قدم بدلاء الازرق عرض راقي أمام الاولاد.
النتيجة ما مهمه بس ما نخسر.
حسمنا اللقب وبقينا البطل.
تاني ما عايزين حاجة.
الهلال البطل وحسم اللقب وحاليا بنجهز للبطولة الافريقية.
الناس لسه بتلعب وبتنافس وخايفه علي المركز التاني.
معقولة في زول بخاف علي الوصافة.
طيب الهلال دا ح ينافس منو تاني.
تاني إلا ننافس الرديف
الرديف حقنا.
الوصيف ح ينافس علي السادس والسابع
أهلي شندي تاني ما بنقدر.
ما تنسو هلال الابيض.
والخرطوم الوطني في بالي.
يا الوصافة مع السلامة.
آرسنال شندي بعد عودة الارباب نحن زاتو نعمل حساب بطولتنا.
اول مرة في التاريخ فريق بقولو عليه قمة يخاف من فريق يليه في الترتيب.
دي اصلو ما لاقتنا.
خوف شديد.
اصدار بيانات وتهديدات عشان الخوف من اهلي شندي.
يا جماعة الاهلي دا صعد للممتاز ليهو كم سنة.
حالتكم بالجد بقت صعبة.
عافي منك يا الارباب.
اعجبني هدف مهند الريدة.
الولد دا مهاجم خطير بس ما لقي فرصة في عهد بلاتشي.
بلاتشي كان عندو نظرية بالاعتماد علي اللاعبين الخبرة.
واستمروا لفترة طويلة في تشكيلة الازرق.
عايز يكسب وطبعا دا من حقو.
الخواجة كان عندو رأي.
بس الريدة مهاجم خطير خطير.
شاهدته يلعب في كوبر.
والريدة لازم يستمر.
يا ربي آخر اخبار الانسحاب شنو.
الجديد شنو يا جماعة.
الوصيف خلاص مشي من الممتاز.
امبارح كان عندهم حاجة كدا بقولو ليها اجتماع تاريخي.
المجلس يلتقي بالجماهير.
طبعا وأكيد اصدروا بيان جديد.
بياناتكم دي كملت الورق.
مصنع الورق قال الرووب.
نحن غايتو مستمتعين بالفيلم دا.
شلنا الدوري ومفتاح الممتاز.
تاني نقعد نتفرج بس.
الدوري خلاص انتهي ومفروض زاتو تاني يقيف.
البطولة شالوها يلعبوا عشان شنو.
مفروض الهلال يمنح اللاعبين اجازة.
شباب الهلال تمام تمام.
مستقبل الازرق بخير اذا حافظنا علي اللاعبين الشباب.
بس اصبروا.
الصبر كويس.
الوصيف لو ما انسحب ح نقابلوا برضو بتشكيلة امبارح.
الخرطوم الغلب الوصيف بهدف الامير صلاح أمبارح نجا من هزيمة.
الخرطوم في اليوم داك ضيع مهرجان اهداف.
والازرق باللاعبين الشباب اهدر مهرجان اهداف.
بالمنطق والحسابات تشكيلة امبارح ح تغلب الوصيف كم.
نحن نغلبكم وانتو طلعو بيانات.
اي هزيمة عايزه بيان.
الوصيف حالو اصبح حال.
لو في اتحاد عام قوي كان نزلكم للدرجة الاولي من اول بيان.
فوضي هي.
بس نقول شنو.
الاتحاد العام دا لازم يمشي.
بيان الوصيف حول سحب الثقة من الاتحاد كلام ساي.
لو الاتحاد العام دا بتعامل بالقانون كان نجي استاد الخرطوم من عصراً بدري.
لكن نقول شنو.
التغيير مطلوب يا أهلة.
الاتحاد العام دا نحن عايزنو يمشي جد جد.
جادين ما بنهظر.
عشان الكورة في البلد دي تمشي صااح.
نجي لمجلس الهلال الهام.
احسموا لينا المدرب الاجنبي من بدري.
التخطيط الجيد طريق النجاح.
الريس قال لو ما احرزنا لقب ابطال افريقيا في 2017 تاني ما نحققوا.
عشان كدا لازم نخطط صاح.
احسموا ملف المدرب الاجنبي سريع.
ما تنسوا التعاقد مع ثلاثة مهاجمين من العيار الثقيل.
طبعا محترفين اجانب.
المحلي دا خلاص انسوه.
اتحسم تاني في شنو.
الهلال مفخرة داخل وخارج الجوهرة.
(صمت اخير) ..
بيانات الوصيف عملت أزمة في الورق.