• ×
السبت 15 مايو 2021 | 05-14-2021
محمد عثمان الجعلي

أبو الهل ياسادة فى مركز القيادة

محمد عثمان الجعلي

 10  0  3004
محمد عثمان الجعلي

مع تباشير العيد السعيد وفى أيام الحج المباركة تنداح دائرة الأفراح فى الديار الزرقاء وأبو الهل ياسادة فى مركز القيادة برصيد 74 نقطة حيث لعب 28 مباراة فاز 24 مرة وخسر مرتين وتعادل مرتين وأحرز رماته 67 هدف وولجت شباكه 12 هدف وصافى الأهداف 55 هدف وباقى للهلال 6 مباريات منها 2 فى الفاشر أمام الهلال والمريخ و2 أمام الأهلى والأمل عطبرة بالجوهرة ومباراة أمام الخرطوم الوطنى أول أكتوبر ومباراة الختام أمام المريخ بأستاده فى العاشر من أكتوبر ، أما الند التقليدى المريخ يحتل مكانه المحبب فى مركز الوصافة الدائم لسيد البلد وإن كان عرش الوصافة هذا العام مهدد بالزوال بسبب مزاحمة الوافد الجديد هلال الأبيض ( الفات الكبار والقدرو ) حيث نقاط وصيف الوصيف ( هلال التبلدى ) 62 نقطة والفرق بينه وبين المريخ 3 نقاط فقط مهددة بالزوال فى أى وقت ( زى السكن العشوائى ) ، ورصيد المريخ 65 نقطة نالها من 29 مباراة كسب المريخ 20 منها وتعادل فى 5 وخسر 4 مباريات وأحرز رماة المريخ 54 هدف وعليه 23 هدف وصافى أهدافه 31 هدف ، وكما نعلم أن المريخ متقدم على الهلال بمباراة وفرق النقاط الحالى بينه وهلال الساجدين والناس الصالحين 9 نقاط بالتمام والكمال قابلة للزيادة بعون الله وتوفيقه ، ويجب أن يتعامل نجوم الهلال مع المباريات القادمة بكل إحترافية ويعتبروا أن الفرق بينهم وبين أقرب وصيف نقطة واحدة حتى لا يحدث تراخى ، طبعاً عندما يلعب هلال الملايين مباراته المؤجلة ويكسب نقاطها بإذن البارى جل ّ فى علاه سوف يكون الفرق بين الهلال والمريخ درزن من النقاط أما الفرق فى صافى الأهداف حتى الآن يبلغ 2 درزن أو 2 دستة ( كله واحد ) سيد البلد رفع شعاره المحبب ( تمتع بالرحلة ودع القيادة لنا ) وترك غيره يتصارعون على وصافته ، ولله در القائل *** أنام ملء عينى عن شواردها .... ويسهر الخلق جراها ويختصم *** يامن يعز علينا أن نفارقهم .... وجداننا كل شئ بعدكم عدم .... الجميع يتزاحم من أجل أن ينهل من موردنا العذب بالمناسبة مورد العذب مزدحم !! لذا لزم التنويه .
*** المريخ زى الجلابية الأنصارية والضحية برهان تية
مافى إنسان يتمنى أن يكون هناك شخص أفضل منه إلا الأب يتمنى أن يكون إبنه أفضل منه وكذلك الحال فى الرياضة عندما خسرنا من إبننا هلال التبلدى برباعية مقابل هدفين كان عنوان الرحيق وقتها ( أجمل التهانى لإبننا الكردفانى ) ولكن الإعلام السالب سلقنا بألسنة حداد أشحة على الخير وتحدثوا عن التبلدى والقنقليز الشهى ولذيذ ، رغم أن صافى الأهداف بين الأب وإبنه كان هدفين ودارت الأيام دورتها ولعب فرسان التبلدى مع المريخ فى استاده ووسط جماهيره ونال علقة ساخنة قوامها خماسية مقابل هدف كأكبر هزيمة فى العصر الحديث يتعرض لها فريق قمة عاصمى من فريق ولائى مازال فى سنة أولى إبتدائى ، يعنى إذا كان صافى هزيمة الهلال هدفين فإن صافى هزيمة المريخ رباعية (وكت الدقون جالو ... طبق الحمل شالو ) ، وإعلام المريخ أرجع الهزيمة بسبب خروج عمر بخيت !! طيب زمان إحنا كنا نشيد بالمعلم وإنتوا تقولوا عجوز عشان كدة هسع عندما نشيد بى شيبولا وكاريكا وبشة الحكاية دى مابتقع ليكم وزى مايقول مثلنا السودانى ( الماضاق العسل مابقدر يوصف طعمو ) وكما توقعنا بعد الخماسية كان الضحية برهان تية ، ومحسن عرفها قدم إستقالته وتمت الإستعانة بفاروق جبرة ، ويبدو أن برهان ومحسن ( توم آند جيرى ) حاولا تقليد صائد البطولات بلاتشى عندما أشرك عنصر الشباب فى الدفاع بقيادة حسين الجريف وعمار الدمازين وأطهر فى الطرف اليمين وأشرك مدرب المريخ فى مباراة التبلدى فى الدفاع صلاح نمر ووليد بدر الدين وإبراهومة فى الطرف اليمين ، الغربية المريخ أصبح زى الجلابية الأنصارية خسر من هلال التبلدى رايح وجاى .
ردود وتعليقات الخماسية فى سلم التبلدية
حاول الهلالاب رد الجميل للمريخ بعد خسارته من فرسان التبلدى لان المريخاب سبق لهم أن قدموا السبت عندما خسر الهلال ، أول تعليق وصلنى من أدروب بكرى عيسى حمد من هلالاب مكة الموجود هذه الأيام بأرض الوطن الحبيب وقال لى إنه دخل مباراة المريخ والخرطوم الوطنى والمريخ وهلال التبلدى وأنه قدم خير وفأل حسن لخصوم المريخ وأضاف بعد كدة مهمتى إنتهت وراجع بورتسودان !! ونقول للأخ بكرى ( مابدرى ياخليفة كمّل جميلك كملو ) أما خلف الله بلة من مريخاب خيبر فقال كنت متوقع النتيجة تعادل أو الحكم يساعدنا شوية ونفوز بهدف لكن الحكم قام نقض هدفنا !! قلت ليه لكن هدفكم تسلل واضح فأجابنى بعفوية ( التسل عينو قول آمين ) وإذا ذهبنا للمناكفات الشعرية سوف ناخد 4 مسادير من شعراء الهلال ( الأحمدين ) أحمد مجذوب وأحمد البشرى وهما يقترحان على المريخ أن يترك كرة القدم ويتجه للمصارعة الحرة ويقول ودالمجذوب
*** ركزوا فى المصارعة غايتو فيها ضرورة
*** وإن ردخوا النجيمة بنمشى ليها نزورا
*** أندر تيكر الشبه الأصل والصورة
*** كان هنا كان هناك يانجمة بس معصورة
ورد عليه أحمد البشرى بهذا المسدار
*** مين غير الهلال الفى البلد أسطورة
*** مين غيرو البيعكس لينا أجمل صورة
*** غايتو نصيحتى للمريخ بشوفا ضرورة
*** ركزوا فى المصارعة وسيبوا لينا الكورة
وفى المسدار الثالث قال الشاعر أحمد المجذوب
*** مريخنا السمح مريخنا يادخرينا
*** مريخنا القمح ماهو الدقيق الفينا
*** أقدل ياجنا قدلة جنا الوزينة
*** جيب لينا الحزام بالقوة وألبسوا زينة
ورد عليه أحمد البشرى بالمسدار التالى
*** بى بكرى وضفر قوة وصلابة متينة
*** بندق من طرف سجم البقول راجينا
*** صعبين نحن إبليس ذاتو مابلاقينا
*** بنجيب الحزام بالقوة من جون سينا
فيصل الأقرع من ظرفاء هلالاب جدة يقترح أن يسرح الهلال كبار نجومه أمثال مساوى ونزار وبشة وكاريكا وبوى والشغيل ويسمح لهم بأداء فريضة الحج وإكمال مباريات الدورى بالنجوم الشباب وجادت قريحتى بالمسدار التالى رداً على لإقتراح فيصل الأقرع ويقول مسدارى
*** ود الأقرع داير نجومنا يحجوا ويزوروا
*** والصفوة قالت برهان تانى مابندوروا
*** يسلم هلال التبلدى بى مهندو وديكورو
***والهاتريك العجيب جابو الولد موكورو
تخيلوا رغم مستوى المريخ الهزيل مازال إتحاد اللقيمات اللئيم يصر أن يمثلنا فى البطولة العربية ويتجاهل سيد البلد محبوب الملايين .
*** همسة الوداع
حبايبنا الحلوين السنة دى مابضوقوا للعيد أى طعم !! العيد عيد هلالاب ، ياربى معقول الصفوة يكون عندها نفس للمرارة والشية ، أنا عندى ليكم فكرة أستفيدوا من برنامج ( صحة وعاقية ) الذى يقدمه دكتور عمر محمود خالد المريخي المعروف الذى قال إن المرارة بالشطة والدكوة والليمون مضرة بالصحة !! وبهذه المناسبة نهمس فى أذن الإعلام الأحمر ... نحن عارفين العيد ده ( خشمكم ملح ملح ) رأيكم شنو ترفضوا الضحية من أصلها بى حجة إنكم نباتيين ؟ مجرد سؤال .
امسح للحصول على الرابط
بواسطة : محمد عثمان الجعلي
 10  0
التعليقات ( 10 )
الترتيب بـ
الأحدث
الأقدم
الملائم
  • #1
    عثمان علي حميده 09-19-2016 02:0
    نتمنا للهلال الفوز دومآ لك التخيه الاخ الجعلي
  • #2
    فيصل الاقرع 09-10-2016 11:0
    سلام جعلينا الليله شيل شيلتك مع ود عقيده اما اليوم بسط شديد الريال غالب والبرشه مغلوب وكذلك ليفربو غالب لكن الايام دي حكايات الخمسات اللافه دي شنو شايف الريال غالب خمسه وواحد من الاخوان قال قصة السكن العشوائي الجعلي حكر حكيره صاح مقال جميل برباعياته واتمني لكم غدا صوما مقبولا في يوم عرفه وسنتين غفران وكل عام وكل احباب الرحيق بخير وصحه وعافيه
  • #3
    09-10-2016 08:0
    كيف يمكن للهلال الخروج من قاع الصفر الدولي الذي بلغ عمقه ال 86 عام
  • #4
    09-10-2016 08:0
    كيف يمكن للهلال الخروج من قاع الصفر الدولي الذي بلغ عمقه ال 86 عام
  • #5
    سيف الدين خواجه 09-10-2016 01:0
    كل سنة وانت طيب وطل عام وانت بخير وخيلك من الجماعة الحين بس خليك بارك عشان نبارك !!!!
  • #6
    إبراهيم 09-10-2016 01:0
    يسلم قلمك يا جعلى . حرمتنا كتير و تأخرت علينا سخرية من غير قلة ادب أتعلم يا مزمز
  • #7
    ابو ميار 09-10-2016 01:0
    كل سنه وانتا طيب ي حبيبنا
    يااخوي مانقش بعضنا ماعندنا كورة ف السودان طول السنين الماضية الدوري الممتاز ليهو 20سنه معروف بطلو منو محتكرة بين فريقين مريخ هلال معقوله السودان دا كلو مافيهو فرق غير هلال ومريخ منافسه عقيمة لا تخلق نوع من الاثارة والمتعه نكون واقعين الدوري السعودي من اقوي الدوريات العربيه الموسم السابق بطلو الاهلي والقبلو النصر مرتين ع التوالي ومن قبل الفتح فبتالي في منافسه فر فرق ليها صولاته وجولاته في الدوري ماذي ناس قريعتي راحت اتوقع من فريق هلال الابيض ان يكون لهو شان كبير ف الموسم القادم فريق يهزم القمة بي الاربعه والخمسة فريق ماساهل ارجو ان يكون للدوري الممتاز ف الموسم القادم بطل جديد خلاف هلال مريخ
  • #8
    الامين عبد القادر 09-10-2016 09:0
    التحية والسلام اخوى الجعلى اولا كل عام وانتم وكل الامة السودانية والاسلامية بخير وعافية و الهلالاب بخير وعافية والعام القادم ان شاء الله كأس الاميرة فى الديار الزرقاء ووجود تنافس قوى من الاقاليم يدفع عجلة دورينا الكسيح للامام وينهى الهيمنة الهلاريخية وحسنا فعل هلال التبلدى كل هذه البهلدة وجرع القمة شر الهزائم وفى عقر ديارهم والله عفيت منهم وبرضو اسمو الهلال يعنى مافى مغصة ابدا ---
    وكلام ود الاقرع سمح تب ووجيه كمان ولكن رأيكم شنو فى ود هاشم سنار وعاكف عطا والحكم عاوز يسطح اسمه بخروج الهلال على يديه بالعافية كده وسواها فاضحة عديل ولم يتحقق حلمه --!!! اعملوا له رتوش يالجعلى والكل عاوز يظهر على حساب سيد البلد ---
    ودمتم للوطن والهلال فى حفظ الرحمن ورعايته
  • #9
    ودعقيده خلف 09-10-2016 09:0
    استاذ الجعلي لك التحيه دوما كتبت في مقالك القادم انو اخر مقال ليك وماشي الحج لكن ابليسك كبير حماك الحج وخلاك قاعد حارس الكرنتينه اشهد عليك من كتبت مقالك الفات انو ما عندك حج عندك عمل خبيث بس يا شمات الليله ابوكم مات ياخي اعمل ليك اعمال يودنك الحج بدل الخباثه البتعمل فيها دي
  • #10
    عزالدين ابراهيم عبدالرحمن 09-10-2016 08:0
    لو لا الحكااااااااااااااااااام لكنتم الرابع الي الان وبرضو فرحااااااااااااانين استحو .......
أكثر

للمشاركة والمتابعة

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019