• ×
الأحد 18 أبريل 2021 | 04-17-2021
محمد عثمان الجعلي

الهلال الجسور يهزم النسور

محمد عثمان الجعلي

 10  0  3606
محمد عثمان الجعلي

لعب الهلال الشوط الأول أمام النسور بأستاد الخرطوم ( أى كلام ) ولم نشاهد إلا 3 كرات نحو مرمى الحارس محمد عبدالله منها يسارية سادومبا ورأسية نزار الضعيفة أما أحمد فتحى فقد كاد أن يغزو شباك الهلال لولا تألق مكسيم وفدائية الشغيل ولعب الضيوف خندقة صاح وعنف قانونى وغير قانونى ، وفى نهاية الشوط الأول أصيب عمار الدمازين ودخل العميد مساوى وكان لغياب الخلوق كاريكا أثره الواضح فى صفوف الفرقة الزرقاء ، ونجح الإمبراطور بلاتشى فى شوط المدربين بعد أن إستبدل صهيب بالطاهر الحاج ( سادومبا ) وكان لدخول سادومبا السودانى أثره الواضح فى خلخلة دفاع النسور ، وفى الدقيقة 70 مرر إدوارد سادومبا الكرة لرجل المهام الصعبة الدكتور بشة الذى أودعها شباك النسور معلنة ميلاد هدف جميل حصد بموجبها هلال العشق الجميل نقاط المباراة كاملة وأودعها فى رصيده فى البنك الأزرق وهدف بشة إسمه ( شحتفة روح الوصايفة ) الذين كانوا يحلمون بالدرون ، وتحكر سيد البلد بجدارة على كرسى الصدارة وإرتفع بنقاطه إلى 65 نقطة وأحرز رماته 57 هدف وولجت شباكنا فقط 12 هدف وأصبح الفرق بين هلال الملايين وأقرب وصيف 3 نقاط رغم أن الوصيف حتى الآن لعب 26 مباراة والهلال 25 مباراة ... وأحرز رماة الجيران 50 هدف وولجت شباكهم 15 هدف ، ومازال سيد البلد صاحب أقوى هجوم وأقوى دفاع فى البلد ومازال شعار هلال الساجدين والناس الصالحين المرفوع ( تمتع بالرحلة ودع القيادة لنا ) أدار المباراة الحكم صبرى محمد فضل الذى طرد جزار النسور المدافع مرتضى مرسال بعد نيله البطاقة الصفراء الثانية فى الدقيقة الأخيرة للمباراة مع خشونة متعمدة مع إدوارد سادومبا ، ورغم أن الحكم أنذر سادومبا إلا أننا نحترم قرارات قاضى الملعب وهذا هو ديدن الهلالاب ولو تعرضنا للظلم والعنف ، لم يكن النسور بالخصم السهل ولكن حظه العاثر أوقعه فى طريق سيد البلد الذى يمارس هذه الأيام زحفه المقدس نحو الصدارة ، ومباريات الهلال القادمة مع الأمير البحراوى يوم الثلاثاء 23 أغسطس ومع أهلى الخرطوم يوم الأحد 28 أغسطس وبعدها يوم 6 سبتمبر سوف يلتقى نيل شندى بالجوهرة الزرقاء ويشد الرحال بعدها لفاشر السلطان ليلعب ضد هلالها ومريخها ثم بعدها أهلى وأمل عطبرة بالجوهرة ثم الخرطوم الوطنى ومباراة مسك الختام فى العاشر من أكتوبر أمام ( وصيف دنيانا ) بملعبه وإذا حصد نجوم الهلال كل هذه النقاط سوف نسمح لهم بأن تكون مباراة الوصيف ( قزقزة ) وتعادل .... ضحكت وأنا أقرأ ماكتبه الإخوة الزملاء خلف الله أبومنذر ومحمد حسن شوربجى عن صدارة المريخ المؤقتة حيث وصفها أبومنذر بأنها ( زى الزول القرصتو عقرب ورقدوه فى الحوادث ) حدها قريب ، كما وصفها شوربجى بأنها زى إنقلاب تركيا ، ونعتذر للأخ شوربجى لعدم الإتصال به لأنى فقدت رقم جواله .
*** أبراهيم جعفر فى المريخ زى عتالى البطيخ
تقول بعض الطرائف أن مدرب حراس مهووس بمهنته شاهد مرة عتالى بطيخ على ظهر لورى وهو يقفز فى الهواء عالياً (ويصب ) البطيخة ويضعها فى بطن اللورى وفى دقائق يشحن اللورى فتعاقد مدرب حراس المرمى مع هذا العتالى ، وفى أول مباراة قفز العتّالى عالياً وإلتقط الكرة وأودعها في شباك فريقه كما كان يعمل فى مهنته السابقة ، تذكرت هذه القصة وأنا أقرأ ماكتبه إعلام المريخ أن نجمه إبراهيم جعفر الذى أحرز هدف فريقه الوحيد فى مرمى حارس الأمل فواز جمال فى الدقيقة 13 عاد نفس هذا الإبراهيم وأرجع الكرة قصيرة لحارس فريقه ( ود الجنسيات التلاتة ) جمال سالم فما كان من لاعب الأمل الشاب عبدالرحيم على إلا أن يخطف الكرة ويودعها شباك جيمى محرزاً هدف التعادل لفريقه فى الدقيقة 87 وعاد المريخ بنقطة غالية من عطبرة ونجا الفريق الأحمر بأعجوبة من فك الفهود ولو أحرز الغانى إيزيكال بعض الأهداف من الفرص الكثيرة التى أضاعها لرجع المريخ للبقعة بهزيمة تسير بذكرها الركبان ، كفاكم نقطة عطبرة الصامدة ( دايرين الموت !! ) ونجح مدرب الأملاب ( ماو ) فى تبديله بعد أن أدخل عبدالرحيم على بدل إيزيكال الذى أرهق دفاع المريخ بتحركاته المزعجة وكالعادة رسب تية فى شوط المدربين الثانى ، وغاب عن دفاع المريخ محترف يتقاضى راتبه بالدولار إسمه كريم الحسن يبدو أنه تم تخزينه فى مستودع المواسير الأحمر الذى يعج بالبضاعة المضروبة ... ود الوزير... على جعفر لا حس لا خبر ، بالمناسبة مريخ الشكاوى إشتكى تاااااانى لاعب أملاوى إسمه عصمت صلاح بحجة نيله 3 كروت !! لذا لزم التنويه .
*** رسائل غنائية رياضية من الفنان الطيب عبدالله
الصديق العزيز ( أبوطارق ) الفنان الطيب عبدالله أجريت معه لقاء عام 2007 لصحيفة الخرطوم بمدينة جدة وسألته عن أحب أغانى الطيب لنفسه !! فأجابنى ... والله ياجنا فى جناك ليك جنا .... وأغنية السنين أحب أغنياتى لقلبى وبما أن الأستاذ الطيب عبدالله مريخابى نريد أن نرسل من أغنية السنين 3 رسائل غنائية رياضية ونهديها له وهو فى مقر إقامته بأمريكا ... الرسالة الأولى من برهان تية وهو يرد على بعض شرفاء الإعلام الأحمر الذين يطالبونه بأن يطوى صفحة تراورى ومن هؤلاء الأساتذة موسى مصطفى فى عموده ( صيحة ) ومحمد كامل سعيد فى ( كراته العكسية ) ويقول برهان تية *** قالوا لى أنساه وأمسح من خيالك ذكرياتو .... وأنسى كل الماضى وأبعد عن طريقه وعن حياتو .... فات وخلاك للزمن وضاعت آمالك سداً....ليه تحن من تانى .... ليه تفكر فى صلاتو ، والرسالة الثانية من مهند الطاهر وهو يرد على الذين يطلبون منه أن ينسى الهلال ويلعب فى المريخ لأن الزمن زمن إحتراف ويرد الغزال الأسمر مخاطباً هلال العشق الجميل وجمهور الأقمار ويقول *** السنين العشت فيها معاك هنايا ... أقوى من قول العوازل وأسمى من كلمة وشاية ... لو خلاص قلبك نسى الأيام معايا ... برضى راضى وفى الغرام كم من ضحايا ... بس تأكد ياحبيبى إنو حبك فى دمايا ، والرسالة الأخيرة من نائب رئيس المريخ عبد الصمد محمد عثمان الذى أرسل رسالة مغازلة قبل المباراة للأملاب وهو يتحدث عن العلاقات الأزلية والصلات الأخوية بين فريقه والأمل ولكن بعدهدف التعادل الذى أحرزه عبد الرحيم على ( أبوعبدة ) قال عبد الصمد *** بالأمل صبرت قلبى وعشت فى دنيا الأمانى ... أهدهد الشوق بين ضلوعى وأترجم الآلام أغانى ...أروى للناس سر عذابى وأحكى ليهم ماسلانى ... لانفع دمعى السكبتو ... ولاشفع عندك حنانى ، ده كلو من عبدالرحيم على ( عملتها كيف ياعبده والدنيا خريف !! ) أنا هيّن... شيلوا شيلتكم مع ود الخواجة سيف وفيصل ود الأقرع والأمين جفارا ومن هلالاب الدمام أبو حسن ومنعم أبو ناصر وبقية أحباب الرحيق ، مشتاقين ياخلف الله ود العقيدة ( الصنّة ) كدة ماسمحة وياكتاحة كان ماظهرت فى الأيام دى معناها ( ماك طيب ولاك شديد ) ونحن سوف نبحث عنك فى كل نواحى الأمارات ...أظهر وبان وليك الأمان ,
*** همسة الوداع
حبايبنا الحلوين شغالين بسياسة ( ماتكرر تقرر ) أو كما يقول مثلنا السودانى ( ضربنى وبكى وسبقني إشتكى ) والكل يعلم أن المريخ هو الإبن المدلل لإتحاد اللقيمات الفاسد ، وهو المدعوم من كل النواحى ولقد شاهدنا الدعم الذى تلقاه أحمر جنوب العرضة هذا العام من إنحياز تحكيمى وكيف نالوا العام الماضى كأس الممتاز بواسطة لجنة ( سمير ) ورغم كل هذه الشواهد يتحدث الإعلام السالب أن الهلال هو الفريق المدعوم وأن المريخ هو المظلوم !! تخيلوا !! رغم أن الهلال هذا العام فقد نقاط مباراة هلال التبلدى كاملة فى أرضه ووسط جمهوره بقرارات مجحفة من الحكم عادل نيالا ، ورفض هذا الظلم غلاة المريخاب مثل درمة وسيحة !! وبهذه المناسبة نهمس فى أذن الإعلام الأحمر.... بالله ...وصيف سيد البلد !! مش مدعوم أكتر من نظام بشار الأسد ؟ مجرد سؤال .
امسح للحصول على الرابط
بواسطة : محمد عثمان الجعلي
 10  0
التعليقات ( 10 )
الترتيب بـ
الأحدث
الأقدم
الملائم
  • #1
    وردة 08-20-2016 05:0
    السلام عليكم جميعا ,ما أجملك وأحلاك وأبهاك يا هلال النسوان اقصد السودان , نهواك ونعشقك في كل الظروف منتصرا أو مهزوما مترنحا او مستأسدا لانك حبيب الملايين .
  • #2
    منعم ابوناصر 08-20-2016 03:0
    قول بسم الله ياودعثمان خليك شويه خفيف على حبايبك الحمر قايتو ذى ماقلت ليك يوم بسببك بموت وصيفى ووو لكن انتو اتاريكم ياناس نهر النيل عندكم مشكله مع اللون الاحمر رقم ان الامل فى اسوء الحالات لكن انتو ايه مشكلتكم مع الاحمر والحين بدأت الشكاوى والبكاءاالجرسه والحرب على الحكام المهم قول لصاحبك ودعقيده انسترو والعبو صاح وخلو الجرسه والخيل الاصيله بتظهر فى اللفه او فى عطبررررررره
  • #3
    عادل سليمان حسين 08-20-2016 03:0
    ود(ألجعلى)أخوى ألسلام عليكم ورحمة ألله وبركاته وبعد ، نهنئكم وأنفسنا بألفوز ألمستحق على فريق ألنسور ألأمدرمانى بألأمس . ونتمنى أن تستمر ألإنتصارات حتى ألتتويج بكأس ألبطولة إن شاء ألله تعالى . وألسلام أخوك عادل سليمان حسين ألدمام ج:0508123129 .
  • #4
    الكتاااااحة والتفاااااحة 08-20-2016 02:0
    انا موجود وماتتعب نفسك تفتش
    بس اذا مصر اصرارا
    او ملح الحاحا عشان تفتش
    فتش في مكان تاني غير الامارات
    المهم اذا عايز الافادة
    خدها من ود عقيدة
    قال سوي ليه دقن ؟؟!!
    يدقوك في الفندك
    واستاذنا الفاضل الجليل
    خواجة قال ليك خليك بارك
    عشان نبارك
    بركة تجيب ليها هدف بعد ولادة
    وكمان في النسور
    اكان دي بركتك احسن ليك تقوم
    اتنفض يا خوي خلي الاولاد يلعبوا
    زي الناس
    التحية لاستاذنا الامين عبدالقادر
    ولكل الاخوة المتداخلين
  • #5
    ابوحسن 08-20-2016 01:0
    لك التحية استاذنا محمد عثمان ونبارك الفوز الي ابوالهل علي النسور ولقد لعبت بشراسة ودفاع محكم وشباب نشط تمام التمام
    بهذا المستواء الجميل اما ابوالهل في الربع ساعة الاخيرة اصبحت هناك نقلات وخطورة علي مرمي النسور
  • #6
    ودعقيده خلف 08-20-2016 11:0
    استاذ الجعلي انا بتكيف لي الكرفته الحمراء مثلما انت بتتكيف لحب الهلال
  • #7
    الامين عبد القادر 08-20-2016 10:0
    التحية والسلام اخوى الجعلى نبارك لكم ولهلال الساجدين والناس الصالحين الصادرة والقيادة والريادة وبينى وبينك ناس الامل شافوا الصدارة المؤقتة السويعات دى كثيرة على الوصيف ومن اسى احسن يشوفوا ليهم سمير ولا فاتح خضر عشان يشعبطوا فى القطار الذى مر ولن يتوقف ان شاء الله
    والقول السمح بالحيل فى عبدالصمد والنقطة الغالية ( بالأمل صبرت قلبى وعشت فى دنيا الأمانى ... أهدهد الشوق بين ضلوعى وأترجم الآلام أغانى ...أروى للناس سر عذابى وأحكى ليهم ماسلانى ... لانفع دمعى السكبتو ... ولاشفع عندك حنانى ، ده كلو من عبدالرحيم على ( عملتها كيف ياعبده والدنيا خريف !! ). ما ليهم حق ياخى اصحابه ديل !!!!
    بس ياخوى ما خبرتنا عن شكوة التشة بشة ؟؟؟ خليهم يدفعوا لناس النسور عشان يشتكوا كمان !!! واعلامهم عندما يفقد المنطق يبحث عن قشة يمرق بيها من الوحل وهذا كله من ابوشيبة المخرف وكبيرهم الذى علمهم السحر مزمز ونحن لو كنا مدعومينا مابياكلوا حقنا فى ملعبنا وعلى عينك يا تاجر ولكن لاننا اسياد البلد ولازم نحترم البلد هل يفقه ذلك اعلام الضلال ؟؟؟؟
    وان شاء الله يكون حبيبنا وكتاحتنا وتفاحتنا طيب ياخى واشتقنا ليه وللقلم الشفيف اظهر يا حبيب
    ودمتم للوطن والهلال فى حفظ الرحمن ورعايته
  • #8
    سيف الدين خواجه 08-20-2016 09:0
    او عثمان برضو خليك بارك عشان نبارك !!!!!!!!!!!!!!!!!!!!!!!!!!!
  • #9
    ودعقيده خلف 08-20-2016 08:0
    استاذنا الفاضل لك التحيه بركه الفزتو بي ولاده معسر عشان ما بفقدك لانك انت دايم راجل عديم وطنيه الهلال غالب تكتب وتغني الهلال مغلوب تكون عامل ( صنه ) حرام عليك والله وانت تشجع صفررراب النسوان عفوا اقصد صفررران السودان اما بالنسبه للحبيب كتاحه اعتزل كره القدم بسبب الصفر الدولي الكبير واعتكف في المساجد يعني الراجل بقي ( مطوع كبير) عمل ليهو دقن لي سرتو دعواتكم له بالتوفيق
  • #10
    حاتم الرشيد 08-20-2016 01:0
    كيفك يامحمد
    انت عارف الكاتب المريخي محمد كامل بعضمة قلمو امس قبل مباراة الامل قال المريخ خلاص المباريات القويه جاءات وخلاص من هنا وكدا بقى مريخ شكاوي
    بمناسبة الشكاوي دي كان عندنا طالب شكاي خلاص في زمن الابتدائي كل يوم اشتكي تلاته اربعه طلبه حتى كان ضحكته يشتكيك ومرات يرجع الطلبه المشتكيهم من جنب بيوتهم يقول هوي الاستاذ قاليك تعال زمان الناس مهذبه الطالب يرجع مع الزول الشكاي دا ومابسيبك يجي راجع معاك بعد يجلدوك حتى يرتاح وقت كتر الشكاوي يوم مسكو ليك استاذ جلدو ليك جلده قالو الله تاني تجي تشتكي زول الا اجلدك تاني من اليوم داك تاني مااشتكى زول دحين الجماعه ديل دايرين ليهم جلده عشان يبطلو ههههههههههه
أكثر

للمشاركة والمتابعة

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019