• ×
الإثنين 17 مايو 2021 | 05-16-2021
بلل

يا كليتشي .. ما قالو عليك حنين ..!!

بلل

 0  0  979
بلل

بكرة يوم النمور.
ويوم كليتشي كمان.
الوصيف موقفوا ما معروف.
موقف الحاج يوسف.
قالوا نحن ما منسحبين.
يعني قاعدين.
بس تاني قالوا ما جايين.
دي نفهمها كيف.
كدي وقعوها لينا حبه حبه.
ما منسحبين وقاعدين.
بس ما لاعبين.
وعايزين اعادة طلب فحص قضية ولدنا شيبوب.
انتوا لسه عندكم أمل.
شيبوب دا انسوه.
مش قال ما عايزكم.
تاني في شنو.
خلوا اموركم دي.
كدي انسوا حاجة اسمها تسجيلات وتعاقدات.
شيبوب قال ليكم عديل ما عايزكم.
تاني في شنو.
انتوا بس ما عندكم قضية.
حركتكم بقت واضحة.
وظااااهره كمان.
دا الخوف ما أكتر.
الخوف من افتراس النمور و.......
دي ما قدرت اتمها ليكم.
عارفين كان كتبتها ليكم.
تاني ح ترجعوا وتنسحبوا جد جد.
ما هظاااااار.
اي ح تقابلوا سيد البلد.
اها بعد دا انسحبوا ساي.
خلونا في كليتشي دا.
الزول دا جايب براه 38 هدف في الممتاز.
أقل من اهداف الوصيف في الممتاز بشويه.
ايواااااا يادون عرفنا مالكم ما عايزين.
دا كلو من كليتشي.
دا مش كان ولدكم.
وكان برضو ولدنا.
نجن الجبناه البلد دي.
عشان الهلال دا مكتشف النجوم.
واي لاعب عندكم من اكتشافات الهلال.
الله يخلي ليكم الهلال.
بس كليتشي دا قال اهدافوا ديك كلها كووووم.
والعايز يجيبها في الوصيف كوم تااااني.
زي الزول البكون عنده كم ولد.
كتاااااااار كدا.
بس عندو ولد واحد من الكتار ديل بريدو شديد.
او عنده معزه خاصة.
خلي اولادو الكتار كلهم.
وبريد واحد بس.
اها شفتو كليتشي عامل كدا.
اهدافوا العايز يجيبها في الوصيف ح يكون عندها طعم خاص.
بالغت يا النيجيري.
ما عندك عُشرة.
معقولة انت كنت بتاكل وبتشرب في بيت الناس ديل.
دا برضو الوصيف.
يوم كنت بتلعب عشانو.
خليك حنين.
ما قالو عليك حنين.
طيب نان وينها الحنيه.
طيب ما دام جابت ليها جرسه.
نقول ليكم الكلام الجد.
كليتشي دا لاعب محترف.
لا بعرف ثنائي العاصمة ولا الولد دا ولدنا.
يعني بلعب عشان يثبت وجودو.
اللاعب دا عارفين انفجر كدا مالوا.
قال طوالي الناس كانت بتقول ليهو يا ماسورة يا ماسورة.
طبعا ما فهم ماسورة يعني شنو.
سأل واحد من بلدياتو بفهم كلامنا دا.
قالو ماسورة دي معناها انت انتهيت خلاص.
قال ليهو قالوا لي كدا.
خلاص خليهم تاني يجبوا الآله الحاسبة.
يحسبوا تاني ساااااي.
فعلال النيجيري دا انفجر ليك في الممتاز.
دي كلها زعله منو بس.
يعني كان بلعب وبالو رايق كان حصل شنو.
طبعا ماسورة دا قالوها ناس الوصيف للاعب.
عشان لعب معاهم وما نجح زي ما نجح في الهلال.
بس عليكم الله يا هلالاب ما تقولو لي كليتشي الزعلان دا من ماسورة.
انو ناس الوصيف ديل القالو عليك كدا.
هم ما ناقصين.
عايزينهم يجوا يلعبوا عشان الموسم ينتهي بخير.
اي خليكم ناس بتحبوا الخير.
حالهم الايام دي يحنن.
بس ما اظن النيجيري يكون حنين.
عارفين ليه.
عشان شباك الوصيف عندها طعم خاااص.
ولسه تاني في ناس كاريكا وسادومبا.
وما تنسوا الريدة.
عايز يؤكد انو هدفوا في الخرطوم ما صدفة.
حظك يا الريدة.
انت منو الزيك.
كان احسن ليكم تنسحبوا ساااااي.
مالكم ومال العذاب دا.
الجماعة كانوا مجتمعين امبارح من الساعة 2 بالنهار.
لحدي الساعة 2 صباحا.
وقالوا لينا كلام ما فهمنا منو اي حاجة.
معقولة يا جماعة لكن.
عايزين نفهم انتو جايين وح تقابلوا كليتشي ولا مالكم.
عايزين ناس نمور شندي يطلعوا بيان برضو.
يا ربي ح يلقوا ورق وين.
ما مشكلة المهم يطلعوا بيان.
ان شاء الله يكتبوه في حيطة.
والبيان دا يا شقي يقولوا فيهو شنو.
انت كدي اصبر دقيقة بس.
أها صبرنا.
بس البصبر الوصيف شنو.
ناس شندي يكتبوا في بيانهم انو كليتشي ما لاعب.
وبس.
وبي كدا الوصيف من الليلة بجي الملعب.
وبطلع بيان تاني.
تاني شنو قول دا رقم 88.
الله يجازي محنك.
عايزين نفهم قصة انو ملعب المريخ جاهز لاستقبال مباراة اهلي شندي.
وبعد ساعات قليلة ما جاهز لاستقبال مباراة سيد البلد.
وح يلعبوا مباراتهم مع الهلال في الخرطوم.
دي ما عايزه ليها فهم.
نحن برانا فهمنا اي حاجة.
والله انت كبير يا هلال.
عذاب شديد.
نبارك لجمع الاندية الفازت في التأهيلي.
المنافسة دي مولعه نار والله.
السوكرتا والشرطة القضارف والاتحاد ودمدني والنهضة ربك وحي الوادي نيالا وتريعة البجة والدفاع الدمازين.
ليكم منا كل التحايا ونتمني ليكم كل التوفيق.
نحن الهلال بنريدو جد.
الهلال مفخرة داخل وخارج الجوهرة.
(صمت اخير) ..
يا كليتشي .. ما قالو عليك حنين !!.
امسح للحصول على الرابط
بواسطة : بلل
 0  0
التعليقات ( 0 )
أكثر

للمشاركة والمتابعة

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019