# كما كان متوقعا ومستوطنا فى قناعة كل صاحب عقل وان لم يكن ملما بمنطوق القوانين فقد رفضت لجنة الاستئنافات الطعن المقدم من النادى الأحمر فى قانونية مشاركة لاعب هلال السودان شرف شيبوب فى المباراة التى جمعت بين الناديين فى بطولة الممتاز وحسمها هلال السودان بهدفين.
# كان متوقعا وراسخا فى قناعات الكل ان الشكوى التى دفع بها النادى الأحمر ليظفر بنقاط مباراة خسرها داخل الملعب لا تساوى الحبر الذى كتبت به بل هى شكوى كان يعلم النادى انه لن يكسبها وذلك لأنه لم يستند على مادة فى اللوائح أو القوانين الدولية أو المحلية تثبت صحة مزاعمه فى عدم قانونية انضمام اللاعب الى هلال السودان كما عجز عن تقديم مستند يثبت ان اللاعب لا يحق له المشاركة لعدم استفائه فترة الايقاف المزعومة وهذا ما دفع اللجنة المنظمة ومن بعدها لجنة الاستئنافات لرفض الشكوى
وسيرفضها الاتحاد الدولى لكرة القدم(فيفا) أيضا وليس بحثيات اللجنتين المحليتين(المنظمة والاستئنافات) وانما بحثيات ان اللاعب شيبوب فى الأصل لا علاقة له بالنادى الأحمر بعد ان تحول من لاعب هاو الى محترف وسيان ان كان التحول بالانضمام لنادى شبيبة القيروان التونسى أو هلال السودان لأن الناديين سجلا اللاعب كمحترف ورفعا من قيمته ورفع قيمة اللاعب شرعته(فيفا) ودعمته فى حال تحول اللاعب من هاو الى محترف بل ومنحته حق توقيع عقد الاحتراف دون الرجوع الى ناديه الذى انخرط فى صفوفه كهاو مع دفع مبلغ مالى للنادى كحق فى رعايته للاعب # هذه حقيقة يعلمها النادى الأحمر الذى دفع بشكواه مستندا على منطوق المادة (55) المحلية التى تعنى اللاعبين الهواة ولا علاقة لها باللاعب شيبوب الذى أصبح محترفا بموافقة ناديه الأول أو بدون موافقته سيان
# للأسف هم يعلمون ان قضيتهم لا سند قانونى أو منطقى لها بل لا وجود لها ولكن للأسف أرادوا خداع وتخدير جماهير النادى المغلوبة على أمرها وزعزعة الاستقرار الرياضى خاصة فى شق منافسة الممتاز من ثم خلق أزمة تمهيدا لنسف الموسم الرياضى بعد ان تأكد للجميع وبكل الحسابات والقراءات والتوقعات والارهاصات حسم هلال السودان لبطولة الدورى الممتاز عن جدارة واستحقاق ومن داخل المستطيل الأخضر لعبا ونتيجة وليس من المكاتب وبداعوى باطلة كما فعلوا هم فى الموسم الماضى.
غيض
# شئ طبيعى ان تحذو لجنة الاستئنافات حذو اللجنة المنظمة وترفض استئناف نادى لجنة المسالمة لأن النادى لم يستند على مادة فى القانون تمنع انتقال اللاعب الى نادى شبيبة القيروان التونسى من ثم لهلال السودان.
# أما ايقافكم للاعب شيبوب فكأنه لم يكن الا اذا وقفتوه فى محطة جاكسون
# يجب ان يعلم جمهور نادى نجمة المسالمة المغلوب على أمره ان الزوبعة التى أثارها ناديه الغرض منها تخديره لينسى ضعف مستوى مجلسه وفريقه
# أيضا قرار الانسحاب الغرض منه شغل وتخدير جمهور النادى المكلوم المقهور المعذب المغلوب على أمره لأنه لا توجد قضية للنادى ثم ان لجنة التسيير مهامها المكلفة بها محددة ومن بينها تسيير النشاطات بالنادى الى حين انتخاب مجلس وليس لديها سلطة قرار تجميد نشاط أو انسحاب.
# انتو لو كان واثقين من الشكوى كان هاجمتوا قناة النيل الأزرق عشان نقلت احتفال هلال السودان الحفيل الحافل بمناسبة فوزه ببطولة الممتاز باستاده وهاجمتوا المذيع وهاجمتوا الفنانين والشعراء والعازفين والساوند؟
# خلاص نحن بنعمل احتفال تانى بالبطولة فى شارع النيل وبنجيب الفنانين ليونارد ريتشى ومايكل انثونى وجون ترافولتا وبقدم لينا الحفل بان غى مون وبتنقلوا قناة السى ان ان وبنجيب عشاء ضلع وكنافة وسلطة فواكه.
# كمان بنخلى شيبوب يرقص مع بان غى مون وهيلارى كلينتون للصباح
# أمشوا قولوا ليه ما جبنا الفنانين ناس عوض زردية وعواطف بلنجات.
# وقولوا كمان سعدية جنبات ست الشاى شغالة فى شارع جبرة صينية البيبسى وما مفروض تجى تبيع شاى فى شارع النيل بنص القواعد العامة
# من هسع جهزوا شكوتكم فى جابسون سلمون لأنو الزول ده لبس الكسكتة
# وطبعا انتو عارفين أى زول بلبس الكسكتة بلحق شيبوب الساعة ستة.
# نحن من أول قلنا ليكم أنسوا موضوع الشكاوى ده لأنو ما بجيب ليكم مركز الوصيف من المكاتب زى المرة الفاتت جاب ليكم البطولة من مكتب مولنا سمير فضل بى منطق اذا قالوا للفنانة سعاد جخانين ما ممكن تغنيوه.
# خلاص بعد ده موضوع الوصافة طلع من يدنا وبقى فى يد أهلى شندى
# بطلوا حكاية الانسحاب دى وأمشوا أقعدوا وضربوا شوفوا أهلى شندى عندو كم نقطة وبعد يغلبكم ونحن نغلبكم الأهلى شندى بفوتكم بى كم نقطة.
# أمشوا أقعدوا براحة وضربوا نقاطكم بى مهلة وخلوا بالكم طويل ونحن ذاتو بنجيب حلة كوارع وجك بزيانوس بارد ونقعد نحسب معاكم نقطة نقطة
# واذا كمان متمسكين بالانسحاب نحن ما بنضغط عليكم بس بنشيل حلة كوارعنا وبرميل الكركديه الجبناهو ليكم وبنبرع بيهم للنعسان وصلاح نمر