• ×
الجمعة 29 مارس 2024 | 03-28-2024
خلف الله ابومنذر

فرصة للشباب ودكة البدلاء

خلف الله ابومنذر

 2  0  2041
خلف الله ابومنذر

# الكل يعلم ان هلال السودان يحتاج لحصد نقطة واحدة من ثلاث مباريات متبقية من البطولة ويتوج سيدا ومتسيدا على عرش بطولة الممتاز التى من هذا الواقع وهذه الحسابات والقراءات أصبحت فى حكم التى بين يديه ما لم يحدث مالم يكن فى الحسبان ولم يحتشد ويتوهط فى لب ومخيلة انسان .
# المباريات الثلاث المتبقية للفرقة الزرقاء أمام أندية الأمل العطبراوى والخرطوم الوطنى وأحمر أمدرمان على التوالى والمطلوب كما أسلفنا الظفر بنقطة ليتوج الأزرق باللقب ، ورغم ان كرة القدم لا تخضع لقراءات ولا تمتثل لارهاصات ولا تعترف بالأسماء ولا تتعاطى التوقعات ويطلق عليها المجنونة ، الا ان جمهور الهلال الوفى الغلاب المهاب أعد العدة وحشد العتاد والمعدات من طبول ومزامير ودفوف ولافتات وخلافها ليحتفى ايما احتفاء وينتشى ايما انتشاء بالبطولة أمسية يوم الجمعة المباركة القادمة عقب مباراة الأزرق العاتى هلال السودان والأمل العطبراواى التى تقام بملعبه الجوهرة الزرقاء وذلك لثقته التى لا تحدها حدود ولا توهنها أصفاد ولا تضعفها قيود فى لاعبيه والعهد بهم وما جبلوا عليه فى اللقاءات الكبيرة الحاسمة يستجيشون ضراوة وبالعزيمة والاصرار والاستبسال والروح التى تحقق الانتصار يجندلون العتاة الغلاظ المدججين الذين كره الكماة نزالهم.
# لا نقفز فوق المراحل ولا نستخف ولا نستهين بمنافس ولكنا نطرح ما هو مطلوب من الجهاز الفنى عقب المباراة القادمة اذا قيض المولى عز وجل لهلال السودان التتويج باللقب، والمطلوب بعد التحكر على عرش الممتاز اتاحة الفرصة لكل لاعبى دكة البدلاء واللاعبين الشباب الذين لم يجدوا فرصة المشاركة فى المباريات التنافسية منذ انطلاقة الموسم ، نمنحهم الفرصة كاملة للمشاركة فى الجولتين الآخرتين أمام ناديى الخرطوم الوطنى وأحمر امدرمان ليقف الجميع على مردودهم الفنى والبدنى قبل حلول فترة انتدابات اللاعبين الشتوية الرئيسية القادمة حتى لا نستغنى عن خدمات لاعبين موهوبين دون ان نمحنهم الفرصة ويذهبوا لأندية منافسة ويجدوا فرصة المشاركة ويتألق نجمهم ونركض خلفهم لاعادة مرة أخرى لصفوف الفريق وندفع ملايين وربما مليارات الجنيهات مقابل عودتهم .
# فرصة من ذهب وسانحة لن تتكرر يجب ان يستثمرها الجهاز الفنى لنادى الهلال ويمنح الفرصة للاعبى دكة البدلاء واللاعبين الشباب ليشاركوا كعناصر أساسية فى الجولتين الآخرتين القادمتين بعد حسم لقب الممتاز باذن فاطر السموات والأرض مساء الجمعة القادمة أمام الأمل عطبرة.
غيض
# لن يكون عصيا ولا عزيزا على لاعبى هلال السودان الخروج بالنتيجة التى تكفل لهم الظفر بلقب الممتاز من أمام نادى الأمل عطبرة وكل المعطيات الفنية والبدنية والروح المعنوية بجانب الخبرة ترجح كفة الأزرق
# بعد حسم هلال السودان للقب من أمام الأمل عطبرة مساء يوم الجمعة القادمة باذن الله تعالى يجب منح فرصة المشاركة واثبات الجدارة فى المباريتين الآخرتين للحارس البديل جمعة جينارو الذى لازم دكة البدلاء منذ انطلاقة الموسم وللطاهر الحاج وولاء ومحمود أمبدة وأبوعاقلة وصهيب الثعلب وبشة الصغير وبقية اللاعبين الشباب وسجناء دكة البدلاء.
# طبعا فى ناس بتستنكر وتقول ما ممكن نلعب مباراتنا أمام نجمة المسالمة بالصف الثانى أو بلاعبى دكة البدلاء ولازم نشارك بالأساسيين عشان نغلب
# وبقول منو القال الهلال بدون الأساسيين ما بقدر يغلب نجمة المسالمة؟
# نجمة المسالمة بمستواها الهابط الشايفنو ده ما محتاجة هلال السودان يلعب معاها بالأساسيين عشان يغلبها، ممكن يلعب معاها بالصف الثانى ويحسم المباراة من الشوط الأول وممكن يجيب من صف السينما ويغلبها
# بأمانة كده يا عبدالصمد بلفو أخوى ممكن نجيكم المباراة بصف الغاز
# ممكن بصف الرغيف ونغلب لأنو ناس النعسان ديل ما محتاجين.
# صف التأشيرة كيف ويكونوا لابسين جلاليب وعمم وكرفتة وكدارات؟
# يوم الجمعة الجايه ما تجيبوا من بدرى كراسى وحفاظة موية وساندوتشات شعيرية وتقعدوا فى الحيشان والشقق والبرندات وتتفرجوا فى مباراتنا مع الأمل عطبرة فى التلفزيون وتنتظروا الهلال يخسر المباراة
# ما تتفرجوا فى الكورة لأنو حا نبوظ أعصابكم ونلعب بيكم ساى.
# نحن عايزين نقطة بس وبنغلب الأمل عطبرة ونكسب ثلاث نقاط وما محتاجين ليها كلها عشان كده بنخت نقطتين فى رصيد الأهلى شندى
# مش نحن حرين ما عايزين غير نقطة واحدة ونخت النقطتين فى رصيد الأهلى شندى عشان الموسم ده بأمانة عايزين نغير وصيفنا ونغير حظنا
# نغير وصيفنا نجيب لينا وصيف من شندى قيافة وعندو عقد عمل ليبيا
# عشان كده بنقعد مع ناس أهلى شندى فى الواطة ونجيب ورقة وقلم وقزازة بيبسى وكرتونة أندومى وكيس شعيرية ونقعد ونحسب ونضربها معاهم نقطة نقطة اذا غلبوكم انتو فى استادكم وانتو اتعادلتو مع أهلى مدنى وجينا نحن غلبناكم وأخونا جمال الوالى رجع من جدة بكون الوصيف منو؟
# كده ضمان الوصيف بكون الأهلى شندى عشان الشعيرية ما باللبن.


امسح للحصول على الرابط
بواسطة : خلف الله ابومنذر
 2  0
التعليقات ( 2 )
الترتيب بـ
الأحدث
الأقدم
الملائم
  • #1
    وطن الجمال 09-29-2016 02:0
    اقتراحك الاخير هو عين الصواب وقد علقت بالمثل هنا هذا الصباح. ياخي حتى ولو اتغلبنا من الوصيف بالصف الثاني بعد حسم البطولة باذن الله مافي مشكلة وهذه المباراة مع مباراة الخرطوم الوطنى فرصة لاعطاء المجال للشباب الحلوين ديل وانشاء الله يسودو وجوهنا (الاسود لونا واحلى عندي من الابيض).
  • #2
    عمر خالد علي 09-29-2016 01:0
    الأهلي شندي متعود اكون حمل وديع أمام المريخ ولكنه يستاسد أمام الهلال
أكثر

للمشاركة والمتابعة

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019