• ×
الجمعة 29 مارس 2024 | 03-28-2024
محمد الطيب الامين

قلبك هنا وبالك هناك ريدة الكضب كملت معاك !!

محمد الطيب الامين

 0  0  7705
محمد الطيب الامين


* في كل المجالات عادة لما الزول ينزل (معاش) بيشتغل شغل ما عندو علاقة بشغله القديم ..
* مثلا زول يكون شغال (60) سنة في وزارة الطرق والجسور ، ولما ينزل معاش بيشتري ليهو ركشة وأمجاد ..
* وواحد تلقاهو شغال في النقل النهري ولما ينزل معاش بيفتح ليهو (مكتبة صحف ومجلات) ..
* بيكون أفنى زهرة شبابه في النقل النهري وجا عشان يفنى زهرة (الشيخوخة) في مكتبة الصحف والمجلات ..
* وأى شغل بتشتغلو بعد المعاش ما بيكون زي شغلك الأساسي ..
* صعب جدا تقدر تنسجم مع شغلك الجديد بعد أن أمضيت أنضر سنوات عمرك في شغل آخر ..
* ولعل هذا من أهم أسباب فشل هيثم مصطفى مع المريخ رغم أن هيثم في الهلال كان بيلعب (كرة قدم) ولما جا المريخ برضو بيلعب (كرة قدم) ..
* يعنى هيثم واصل في نفس شغلو ومع ذلك فشل في تقديم أى شئ يذكر للمريخ ..
* وهذا أيضا له علاقة بشعار (المحبين) الذى يقول : (الحب للحبيب الأول) ..
* في دنيا الريدة .. العشاق يطلقون على الحب الذي يأتى بعد الحب الأول يطلقون عليه (بدل فاقد) ..
* بدل فاقد او (إسكراب) ..
* الحبيب بعد الحب الأول بيدخل على العلاقة العاطفية الثانية بـ(نصف قلب) و(نصف عقل) و(نصف تركيز) ..
* وفي الغالب تجده يحب الحب الثاني بـ(لياقة) الحب الأول ..
* هذه الفلسفة العاطفية أحسب أن النجم بدر الدين قلق قد قصدها تماما في حواره مع الأخ عمر بـ(قوون) أمس ..
* قلق وفي إفاداته الجريئة أثبت أشياء هى مثبة أصلا ..
* ولكن قيمة ما قاله قلق تأتى من كونه نجم كبير تقلد من قبل شارة الكابتنية بفريق المريخ ..
* وأهم من هذا أن قلق سجل هذه الإفادات و(أعصابه باردة) ..
* يعنى لما إتكلم ما كان زعلان ..
* المريخ لم يشطب قلق في التسجيلات الأخيرة بل شطبه قبل سنوات وهذا يؤكد أن حديثه خالى من (الغرض) وخالى من (الزعل) ..
* قلق قال أن المريخ يحاول تقليد الهلال وإستدل على ذلك بأن نصف تشكيلة المريخ تتكون من قدامى نجوم الهلال ..
* ويرى قلق أن المريخ إذا كان يعتمد على قدامى نجوم الهلال لن يحقق البطولات ..
* وهذا حديث (علمي وأدبي) أثبتته التجربة والأيام ..
* المريخ وخلال السنوات الأخيرة كان يعتمد على (نجوم الهلال بالمعاش) ..
* وكل اللاعبين الذين سجلهم المريخ بعد شطبهم من الهلال كانوا يلعبون للأحمر بـ(نصف قلب) و(نصف عقل) و(نصف تركيز) ..
* وسبق أن أطلق غارزيتو أبان فترته بالمريخ تصريحا قال فيه : (هيثم قلبه مع الهلال وعقله مع المريخ) ..
* وده شئ طبيعي جدا ..
* وما هيثم براهو .. هسه بكري قلبو مع الهلال وعقلو مع الهلال لكن (كراعو مع المريخ) ..
* وما ينطبق على بكري ينطبق على عبده جابر وفييرا ومعز محجوب وعمر بخيت وكل الذين لعبوا للمريخ بعد (المعاش) ..
* يببقى كلام قلق حقيقي بنسبة مية في المية ..
* بدر الدين قلق أكد ما قالته صحيفة الهداف الجزائرية التى سطرت تقريرا ذكرت فيه أن المريخ هو (ضل) الهلال ..
* الصحيفة الجزائرية قالت المريخ يعيش على مشاطيب الهلال ..

* وحقيقة حديث قلق لما تجي تربطو مع حديث علاء الدين يوسف ستجد الصورة أمامك واضحة وضوح الشمس ..
* فييرا قبل شهرين قال : (الهلال أكبر من المريخ) ..
* يبقى يا جماعة نظرة اللاعبين اللابسين شعار المريخ هى (الهلال أكبر مننا) ..
* وهذه النظرة تسبب فيها مجلس الإدارة وتحديدا السيد جمال الوالى الشهير بـ(عزو) ..
* جمال الوالى وفي (13) سنة سجل (16) لاعبا من الهلال وهو رقم يكشف حجم (الدونية) التى يعاني منها المريخ ..
* وأنا حقيقة أحب أن أختلف مع بدر الدين قلق في جزئية صغيرة جدا ..
* أقول لبدر الدين قلق : رغم إنو مشاطيب الهلال سجلوا للمريخ و(بطونهم طامة) إلا أنهم كانوا سببا مباشرا في محافظة المريخ على مركزه كوصيف دائما لسيد البلد ..
* لو ما مشاطيب الهلال المريخ ما كان بيلم في الوصافة في السنوات السابقة ..
* أخطر من هذه الجزئية فقد قال قلق : (قالوا وقلنا) سبب مشاكل المريخ ..
* يعنى الوشايات والكلام من ورا الضهر ..
* الجماعة بقوا عليهم (تقليد وقوالات) ..
* مؤسف والله أن يكون المريخ بكل هذا العمر بينما شخصيته لا تزال تعانى من الإنفصام ..
* أقول ليكم حاجة ..
* واحدة من أهم عدم أسباب نجاح الفنان مصطفى حمزة هو تقليده للجان محمود عبد العزيز ..
* مصطفى حمزة صوت جيد وطلة رائعة ولكنه راح ضحية التقليد فأصبح خارج نطاق ذاكرة الناس ..
* مصطفى حمزة لم يكتفى بتقليد محمود في الصوت فحسب ، بل قلده حتى في شكل الأغنيات وأسماء الإلبوامات ..
* لما الحوت طلع إلبوم (ما تشيلي هم) قام مصطفى حمزة بعد ستة شهور طلع إلبوم إسمو (شايل همك) ..
* وفي النهاية بقيت شخصية الحوت وتلاشي مصطفى حمزة ..
* هسه المريخ ده زي مصطفى حمزة والهلال زي محمود عبد العزيز ..
* بيقلدونا في كل شئ وفي النهاية ما ح يبقوا شئ ..
* والله صحي ..
* المقلد ح يظل مقلد ..
* بطريقتكم دى لا بتبقوا هلال ولا بتبقوا مريخ ..
* (بتتجوبكوا) ساكت ..
* عموما نشكر قلق على هذه الإفادات التاريخية ونأمل أن تتوفر ذات الشجاعة للنجم الكبير فيصل العجب الذى إستلمه المريخ (لحم) وجدعه (عضم) ..
* العجب ده كمان قصتو براهو ..
* ناس المريخ أول ما سجلوا هيثم شالوا (الشارة) من العجب وأدوها لهيثم ..
* وبعد شوية أجبروا العجب على الإعتزال وكتبوا خطاب إعتزال إنابة عنه ..
* كتبوا خطاب إنابة عن العجب وأصلا هم قبل كده (بصموا) إنابة عن علاء الدين ..
* شطبوا العجب عشان خاطر هيثم وبعد ستة شهور لا لقوا هيثم ولا لقوا العجب ..
* وهسه بطريقتكم دى بعد سنة واحدة لا بتبقوا هلال ولا ح يكون في مريخ ..
* وإحنا أصلا سياستنا إنو المراكز الخمسة الأولى في ترتيب الدورى تكون من نصيب الأندية التى تحمل أسم الهلال بقيادة كبيرهم الذي علمهم المتعة (الهلال) ويكون وصيفه (هلال الأبيض وهلال كادوقلي وهلال الفاشر وهلال نيالا لاحقا) ..
* وإنتو خليكم في التقليد لما تلقوا نفسكم لاعبين سنترليق بقاء أو هبوط ..
* هبوط بـ(الخاء) ؟؟
* ونركب صافنات ونجيبة (برناوية) وأصلو الزول بيموت والذكرى تفضل حية ..
* و..و..
* وما تشيلي هم عاشقك ...(بعرف يرص العلامات) ..
امسح للحصول على الرابط
بواسطة : محمد الطيب الامين
 0  0
التعليقات ( 0 )
أكثر

للمشاركة والمتابعة

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019