• ×
الخميس 28 مارس 2024 | 03-27-2024
بلل

البشوف فرحتكم يقول شلتوا الممتاز

بلل

 0  0  1337
بلل


دي الكورة كدا.
ما بتقدر تقول حاجة.
نعمل شنو يعني.
معقولة يا ناس شندي.
تضيعوا فرصتكم.
إنتو كنت لاعبين مع الوصيف.
أي الوصيف زاتو وبي صفاتو.
الآرسنال ما كان في يومه.
برضو يستحقوا التحية علي المجهود.
أدخلوا الوصيف في حتة ضيقه.
حاول يهرب وما يلعب.
دا خوف شنو دا البخليكم تعملوا كدا.
اهلي شندي يا مرعب.
الجماعة مشوا للاتحاد عشان يكتب ليهم هروب رسمي.
التاريخ ما ح ينسي ليكم الهروب دا.
هروب زي الهروب.
اهلي شندي موقفوا كان ثابت من البداية.
قال هو منتظركم في اي مكان.
جيتو بيلعب معاكم.
ما جيتو برضو منتظركم.
التاريخ بيحفظ اي حاجة.
زي ما حافظ ليهم تسعة سان جورج.
سباعية الوحدات.
احتكار سيد البلد للممتاز.
وإنتو ما قادرين تعملوا حاجة.
***
ضيعت فرصتك يا كلتشي.
مافي زول تاني كان ح يحصلك.
قلنا ليك كان عندك تلاتة اقوان تاني.
رصيدك ح يزيد.
بس نقول شنو.
دي الكورة كدا.
طبعا الوصيف دخل في فرحة مبالغة.
ما مصدقين.
نحن زاتو اتلخبطنا.
قلنا يا ربي شالو الكأس ونحن ما عارفين.
صحي الكلام دا يا أهلة.
نحن كنا بنحلم.
الكأس دا ما حقنا.
شالوه ناس الوصيف.
أسي نبارك ليكم ولا نعمل شنو.
بس جدول الترتيب بقول غير كدا.
نحن خلونا.
كدي انتو راجعوه كويس.
شوفو الاول منو.
وإنتو وين.
والفارق كم نقطة.
ركزوا لينا في الفارق دي كويس.
أكييييد جاكم إحباط لمن عرفتوا الحقيقة.
دي الحقيقة المرة.
***
بس في حقيقة تانية.
وأصعب من ديك.
إنتو ح تلاقو سيد البلد.
أي دي الحقيقة.
ما تطيروا عيونكم كدا.
شفتو كيف الكلام دا.
بطل الدوري.
المرعب الحقيقي.
إنتو بس تعالوا.
ما تعملوا لينا حركات.
وتقولوا عندنا خطاب عايزين نفحصوا.
ولا شيبوب ما لاعب الهلال.
شوفوا ليكم حاجة تانية.
نحن عايزين نكمل فرحتنا بكأس الممتاز.
طبعا ما بتكمل إلا بالفوز عليكم.
تعالوا بس عشان تاخدوا المعلوم.
***
مباراة القمة قربت.
عايزين نكون في قمة الجاهزية.
غالبين يعني غالبين.
في اي حتة.
الخرطوم او ام درمان.
حتي لو لعبناها في شارع الزلط.
برضو ح نغلبكم.
سيد البلد جاهز موية ونور.
***
كردنة ح يصل الخرطوم الليلة.
نرحب بقائد الامة الزرقاء.
سيقود معركة القمة بنفسه.
يا وصيف أرجي الراجيك.
المحاربون القدامي بعملوا في شغل روعة.
فوزي وطارق ومبارك.
افضل من كدا مافي.
الثلاثي المقاتل.
لازم يستمروا مع الجهاز الفني الاجنبي.
الجيل الحالي من اللاعبين محظوظ للغاية.
الثلاثي ما ح يبخل علي اللاعبين بالخبرات.
***
برضو فارقتو الوصافة.
ما بتشبهكم.
ولا جاية معاكم.
ريكاردو ما قرأ الوصيف كويس.
كان تسأل ابراهومة والغاني ابياه.
عارفين الوصيف كويس.
الوصيف فيهو نقاط ضعف كتيرة.
خاصة في الدفاع.
المرور من دفاع الوصيف أسهل من تخطي ركشة وانت راكب ليك هايس.
سيد البلد منتظركم.
تعالوا من بدري.
نحن الهلال بنريدو جد.
الهلال مفخرة داخل وخارج الجوهرة.
(صمت اخير) ..
البشوف فرحتكم يقول شلتوا الممتاز.
امسح للحصول على الرابط
بواسطة : بلل
 0  0
التعليقات ( 0 )
أكثر

للمشاركة والمتابعة

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019