• ×
الثلاثاء 22 يونيو 2021 | 06-21-2021
محمد عثمان الجعلي

الأزرق النشوان يهزم الفرسان

محمد عثمان الجعلي

 10  0  3002
محمد عثمان الجعلي


واصل هلال العشق الجميل رحلة الألق والتألق عندما إلتقى محبوب الملايين بأهلى الخرطوم فى الجوهرة الزرقاء ورغم أن سيد البلد فقد نجمه المميز بشة بالإيقاف وأجلس خط دفاعه الأساسى فى دكة البدلاء ولعب فى الدفاع بالشباب عمار الدمازين وحسين الجريف وأطهر وبوى ورغم أن الأهلى العاصمى لعب بعنف قانونى وغير قانونى ورغم أن حكم كادوقلى فضيل محمد حميدان صرف ضربتى جزاء للهلال الأولى عندما إرتكب محسن إسماعيل مخالفة مع بوى داخل خط 18 وفضيل عمل فيها نائم والتانية عندما لامست الكرة يد مدافع الفرسان ورغم ذلك كان الفريق الهلالى فى العلالى ، عن إذنكم ياشباب نطلع فاصل ونواصل ونظبط الرأس بى كباية شاى منعنع ، وكمان العشاء رغيف بى لبن ( حليب وعليه طحنية جاية من السودان ) ...عدنا ليكم يا حبايبنا تخيلوا مباراة يكون نجمها شيبولا وكابتن الهلال فيها كاريكا تكون كيف !! دى ماعجوة معطونة فى عسل عديل كدة !! رغم ظلم الظالمين إلا أن هلال الساجدين والناس الصالحين يكسب نقاطه خدمة يمين وعرق جبين ، كما إننا لن نهاجم التحكيم مهما حصل ونعتبر الحكم بشر يصيب ويخطئ ونردد المثل الكردفانى ( الله يجعلنا غابة والناس حطابة ) طبعاً حسمنا المباراة منذ نصف الساعة الأولى عندما أطلق الكابتن الخلوق كاريكا قذيفة أصابت العارضة بالشلل الإرتعاشى وإرتدت لسادومبا الذى أرسلها بثقة أرضية هادئة سكنت شباك أكرم الهادى سليم وضمن سيد البلد نقاط مباراة الجوهرة وأودعها فى رصيده فى بنك النيل الأزرق وكان يمكن أن تنتهى المباراة بهذه النتيجة طالما شباك مكسيم ظلت بيضاء من غير سوء إلا أن خليفة أحمد وأحمد ابكر وعمر سليمان حاولوا غزو الشباك الزرقاء وهذه فى عرف الهلالاب جريمة تستوجب العقاب وبالفعل أرسل نزار قذيفة أرضية ثانية سكنت شباك أكرم إسمها ( الإعدام رمياً بالرصاص ) وإنتهت المباراة بهذه الثنائية الجميلة وأحرز الأزرق النشوان أحلى الأقوان فى شباك الفرسان ، وبهذه النتيجة حافظ صاحب المقام الرفيع على موقعه الصدارى وإرتفع بنقاطه إلى 71 نقطة مع العلم أن له مباراة مؤجلة وأحرز رماته 63 هدف وعليه فقط 12 هدف ( ماشاء الله وتبارك الله ) بينما وصيفنا الدائم رصيده 65 نقطة وأحرز رماته 53 هدف وعليه 18 هدف ومازال سيد البلد فى موقع الريادة والسيادة وهو يرفع شعاره المحبب ( تمتع بالرحلة ودع القيادة لنا ) بالمناسبة الأهداف التى ولجت شباك الوصيف تستحق أن نفرض عليها الزكاة لأنها بلغت النصاب !! لذا لزم التنويه .
*** تراورى ضوّق الجيران نوم الكيعان
مدرسة الهلال النموذجية إمتازت بالحسم والضبط والربط على مر التاريخ ، فى عهد الأمين البرير زار أحد قادة الهلال المدينة المنورة وذهبنا لزيارته ومعنا الأساتذة فيصل عبد المنعم ومحمد الأمين التنى ونخبة طيبة من هلالاب طيبة الطيبة وسألناه لماذا شطب الهلال هدافه المميز تراورى فأجابنا إن تراورى لا يتعامل بإحترافية فحدث ذات مرة أن غاب عن التمرين لأنه وجد فى شقته ( بيت عنكبوت ) بينما لا يجامل فى النواحى المالية ولو تأخر راتبه عن يوم 30 فى الشهر يأتى للتمرين بالبنطلون والقميص ، وسألناه ألا تخافوا أن يذهب للمريخ فقال حتى لو ذهب لن يفيد المريخ كثيراً ، ولقد حدث ماتوقعه الإدارى الهلالى والآن شفنا كيف ( تراورى ضوّق الجيران نوم الكيعان ) وشكاوى وتمرد ( حوالينا ولا علينا ) ... وبمناسبة المريخ قال لى الأخ خلف الله بلة من مريخاب خيبر ملاحظة مهمة وكان يتمنى أن يطرق الإعلام الرياضى عليها بقوة وهى أن التنافس هذا العام على المقعد الكونفدرالى بين فرق الممتاز سوف يكون على أشده حيث تتنافس على ذلك ثلاث فرق هى هلال الأبيض وأهلى شندى والخرطوم الوطنى لذلك سوف تكون مباراة المريخ مع أهلى شندى وهلال التبلدى تنافسية وشرسة وكذا مباراة الخرطوم الوطنى مع الهلال ، وهذه حقيقة نشكر عليها الأخ خلف الله ود العقيدة وبإذن الله الخواجة بلاتشى ( عامل حسابه ) لكل الإحتمالات لكن الكلام الجوز بتاعكم ( برهان ومحسن ) ... بالمناسبة هذا آخر رحيق ختام نكتبه من مكة لأننا سوف ننتقل للعمل فى فرع الشركة بعروس البحر جدة !! ونشكر ونودع زملاء السكن بمكة الإخوة بدر الصديق الهلالابى وعبد المنعم عباس المريخابى وهما نعم رفقاء الغربة ... لذا لزم التنويه .
*** رسائل غنائية رياضية من الفنان سيد خليفة
نريد أن نرسل 3 رسائل غنائية رياضية من أغنية ( ياوطنى يابلد أحبابى ) كلمات الشاعر إبراهيم رجب غناء الفنان سيد خليفة
الرسالة الأولى من جماهير الهلال لفريق الخرطوم الوطنى الذى هزم المريخ بهدف صلاح الأمير وإنتزع منه نقاط المباراة كاملة بعد عرض جميل ورائع مثل روعة وجمال الخرطوم وفى الزمن القاتل وأودعها بنك الخرطوم وتقول الرسالة
*** يا الخرطوم يا العندى جمالك جنة رضواااان .... طول عمرى ماشفت مثالك فى أى مكاااااان ، والرسالة الثانية من مشطوب المريخ السابق صلاح الأمير الذى وجد الجحود فى المريخ ونال التقدير وراحة البال فى فريق الخرطوم الوطنى مع أحبابه ناس بدر الدين قلق ... وتقول الرسالة *** أنا هنا شبيت ياوطنى ... زيك مالقيت ياوطنى ... فى وجودى أحبك وغيابى ... ياوطنى يابلد أحبابى ، والرسالة الأخيرة من لاعب المريخ عنكبة الذى قضى أجمل سنوات عمره فى فريق الخرطوم وجاء للمريخ ليحصد الهزيمة والألم ويعض على بنان الندم ويتحسر على أيام الصبا فى صفوف فريق الخرطوم الوطنى وبجانبه صلاح نمر ويقول عنكبة *** بتذكر فيك عهد صباى ... على شاطئ النيل ... وحبيبى جالس حداى أسمر وجميل ...أنا بفخر بيك ياوطنى ... بالروح أفديك ياوطنى ... ياوطنى يابلد أحبابى .
*** همسة الوداع
حبايبنا الحلوين سئموا من حدوتة مهاجمة التحكيم بعد أن فقدوا نقاط مباراتهم أمام الخرطوم الوطنى بعد هدف صلاح الأمير وأرجعوا سبب الهزيمة لنقص فى اللعيبة !! مع العلم عندهم ماسورة فى المستودع الأحمر مركونة وتصرف الراتب بالدولار وإسم هذه الماسورة ( كريم الحسن ) وقالوا سبب الهزيمة أيضاً إشراك اللاعب حماد بكرى المصاب فى الركبة !! وبهذه المناسبة نهمس فى أذن الإعلام الأحمر إنتوا بتشركوا لاعب مصاب فى الركبة أصلكم لاعبين ليدو ولا سيجة ؟ مجرد سؤال .

امسح للحصول على الرابط
بواسطة : محمد عثمان الجعلي
 10  0
التعليقات ( 10 )
الترتيب بـ
الأحدث
الأقدم
الملائم
  • #1
    فيصل الاقرع 08-30-2016 06:0
    اولا مرحبا بالحبيب الغالي في جده التي جاءها بعد ان تنقل بين مكه والمدينه وتعبأ بنورهما ليأتي ليبهر به جده وجده نورت يا جعلينا وبذا تكون اكملت الطواف علي اكبر

    اربع مدن في المملكه وانت اصلا كنت معنا وقريب مننا حتي وانت في تلك المدن
    ﺍﻧﺎ ﻫﻨﺎ ﺷﺒﻴﺖ ﻳﺎ ﻭﻃﻨﻰ
  • #2
    عادل سليمان حسين 08-29-2016 04:0
    أخونا(ود ألجعلى ) ألسلام عليكم ورحمة ألله وبركاته وبعد ، شكرآ على ألعامود ألظريف دا ، ونتمنى للفرقة ألهلالية دوام ألإنتصارات حتى ألبطولة . أخونا ألجعلى نتمنى لك طيب ألإقامة فى عروس ألبحرألأحمر وبألتوفيق إن شاْء ألله تعالى،وما تنسانا من دعوة صالحة قبل مغادرة ألحرم ألمكى.وفقك ألله أينما حللت ، وألسلام ختام أخوك عادل سليمان حسين ج:0508123129 ألدمام .
  • #3
    ابوحسن 08-29-2016 01:0
    لك التحية استاذنا محمد عثمان ونبارك الي ابو الهل التفرد بصدارة يعد الفوز الاخير علي الاهلي الخرطوم ونتمني ان تستمر الافراح مع ابو الهل ويكون الاستفرار الفني والاداري حتي يقدم هولاء الشباب الافضل خارجين كما لا يفوتنا ان نكفرالي اهل
    الصفوة الهزيمة من الخرطوم الوطني بقيادة البطل ود الامير هههههههه عمله فيهم وخلي خشمم ملح ملح هههه طبعا ناس المريخ
    االعلة يا من الحكم يا المدرب شماعة ثابته طبعا هاجموا الجهاز الفني وقالوا عايزين غارزيتو مرة ثانية هههههههه (مجرد سؤال )
    خازوق تراوي مازي جدو غارزتو!!!
  • #4
    عبدالمنعم عباس 08-29-2016 12:0
    الوداع والفراق والرحيل كلمات تجتمع في معني واحد وهو فقد شخص عزيز علينا ولا نتوقع فقده. شخص نشتاق لسماع صوته وكلامه ونبتسم حين ما نذكر سيرته.. وفقك الله اخي وصديقي الأستاذ محمد عثمان الجعلي في مسكنك وعملك الجديد بجدة.. ربنا يجمعنا في ساعة خير اخي الجعلي...

    عبدالمنعم عباس احد أعضاء السكن بمكة المكرمة..
  • #5
    بكري عبده 08-29-2016 10:0
    ههههه ، رائع يا استاذ ، هذا هو ادب العكننه الدايرنو فى الوسط الرياضى ، لكن ناس الوصيف دايرنو فى وسط الميدان .
  • #6
    سيف الدين خواجه 08-29-2016 10:0
    ليه كدا يا خليفه ما تخليك بارك في مكة حتي نهاية الدوري بعدين تقول يا فكيك !!!ما بدري يا خليفه !!!صالح الدعاء في الحج يا حاج وخليك بارك وتبارك ايام التشريق
  • #7
    منعم ابوناصر 08-29-2016 10:0
    تحياتى جعلينا فعلا شي جميل وامس نمنا مرتاحين وحبايبك تعبانين ودا المهم وبعدين ياخوى انت ماشى جده شكلك بقيت لاعب معترف كل يوم فى فريق يعنى بقيت ذى كلتشى بس احسن من تبقى ذى تراورى الضوق الجيران نوم الكيعان لكن ياالجعلى الله يجازى محنك دى جبتها من وين شكلك انت اقدم من جيفارا والاقرع وخواجه ....بعدين كيف حبايك تركو مهاجمة التحكيم ماشفت تصريح عمك عبدالتام قال المريخ تمام بس حكام صلاح هم من عرقلوه,,,, اها حكام صلاح ديل يشيلو الكوره ويدخلوها قون او متخيل يحسبو هدف الامير تسلل ام ماذا تقصد ياعبدالتام الشغلك ماتمام,,,,, ياحبيبى عبدالتام انتو ماقادرين تحسمو تراورى كيف تحسمو الوطنى
  • #8
    بابكر عوض الشيخ 08-29-2016 10:0
    يا الجعلي لماذا هذه التنقلات الكثيرة ؟؟ المدينة ؛الدمام ، مكة ؛جدة ولا الشغلة (دعنا لنا القيادة وتمتع بالرحلة يبدو أن إدارتكم مريخيابية
  • #9
    الامين عبد القادر 08-29-2016 09:0
    التحية والسلام اخوى الجعلى ونبارك لكم ولكل الاهلة هذا الانتصار الرائع لاشاوسنا الاوفياء على اهلى الخرطوم وانت نغزت التحكيم ولكن اكيد لن تكون زى صاحبنا ابوشيبة المخرف -- والجميلة فرحة سادومبا مع الجمهور ونجليه وهكذا عودنا الازرق الدفاق بالحميمية الدائمة بين نجومه وجمهوره منذ الازل ---
    *( تراورى ضوّق الجيران نوم الكيعان ))) وده حقنا كله ولسه كمان ما شافوا العنكبوت ذاتها فى ديارهم ---
    وشنو حكايتك كل يوم فى بلد الله يستر ما يقطعوك البحر لجماعتنا بهناك ويخلوك تبحلق فى السماء ---
    ودمتم للوطن والهلال فى حفظ الرحمن ورعايته
  • #10
    ودعقيده خلف 08-29-2016 09:0
    استاذي الفاضل للك التحيه دوما البلقي هواهو بضري عيشو والخيل في اللفه ونقول لكم بعد الفاس وقع في الراس مبروك عليكم كاس الممتاز مقدما اما بالنسبه لنقليتك للعمل من اطهر بقاع الارض المدينه المنورة ثم مكه المكرمة ثم اخيرا الي المنفي جده انا خوفي المره الجايه يطشوك في المنفي بالسنبك الي الصومال وتكون منسق اعلامي لفريق المان الصومالي وبعدين يا لجعلي انا كلمتك من البدايه قلت ليك اذا عملت اي خباثه او اي شماته في المريخ المدينه المنورة بتفضك بره والان مكه نفضتك الله يستر علي جده ما تغرغك في البحر
أكثر

للمشاركة والمتابعة

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019