمر .... الذي لاتعرف خدوده حمرة الخجل ، بالمناسبة بعد خصم ( نقاط الهرولة التلاتة ) يصبح الفرق بين هلال الملايين وأقرب وصيف هو 13 نقطة و35 هدف صافي !! لذا لزم التنويه .
*** صن داونز بالأخص يهدي القمة أفضل درس
طلب مني الأخ خلف الله ود العقيدة من مريخاب خيبر عن أكتب عن فريق صن داونز الجنوب أفريقي بطل نسخة الأبطال لهذا العام حتى يستفيد الهلال والمريخ من هذا الدرس ، ومايميز فريق صن داونز هو تعامله بالإحترافية حيث نجد البطل الجنوب أفريقي ( زي حلاتنا ) طلع من دوري 16 علي يد فيتا كلوب الكنغولي ولعب دوري 16 كونفدرالية وخرج أيضاً علي يد ميدياما الغاني ولكن تم إستبعاد فيتا كلوب من المنافسة لإشراكه لاعباً غير مؤهل... وكما نعلم أن الهلال عام 2014 إشتكي فيتا في محترفه البورندي بيرورى تاجي ولم نعرف كيف نكسب الشكوى ، وصعد صن داونز بدلاً عن فيتا لدوري المجموعات حتى وصل مباراة النهائي أمام الزمالك المصري وفاز صن داونز بثلاثية نظيفة في جنوب أفريقيا وخسر بهدف في برج العرب بمصر ونال كاس الأبطال لأول مرة في حياته ومعه مليون ونص دولار !! ويقوده المدرب الوطني بيتسو موسيماني منذ عام 2012 ( لاحظ الصبر على المدرب الوطني 4 سنوات ) ... والعكس تماماً حدث في الزمالك بقيادة رئيسه الجعجاع مرتضى منصور الذى شلع الفريق من أعمدته الأساسية هذا العام حيث أعار لاعب الوسط وصانع ألعاب الزمالك محمود كهربة لفريق إتحاد جدة مقابل مليون وربع دولار وذهب الطرف اليسار حمادة طلبة للمصري البورسعيدي وأعار الطرف اليمين حازم إمام للإتحاد السكندري ، وبعد إستقالة المدرب محمد حلمي قاد الزمالك لاعبه السابق المدرب مؤمن سليمان الذي أدخل محمود عبد الرازق شيكابالا في آخر دقائق المباراة ، ولم يستفد الزمالك من خدمه نجومه أمثال باسم مرسي وأحمد توفيق وأيمن حفني ومصطفي فتحي وكل مافعله المحترف النيجيرى ستانلي هو إحرازه لهدف الزمالك الوحيد بعد أضاع مهرجاناً من الأهداف ، أما رئيس النادي مرتضى منصور فقد قال ... أي واحد مايقول الزمالك إنهزم بالسحر حا أضربه بالجزمة !! وهذه هي العشوائية في شمال الوادي وجنوبه .
*** متوكل كهربة وشيبونا هضربة
في برنامج عالم الرياضة التلفزيوني عصر الجمعة إستضاف رضا مصطفي البروف عبد الوهاب محمد الحسن الخبير في القانون الدولي ومعه المريخابي المتعصب دكتور مدثر خيري ( قانون رياضي ) وكان الحديث عن شيبون وإنسحاب المريخ من نهائي الكأس وأعجبني في البروف عبدالوهاب أنه كان يتحدث عن نقاط محددة وهي أن الإحترافية لاتعني فقط المقابل المادي وإنما قبل ذلك أن يكون هناك عقد مكتوب يوضح أن هذا اللاعب محترف وهذا مايفقده المريخ ، أظرف حاجة الإعلام السالب حاول أن يتهرب من نقطة العقد المكتوب وقال هناك عقد داخلي مع شيبون !! داخلي دي حلوة يعني حاجة ( دكاكينية ) كدة والإتحاد ماطرف فيها يعني كلام بين إتنين والتالت برة ( والتالت في هذه الحالة هو إتحاد اللقيمات ) وتاني حاجة قال البروف عبدالوهاب إن خطاب المريخ يجب أن يطالب بإعادة المباراة وليس منحه نقاط المباراة !! لكن يادكتور الناس ديل متعودين على كأس المكاتب السنة الفاتت لجنة سمير فضل منحتهم خمس نقاط !! عشان كدة السنة دي طالبوا بي 3 نقاط بس !! عملوا تخفيضات ، أما المتعصب خيرى فذكرني بالإعلام السالب والتكرار الممل والحديث عن المادة 104 التي تمنع تتويج البطل إذا كانت هناك قضية مرتبطة بالمنافسة ولم تستكمل كافة خطوات التقاضي !! وكلنا نعلم في الأصل قضية مافي وتاني حاجة لجنة الإستئنافات قالت لكم الفحص مرفوض !! تاني ( اللياقة لزومها شنو !! ) وين شفتوا ليكم لايووق أدوه كأس !! أما حكاية شيبونا ... صراحة كدة حالته أصبحت متأخرة ، كلنا عارفين السن لها حكمها !! لكن أنا ماكنت فاكر الزهايمر إتمكن منه للدرجة دي !! وسوف نورد لكم ماكتبه بخصوص الحكام ونترك الحكم للقراء الكرام ، فقد كتب شيبونا قائمة بعدد 11 حكم من المغضوب عليهم من قبل الإعلام السالب وطالب بإبعادهم من إدارة أي مباراة طرفها المريخ وإليكم قائمة المغضوب عليهم 1/ المعز أحمد 2/ معتز عبد الباسط 3/ محمود شانتير 4/ صديق الطريفي 5/ عادل مختار ( حكم نيالا الذي ظلم الهلال في مباراة التبلدي ) 6/ السموأل محمد الفاتح 7/ الفاضل أبوشنب 8/ الفاضل عبد العاطي 9/ الجيلاني أبو الحسن 10/ عبد السميع فضل الله 11/ المساعد هيثم النور !! والله زي ما أقول لكم هذا ماكتبه عجوز الصدى ( شيبونا ) ... تخيلوا لو نادي الهلال قدم أيضاً قائمة من الحكام المغضوب عليهم وكذا أهلي شندي والخرطوم الوطني وبقية أندية الممتاز !! كيف يكون حال الرياضة في بلادنا مع العلم أن حياة الحكام أصبحت في خطر بسبب تحريض شيبونا ومجلس الصحافة والمطبوعات ( أضانه طرشاء ) ... هل نحلم بالإحترافية وأن تصل أندية هلال مريخ لكأس الأبطال !! الحلم ملك مشاع ولا ضريبة عليه ، ولكن الإعلام السالب يهدم كل جميل في حياتنا الرياضية .
*** همسة الوداع
حبايبنا الحلوين كملوا الخرخرة كلها وكرت شيبون أصبح محروق ومهاجمة الإتحاد والحكام أصبحت لعبة مكشوفة وعقلاء الصفوة ملوا مثل هذه الألاعيب السمجة ، ونقول للجيران الواضح مافاضح لو ناوين تزوغوا من مباراة مدني أدونا خبر !! مدني ماقريبة زي أستاد الخرطوم ، مافي داعي نفقع مشوار على الفاضي ، والجرسة والخرخرة مافي جنوب الوادي بس ، مرتضي منصور بعد خسر فريقه من صن داونز قال الحكم الغامبي بكاري جاساما قبض عشرة ألف دولار لهزيمة الزمالك وحرمنا من ضربتي جزاء !! وبهذه المناسبة نهمس في أذن الإعلام الأحمر إنتوا الجعجاع مرتضى منصور ده مريخابي ولا شنو ؟ مجرد سؤال .

امسح للحصول على الرابط
بواسطة : محمد عثمان الجعلي
 13  0
التعليقات ( 13 )
الترتيب بـ
الأحدث
الأقدم
الملائم
  • #3
    ابوحسن 10-25-2016 08:0
    لك التحية استاذنا محمد عثمان طبعا ناس الصفوة عايزين يفصلوا اي حاجه لمصلحتهم لذلك يلفوا ويدورا مع اتحاد اللقمات الاحمر
    وجزاك الله خير يا استاذنا الجعلي علي ايضاح المادة 104 كنا بنفتش فيها عشان ناس الصفوة ازعجونا عليها
  • #4
    ابو حازم 10-25-2016 08:0
    لك التحية الحبيب محمد عثمان وانت تتحفنا بعمودك الرائع في محبوبتنا كفر ووتر، وحقيقة هلال السنة دي فوق عديلو صعد للنهائي وساق معاه ولدو الصغير وترك الحسرة لناس الخرخير.
    منتظرين منك مقال بطعم التبلدي يا ود عثمان ، مع العلم ان التبلدي أصبح من المشروبات الغير مرغوب فيها في العرضة جنوب، لذا لزم التنويه ههههه.
    وتحياتي
  • #5
    ابو حازم 10-25-2016 08:0
    لك التحية الحبيب محمد عثمان وانت تتحفنا بعمودك الرائع في محبوبتنا كفر ووتر، وحقيقة هلال السنة دي فوق عديلو صعد للنهائي وساق معاه ولدو الصغير وترك الحسرة لناس الخرخير.
    منتظرين منك مقال بطعم التبلدي يا ود عثمان ، مع العلم ان التبلدي أصبح من المشروبات الغير مرغوب فيها في العرضة جنوب، لذا لزم التنويه ههههه.
    وتحياتي
  • #6
    باكمبا 10-25-2016 07:0
    هههه مدثر خيري المريخي المتشنج الفاشل لا يعرف أدبيات الحوار قال ليبرر العك والتفسيرالمعوج لبعض ما يحفظه ويردده في الونسات ليخم العوام والرجرجة أن القانون الرياضي يختلف عن القانون المدني ،،،، ههههههه بالله ده درس القانون وين وهولا يعرف ما هية التأهيل المطلوب لممارسة مهنة القانون وماكان لخريج من الأزهر أن يعمل بالأمم المتحدة وما كان للسوداني أن يعمل بالخليج وهكذا فالقانون يختلف كماقال الخبير التجهيلي المريخي في التلفزيون القومي بالصوت العالي ووقاحة بدون خجل، كسرة: بالتشنج الشفناه منو ومقاطعتة للضيف المحترم لاآخر بعدائية شديدة أشك في أنه مارس مهنة المحاماة أو غيرها أمام المحاكم عشان كده شبك في حكاية خبير قانون رياضي ، ودي برضو أشك في أنه كسب اي قضية رياضية ومايقوم به هو استعراض لكسب شعبية بين جهلة الدلاقين، وما درى المسكين أن سقط سقوطا كبير ززز ههه قال أيه القانون الرياضي يختلف عن القانون المدني،،،،،
  • #7
    فيصل الاقرع 10-25-2016 12:0
    تر / الخرطوم / تأهل هلال الابيض لنهائي كاس السودان بفوزه على المريخ 3-2 عقب تعادله معه بدون اهداف في المباراة التي جمعتهما مساء اليوم باستاد الخرطوم ليضرب موعدا مع الهلال في نهائي كاس السودان
    فررررررررررررررررررررر
  • #8
    فيصل الاقرع 10-25-2016 12:0
    اها يا الجعلي حبايبك لا مدني لا سوبا ماوصلنها ام درمان ذاتها مارقين مخلينها طااااااااااااااااروووووووووزا استريح اك راحه في الاستديو التحليلي المذيع سأل زيكو قال له جبره اعمل شنو في الشوط التاني حسب خبرتك ومرئياتك اتلفت يمين يسار قال لي اشيل الكوره ويهرب
  • #9
    وردة 10-24-2016 11:0
    يا حليلو المريخ يا استاذ محمد اتغطى بشوالوتو الجايي بيها واندفن بالرمال .
  • #10
    فيصل الاقرع 10-24-2016 07:0
    سلام جعلينا بقيت زي السيره تجي العصر فوقك ود بدر وبعدين شابكنا بخبايبك الحلوين بتجوا مدني والا مابتجوا اجو مدني اسووا شنو اجو اشجعوا هلالين وانا ما قلت ليك تاني الشائب العايب تاني ماتدخله لينا في رحيقنا دا في الرحيق زي الكسبره في شايك المنعنع وحبيبنا ود عقيده داير باخبار سن داونز شنو دا يا ودعقيده مابلعب في التأهيلي علي شان كدا ما حاقابل المريخ والمريح جدو التاهيلي وبعدين قلت السنه الفاتت ادوهم 5نقاط والسنه مطالبين ب 3 نقاط لا مش 3نقاط لانه نقاط سيد البلد مازي نقاط التانيين نقطتنا بعشره امثالها والصلاه في الحرم مضاعفه اضعاف انت قبل كدا كلمتنا عن صلاة الحرم في المفكره الطولنا منها شديد
  • #11
    الامين عبد القادر السمانى 10-24-2016 07:0
    التحية والسلام اخوى الجعلى ونبارك لكل اسياد البلد بالتتويج والوصول لنهائى كأس السودان وان شاء الله المرة القادمة كأس الاميرة الافريقية -- الحلم الذى طال انتظاره ولن يتبدد ابدا طالما لدينا عزيمة الابطال ---
    اول مرة خلف الله المعذبنا يقول كلام صالح وهذا ما نحتاجة كمثال قوى هذا الفريق الصاعد ولاول مرة ويحقق البطولة ونحن من سنة حفر البحر ونصل مرتين ولم نحقق الحلم ونتمى ان نعى الدرس من هذا الفريق الجنوب افريقى وبمدرب وطنى صبروا عليه --
    هل نصبر نحن على المدربين عاميين وليس اربعة اعوام هنا تكمن المعضلة ؟؟؟
    وانت مستعجل ليه يا حبيب ممكن النهائى هلالى خالص ازرق وابيض بس ؟؟؟ وما تفقع مرارتك ساكت ---
    ودمتم للوطن والهلال فى حفظ الرحمن ورعايته
  • #12
    منعم ابوناصر 10-24-2016 06:0
    عاد يا الجعلى فقعت مرارة حبايبك بعدين لما تقولهم موقعة ذات السحاب او الانسحاب دى بطير جنهم لان المواقع البتشهد ليهم كثر وماموقعة زيكو ببعيد وطالما بسمعو في كلام شيبونا ومعاط السلوك بتكتر المواقع لكن ياالجعلى الله يجازى محنك من وين جبت الاسم والتانيه مثلك ينطبق عليهم بس اول مره اسمع فيهو وقعو في حجر وتحتو دقر وفعلا وشيبونا قال ماعايز هذا العدد من الحكام قوليهو مافى داعى للشتح البعرى دق جيبك وجيب ولى نعمتكم انت ومزمز وجيبو حكام اجانب لكن انتو عارفين بالاجانب لن تربحو
  • #13
    ودعقيده خلف 10-24-2016 05:0
    حبيبنا لك التحيه دوما لاتفرح كثيرا الفرح بعمل بعبعه القابله مدني تكرر الدمازين تاني يا حمبرا قباض الطير
أكثر

للمشاركة والمتابعة

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019