• ×
الجمعة 29 مارس 2024 | 03-28-2024
شوربجي

يا فوزي حرام عليك ما تحرق الوصيف

شوربجي

 12  0  3359
شوربجي

((())) ويا فوزي لا تحرق الوصيف :

وبعد ان قضي الامر

وطارت الطيور بارزاقها

يلا يا جماعه نصحح اعوجاج الكرة السودانيه

ونحاكم الهلال والحكام والاتحاد والجوهرة الزرقاء والبقيه

ونحاكم الشركة الصينيه

ونحاكم شيبوب وجابسون و فوزي المرضي في المحكمة الدوليه

ونحاكم كردنه وعماد الطيب وشبشه والادارة الهلاليه

ونحاكم الذراع الطويل وصاحب العماره في جوبا والملكيه

ونحاكم الطابق الثالث والرابع والخامس والسابع ونحاكم الاونطجيه

وعشت يا مريخ موفور القيم قيم

ناهض العزة خفاق العلم علم

خطوك الوثاب في ركب الأمم امم

كجناح النسر يجتاح القمم قمم

ويا فوزي حرام عليك ما تحرق الوصيف

وخليهو عايش ممكن بكره يصبح نضيف


((())) يا من تنطقون القرآن غرآن :

اهل المريخ لا عاجبهم الهلال

ولا عاجبهم كتاب الهلال

ولا عاجبهم جمهور الهلال

ولا عاجبهم جوهرة الهلال

ولا عاجبهم اسانسير الهلال

ولا عاجبهم كشافات الهلال

ولا عاجبهم باص الهلال

ولا عاجبهم اسد الهلال

ولا عاجبهم كردنة الهلال

ولا عاجبهم شيبولا الهلال

ولا عاجبهم سادومبا الهلال

ولا عاجبهم كاريكا الهلال

وشاطرين في الترصد للاخطاء اللغويه

وقالوا كردنه قال بنزينه بدل بنزيمه صاحب الجنسيه الفرنسيه

ما جمالكم الوالي قال : قال الله تعالي ( العارف عزو مستريح ) القناة الفضائيه

وان كانت الاخيرة اكبر جرما واثما وهي تضيف آية جديدة في القرآن الكريم والعياذ بالله

وفي النهايه كلها اخطاء بشريه

والمفترض تصحيح اخطاء اللسان اليوميه

والشائعه في نطق القاف غينا

وبغباء شديد ينطقون القرآن غرآن

و ( القليل ) ( غليل )

و(القمه العربيه) ( غمة العربيه )

ويصنفون خلق الله ده صحفي وده ما صحفي

وده عربي وده ما عربي

يا اخي انت منو او كما قال القذافي من انتم ؟؟؟؟؟

و ما الغضاضه ان يكتب المهندس و يكتب الدكتور و يكتب الكناس ويكتب الغفير

المهم الفكرة والمهم الرأي

وكم والله اتمني ان اكتب بالرطانه الحلفاويه

وما ضروري الدخلاء يفهموا ما نكتب لان البلد بلدنا ونحن سودانيه

وليذهب ناس (جفعر سالهين) الي الجحيم من حبشه وارتريا ودول عربيه

وليعودوا لاوطانهم الاصليه

وبالمناسبه ما في حاجة اسمها صحفي كبير و صحفي صغير بعد الشبكة العنكبوتيه

وبالله عليكم من هي الجهة التي تنصب هؤلاء كبارا

وفي بلد كالسودان يئن اهله في بؤر التخلف والجهل

ورحم الله فنان السودان الاول وهو يتأسف ويتأسف ومن ناس ديل

وا اسفاي .

وحاتكم انتو وا اسفاي ..

وا اسفاي ...

إرادة المولي رادتني وبقيت غناي ..

اسوي شنو ..

من المكتوب اسوي شنو

براهو الواهب العطاي ..

منو ؟؟؟؟؟؟

منو - اليقوم يساهر الليل

يسافر فوق جناح الشوق

يكوس نجماً بعيد ضواي ..

منو ؟؟؟؟

منو إذا وصفولوا خط كنتور تلاقي

خطاهو

مع الحردلو في الدوباي

وا أسفاي ..

بديع الدنيا

كل الدنيا وا أسفاي ..

عشان خاطر عيون

حلوين

وا أسفاي

منابع الطيبة متجاورين

وتسامحين

في السمحين

واسفار فوق صبي العين

معاك سلامة يادنياي

يا دنياي ..

بتنكد وتوسد

وسادة شوق

بنوم مرتاح وخالي البال

وتاني وتاني عهد صباي

عشان ما تبكي ببكي انا

ببكي انا

وحاكي الطرفة في نص الخريف بكاي

وطبولي تهف جبال الشيف

خايف في العذابي الريد

ومتوكل عليك

يا الله دافر الريد

فريق البسمة يلمح لي

بتتفتح مشاد الريد

واحسك جوة

زهرة فيها صوت الناي

وا أسفاي ..

وحاتكم انتو وا اسفاي


((())) وجابسون ابن ام جابسون ولدنا :

وكما توقعنا فلقد كان كردنه يقصد جابسون وليس بايسون

وكان يقصد انه سيتصور مع جابسون

ولو قال كردنه داير رمضان يعني هو داير رمضان جابسون

ولو داير اوكراه يعني داير اوكراه جابسون

ضربا كردنه اشبه بضربات تايسون

وافهموها بقي

لقد بدأ تشليع الوصيف علي الرصيف

وده هو الشغل النضيف

والبادي اظلم يا من سجلتم بكرونا بالتزييف

كردنه لحمو مر وقلنا ليكم بطلوا التخريف

قلتو التحدي ابقوا مارقين لان الحكايه ما حتقيف


((())) المدفور زعلان :

حرام عليكم يا قناة النيل الازرق كده زعلتو علينا المدفور

كيف تعملوا حفلة للبطل وما تراعوا الشعور

وكيف تعملوا اغاني والعاب ناريه وبهجه وسرور

والجماعه يا حسرة في بيوتهم نايمين من بدري وطافيين النور

وما تزعلوا سنقيم لكم سهرة وصافه مدنكله في قناة ساهور


محمد حسن شوربجي



امسح للحصول على الرابط
بواسطة : شوربجي
 12  0
التعليقات ( 12 )
الترتيب بـ
الأحدث
الأقدم
الملائم
  • #1
    أبو زبيدة 10-05-2016 11:0
    والله أوفيت وكفيت ... يا شوربجي ..
    لكن أقولك ديل كان تجرهم في الشوك ما يكفيهم ..
    (جيقة تجي)
  • #2
    ابو علي 10-05-2016 09:0
    وا اسفاي يا حاردلو ديل سمعوا الغناء ودفنوا معاني القصيدة وا اسفاي . يا شوربجي يالله خليك في هلالك وما تكتب في الأدب واللغة ومبروك عليك دعم عادل مختار وسموال وووووووووا هههههههههههههه
  • #3
    كمبارس أفريقيا*تمامة عدد 10-05-2016 08:0
    بسم الله ماشاء الله وتبارك الله واللهم لا حسد
    نحنا عاجبنا شىء واحد ***الصفر الدولى*** نسأل الله أن يديمه عليكم الى يوم الدين اللهم أدمه صفرا وأحفظه لهم من الزوال
  • #4
    بابكر عوض الشيخ 10-05-2016 08:0
    الله عليك يا شوربة والخلاصة دائما في الشوربة بدون مكعبات ماجي كيل بمكيالين وقطع الأسلاك التي تقطعت بها الأسباب أسلوبك الرصين الظريف ونارك الهادئة جعلتهم يستوون ولغتك لا يجاريها أحد فأنت من أهل الحضارة الترهاقية وحرارة القلب النوبية وعقيدتك الهلالية التي ترجم النجوم وتزيل الهموم جعلت الكل حولك يقول أنت الهلال أنت الآمال أنت كل شيء تمام سر للأمام وحطم الأقزام
  • #5
    محمد 10-05-2016 02:0
    استغرب من بعض الناس يسبون شوربجي ويومي يقرأوا مقالاته ويعلقوا عليها ،،، واصل شوربه وإلى الأمام
  • #6
    محمد 10-05-2016 02:0
    يا زول خليك من العارف عزو مستريح ،،،، جمال قال في نفس اللقاء ربنا قال ولا تأخذوا الناس بالشبهات وقبل يومين مزمت أبو القاسم في لقائه مع حاتم التاج وأحمد عطا المنان رئيس أهلي شندي شغال لينا طول البرنامج ده حديس هلالاب ده ما حديس أهلاب والمشكلة إنه بيسخر من الجوهرة الزرغاء ههههه وما بعرف الفرق بين حديث وحديس هاهاها
  • #7
    انور التاج - ودسليم 10-05-2016 01:0
    يا جماعة ممكن اى حد يكتب زى ما عايز كلام خارم بارم ويقول انا صحفى وما هى شروط القبول كى اكتب وهل كل حد صحفى يا جماعة حرام عليكم كل من هب ودب عمل فيها صحفى لازم تكون هناك شروط لامتهان مهنة الصحافة ولها قوانين رادعة يتقيد بها الصحفى هريتونا وعملتو لينا سكر وضغط ووجع قلب
  • #8
    منعم ابوناصر 10-05-2016 09:0
    تسلم استاذى الغالى شوربجى كايد الوصايفه حتى وصفوك بالاجنبى @@@@ اذا اتتك شتيمه ناقصه من وصيفى فأعلم بأنك كامل وانك بتشجع سيد البلد @@@ وسير استاذنا شوربجى ولا تنظر للحاقدين والمسبطين الوصايفه وياجبل مايهزك ريح
  • #9
    oaltahiir 10-05-2016 08:0
    هو التسجيلات الباقي ليها كم يوم

    كأس الدوري باي باي

    كأس السودان في قاعة الانتظار

    كلها مؤمنه
    دحين نتفرغ للتسجيلات

    و ربنا يستر من الهضربة

    لله درك شو

    الذباب في ايجازة
  • #11
    د الشريف 10-05-2016 08:0
    لم ارى او اسمع فى حياتى فريق تمكن من (إعلامه) الإحساس بالدونية مثل الهلال .. كلام مكرر وممجوج لإثبات علو كعب الهلال .. مع ان الحقيقة واضحة وجلية ولا تحتاج الى كثير عناء .. الهلال فريق يحقق البطولات الداخلية بمعاونة الحكام وشارك فى كل المنافسات القارية والأقليمية واستعصت عليه وحصاده صفر كبير .. لم يجدوا بطولات او انجازات فلم يجدوا امامهم غير التبخيس .. العالم النمساوى الشهير كالهير والمتخصص فى علوم التلكينيزيا يفسر انعدام ثقة الفرد بنفسه بانها شعور خفى بالدونية يظهرها من خلال ابراز سلبيات اخفاقات وسلبيات الآخر .. أقرأوا مقالات مستر شوربة لتتيقنوا من هذه الحقيقة !!!
  • #12
    sahir 10-05-2016 07:0
    والله الشبكه العنكبوتيه بااالغت معانا لمت لينا كل الاوساخ والغبار والذباب الميت والغريبه فاكر نفسه حي وخلت كل فاقد تربوى يواسى راسه براس ناس تعبت وتعلمت وامتهنت مهنه وجاي تقول مافى فرق بينى وبينهم !! عجايب والله
أكثر

للمشاركة والمتابعة

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019