• ×
السبت 6 مارس 2021 | 03-05-2021
بلل

عفواً .. الرجاء الإسراع في التعاقد مع غارزيتو لهذه الأسباب ..!!

بلل

 0  0  948
بلل

سمعنا عن مفاوضات العجوز غارزيتو.
ما كعب كويس والله.
بقدر يفيد الهلال كتير.
الراجل دا داهية جد.
وشاطر كمان.
حقق ألقاب كتيره.
وغير كدا قاد مازيمبي للفوز بأبطال افريقيا.
وحافظ افريقيا شبر شبر.
والاحلي من كدا عارف ليك الوصيف دا خانه خانه.
تاني ما عندنا مشكلة.
بس مشكلتو بحب القروش.
من حقو.
عشان شاطر.
عايز الناس تقيمو التقييم الصااح.
فعلا يستحق كدا.
نحن مع المجلس في اعادة غارزيتو.
قلنا زمان عايزين مدرب اجنبي شاطر.
وقدير.
وبعرف أساليب اندية افريقيا كويس.
وعنده تجارب سابقة في افريقيا.
وغارزيتو تتوفر فيهو كل الصفات دي.
ونحن ضد المدرسة العربية.
خاصة شمال افريقيا.
دي غير بترجع الهلال للخلف ما بتعمل حاجة.
امسكوا في العجوز دا.
بيقدر بيبني الفريق البنحلم بيهو.
وممكن نشيل معاه لقب افريقيا.
كفاية تجربته مع الوصيف.
وصل معاه لدور الاربعة لأول مرة في تاريخه.
يا مجلسنا الهمام سريع جيب لينا غارزيتو.
****
الوصيف خبرو شنو.
عامل كيف مع ناس اهلي شندي.
لسه ما جايين يلعبوا.
قالوا ح يقدموا الليلة طلب الفحص.
فحص آلي.
يا اخوانا انتو ما بتفهمو عربي.
كدي خلوا الاتحاد العام ولا الهلال.
شيبوب قال ما عايزكم عديل كدا.
قال العطالة ولا ألعب في الوصيف ثانية واحدة.
تاني في شنو.
انتو بتجرو ورا لاعب قال ما عايزكم.
أها قولو رجعوه ليكم تاني.
الود ما بقدر يلعب ليكم.
إنتو شوفو معركة النمور دي أول.
دي ناس اهلي شندي عندهم حياة أو موت.
وانتو لسه بتجروا ورا شيبوب.
احسن ليكم انتبهوا لي كورتكم.
ما تنسوا سيد البلد في انتظاركم.
ح تمشوا منو وين.
والله انتو وقعتكم وقعة.
النمور وسيد البلد.
ممكن هنا تقدموا شكوي ضد الاتحاد العام.
ليه يخلي ليكم ديل في الآخر كدا.
دا مقصودة.
مقصودة وعاجباني.
مبروك امير كمال وعلي جعفر.
ياااااا حلاوة.
نرحب بعودة أفضل مهاجمين في السودان.
ح ينضموا لأخطر مهاجم كمان.
صلاح نمور.
امير كمال وعلي جعفر وصلاح نمر أي مدرب في العالم يتمني وجود ثلاثي الرعب في تشكيلته.
ثلاثي الهجوم المرعب.
مبروك عليكم يا ناس الآرسنال.
نحن خلونا.
كلامنا براه.
أمبارح برضو عمكم بتاع الطعمية أداني ليها في يدي.
قلت ليهو الوضاع ما اتصلحت.
قال لي والله ما بتتصلح إلا بعد الدوري ينتهي.
معقولة دورينا يعمل أزمة في الورق.
نطالب جمال الوالي بتشييد مصنع للورق.
حقكم براكم.
عشان ما تعملوا أزمة في الورق.
اولادنا يمتحنوا كيف تااني.
خلوا التلاميذ ينتبهوا لقرايتهم بس.
ما يبقوا زينا كمان.
شايلين هم حاجة اصلو.
إتفقنا.
***
الازرق لعب كورة ودية مع كوبر.
طبعا الغرض ما الفوز بس.
تجهيز اللاعبين ويكونوا لسه في اجواء المباريات.
دا كلو عشان حضرة الوصيف وقف لينا الدوري.
ما مشكلة.
نحن بنلعب كورتنا بس.
كوبر من الاندية الجيدة.
حاليا بيتصدر دوري الاولي بالخرطوم.
بالتأكيد تجربة افادت الجهاز الفني.
يا ريت كمان يلعبوا كورة تانية وتالتة قبل مواجهة الوصيف.
يجب اختيار السوكرتا لأداء التجربة.
السوكرتا مولع في التأهيلي.
قرب يرجع الممتاز.
دعواتنا لناس بورتسودان بالتوفيق.
نحن الهلال بنريدو جد.
الهلال مفخرة داخل وخارج الجوهرة.
(صمت اخير) ..
عفواً .. الرجاء الإسراع في التعاقد مع غارزيتو لهذه الأسباب ..!!
امسح للحصول على الرابط
بواسطة : بلل
 0  0
التعليقات ( 0 )
أكثر

للمشاركة والمتابعة

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019