• ×
الخميس 4 مارس 2021 | 03-04-2021
محمد عثمان الجعلي

الوصيف الشاكي أسرع من كاكي

محمد عثمان الجعلي

 11  0  3091
محمد عثمان الجعلي

قضينا ليلة ساهرة تضمنت محاسن ... من كل روضة عينة ... ومن كل عين زهرة ... رأينا حفلة ساهرة ... إتوجت قياصر ... وإتلألأت كواكب من أطيب العناصر ... الروضة لابسة حلة ... من الزهور طرائق ... بيها المكان تحلّا ... والجو نسيمو رائق ... والغيم نشر مظلة ... ما أحلى ديك مناظر فيها البيان تجلى ... بين مسفرات أهلة ... ونخبة عرب أجلاء ... ناس عليها فرحة ... وناس طريحة جرحى ، عندما نسمع كلمات الشاعر ود الرضي الجميلة يذهب الخيال مباشرة لهلال العشق الجميل بطل السودان لعام 2016 الذي حسم أمر المنافسة قبل جولتين من نهاية دورى الوطن الممتاز وعادت عروس السودان وبنت النيل وكأس الممتاز للجوهرة الزرقاء المقر الدائم للكؤوس ، أعذروني ياشباب عشان عايزين نظبط الرأس بي كباية شاي بنعناع جدة الظريف ، عدنا ليكم ياحبايبنا ... نعم عاد الحق السليب لأصحابه وزهق الباطل إن الباطل كان زهوقا ، عندما ينتصر الهلال يستبشر الصباح ويغرد الفأل الحسن ويبتسم الأطفال وتتفتح الأزهار وتطرب عذارى الحى ، كيف لا يكون ذلك كذلك والهلال هو محبوب الملايين ومعشوق الجماهير الأول في أرض النيلين ، فالهلال هو وجه السودان المشرق في أبطال أفريقيا وهو سيف الوطن البتار وفوقو سمحة الهيبة والقدلة وسمحة القدلة فوق مختار ، عندما قرأت تشكيلة الهلال في كفر ووتر ( أنا ذاااتي جاتنى خوفة ) ، مكسيم أفضل حارس مرمى في الدوري السوداني يحرس العرين الأزرق وفي الدفاع حسين الجريف والعميد مساوي الحريف وفي الأطراف أطهر العنيد وبوي الصنديد وفي الوسط الداهية بشة والصاقعة نزار وأبوعاقلة وشيبولا وفي الهجوم كاريكا وسادومبا ( معقول يافوزي !! حرام عليك !! الوصايفة كان هربوا ليهم حق !! ) ... فيصل الأقرع من هلالاب جدة لفت نظري لمسادير شعر جميلة لشاعر الهلال محمد أحمد نقدالله تقول هذه المسادير
*** بسم الله إبتديت قولي البيوقد نار...فوق سيد البلد سيد الكفر والتار
*** مريخكم زماان جهز جناحو وطار ... وفريق الهلال يتمنوه ناس نيمار
*** الممتاز قبيل حاسمنو شلنا الكأس ... والهلال في الكورة عندو أساس
*** من سيد البلد كل الفرق تنداس . وجمهورو العريض الليلة مرفوع رأس
*** في الملعب عصر راجين وماجيتونا .. ماقلتوا الهلالاب أصلو مابلاقونا
*** فالحين في الكلام في الكورة مابترجونا ..كررتوا الشريط بي زيكو ذكرتونا ، ولقد جادت القريحة بالمسدار التالي
*** فريق النجمة على الدوام يولول باكي
*** تحلف تقول إنضرب بي قنبلة ناجازاكي
*** لايوووق في العرائض كل يوم مقدم شاكي
لكن في الشراد بصراحة يسبق كاكي
*** الصغار إنضربوا والكبار هربوا
مشكلة لجنة تسيير المريخ أنها أصبحت تأتمر بأوامر الإعلام السالب الذي توغل في مجلس الإدارة وأفقد المجلس هيبته كمجلس من المفترض أن يكون بقامة أندية القمة ، فالبيانات الكثيرة المكررة والشكاوي الفالصو تخصم من رصيد الصحافة الصفراء ( إن كان لها رصيد ) فكيف يكون الحال عندما تصدر من مجلس إدارة !! تخيلوا عندما نزل الفارس الأزرق للنزال في ميدان الشرف والتنافس الشريف لم يجد الخصم الذي ملأ الدنيا ضجيجاً وتوعد وهدد ولم يجد الهلال إلا طاقم التحكيم بقيادة صديق الطريفي وحتى جمهور الصفوة الذي حضر للميدان تفاجأ بإنسحاب فريقه !! صراجة ( الخلعة كعبة ) وده كلو من فوزي المرضي يا أخي مالك ومال الحريق !! ( كان تشرك ليهم بي موية السكر ) كان تقول ليهم بنلعب ليكم بالشفع الصغار ، لكن في مشكلة أولادنا الصغار غلبوا صغار المريخ بثلاثية سادومبا الصغير عشان كدة لما الصغار إنضربوا الكبار هربوا !! تخيلوا من قولة تيت غاب أخوان عمر بخيت ، ومن الضهر غاب أخوان ضفر ، ومن كاريكا ظهر غابوا أخوان مصعب عمر ، وعندما حمي الوطيس غابوا أخوان بخيت خميس ، معقول الشراد في جنوب العرضة ماعيب !! الوصيف إرتعدت فرائصه ياجدعان ، وين أخوان البنات العلموا الجبل الثبات !! والجري ده ماحقي حقي المشنقة والمدفع أب ثكلي وحالف باليمين أعز بنات أهلي ، طيب ماهو رأي إتحاد اللقيمات في هذا الهروب الكبير وماذا سوف يفعل لإبنه المدلل !! أنا حدى الآن ماقادر أتخيل الجماعة هربوا أو شتتوا !! وبي لهجة أهل الخليج ( الرجاجيل إنحاشوا ) بالمناسبة عند المصريين الجري ماعيب !! الجري نص الجدعنة !! لذا لزم التنويه .
*** رسائل رياضية غنائية من ثنائي العاصمة
نريد أن نرسل 3 رسائل رياضية غنائية من كلمات الشاعر علي شبيكة وغناء ثنائي العاصمة من أغنية ( يانا الزمان ياناس ) الرسالة الأولي من مجلس إدارة نادي المريخ وهو يلوم إدارة الإتحاد العام التى حرمته من كأس المكاتب وهي التى سمكرته له العام الماضي بلجنة سمير فضل وتقول الرسالة *** يانا الزمان ياناس مالكم نسيتونا ... بدلتوا ريدنا بي ناس لي الدنيا سبتونا !! بس يعني واللّا خلاص بقى ماتعرفونا !! يانا الزمان ياناس ، والرسالة الثانية من إتحاد أسامة وهو يلوم المريخ بإنسحابه من مباراة الكأس وأن هذا ليس العلاج الصحيح ... وتقول الرسالة *** يانا الزمان ياناس عشنا المحبة سواء ... وروينا بالإحساس أجمل غرام وهوى ... كل ما الليالي تمر نزداد لهيب وجوى ... بس زي غرامنا محال الفرقة تصبح دواء ، والرسالة الأخيرة من شركة سوداني وهي تكرم الهلال الذي نال الكأس خدمة يمين وعرق جبين وتعتذر عن الظلم الذي حدث للهلال العام الماضي وأن سوداني سوف تظل شركة محايدة وهي سعيدة أن ترى الهلال على منصة التتويج التى حازها بجدارة وتقول الرسالة ***
يانا الزمان ياناس بس السنين بتمر ... تسقي السعادة في كأس ... لي ناس بتسقي المر *** والطال غيابو وطال لو إنكتبلو عمر ... بيجئ يوم ويلاقي الناس الشوفتهم بتسر .
*** همسة الوداع
حبايبنا الحلوين سرقوا مننا لقب الزعيم وقلنا عوجة مافي وكما نعلم أنه حتى في السعودية لقب الزعيم خاص بالهلال ، كمان لقب الزعيم يفرض عليك إلتزام ماممكن تكون زعيم في الهروب !! ( كان تفرشوا فرشة عبدالله ود سعد وكان ماعارفين فرش كيف !! أسألوا حفيده الأرباب حسن محمد سعد من مريخاب الطائف ) من الله خلقنا ماشفنا زعيم في الشراد إلا في جنوب العرضة ، المريخ إنضرب بثنائية ساسا وشيبولا في 20 يونيو وعمل نائم وصحا فجأة وقدم خمس عرائض في هذا الإسبوع ليمنع تتويج الهلال وكلها تم رفضها ، ياحليل لجنة سمير فضل كانت تدعمكم وتديكم دفرة !! لوكانت موجودة كان المريخ تاني شال كأس المكاتب وعمل حفلة بي إنصاف مدني وفرفور ، وبهذه المناسبة نهمس في أذن الإعلام الأحمر إنتوا السنة دي ياكافي البلاء مافي فرفور لي المدفور ولا شنو ؟ مجرد سؤال .
امسح للحصول على الرابط
بواسطة : محمد عثمان الجعلي
 11  0
التعليقات ( 11 )
الترتيب بـ
الأحدث
الأقدم
الملائم
  • #1
    البابا 10-20-2016 02:0
    هههههههههههههههههههه فن وإبداع...
    لقب الزعيم ياجعلي اشتروهو من د. الباقر يوم عمل جريدة الزعيم تينا بالهلال والطيب عبدالله فما كان من الوالي إلا أن (حقص) ليها وبدأ في الإغراء إلى أن اشتراها ومن بعده لعبدالصمد يعني زعامة بقروش
  • #2
    ابو حازم 10-20-2016 02:0
    مشكووور يا ابو عثمان على هذا المقال الرائع كروعتك دائما عندما يكون الحديث عن العشق الجميل ومحبوب الجماهير.
    فعلا الشردة كعبة خاصة عندما تكون من من يسمون انفسهم بالزعماء، وزي ما بقول عرابهم عندما يتحدث عن فريقه وشجاعة فريقه الذي أطلق عليه "أبزرد" لكن ابزرد شرد .
    انسحاب ليس له أي مبرر سوى الخوف من هزيمة كبيرة أما الأقمار المنتشية.
  • #3
    ابو حازم 10-20-2016 02:0
    مشكووور يا ابو عثمان على هذا المقال الرائع كروعتك دائما عندما يكون الحديث عن العشق الجميل ومحبوب الجماهير.
    فعلا الشردة كعبة خاصة عندما تكون من من يسمون انفسهم بالزعماء، وزي ما بقول عرابهم عندما يتحدث عن فريقه وشجاعة فريقه الذي أطلق عليه "أبزرد" لكن ابزرد شرد .
    انسحاب ليس له أي مبرر سوى الخوف من هزيمة كبيرة أما الأقمار المنتشية.
  • #4
    الامين عبد القادر السمانى 10-20-2016 11:0
    التحية والسلام اخوى الجعلى كنا نمنى النفس بمتعة ومشاهدة لنهائى فريد ولكن تأتى الرياح بما لاتشتهى السفن وبينى وبينك كانوا عاقلين جماعتك الوصيفاب وحسبوها صاح لان البشتنه والبهدلة كانت حصلت وحريق فوزى ماخاب ابدا وهنالك حريق اكثر من كدة يا جماعة الخير وكل عام اعملوها ونحن قاعدين ان شاء الله الا تقولوا ---
    غايتو هروب زى ده ماحصل ولن يحصل صغار وكبار يا كافى البلاء مافى عاقل فى البلد ؟؟؟
    وننتظر كاس السودان ونمنى النفس يا ودالاقرع كان نجد الجماعة فى الملعب !!!
    ودمتم للوطن والهلال فى حفظ الرحمن ورعايته
  • #5
    ابوحسن 10-20-2016 10:0
    لك التحية استاذنا محمد عثمان ونتقدم بتهنية الي بطل السودان في الميدان ابو الهل وعاد الكاس الي مستحقي البطولة بعد الانسحاب القشيم من اهل الصفوة وعدم المبالة من اتحاد المجاملات واللقيمات وخرج جمهور المريخ خزين من الملعب عكس
    جمهور الهلال الذي عاش نشوة النصر مع الاعبين واستلام الكاس مع ادراة النادي وكان التتويج والفرح بكاس والبسمات الجميلة
    عكس اهل الزوقة والزنقة
  • #6
    سيف الدين خواجة 10-20-2016 08:0
    اخي الحبيب مبروك الا قليلا سه بدري برضك خليك بارك عشان نبارك !!! (حمدو في بطنو )
  • #7
    فيصل الاقرع 10-20-2016 12:0
    سلام جعلينا اليوم نحن مكبرين المخده ولينا اكتر من اسبوعين الكوره بقت عندنا ونسه ساي وكاسها في جيبنا واغنية ثنائي العاصمه فصلتها عليهم تفصيل اديك العافيه وحرام عليكم الجماعه ديل ما هربوا بص الوالي اتعطل عليهم في الطريق والحكم ما صبر اكان صبر شويه للدوره الاولي الحايه كان جو
    وشوف ود ﺍﻟﻤﺠﺬﻭﺏ قال شنو ﻓﻲ ﻭﺻﻒ ﺍﻟﻬﺮﻭﺏ
    ...
    ﻳﺎ ﺍﺧﻮﺍﻧﺎ ﺍﻟﻬﺮﻭﺏ .. ﺍﺳﺒﺎﺑﻮ ﻟﻴﻬﺎ ﻇﺮﻭﻓﺎ
    ﺍﺻﻠﻮ ﺍﻟﻨﺠﻤﺔ ﺍﺿﺤﺖ ﻟﻠﻮﺻﺎﻓﺔ ﻭﻟﻮﻓﺔ
    ﺷﻦ ﻓﺎﻳﺪﺓ ﻧﻬﺎﻳﺔ ... ﻣﻦ ﺍﻻﺻﻞ ﻣﻌﺮﻭﻓﺔ
    ﻭﺍﺻﻼ ﺭﺍﺱ ﻭﺻﻴﻔﻨﺎ ﻋﺪﻡ ﺯﻣﺎﺍﻥ ﺍﻟﺼﻮﻓﺔ
    ...
    ﻭﺍﺣﺪﻳﻦ ﻗﺎﻟﻮ ﺷﺮﺩﺓ ..ﻭﺯﻭﻟﻨﺎ ﺍﺻﻼ ﺯﻭﻟﺔ
    ﻭﺍﻟﺴﺒﺐ ﺍﻻﻛﻴﺪ .. ﺍﺭﺍﺀ ﻓﻼﻥ ﺍﻟﺤﻮﻟﺔ
    ﺑﻌﺪ ﺷﺮﺏ ﺍﻟﺘﻠﺒﺪﻱ ..ﻭﺟﺒﻨﺎ ﻟﻴﻬﻮ ﺍﻟﻜﻮﻻ
    ﺯﻭﻟﻨﺎ ﺷﺮﺩ ﻋﺪﻳﻞ .. ﻟﻴﻪ ﻳﺎ ﻋﺰﻳﺰ ﺷﻴﺒﻮﻻ
    ...
    ﻋﺸﺎﻥ ﺳﺎﺩﻭﻣﺒﺎ ﻻﻋﺐ .. ﻳﻌﻨﻲ ﺗﺠﻔﻠﻮ ﺟﻔﻠﺔ
    ﺍﻟﻨﺎﺱ ﺍﺻﻠﻮ ﺟﺎﻳﺔ ﻣﻦ ﺍﻻﺻﻞ ﻣﺤﺘﻔﻠﺔ
    ﻣﻮﻟﺪ ﻭﺍﻧﺘﻬﻲ ﻭﻣﺎ ﺷﻔﻨﺎ ﻟﻴﻬﻮ ﺍﻟﻘﻔﻠﺔ
    ﻛﻬﺮﺗﻮﻧﺎ ﻳﺎﺥ ..ﺿﻴﻌﺘﻮ ﻟﻴﻨﺎ ﺍﻟﺤﻔﻠﺔ
    ...
    ﻳﻮﻡ ﻗﻠﺒﻮ ﺍﻟﻤﻜﺎﻥ ...ﻗﻠﻨﺎ ﺍﻟﻮﺻﻴﻒ ﺑﻴﻜﺎﻭﻱ
    ﻗﻠﻨﺎ ﺍﻟﺮﺩ ﻛﺴﻞ ﻛﻢ ﻓﻴﻬﻮ ﺷﺎﻓﻮ ﺑﻼﻭﻱ
    ﻓﻲ ﺍﻟﺨﺮﻃﻮﻡ ﺷﺮﺩ .. ﺣﺼﻞ ﺍﻟﻬﺮﻭﺏ ﺍﻟﺪﺍﻭﻱ
    ﺗﺎﺭﻳﻬﻮ ﺍﻟﻮﺻﻴﻒ .. ﻣﻦ ﺑﺪﺭﻱ ﻗﺮﺭ ﻭﻧﺎﻭﻱ
    ...
    ﻣﺎ ﺩﺍﻡ ﺩﻳﻤﺔ ﺧﺎﺳﺮ ﻭﺩﻳﻤﺔ ﻣﺎﻛﻞ ﻧﻴﻤﺘﻚ
    ﻭﺍﺻﻼ ﻣﻦ ﺯﻣﺎﻥ ﻣﺴﺨﺖ ﻋﻠﻴﻨﺎ ﻫﺰﻳﻤﺘﻚ
    ﺍﻫﺮﺏ ﻳﺎ ﻭﺻﻴﻒ .. ﺗﺐ ﻳﺎﻫﺎ ﻓﻌﻼ ﺷﻴﻤﺘﻚ
    ﻭﺍﻳﻪ ﻏﻴﺮ ﺍﻟﻬﺮﻭﺏ ﺍﺻﻼ ﻣﻘﻠﻞ ﻗﻴﻤﺘﻚ
  • #8
    ibrahimdaffala65@gmail.com 10-19-2016 08:0
    والله يالجعلى كتاباتك عن الهلال عطر فواح يعطرنا . الوصايفة حقو يحمدوا الله على الوصافة ( قربت تطير )
  • #10
    منعم ابوناصر 10-19-2016 06:0
    لكن ياالجعلى ماحيرتنا عديل مقال نبداهو من الاول نرجع تانى نعيدو حيرتنا ونسيتنا الجماعه الشردو وفعلا الجرى نصف الجدعنه وجماعتك اجدعنو اوى بعدين انت قائل لو لعبو الكوره كان فعلا يرو قنابل نجازاكى بس دى بالغت فيها والله ماقصرت مع حبايبك الحامطين وانا بقول للوصيف الدائم كما قال شعرنا العبادى فارقك الثبات فارق درب ابواتك
  • #11
    احمد قاسم ابوزيد 10-19-2016 05:0
    لك التحية أستاذنا محمد عثمان مفروض بعد م تجيب الشاي وتتحصن من ناس العارضة جنوب
    عجني مسدار الشاعر محمد احمد
    الممتاز قبيل حاسمنو شلنا الكاس
    ومخبور الهلال فى الكوره عندو اساس
أكثر

للمشاركة والمتابعة

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019