همس الهتاف
شماتتة ابلة ظاظا...شبق المعرفة
كثيراً ما تستخدم السيدة حرمنا المصون حينما تمارس الشماتة بنفسها او تلتقط شماراً شامتاً عبارة شماتتة ابلة ظاظا ومنذ وقت طويل يراودني السؤال هي ابلة ظاظا دي منو وشمتت في منو وعشان شنو ، غير اني اكتفي كل مرة بممارسة فقه لذة الالم ، واترك السؤال مستمتعاً بمجاهيله استمتاع الواحد فينا باثر حكة ناتجة من جرح قديم ، عموماً ليس هذا موضوعنا فاالشاهد ان موبايلي استقبل رسالة تقول (حبتين عند اللزوم) قبل ان يخرج حكم مباراة الهلال ودجليبا المالي صافرة النهاية من فمه ، لكنني اعتبرت ان هذا مشجع متعصب يكثر مثله في بلادنا من فاقدي الوعي بضرورة الفرز بين التنافس الداخلي المطلوب والمحمود وبين ضرورة تجميع الاحاسيس الوطنية والوقوف خارج الديار مع كل ما هو سوداني صميم .
غير ان دنيا من الاسف الشديد والحسرة والالم اصابتني وصحيفة المريخ التي تحمل الاسم الكبير المهول لشيخ الاندية السودانية تحاول التقليل من قيمة الهلال شقيق المريخ وصنوه ووجه عملته ألاخر ، ما هذا الزمان القيح ، المريخ فريق الادب والثقافة ، فريق الرموز في شتة ضروب الحياة والمعرفة ، فريق ابن البان ودلدوم والمريخابي العجوز السر قدور والدكتور النابه الجميل عمر محمود خالد ، تحمل صحيفته ،الحاملة لديباجته في صدر صفحتها الاولى مانشيتاَ ضخماً يقول (انا مالي ومالو) في اشارة سخيفة واستغلال انتهازي للاغنية الجميلة من اجل الشماتة من هلال الملايين الغبش الزينين .
في اجازتي الاخيرة للسودان دعيت لحفل زواج في احدى الصالات الراقية ، المغني الشاب المهند ، المشبوك بسلسلة في العنق ترقد فوق صدر مفتوح يغني بصوت ركيك وحنجرة ملتهبة (ضربت لي تلفون لقيتو في اوزون) و بعد ان استفرغ فينا صوته المشروخ الواهن اردف باخرى (كتمتو نفسوا الهوا وينو) ثم طلب الاستغاثة (لا حولا الله ده اسمو منو وساكن وين) خرجت على عجل معتذراً لصاحب الحفل وانا اقول في سري لذلك المغني المافون ، ياخي الله يكتم نفسك كتمت على ذوقنا ، ذائقتنا الملانة باابو عفان ووردي والجابري وخضر بشير واحمد شاويش ، كتمت عليها ونحن نحتاج لدستة كاسيتات للتخلص من تاثيرك السخيف ، بيني وبينكم محتاجين تسليك مجاري بعد هذا الغثاء المتعفن .
نرجع لموضوعنا كيف وصل الدرك بصحيفة المريخ فريق الجهابذة المدجج بالمثقفين ان تحمل صحيفته ، وعلامته ، وعنوانه في صدرها مثل هذا السخف السخيف ، انه اذن زمن المهازل والمحن ، ومن عجب ان الزميل بابكر سلك الذي زاملته في صحيفة النخبة فضلاً عن تزاملنا في المحاماة قد لجأ لمثل هذا النوع من الهتر راكباً للموجة التي قفذت به وبعداده الى اعلى سافلين فاصبح يتقاضى من الاموال اخطرها على حس (خالتي صلت بالنهار) و(البقعد مع الوالي مابقوم )و حوض البط وغيرها من ترهات الكتابة مفارقاً خطه الرصين تحت دعوى الجمهور عاوز كده ، وقد اسفت للزميل سلك في حلقة قناة قوون وهو محتفي بضحك بعض الصبية في الاستديو ناسجاً من نفسه ابودلامة آخر وهو يقول للمذيع الشاب ابن الزميل عبد المولى (هسة كان في زول قال لي ابوصلعة بزعل ) غايتو يا سلك ما اعرفه ان أي سوداني تقول ليهو يا ابوصلعة ، ما لم تكن محتمياً بقرابة مانعة او صداقة جامعة ، بديك بونية في راسك ، وكدي انت جرب بي صلعتك دي قول لي أي زول اصلع ما بتعرفو يا ابوصلعة وشوف ردة الفعل ، عموماً يظل تقديري لسلك قائماً لكنني انعي بؤس اشكال الكتابة وتهافت التحبير تحت دعاوى الجمهور داير كده ، طيب ما تجيبوا أي مشجع يكتب والسلام ، لي شنو صحفيين وامتحان ومجلس وكبسيبة ، في دار ابو منو ؟؟؟؟
تحضرني في هذا المجال ، مجال الشمات قصة حكاها الاستاذ الممثل الجميل الرشيد احمد عيسى عن الشاعر الكبير الراحل عمر الطيب الدوش قال الرشيد انهم ذهبوا في رحلة الى القضارف بدعوى من اتحاد المعلمين ، وان الراحل الدوش قرأ لهم من شعره النضيد وايقظ ليل القضارف بنصوصه الكاربة ، في الصباح وهم على مشارف البص رفض الدوش ان يصعد الى البص قائلاً للرشيد ياخ في حي في القضارف دي اسمو سلامة البيه ، انا ما برجع الخرطوم الا اعرف البيه ده منو وسلامتو من شنو ؟؟؟ وانا الآن اطلب ممن يعرف ان يحكي لنا حكاية ابلة ظاظا مسترشداً بخطى الراحل المهول عمر الطب الدوش ، هي ابلة ظاظا دي منو؟ وشمتت في منو ؟ وشمتت في شنو ؟؟؟
هتاف اخير
اليوم يلاقي الهلال هلال كادوقلي ، الابن الذي تجاسر على والده وافقده ثلاث نقاط غاليات اشاعت الخوف في الربوع الزرقاء قبيل ضربة امل عطبرة ، ولانني لست من انصار الكتابة المناصحة وعلوق الشدة في يوم اللقاء فانني اتمنى ان تنتهي هذه المباراة باربعة اهداف على الاقل ، عضاً على الصدارة التي تهادت نحو حبيبها الازرق ، وتهيئة لبيئة استعداد افضل ليوم الاتحاد الليبي ، يوم الجماهير الكاسرة ، والتيحا الحاسرة .
شماتتة ابلة ظاظا...شبق المعرفة
كثيراً ما تستخدم السيدة حرمنا المصون حينما تمارس الشماتة بنفسها او تلتقط شماراً شامتاً عبارة شماتتة ابلة ظاظا ومنذ وقت طويل يراودني السؤال هي ابلة ظاظا دي منو وشمتت في منو وعشان شنو ، غير اني اكتفي كل مرة بممارسة فقه لذة الالم ، واترك السؤال مستمتعاً بمجاهيله استمتاع الواحد فينا باثر حكة ناتجة من جرح قديم ، عموماً ليس هذا موضوعنا فاالشاهد ان موبايلي استقبل رسالة تقول (حبتين عند اللزوم) قبل ان يخرج حكم مباراة الهلال ودجليبا المالي صافرة النهاية من فمه ، لكنني اعتبرت ان هذا مشجع متعصب يكثر مثله في بلادنا من فاقدي الوعي بضرورة الفرز بين التنافس الداخلي المطلوب والمحمود وبين ضرورة تجميع الاحاسيس الوطنية والوقوف خارج الديار مع كل ما هو سوداني صميم .
غير ان دنيا من الاسف الشديد والحسرة والالم اصابتني وصحيفة المريخ التي تحمل الاسم الكبير المهول لشيخ الاندية السودانية تحاول التقليل من قيمة الهلال شقيق المريخ وصنوه ووجه عملته ألاخر ، ما هذا الزمان القيح ، المريخ فريق الادب والثقافة ، فريق الرموز في شتة ضروب الحياة والمعرفة ، فريق ابن البان ودلدوم والمريخابي العجوز السر قدور والدكتور النابه الجميل عمر محمود خالد ، تحمل صحيفته ،الحاملة لديباجته في صدر صفحتها الاولى مانشيتاَ ضخماً يقول (انا مالي ومالو) في اشارة سخيفة واستغلال انتهازي للاغنية الجميلة من اجل الشماتة من هلال الملايين الغبش الزينين .
في اجازتي الاخيرة للسودان دعيت لحفل زواج في احدى الصالات الراقية ، المغني الشاب المهند ، المشبوك بسلسلة في العنق ترقد فوق صدر مفتوح يغني بصوت ركيك وحنجرة ملتهبة (ضربت لي تلفون لقيتو في اوزون) و بعد ان استفرغ فينا صوته المشروخ الواهن اردف باخرى (كتمتو نفسوا الهوا وينو) ثم طلب الاستغاثة (لا حولا الله ده اسمو منو وساكن وين) خرجت على عجل معتذراً لصاحب الحفل وانا اقول في سري لذلك المغني المافون ، ياخي الله يكتم نفسك كتمت على ذوقنا ، ذائقتنا الملانة باابو عفان ووردي والجابري وخضر بشير واحمد شاويش ، كتمت عليها ونحن نحتاج لدستة كاسيتات للتخلص من تاثيرك السخيف ، بيني وبينكم محتاجين تسليك مجاري بعد هذا الغثاء المتعفن .
نرجع لموضوعنا كيف وصل الدرك بصحيفة المريخ فريق الجهابذة المدجج بالمثقفين ان تحمل صحيفته ، وعلامته ، وعنوانه في صدرها مثل هذا السخف السخيف ، انه اذن زمن المهازل والمحن ، ومن عجب ان الزميل بابكر سلك الذي زاملته في صحيفة النخبة فضلاً عن تزاملنا في المحاماة قد لجأ لمثل هذا النوع من الهتر راكباً للموجة التي قفذت به وبعداده الى اعلى سافلين فاصبح يتقاضى من الاموال اخطرها على حس (خالتي صلت بالنهار) و(البقعد مع الوالي مابقوم )و حوض البط وغيرها من ترهات الكتابة مفارقاً خطه الرصين تحت دعوى الجمهور عاوز كده ، وقد اسفت للزميل سلك في حلقة قناة قوون وهو محتفي بضحك بعض الصبية في الاستديو ناسجاً من نفسه ابودلامة آخر وهو يقول للمذيع الشاب ابن الزميل عبد المولى (هسة كان في زول قال لي ابوصلعة بزعل ) غايتو يا سلك ما اعرفه ان أي سوداني تقول ليهو يا ابوصلعة ، ما لم تكن محتمياً بقرابة مانعة او صداقة جامعة ، بديك بونية في راسك ، وكدي انت جرب بي صلعتك دي قول لي أي زول اصلع ما بتعرفو يا ابوصلعة وشوف ردة الفعل ، عموماً يظل تقديري لسلك قائماً لكنني انعي بؤس اشكال الكتابة وتهافت التحبير تحت دعاوى الجمهور داير كده ، طيب ما تجيبوا أي مشجع يكتب والسلام ، لي شنو صحفيين وامتحان ومجلس وكبسيبة ، في دار ابو منو ؟؟؟؟
تحضرني في هذا المجال ، مجال الشمات قصة حكاها الاستاذ الممثل الجميل الرشيد احمد عيسى عن الشاعر الكبير الراحل عمر الطيب الدوش قال الرشيد انهم ذهبوا في رحلة الى القضارف بدعوى من اتحاد المعلمين ، وان الراحل الدوش قرأ لهم من شعره النضيد وايقظ ليل القضارف بنصوصه الكاربة ، في الصباح وهم على مشارف البص رفض الدوش ان يصعد الى البص قائلاً للرشيد ياخ في حي في القضارف دي اسمو سلامة البيه ، انا ما برجع الخرطوم الا اعرف البيه ده منو وسلامتو من شنو ؟؟؟ وانا الآن اطلب ممن يعرف ان يحكي لنا حكاية ابلة ظاظا مسترشداً بخطى الراحل المهول عمر الطب الدوش ، هي ابلة ظاظا دي منو؟ وشمتت في منو ؟ وشمتت في شنو ؟؟؟
هتاف اخير
اليوم يلاقي الهلال هلال كادوقلي ، الابن الذي تجاسر على والده وافقده ثلاث نقاط غاليات اشاعت الخوف في الربوع الزرقاء قبيل ضربة امل عطبرة ، ولانني لست من انصار الكتابة المناصحة وعلوق الشدة في يوم اللقاء فانني اتمنى ان تنتهي هذه المباراة باربعة اهداف على الاقل ، عضاً على الصدارة التي تهادت نحو حبيبها الازرق ، وتهيئة لبيئة استعداد افضل ليوم الاتحاد الليبي ، يوم الجماهير الكاسرة ، والتيحا الحاسرة .
