• ×
الخميس 22 أبريل 2021 | 04-21-2021
شوربجي

الناس القيافه فاقدين الوصافه

شوربجي

 14  0  2019
شوربجي


خرجت الوصافه من منزل ذويها بالعرضه جنوب واوصافها كالتالي :

طويله وقصيره

ضعيفه وسمينه

لابسه فستان احمر

وشبشب اصفر

من يجدها الاتصال بمركز اللقيمات العام طريق المطا

ووَصف يوصف وصيفا

و جمعها وُصَفاءُ

والمؤنث وصيفة

والجمع وصيفات

ووصيف الأميرِ هو التابع له
والوَصِيفُ هو : الخادمُ ، غلامًا كان أَو جارية .

والوَصِيفٌ فِي القَصْرِ هو الخَادِمٌ

والوصيفه في القصر هي الخادمه المقربه

ويقولون جَاءتِ الوَصِيفَاتُ بِالأَطْبَاقِ .

ويقولون وَصَلَتِ الأَمِيرَةُ بَيْنَ وَصَائِفِهَا

وفي السودان ولاول مره نشهد حربا ضروسا علي الوصافه

ويا شماتة ابله ظاظا فيا اذا ضاعت مني الوصافه

والوصافه خط احمر بالنسبه للوصيف وكل شيي والا الوصافه

وبالروح بالدم نفديك يا وصافه

ولا افراط ولا تفريط في الوصافه

وكل بص الوالي في الاتحاد العام من اجل العسوله الوصافه

و٢٨ عضو في التسيير سيقاتلون من اجل الوصافه

والعارف عزو مستريح سيعمل علي استعادة الوصافه

ولا لهاتريك كلاتشي حتي تعود الوصافه

ولا لسفر جمال سالم حتي لا يبهدلنا المعز وتروح الوصافه

ووفد الوصيف اقتحم الاتحاد العام وده طبعا من اجل الوصافه

والوصيف يهدد بالانسحاب وطبعا من اجل عيون الوصافه

والوصيف لا يرضي الضيم وطبعا من اجل الوصافه

وخرج عصام الحاج مكشرا وهو يهدد ويتوعد وذلك خوفا علي الوصافه

ومن يتلاعب بالمريخ لم يولد وسنعض بالنواجز علي الوصافه

وموروثات الوصيف لا يمكن التلاعب بها فلا تفريط في الوصلفه

ونحن حنقلب عاليها واطيها دفاعا عن الوصافه

ومقال ناري للمنسق الاعلامي خوفا علي ذهاب الوصافه

وتعنيف ميشو من اجل ابقاء جمال سالم خوفا من المعز وكلاتشي وذهاب الوصافه

وامير كمال وعلي جعفر راجعين من اجل الوصافه

وممكن تراوري يرجع من اجل عيون الوصافه

واثارة قضيه شيبوب القصد منها الاستعداد للقتال من اجل الوصافه

ونحن سننقذك من قضية الفساد يا اسامه عطا المنان بشرط ما تروح مننا الوصافه

وعلي الدوله ان تحمي المريخ من الكاردينال الرهيب ويا حليل الوصافه

كل ما في الامر اخوتي الرغبة المريخيه الاكيده في المحافظه علي الوصافه

الوصافة التي كانت بالنسبه للمريخ ( كخه ) اصبحت عزيزه يتقاتل عليها الناس وتحيا الوصافه

اقبلوا يا وصيفات الاميره

اقبلوا يا وصيفات الاميره

المسا هذا الزفاف

وافرشوا (ازرق) السجاد

كمل الله حسن وعفاف

كل من حضر الزفاف

وحسنها بحر ما له ضفاف

وغار منها ضي القمر

اقبلوا يا وصيفات الاميره


((())) مسرحيه رائعه لشعراء الهلال :

اسم المسرحية : البحث عن شكوي
قام وفد من المريخ بزيارة مكاتب الاتحاد العام طلبا للتاجيل وحفاظا علي الوصافة
..
ود المجذوب : في دور وفد المريخ
ود البشري: في دور معتصم جعفر
سوهندا : في دور سمير فضل
.
ود المجذوب (وفد المريخ )
يا ناس معتصم نجمتنا طالع عينا
نحن مهددين ..يا ريت تاجلو لينا
رضينا نكون وصيف ..وافقنا واتماشينا
الا نجي التوالت ..ما عصرتو علينا؟؟
.
ود البشري (معتصم جعفر)
احبابنا الزمان ،،، ،،، مكتبنا فاتح ليكم
شرفتونا تب ،،، يا اخوانا مرحب بيكم
الموسم قفل ،،،، واتقصقصن جنحيكم
بنسوي المتاح ،،،، والباقي غايتو عليكم

سوهندا (سمير فضل)
مرحبتين سلام خشو المكاتب جوه
قبال الفريق يهلك يقع في الهوه
نبشتن بالهلال نعمل عليه فتوه

والكاس حقكم بنشيلو ليكم قوه
.
ود المجذوب (وفد المريخ)
انت الاتحاد .. الفي الرياضة امير
جيناك بالعجين جاهز بدون تخمير
لخيناهو ليك وجهزنا للتحمير
ممكن لو سمحتو ..تشوفنا لينا سمير

ود البشري (معتصم جعفر)
ما بنفع سميير ،،،، ما الباقي تحصيل حاصل
بينك والهلال ،،، يا ( اب نجمة ) كمين فاصل
بنشووفلك طريقة ، ان شاء الله بيها تواصل
بس ناكل (اللقيمات ) ،، شان نشوف الحاصل

سوهندا (سمير فضل)
خلي الجقلبه و في الحاره نحن معاكا
قشقش دمعتك إستنى ماتتباكى
قرار الشكوى جاهز ونحن ديمه وراكا
نهديك النقاط وفر تعب مرماكا

ود المجذوب (وفد المريخ)
شوفو لي طريقة الكورة شان تتاجل
الملعب محفر ..او عديل ما اتنجل
وقفو لي كلتشي وقولو تب ما اتسجل
حا تضيع الوصافة اذا سمير ما اتعجل

ود البشري (معتصم جعفر)
معصور الفريق ، في استادو باقة حريقة
نجامتو انطفت ،،، ما شفنا تاني بريقا
اولاد شندي عاوزين يمرقوهو ،،، سليقة
الحقو يا سمير ، شوف ليهو اي طريقة

سوهندا (سمير فضل)
عندنا حل سريع يانجمه اقيفي دقيقه
لي ناس الهلال بنشوف وسيله معيقه
نديك نقطتين ونجازف اي طريقه
تبتهج النجوم سرعه ويضوي بريقا

ود المجذوب (وفد المريخ)
معليش يا سميري اذا عصرنا عليكا
اقلع لينا ستة عشان نفاخر بيكا
كان عزيتنا جد ماف حاجة تغلي عليكا
بنجيب ليك بدل صحن اللقيمات كيكة
..
ود البشري (معتصم جعفر )
ما تشيل هم دحيين ،،،، بكرة النقاط حيجنك
الاستاذ سمير ،،،، في شغلو ديمة محننك
هسة بجيييهك ،،،، تب ما بخيب ،،،، ظنك
اسرع يا سمير ،،،،،، ورينا يا زووول ،، فنك
.
سوهندا (سمير فضل)
بديك إقتراحي ،،، وليك حلولي مفيده
بنجيب النقاط يانجمه ليكي اكيده
من دون إجتهاد نديك هدايا عديده
كورة القمه ديك بنجيبا تاني نعيدا

ود المجذوب (وفد المريخ )
كورة القمة صعبة مع صعابا وهولا
تمسكني الهموم..كل ما يقرب حولا
عيدوها بشروط وان كان سيصعب قولا
لا سادومبا يلعب ..لا عزيز شيبولا


((())) الرديف شوط والشباب شوط :

اقترح ان يلعب الهلال مباراة المريخ بالرديف والشباب

الرديف شوط

والشباب شوط

وارحموا عزيز قوم ذل


محمد حسن شوربجي
امسح للحصول على الرابط
بواسطة : شوربجي
 14  0
التعليقات ( 14 )
الترتيب بـ
الأحدث
الأقدم
الملائم
  • #1
    سامي 10-04-2016 06:0
    أجلد العفن يااستاذ شوربجي وارجو أن تزيد العيار حتى يلتزم كل متنطع ماعونه وبعدين الناس الحارقا كلام شوربجي الحار دا مايشوفوا مزمز بتاعهم وسلك عريان والمخرف ابوشيبة وبتاع ستات الدلوكة كابو ديل بعملوا في شنو يعني مبوعثين النوايا الحسنة!!!!!!!!!!
  • #2
    أسامة 10-04-2016 12:0
    لله درك يا شوربة يا رائع عندنا حبوبتنا رحمها الله كانت دائماً تقول البقول النصيحة مفروض يكون معاه عكاز .. الجماعة ديل ما بختشوا أبداً ياخي الدوري إتحسم والشغلانة إنتهت وذهب الكأس لمن يستحقه وهم لسة ماسكين في شيبوب ومؤامرة جمال سالم وكلام لا يدخل عقل طفل في الروضة وأقسم بالله لو كان الوضع معكوس لأقام المرشد الدنيا ولم يقعدها ولملأ الدنيا ضجيجاً وتهكماً وسخرية بسيد البلد ...
  • #4
    منعم ابوناصر 10-04-2016 11:0
    اكان استاذنا شوربجى اجنى فأ نتم ياوصايفه بهذه التهمه المردوده عليكم تكونو قد اعترفتم بأن الهلال فعلا سيد البلد طالما ان الاجانب ايضا تشجع الهلال وهذا يدل على عظمة الهلال و عظمة مشجعى الهلال الاجانب مع العلم بأن استاذنا شوربجى رجل سودانى اصيل ولكن اذا الوصايفه الغدوه عندهم ابوخيبه ومزمز وسلك العريان والعارف عزو وهلم جرا اذا كان الغراب دليل قوم فأقم عليهم ,,,,,,, وخليهم فى هذا العويل حتى يفيقو فى مبارة العبور الحين ينوحو كالفارده الجنين
  • #5
    صديق البخيت 10-04-2016 09:0
    هههههه كتبابات يا شوربة كلها تلفيق وتكرار ذي ونسة المشاطات
  • #6
    حموري 10-04-2016 09:0
    والله يا شوربجي كلامك كله صحيح الجماعه عاملين صراخ ونبيح قالوا الوصافه كان ضاعت النوم بيطير من عينا او ما بنستريح ، البيت دا ضيفه لمقالك ، دي الحقائق الظاهره عن الجماعه ديل وجرستهم.
  • #7
    nasma 10-04-2016 08:0
    اديهم ياشوربة يا اصلي خلاص بقي ليكم حار مقال رائع من هلالابي رائع وسودانى اصيل محمد حسن شوربة الكاتب الهلالي القح جلاد الدلاقين يامسهرهم
  • #9
    oaltahiir 10-04-2016 08:0
    العارف عزو مستريح و الماعاجبو شو

    بسيطة

    ما يقرأ العمود

    لكن الغريبة انتم مدمنييييييييييين عليه شفاكم الله

    لله درك ياكايدهم ياعزيزنا شو

    و الباب يفوت وصيف
  • #10
    EzzSudan 10-04-2016 07:0
    اجمل مقال قرأته لك, ياخ الجماعة ديل دقيت بيهم الدلجة عديل, لكن يستاهلوا. هسي المدعوم منو الهلال و لا المريخ.
  • #11
    الزيدابي - الجزيرة ام طرفة 10-04-2016 07:0
    الاخ- المسمى نفسه الزعيم __ الأخ محمد الحسن شوربجي سوداني وبالميلاد كمان .. وله الحق في تمجيد فريقه الهلال ولو انت ما عارف عدد مشجعي فريق الهلال فوق التسعون في المائة بالسودان .. هذي هي مشكلتك ..

    واذا كان كلام الاخ محمد الحسن شوربجي فيه نوع من الترقية فعليه ارجو منك ان ترجع الى جميع اعمدة صحفيي المريخ لكي تقرأ ما يكتبونه عن الهلال .
    نعم الجميع يكتب بتهكم على الآخر .. ولكن البادي اظلم .. وأسالوا كبيركم الذي علمكم السحر .. بعدين كلام الاخ شوربحي صاح مائة في المائة المريخ يبحث عن الوصافة باي شكل .. كما فعل في المواسم الماضي واخذ الدوري من داخل المكاتب ..
  • #13
    جلابي - الدوحة قطر 10-04-2016 07:0
    الي متي تظل في ثوب الاضمحلال الثقافي والصحفي ..فبعد اقوال بعض الصحفين عنك وعن بعض الفضائح التي زلزلت الصحافه كنا نعتقد بانك ستحاول الترقي بمقالاتك لتتناسب والكيان الذي تكتب عنه ولكن للاسف مازلنا في سنه اولي كتاب نحشو الاسطر باحرف كارثية ولا نعرف معني للمقال او فائده او مكنون ...ارتقي يا اخي لمستوي الحدث واكتب عن ما يفيد هلالك واترك عنك تلك الانشاءات المصغره لشخصيتك
  • #14
    الزعيم 10-04-2016 02:0
    المريخاب سودانين. رجال ما بلبسوا فستان احمر. وشبشب اصفر. الأخ جعفر صالحين. كم مرة نصحك. فريقك الزمالك لاعب مع الأهلى واترك الهلال السودانى. للسودانيين. ونقول ليك يا غريب. امشى لبلدك.
    يا ادارة كفر ووتر. هذا الفاشل. ما يستحى نعم ولكن أين الرقابة.

    يا شوربة. لعلمك كرة القدم فوز وهزيمة وتعادل. انت لو سودانى ومشجع هلال فرضا ما المشكلة. .
    الحمدلله الهلال. فاز بكاس الممتاز هذا الأجنبى. فرحان على اى أساس ما ندرى. ولكن. دائماً. ناس شمال الوادى اسلوبهم كدة. فى داعى انفاق. شوربة.
أكثر

للمشاركة والمتابعة

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019