• ×
الثلاثاء 19 أكتوبر 2021 | 10-18-2021
محمد عثمان الجعلي

هلال الملايين يعطر سماء السلاطين

محمد عثمان الجعلي

 12  0  3392
محمد عثمان الجعلي

عندما يفوز الهلال تتفتح الأزهار وتفرح الأقمار كيف لا يحدث ذلك وهلال الساجدين والناس الصالحين هو محبوب الملايين الذى عطر سماء السلاطين عندما إلتقى بهلال الفاشر عصر الأثنين 19 سبتمبر فى مباراة تعتبر من مباريات الحسم الفورى لكأس الدورى ، وكأس الممتاز يمنى النفس بالعودة للديار الزرقاء المقر الدائم للكؤوس وكأس البلد الأول هو كأس سيد البلد المحبب ، ورغم علمنا التام أن اللعب فى أستاد النفعة هو بطولة فى حد ذاتها لأنها مثل السير فى حقل الألغام وأخطر من تحرير هجليج ورغم أن قناة النيلين ( حليفة الفشل الأولى ) حرمتنا من المتعة إلا أن الإذاعة السودانية مشكورة قامت بالواجب لأن سلعة الهلال جيدة وكما يقول المثل المصرى ( السلعة الجيدة تبيع نفسها ) ، ولقد أعلن الأقمار لنجوم الهلال بكل وضوح أننا نريد نقاط هلال الفاشر كاملة ولن نقبل بأعذار سوء أرضية الملعب أو ظلم التحكيم ونرفض أى شماعة لا تمنحنا نقاط المباراة كاملة ، وإنتهى شوط المباراة الأول بالتعادل السلبى وفرح الوصايفة ( فرحة نص كم ) وجاء شوط المدربين الثانى وفى الدقيقة الثانية من الشوط الثانى توغل الصاعقة نزار فى منطقة جزاء الخيالة ولم يكن أمام دفاع الخيالة إلا إيقافه بضربة جزاء أحرز منها سادومبا هدف الهلال الأول وتحرك هلالاب الفاشر ومعهم كل هلالاب العالم بالتصفيق وبعد 25 دقيقة أضاف الخلوق كاريكا هدف الأمان لبطل السودان ، لكن ساسا طلع ماعنده ذوق وأحرز الهدف الثالث ، ونال صاحب الجناب العالى والمقام الرفيع نقاط المباراة كاملة وأودعها فى رصيده فى بنك النيل الأزرق ومعها ثلاثية بيضاء مكوية ( يعنى فوز وفنجرة ) حقيقة القادر بسوى ، وإرتفع سيد البلد بنقاطه إلى 77 نقطة نالها من 29 مباراة فاز فى 25 وخسر مرتين وتعادل مرتين وأحرز رماته 70 هدف وعليه 12 هدف وصافى أهدافنا 58 هدف أما أقرب وصيف مؤقت هو الند التقليدى المريخ برصيد 68 نقطة نالها من 30 مباراة حيث فاز 21 مرة وخسر 4 مرات وتعادل 5 مرات وأحرز رماة المريخ 57 هدف وعليه 24 هدف ( الكتراااابة ) تخيلوا سيد البلد صاحب أقوى هجوم ودفاع فى البلد والفرق بين الهلال ووصيفه الدائم فى النقاط 9 نقاط ولنا مباراة مؤجلة أما الفرق فى صافى الأهداف يساوى 25 هدف ( والله مابهظر زى ماأقول لكم ) عايزين بخور التيمان ياحدعان !! يافوزى المرضى ماشايف شغلك ، ومباراتنا عصر الجمعة القادم مع مريخ الفاشر مباراة مهمة خاصة أن مريخ الفاشر به عدد من النجوم مثل إسماعيل صديق ومشرف زكريا ومحمد موسى ومصعب العلمين وغيرهم .
*** يوم الجمعة والأمة مجتمعة
تذكرت كلمات الجاغريو التى يرددها الفنان الراحل أحمد المصطفى ( أغنية سميرى المرسوم فى ضميرى ) وطبعاً معروف سميرنا المرسوم فى ضميرنا هو هلال العشق الجميل وأتحداكم أسألوا من الكلام ده أى هلالابى لكن الهلالاب الزعلانين روقوا ليهم المنقة شوية وهم (جيرانكم فى جنوب العرضة ) ، وتقول بعض كلمات الأغنية *** يازهرة أحلامى ... بنظم فيك كلامى ... تايه ودمعي هامى ... مع القمرى البقوقى برسل ليك سلامى ... وين سميرى المرسوم فى ضميرى ... نزلت منى دمعة ... والأمة مجتمعة ... واليوم كان جمعة ، نعم فى يوم الجمعة إجتمعنا فى سوق باب شريف فى جدة وكنا ستة ومعنا شاب صغير 3 هلالاب و3 مريخاب وكنا فى محل الأخ المريخابى عصمت عبدالله ومعنا من المريخاب الأستاذ إبراهيم عبد الهادى ومحمد عوض أسيد ومن الهلالاب ( شيخ هلالاب باب شريف ) محمد آدم مكنن ( حتى الجلابية زرقاء مكوية ) والدكتور بابكر مصطفى بابكر وشخصى الضعيف وكان محور النقاش الرياضى هزيمة هلال التبلدى للهلال والمريخ ، والأخ عصمت أخذ جرعات حب إضافية للمريخ وهو فى السودان من منطقة الجبيلية ريفى المسلمية وعند التعارف قال للأخ مكنن ( محمد عثمان القدامى ده شخص محترم لكن محمد عثمان الجعلى بتاع كفر ووتر مافى أخبث منه إلا خالد عز الدين ) ونشكر الأخ عصمت وهو يرفع مقامنا ويساوينا بالأستاذ خالد عزالدين !! غايتو الجلسة دى كان معانا أخونا وزميلنا محمد حسن شوربجى ( كان لقيتوه هسه فى العناية المركزة ) أعمل حسابك ياشوربجى الأيام ديل الصفوة سمها فاير ، أما الطفل المكاشفى عصمت ( طلع عكس أبوه ) هلالابى على السكين فقلت فى نفسى ... الهلال بالفعل هو خيار المستقبل ... وبرطانة أهلنا المحس ( هلالى كنى أولى لنا ... ومريخي كنى أوبرتى لنا ) يلا ياشوربجى ترجم للصفوة الهلال هو الكسبان والمريخ هو السجمان ، نعم كانت جلسة عكست جميل طباع شعبنا الطيب المضياف ... وياهو ده السودان .
*** المخطط الأكبر للهروب الأحمر
الهلالاب تعودوا أن يكظموا الغيظ وهذه أخلاق الكبار أما الصفوة يافيصل الأقرع ( أنا ما أفسر وإنت ماتقصر ) ، طبعاً إتحاد اللقيمات ( البايتة ) الفاسد العام الماضى سرق مننا كأس الممتاز لكن السنة دى ( البسرق بنقطع إيدو ) وقواتنا محاصرة المكان والضرب فى المليان عشان كدة المريخ يخطط للهروب من ساحة المواجهة حتى لا يشاهد هلال الأمة وهو يتوج بكأس الممتاز فى ليلة الفرح الكبرى ، و بداية المخطط أن المريخ هرب حتى من أستاده لأن مباراة التتويج فى القلعة الحمراء والصفوة لا تحتمل أن تشاهد أخوان مساوى وهم يحتفلون بالكأس من داخل أستادهم ، لذا طلب المريخ بتحويل المباراة إلى أستاد الخرطوم !! ياربى إتحاد اللقيمات الكسيح رأيه شن فى هذه المهزلة التى بطلها إبنه المدلل ، ويجب أن نقرأ ماكتبه عراب الإعلام السالب مامون أبوشيبة حيث قال ( شيبون ) ...لقد إنتهى الدورى قبل 7 أسابيع من نهايته بسبب بعض الحكام المرجفين ( ونسأل أبوشيبة هل من ضمن الحكام المرجفين المريخابى عادل نيالا الذى ظلم الهلال باستاده أمام هلال التبلدى !! ) ثم أضاف مامون... لم تجد مباراة المدعوم أمام هلال الفاشر ( يقصد بالمدعوم هلال الملايين وليس المريخ ) أدنى إهتمام أو متابعة إلا من بعد أصحاب الضمائر السوداء الذين تعودوا أكل الجيفة !! وقال رئيس تحرير الصدى هناك مخطط لإزالة المريخ من المركز الثانى خاصة فى مباراة نبالا وأهلى مدنى !! ( يامامون مخطط شنو !! المشتهى الحنيطير يطير والمشتهى الحوت يموت ) وأمر مامون مجلس المريخ بالإنسحاب إذا نقض الحكم للمريخ هدف أو لم يحسب له ضربة جزاء !! عليكم الله خلوا المريخ يفوز فى كل مبارياته القادمة !! نحن ماقايلين وصافتنا غالية للدرجة دى ، وعكس أبوشيبة تماماً كتب أحدهم قائلاً ... أيها الناس الكضب مابنجينا والحق هو من يخرجنا من هذه الورطة والقاع الذى لم نكن نتوقع يوماً أن نجد أنفسنا متقوقعين فيه ، والحى وووب والكندكة بالتراب كان بتحل يابت فرح !! كان كبينا لورى رملة فى صلعتى دى !! بالمناسبة كاتب هذه الحقيقة ليس محمد عبد الماجد وإنما بابكر سلك !! لذا لزم التنويه .
*** همسة الوداع
حبايبنا الحلوين وقت الهزيمة بفقدوا بوصلة الصواب بالتمام والكمال عشان كدة من باب حق الجار ممكن نهدي ليهم نصيحة ونقول ليهم عشان خاطر المغتربين من أبناء المريخ حاولوا أكتبوا بتفاؤل وتحدثوا عن مشاركة المريخ فى البطولة العربية من أجل رفع الروح المعنوية ، لكن المشكلة الفريق ماجاهز !! ( الله يجازى محنك يا إتحاد اللقيمات ) وبهذه المناسبة نهمس فى أذن الإعلام الأحمر معقول يكون من يمثل دفاع السودان فى بطولة العرب ناس ضفر وكريم الحسن وعلى جعفر وبخيت خميس !! يعنى كان ماخايفين من حساب ربنا مابتخافوا على سمعة السودان ولا شنو ؟ مجرد سؤال .
امسح للحصول على الرابط
بواسطة : محمد عثمان الجعلي
 12  0
التعليقات ( 12 )
الترتيب بـ
الأحدث
الأقدم
الملائم
  • #1
    فيصل الاقرع 09-22-2016 01:0
    اهلاوبيك الاخ الانين ونحن ما بنلحقك في الزرف واللكافه وتخياتي ود عقيده وربنا افك عقدتكن يا ودعقيده قال حمراء تسر الناظرين والله يا ود عقده قدر ما قلنا لي غير الصوره وجملة (حبايبنا الخلوين) ما راضي
  • #2
    abdulbagi 09-21-2016 06:0
    سمحه المقدره . نحن اسياد البلد العاحبوا عاجبو والماعاجبو اجى المقبره اشوف الدفن كيف. نقدل بحقنا مش بحق سمير فضل بمناسبه يا اخوانا الزول دا وين
  • #3
    abdulbagi 09-21-2016 06:0
    سمحه المقدره . نحن اسياد البلد العاحبوا عاجبو والماعاجبو اجى المقبره اشوف الدفن كيف. نقدل بحقنا مش بحق سمير فضل بمناسبه يا اخوانا الزول دا وين
  • #4
    فيصل الاقرع 09-21-2016 04:0
    سلام جعلينا حبابك بعد ما طولت الغياب ناس مكنن في باب شريف قابلوك ونحن اهل الجلد والرأس للان ما زرتنا حايم بباب شريف ومعطل الرحيق ما عارفنا نحن بنرجاه بفارق الصبر وبعدين البخور الا نسوي منك انت يا الجعلي اسكت شويه خلي الدوري اخلص وبعدين اقعد عد علي مهلك والجماعه يا الجعلي الوصافه ذاتها السنه دي احسبوها نقطه نقطه وما اظن الموا فيها وابوشيبه الشايب العايب خلينا منه ورئيس لجنة الحكام قال ليهم الحكام دخلهم شنو اذا هجوم الهلال ما قادرين تمسكوهوا
  • #5
    بكرى النيلين 09-21-2016 04:0
    ليك مده ما بنت ...وانا فى اشتياق لى شوفتك....ياالجعلى وين انت...
    انت وين ولا انا وين...
    تحياتى واشواقى كيمان كيمان قدر نقاط هلالنا العسل دا...
    ما شاء الله قلت لى كاتب بمزاج ونفس فاتحه ...وناس سلك كابين لورى رمله فى الصلعه..
    وتعال شنو هيثم كابو بعمل فى شنو..يازول دا فقد المنطق عديل كده وبقى يهدرب..
    تقول ما شرب الشربوت فى العيد...بعد العيد...وحاجات تانيه حاميانى...
    يا حليلهم الوصيفاب جنو وبقوا يحننوا من العليهم...وما منك ما منك...من العليك
    من العليم يا مامون...كاسنا وباذن الله تعالى رجع لمكانو الطبيعى ..وين سمير فضل يا معتصم جعفر...يا حليلكم ويا حليلكم الله يفك كربتكم مع اسامه وبقيه العقد الزلابيا
    يا حليلك يا جيمى ويا حليل الرد كسر...وانحنا نحمد الله ونشكرو كتير عندنا الجوهره الزرقاء وعند القناه وعندنا الكاش وعندنا الكاردينال والاسد وسادومبا وشيبولا وكاريكا ومكسيم....والماعندو ذى ديل يقع البحر...ان شاء الله الابيض ولا الاحمر...
    مبروك مقدما لكل الهلالاب الكاس باذن الله تعالى..ولك تحياتى..
    بكرى النيلين...ود ام روابه...الهلالابى...
  • #6
    سمبر على دياب 09-21-2016 02:0
    الاخ الجعلى كمان جابت ليها رطانة فى الحقيقة المريخ ابرتن فار ما تبقو زيهم خف عليهم شوية احسن ما نلقى وصايفة وتمسخ الكورة
  • #8
    ابراهيم عبدالهادي 09-21-2016 12:0
    الاخ الحبيب الاستاذ محمد عثمان لك كل التحايا لشخصك المحترم المهذب الراقي حقيقة سعدنا جميله وانت تتحفنا بزيارتنا وقضينا معك اجمل اللحظات ومن قرب عرفنا كم انت جميل وكلام عصمت حقيقي محمد عثمان يختلف عن محمد عثمان الجعلي بتاع كفر ووتر حقيقة انت صفوه ولذلك كان الاندهاش من عشقك للهليل سيد اللبن وصاحب الاصفار المحموله جوا نتمني لك اسعد الاوقات وبالتوفيق ان شاء الله
  • #9
    الامين عبد القادر السمانى 09-21-2016 12:0
    التحية والسلام اخوى الجعلى ونبارك لكم هذا الزحف الازرق نحو البطولة المحببة لسيد البلد ولاعزاء للوصايفة وطبعا الوصايفة صاروا كثر هذا الموسم وكان لجماعتنا ممكن يروحوا فى حق الله
    انا فكرت عندما سطرت سميرى كأنك تقصد بها سمير فضل المطلوب بشدة من اصحابنا فى هذه الايام العصيبة التى كثرت فيها هترشتهم -- شىء حكام وهذه نغمة المخرف ابوشيبة والمدعوم كل كتابهم بمافيهم كبيرهم الذى علمهم السحر مزمز وسقايتنا لسه مدوره ----
    ((رصيده فى بنك النيل الأزرق ومعها ثلاثية بيضاء مكوية ( يعنى فوز وفنجرة ) حقيقة القادر بسوى ، وإرتفع سيد البلد بنقاطة الى 77 )) وباذن يوم الجمعة سوف نقفل 80 وكم دقيقة وشباك القط الكاميرونى نظيفة ومكوية زى مابتقول يا جعلينا وربنا يديمها سعادة وفرح هلالى غامر دائما --
    وتحياتنا لاخونا فيصل الاقرع وتحلو الجلسة معه ولقفشاته المحببة وكمان للغالى كتاحة التفاحة وللمهندس بابكر عوض الشيخ وللجميع كل عام وانتم بخير وعافية
    ودمتم للوطن والهلال فى حفظ الرحمن ورعايته
  • #10
    ابوحسن 09-21-2016 09:0
    لك التحية استاذنا محمد عثمان اول حاجه نبارك الي شباب ابوالهل الفوز علي الابن هلال الفاشر بزات العودة الحميدة الي القناص
    سادمبا ههههههه طبعا ناس الصفوة قالوا الهلال يسجل الرواكيب القديمة ههههه لكن نحن نقول لاهل الصفوة ***الرواكيب الكبيرة تبقي اكبر من مدن بعدين يا استاذ الجعلي ههههههههههه حلوا منك الرد علي مامون ابو شيبة قال مخطط شنو انتوا حمام ميت ههههه
  • #11
    ودعقيده خلف 09-21-2016 08:0
    ابو كرفته حمراء تسر الناظرين لك التحيه عمل خبثئ وارهابئ شنداوي( البلقي هواهو بضري عيشو طبعن السنه ماشاءالله كل السودان معيش ) لكن كاس الممتاز اعطو هديه للكردنه غطو بها خروجكم المبكر من ابطال القاره لكن والله وجهت نظري لوما الهلال شال كاس الممتاز السنه دي كان حصلت بورسعيد اخري في العرضه ( الوصيه في الزمه من اخوكم عبدالله بلل القرياتي )حمبرا قباض الطير
أكثر

للمشاركة والمتابعة

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019