• ×
الجمعة 18 يونيو 2021 | 06-16-2021
محمد الطيب الامين

بر الوالدين أهم من الأم والأب...

محمد الطيب الامين

 0  0  6964
محمد الطيب الامين



* حكمة الله (الموز الكاذب) يشبه (الموز الصادق) من حيث الشكل ..
* شجرة (الموز الكاذب) شكلها نفس شكل (شجرة الموز الما كاذب) من حيث (القوام والطول والخُضرة) ..
* نفس الملامح والشبه ..
* ولكن الإختلاف أن شجرة الموز الكاذب لا (تلد) ..
* ممكن تشيل (نُوار) لكن ما بتلد ..
* ضل ساكت بس ..
* زي المريخ كده ..
* المريخ برضو (ضل ساكت) ..
* وأكتر حاجة مُحبطة إنك تكون منتظر (ثمار الموز) وفي النهاية تكتشف إنو شجرة الموز دى (ضكر) يعنى ما بتلد ..
* والسيد جمال الوالى في كل عام (بيسقي في الشجرة الصفراء) وفي النهاية بيكتشف إنها (لا تنجب بطولات) ..
* بعض مرات جمال الوالى بيعمل (سماد) من أجل تحسين نمو الشجرة ولكن دائما ما تكون المحصلة (نجاح في الفشل) ..
* في الزراعة يقولون (سماد) وفي كرة القدم نقول (لقيمات) وكلاهما يؤدى الغرض ..
* وتبكو بس .. عين قطرة وعين مس ..
* المريخ حينما فشل في (الشراب من يده) تفرغ تماما للشراب من (يد الغير) ..
* وأهلنا بيقولوا الشراب من يد الرجال عطش ..
* عشان كده الجماعة ديل عطشانين طوالى ..
* أمبارح المريخاب كانوا مهتمين بمباراة الهلال وشقيقه هلال الفاشر أكثر من إهتمامنا نحن بهذه المباراة ..
* كانوا متوقعين هلال الفاشر يعرقل الهلال ..
* ركبوا السماعات في أضنينهم وقاعدين منتظرين خسارة الهلال ..
* منتظرين بدون خجل كمان ..
* عايزين يفرحوا ..
* المريخ بقى ما بفرحهم عشان كده مصدر فرحتهم الوحيد خسارة الهلال ..
* كانوا عندهم أمل كبير في تعثر الهلال بمدينة الفاشر ..
* بقوا على الله وعلى الفاشر ..
* فقدوا الأمل والطموح وحتى الشخصية ..
* والهلال أمبارح بثلاثية نارية تجاوز شقيقه هلال الفاشر وتبقى المريخ صفحة الهلال عشقي الأبدي ..
* وأصلا أى مريخ أسهل من الهلال ..
* يعنى مريخ الفاشر سينال هزيمة أكبر من الهزيمة التى تلقاها (مريخ العرضة) ..
* عشان كده أنا شايف المفروض تنسوا حكاية إنكم تنتظروا نتائج الهلال دى ..
* أصلا إنتو ما قدر الهلال .. أو كما قال النجم علاء الدين يوسف ..
* شوفوا الناس القدركم وإنتظروا نتائجهم ..
* شوفوا ناس الخرطوم الوطنى وأهلى شندي وهلال كادوقلي ..
* ديل قدركم ..
* هلال الأبيض ذاتو ما قدركم ..
* ألعبوا بعيد مننا عليكم الله ..
* الناس الأكبر منكم ما تباروهم ولا تابعوا أخبارهم ..
* ركزوا مع أهلى شندي وكلتشي ..
* طبعا الأيام دى لما تجي سيرة كلتشي المريخاب بتحسسوا ..
* والله صحي ..
* المريخابي لو جبتو ليهو سيرة كلتشي (وشو بتغير) ..
* بتعقد ..
* والمشكلة إنو بعد كلتشي راجيكم شيبولا تااااااااااني ..
* وغايتو السنة دى بالذات يا متنا من الضحك ويا كمان الضحك كتلنا ..
* المهم ..
* حسب الوصف الإذاعى لمباراة الأمس فأن الهلال لم يكن مقنعا في الحصة الأولى ..
* والحمدلله أن الفريق نجح في المحافظة على الشباك نظيفة خلال الشوط الأول الذي شهد نشاطا مكثف لاصحاب الأرض ..
* وقد كان الحسم في الشوط الثاني بثلاثية (سا سا وكا كا) ..
* وأكيد التلاتة نقاط أهم من الفوز أو كما قال بكري المدينة ..
* (بكورى المدينة) قبل كده قال التلاتة نقاط أهم من الفوز ..
* التلاتة نقاط أهم من الفوز ، والأنثي أهم من المرأة ، وبر الوالدين أهم من الأم والأب ..
* وغايتو جنس غايتو !!
* عموما .. مباريات الهلال المتبقية تحتاج لتركيز كبير واهداف مبكرة ..
* التسجيل المبكر يقي الهلال كثير من الشرور والمصاعب والمتاعب ..
* الهدف المبكر بيقطع (العشم) ، عشم الخصم وعشم المريخ وعشم التحكيم ..
* كل العشمانين ممكن نضربهم بهدف مبكر ..
* والكويس في الموضوع إنو المريخ (عشمو) ما كبير ..
* ما عشمانين في البطولة لكن عشمانين إنو فارق النقاط ما يزيد من الـ(12) نقطة ..
* ده كل همهم في الدنيا ..
* والحاجة دي ذكرتني حاجة ..
* زمان وإحنا صغار كنا بنحب (الورقة البيلفو فيها الباسطة أكتر من الباسطة ذاتا) ..
* كنا بنتشاكل في (الورقة البيلفو فيها الباسطة) ..
* بنحس بروعة الباسطة من خلال (الورقة) ..
* مرات بنكون إحنا خمسة أطفال ..
* بنعمل شيرنق بنجيب (ربع باسطة) ..
* ربع الباسطة لما تقسمو على خمسة أشخاص ممكن اى زول تقع ليهو (قطعة واحدة) ..
* عشان كده نحن كنا بنقسمو (الربع) على أربعة والزول الخامس بنديهو (الورقة الكانت ملفوفة فيها الباسطة) ..
* يلحس الورقة ويأكلها زي اللبانة ..
* حاليا يا جماعة المريخ بيقاتل من أجل هذه (الورقة) ..
* والله صحي ..
* الجماعة ديل بقوا ما مستهدفين البطولة وإنما مستهدفين الورقة ..
* والورقة ذاتا هلال الأبيض عندو فيها رأي ..
* واهلى شندي عندو فيها رأي ..
* والخرطوم الوطنى عندو فيها رأي ..
* وإنتو بصلاح نمر ومصعب عمر ديل أنا خايف الورقة ذاتا ما تلمو فيها ..
* غايتو نحمدالله إنفردنا بباسطتنا وما في زول مشاركنا فيها ..
* شلنا الباسطة وإتخارجنا وإنتو بطريقتكم إتشاكلوا في (الورقة) ..
* المهم .. نرجع ونقول : (العارف عزو مستريح) ..
* مسكين فيصل العجب .. مرة يقولوا جايبنو مدير كرة ومرة ينفوا ..
* العجب مريخابي أكتر من الـ(28) عضو الجابتهم الحكومة ديل ..
* العجب جا المريخ بإمكانياته وقدراته ..
* والـ(28) عضو ديل جو المريخ بواسطة الحكومة ..
* ومع ذلك العجب غير مرغوب فيه ..
* دنيا والله ..
* ما هى آخر أخبار المدرب (هاي) ؟؟
* قالوا المدرب هاي وعبر شريط الفيديو شاهد مباراة للهلال ..
* شاهد مباراة مسجلة وقال ليهم في فترة التسجيلات الرئيسية سجلوا لي نمرة (4) ونمرة (8) ونمرة (17) ونمرة (7) ونمرة (13) ونمرة (2) ..
* طبعا بيقصد يسجلوا ليهو بشة وشيبولا وكاريكا والثعلب ونزار حامد وأبوعاقلة ..
* طيب ما يسجلوا ليك الهلال عديل ؟؟
* مدربكم ده مشكلتو كلها في (إسمو) ده ..
* المدرب ده أحسن تجنسوهو وتسموهو أسم كبير شوية بدل (هاي) دي ..
* وغايتو الله يكفينا شر (المُصدِي) اللمعتو الأيام ..
* ونركب صافنات ونجيبة (دارفورية) وأصلو الزول بيموت والذكرى تفضل حية ..
* و..و..
* وجيت أهنيك وأصافحك وجيت أقول (العيش أهم من الرغيف) ..
امسح للحصول على الرابط
بواسطة : محمد الطيب الامين
 0  0
التعليقات ( 0 )
أكثر

للمشاركة والمتابعة

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019