• ×
الأحد 13 يونيو 2021 | 06-11-2021
محمد عثمان الجعلي

من المفكرة ... بخاتى والسرة بت البشير

محمد عثمان الجعلي

 8  0  3479
محمد عثمان الجعلي

نعود اليوم للمفكرة الإجتماعية ونبحر بعيداً عن شواطئ الرياضة كما تعودنا ونحن تظللنا هذه الأيام سحب الخير والبركة فى شهور الحج المباركة وأمة الإسلام تتوافد على الأراضى المقدسة من كل فج عميق ليشهدوا منافع لهم ، ويكفى فى فضل الحج أن الله جل فى علاه يدنو من أهل عرفات ويباهى بهم الملائكة ويعتق أكبر عدد من أهل النار فى ذلك اليوم .... والحج المبرور ليس له جزاء إلا الجنة ، وكما جاء فى الحديث المتفق على صحته ( من حج هذا البيت فلم يرفث ولم يفسق رجع من ذنوبه كيوم ولدته أمه ) وكما قال حبر الأمة عبدالله بن عباس رضى الله عنهما ... الرفث هو الجماع ومغازلة النساء والتصريح بذكر الجماع أو الفسوق هو الخروج عن الطاعة بالجدال وفعل المعاصى ، وعندنا فى السودان فى الزمن الجميل طقوس جميلة للحج أول خطوة أن من يؤدى هذه الشعيرة نمنحه رتبة ( حاج ) وهى تعنى المزيد من الوقار والإحترام لصاحبها كما أن الحاج نفسه يغير سلوكه نحو الأحسن ويتجه للتقوى ومخافة الله ، مع العلم أن الحج أحد أركان الإسلام الخمسة مثله مثل الصلاة والزكاة والصوم ولكن لم نسمع بعبارة ( صوام فلان ولا زكاى فلان ولا صلاى فلان ) كما أن بيت الحاج يتم ضربه بالجير حتى يكون ناصع البياض ويرسم عليه النخل ويكتب فى مدخل البيت ( ياداخل هذا الدار صلى على النبى المختار ) ... لا أدرى لماذا تكون الدار مذكر ( هذا الدار ) أم أن الخطأ الشائع صواب !! وتنتشر مدائح الحج الذى تتحدث عن مكة وأشهرها قصيدة البرعى *** ياراحلين إلى منى بقيادى ... هيجتم يوم الرحيل فؤادى *** سرتم وسار دليلكم ياوحشتى الشوق أقلقنى وصوت الحادى ، ونحن بحمد الله مكان العمل فى مكة جنب جبل النور والسكن جنب الجمرات وإن شاء الله بعد دوام الثامن من ذى الحجة نلبس الإحرام ونردد مع البرعى ( تالله ما أحلى المبيت على منى ... فى ليل عيد من أبرك الأعياد ) نسأل الله أن يوفقنا وإياكم لأداء الحج ، والحجيج السودانى وصل بحمد لله للمدينة المنورة حيث المسجد النبوى الذى يضم ترابه أفضل خلق الله أجمعين ...ولله در القائل *** ياخير من دفنت بالقاع أعظمه ... فطاب من طيبهن القاع والأكم *** نفسى الفداء لقبر أنت ساكنه ... فيه العفاف وفيه الجود الكرم *** لئن رأيناه قبراً إن بباطنه ... لروضة من رياض الخلد تبتسم *** لو كنت أبصرته حياً لقلت له ...لا تمشى إلا على خدى لك القدم ... صلوات ربى وسلامه عليه وعلى صاحبيه ، طبعاً لا نريد أن نتحدث لماذا تميزت هذه العبادة دون غيرها بذكرها مقرونة بإسم صاحبها مثل حاج أبراهيم وحاجة الروضة وحاج فيصل الأقرع وحاج سيف الدين خواجة وحاج الأمين عبدالقادر وحاج خلف الله بلة وغيرهم أما حاج مهند وحاج طلال وحاجة ولاء وحاجة أريج ( ديل لسه مادخلوا قاموسنا الإجتماعى ) ... بالمناسبة أنصار السنة قالوا لاتجوز أن نطلق عبارة حاج فلان لمن أدى فريضة الحج لأننا لم نسمع الصحابة يقولون حاج الرسول أو حاج أبوبكر أو حاج عمر !! لذا لزم التنويه .
*** قفة الملاح بين مؤتمر أبوجا والبجا
عيد الضحية فى السودان له طابع خاص وطعم مميز حيث الشية والمرارة النية وأنا لست من أنصار المرارة لكن مع الشية مهاجم درجة أولى أخطر من ( كاريكا وشيبولا ) وخاصة عندما تكون الشطة بالدكوة حاضرة فى هذا المقام الرفيع والجناب العالى ( الحكاية شنو !! كلكم بقيتوا تتمطقوا !! والعجب أنا ) طبعاً بعد الأمطار التى ضربت السودان ومع الخريف سوف يكون سعر الخروف فى العلالى وسوف يكون الخروف الجامبو أغلى من نجوم التسجيلات الأجانب وكمان الخروف عايز معاه لزوم الفطور شرموط وويكة وبهارات وإليكم أسعار العملات حسب ماوردت إلينا من البنك السودانى الفرنسى ( أستغفر الله ) إليكم أسعار البهارات حسب ماوردت إلينا من الإبن عثمان محمد عثمان (وزير التموين فى البيت ) ربع الويكة 140 جنيه وكيلو الشرموط 80 جنيه وهلمجرا ، يا شباب نحن كل يوم قاعدين نسمع الحكومة فى التلفزبون تتحدث عن تخفيف أعباء المعيشة والأسعار مولعة نار ومازالت السلع تمد لسانها هازئة من التصريحات الجوفاء ، طيب رأيكم شنو نعمل مؤتمر ( أبوجا ) أو البجا من أجل سواد عيون ( قفة الملاح ) وماعندنا مانع نسمح لأصدقاء الإيقاد بالتدخل شريطة أن يكشكشوا جيوبهم ويجبروا الحكومة أن تدخل يدها فى جيبها عشان خائفين جيب الحكومة تكون فيه ( عقارب ) ... هناك ملاحظة يجب أخذها فى الحسبان أن موسم الفيضان فى السودان تعقبه مجاعة ففى عام 1988 بعد السيول والفيضانات زرع الناس الذرة والقمح ولأن نسبة المحاصيل المزروعة كانت كبيرة عجز المزارعون عن حصدها وترجيلها وفى العام التالى عزفوا عن زراعة الذرة والقمح وزرعوا الفول والبصل وحصلت المجاعة ، فهل إحتاطت الحكومة لهذا الأمر أم شغالة بسياسة ( مركب على الله ) مابتغرق !! ...من مزايا العيد فى السودان أن الزواج يكون فى هذه الأشهر المباركة وخاصة أيام العيد الكبير وعندنا من أبناء جمعية أبناء المتمة بالرياض هذا العيد إتنين من العرسان الأول هو أمير التاج الذى سوف يعقد قرانه على ست الحسان بت الخال ( رانية أحمد النور ) ومحمد حسن محمود وشريكة حياته (زينة الشباب ) هديل مجذوب ... إن شاء الله يغلبنكن بالعيال وتغلبوهن بالريال .
*** أهل الجاهلية والإجرام فى تحليل الحرام
الأشهر الحرام الأربعة هى ذو القعدة وذو الحجة ومحرم ورجب فقد حرم الله فيها القتال ولكنها لم تسلم من عبث أهل الجاهلية مثل غيرها المقدسات ، وحتى أيام السنة عند هؤلاء القوم كانت 12 شهر و15 يوم ، لذا كان الحج مرة يكون فى رمضان ومرة فى شوال ومرة فى ذى الحجة وغيرها من الشهور حسب دوران هذه الأيام ، وبما أن العرب قديماً كانوا يعتمدون على السلب والنهب فقد كانوا يعانون من طول مدة الثلاثة أشهر الحرم المتوالية لذا لجأوا لحيلة تحليل الحرام وتحريم الحلال فكانوا يجعلون محرم مكان صفر وصفر مكان محرم وينهبون ويسلبون فى شهر محرم ويكفون عن السلب فى صفر الذى جعلوه حراماً بآرائهم الفاسدة وقلوبهم الحاقدة ، وكانت حجتهم فى ذلك أنهم حافظوا على عدد الشهور الحرم الأربعة ولم يجعلوها ثلاث وإنما فقط إستبدلوا شهر مكان شهر آخر ، وكانوا يطلبون من صاحب النفوذ والحظوة فى منى وأمام الحجيج ويقولون له أنسئنا شهر المحرم ، والنسئ فى لغة العرب هو التأخير والتأجيل فيجيبهم لقد أنسأنا محرم مكان صفر !! وقام القرآن الكريم فى الآية 37 من سورة التوبة بنسف هذه القاعدة الفاسدة فى قوله تعالى ( إنما النسئ زيادة فى الكفر يضل به الذين كفروا يحلونه عاماً ويحرمونه عاماُ ليواطئوا عدة ماحرم الله ) ... ونحن فى هذه الأشهر الحرم نشاهد ونسمع مايفعله الطيران السورى ومن خلفه روسيا وإيران بأبناء حلب الصامدة وأصبحت روسيا اللئيمة تبيع أسلحتها الجديدة بعد أن تعد العملاء بأنها سوف تجربها على الطبيعة فى أبناء الشعب السورى البواسل ومن بعدها سوف يتأكد الزبون من جودة البضاعة .
*** خاتمة قبل الوداع
محمد عبد الرسول الشهير بى ( بخاتى ) من ظرفاء المتمة وزول حبوب وأخو أخوان وطباخ ماهر ومن نجوم جمعية أبناء المتمة بالرياض قبل أن يطيب له المقام فى جدة مع رفيق دربه مجذوب إسماعيل ، ولقد زرته مرة عندما كان يعمل فى حفر الباطن ورآنى أريد أن أتوضأ ولابس ( شبشب مع شراب ) فسألنى ضاحكاً ( مالك يا الجعلى الليلة عامل كدة زى ستات الشاى !! ) لكن ربك رب الخير ( رماهو ) فى عمتنا السرة بت البشير وهى إمرأة حديدية وكريمة ولكن كان زعلت صعبة ، وكانت تنوى الحج قبل عدة أعوام وتأخر جوازها فى السفارة فقال لها الناس ... السنة دى المنادى ماناداك وماعندك فرصة للحج ، وزاد حزنها عندما تسمع كل ليلة بشباب القادرية بقيادة عادل نسيب عمران ومحمد على النور والتاج مدينة وهم يمدحون المصطفى صلوات ربى وسلامه عليه وهذا المديح يعنى أن الحاج قائم بكرة ، وصادف أن دعتنى حاجة السرة للفطور وبينما كنت أسير معها فى الطريق قابلها بخاتى وقال لها ( إنتى حدك لى وين ياولية لا هسع حايمة بى جاى !! ) فصاحت فى وجهه ( معقول زول يصابح وشياتكم ديل يزورالرسول !! ) فلم نملك غيرأن نضحك !! والحمد لله ربنا سهل لها بعد يومين وحجت ، ومن طرائف أهل المتمة أن العم السيد صالح جاء للحج ووجد باكستانى دقنه كبيرة وهو يمسك بأستار الكعبة ويبكى ( ويجعّر ) بأعلى صوت !! فقال له السيد صالح ( قر ... قر ...ياناكر إتلقى أمانة ماك مسوى ليك قلائل ومصائب !! ) وإلى اللقاء فى مفكرة قادمة وكما يقول الحبيب محمد الفاتح ( كتاحة ) ... أقعدوا بالعافية ... ونترككم فى حفظ الله ورعايته ونستودعكم الله الذى لاتضيع ودائعه .
امسح للحصول على الرابط
بواسطة : محمد عثمان الجعلي
 8  0
التعليقات ( 8 )
الترتيب بـ
الأحدث
الأقدم
الملائم
  • #1
    عثمان علي حميده 09-19-2016 03:0
    باسلاام كلام جمبل يا الاستاذ محمد اتمنا يوم مفكره ويوم كوره
  • #2
    الامين عبد القادر 08-27-2016 07:0
    التحية والسلام حاج الجعلى وربنا يتقبل الطاعات ويسهل عليكم الحجة ويتقبلها ونحن كل عام كنا نعمل زى حكايتك دى يوم خمسة يوم ستة ذو الحجة نركب ونجى فى السيل ونحرم ولكن الان الامور ماعادت زى اول دحين انت عملت تصريح ولا حاجى عنقالى ساكت يازول وفى كلا الحالات ربنا يتقبل الطاعات --- وعقبال لكل الحجاج الذين ذكرتهم فى المفكرة الرائعة

    قفة الملاح اعيت من يداويها وهى تداوى كيف اذا الدولار شارف على العشرين يعنى تانى قفة الملاح ذاتها فى خبر كان وان بقى كيس بلاستك صغير ماقصر تب الواحد بهذا الوضع -- الله يجازى الكان السبب وربنا يبعدهم اليوم قبل الغد --- وانت الناس دى مابتشبع ابدا !!!!
    ودمتم للوطن والمواطن فى حفظ الرحمن ورعايته

  • #4
    ابوحسن 08-27-2016 02:0
    لك التحية استاذنا محمد عثمان وبارك الله فيك علي هذه المفكرة الجميلة ونسال الله القبول الي الجميع حسب النيه
    لقد اجبتني هذه الابيات **ياخير من دفنت بالقاع اعظمه *** فطاب من طبيهن القاع والاكم
    نفسي الفداء لقبر انت ساكنه *** فيه العفاف وفيه لجود والكرم
    لئن رايناه قبرا ان بباطنه *** لروضة من رياض الخلد تبتسم
    لو كنت ابصرته حيا لقلت له *** لا تمشي الا علي خدي لك القدم
    اللهم صل وسلم علي سيدنا محمد وعلي اله وصحبه وسلم تسليما كثيرا والللي جزاك الله خيرا اخونا ابو عثمان علي الابيات دي
    دخلتنا في احوال شخصية في هذه الايام المباركه ونسال الله ان نكون من الحاجين هههههههه ما نيقاء زي حاجه السرة بت بشير
    هههههههه وبعدين يقابنا بخاتي ويضحك علينا والحية له وايضا الي العرسان وربنا يتمم علي خير بازن الله والف مبروك لهم
  • #5
    منعم ابوناصر 08-27-2016 01:0
    تحياتى جعلينا اديك العافيه كالعهد بيك دوما مذكره شيقه وفيها كل ماهو جميل ومبدع حاضرا كان او ماضى وبعدين ربنا يتقبل منك مقدما لانك انت بتكون فى مناسك الحج ونحن فى الخروف وتبعات الخروف من الشيه والمراره النيه وشطة الدكوه البتخلى حلقك يتمطق وايضا مبروك مقدما للعرسان ,,,,, وانا كذالك اضم صوتى الى اخونا الاقرع واقليك قفة الملاح عند الكريم انشاء الله يتلطف باهلنا هوالقادر على ذالك ونحن نتكلم يومى فى القفه بس امكن لخير لينا هذا العناء والتعب انشاء الله نلقاها قدام ,,,,,, اخونا بخلتى ماقصر معاك بس انت دافنا ليهو لمن عمتنا السره بت البشير جابت ليك حقك بقيت ذى حبايبك الحمر قالو قبل 30 سنه الحكم صرف منهم جزائيه امام سيدالبلد البركه فى عمتنا السره انشاء الله تجيب حق حبايبك الحمر ذى ماعملت معاك
  • #6
    سيف الدين خواجه 08-27-2016 09:0
    حبيبنا نسال الله يوعدنا باخري وانت هناك بارك وخليك بارك !!!اما قفة الملاح اظرف ما قرات ان مسطولا سالوه متي تنقلب هذالحكومه فكان ردة هي اصلها مقلوبن بس كيف نمرق من تحتا سالمين !!!وما زال العصر مستمرا لحين اشعار اخر !!!وطرفه اخري قال احدهو الرغيف كان اربعة بجينيه عام 2014وعام 2015صارت 3وعام 2016صارت اتنين اما عام 2017ستكون واحة بدنيه وعام 2018ستكون المسالة تتصور مع الرغيقة بجنيه وترجعها للمحبز !!!وشكرا وخليك بارك
  • #7
    ودعقيده خلف 08-27-2016 09:0
    استاذي الفاضل لك التحيه دوما ومشتاقين والله ومبرووووك ليك الحج مقدما وربنا يوفقك ويتم ليك حجك ونقول للعرسان الف مبروك انشاء الله حياة زوجيه سعيده بالرفاء والبنين اما بالنسبه للحبيب كتاحه لسع هو ما حجه عشان انت تقول له حاج اما بالنسبه لسكنك الحالي جوار الجمرات انتبه ما يقوم عليك شيطان من الجمرات وبعدين المريخاب يشمتو عليك يقولو داء غضبنا عليه
  • #8
    فيصل الاقرع 08-27-2016 01:0
    سلام جعلينا بقيت تهجمنا نص الليل لكن هجومك بردا وسلاما علينا اليوم المذكره منوعه وجميله ونتمني لك حجا مبرورا وسعيا مشكورا وماتنسي جيب لينا معاك طواقي وسبح والا ما حنعتمد ليك الحجه كان صاحبنا راجل نكته مقيم هنا وبعدين زي شغلتك دي قال ماشي الحج فواحدمن الجماعه قال ليهو الحج دا اكان ما الزول ركب لي الطياره والا الباخره وجاهو من هناك مو حج اخونا قال ليهو نان نحن جائيين بطوف ونبارك للعرسان والعروسات وربنا يتم ليهم علي خير وقفة الملاح قطعت اضنيها من كترة ما نجهتها وكل ما تجيب سيرتها تمشي طالعه لفوق كدي فك سيرتها اكان ربنا انزلها وعمك السيد صالح بقطع وهو في الحج مالو انت ما قلت نبحر بعيد عن الكوره كاريكا وشيبوله ديل حجاح
    ولك التحيه وخلينا ننوم علي مذكرتك دي
أكثر

للمشاركة والمتابعة

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019