يوم اشباع كروي وفني وتقني
اشباع بماتعنيه الكلمة
عشنا فيه ضياع بصري
وعشنا فرح كروي
وعشنا حزن نفسي!!!
الرموت لم يفارق ايدينا
ونظرنا لم يفارق الشاشة
ومستوي الصوت كان في الدرجات العليا لمتعة التعليق وثقافة المعلقين
تكلمنا سابقا وناشدنا
اتحاد الكرة والاعلام
رجاء لاتصدروا جماهير الرياضة السودانيه للخارج
وكل مره نشوف هجرة العمالة والموظفين والفنيين
والان الدور علي هجرة الجماهير السودانية وحتى (الالتراس)
هجرتهم بالحواس الخمسة والبدن في السودان !!!!
هجرتهم لمتابعة الدوريات والبطولات العربية مع سبق الاصرار والترصد من اتحاد اللعبة والاعلام،،،
(تم تصدير المشجع السودااااني بنجاح)
نرجع لمتعتنا الامس نبداء من وين وننتهي وين
ضعنا كثيرا نعم وتحسرنا مرات
استمتعتنا بالميادين وتحسرنا علي ملاعبنا
تشبعت اعينا مع الكميرات واللقطات وتاسفنا علي النقل التلفزيوني عندنا
اندهشنا لخيارات المحترفين وتحسرنا علي انصاف المحترفين وبعد دا (متمردين ومدلعين ورافعين القزاز)
مابين السوبر السعودي وكاس مصر
عطاء وجمال وكرة قدم حقيقة
مابين استديوهات تحليلة وصورة جميلة ومراسلين
هل ستتعود عيوناتنا مع النقل العندنا المسكين!!!!
السوبر السعودي تفوق في كل شي وسرق الجمهور السوداني داخل وخارج السودان
والكاس المصري حلاوة اهداف وعودة الزمالك الي الساحة الكروية
وجمهور المريخ ابتهج مع الاثنين
خاصه مع الزمالك الكل يرى روح المريخ في تشيرت الزمالك
واسعدنا فوز الاهلي عشان ضرب اللون ،،،،،
هل تعلم ان السومة حسم ثلاث بطولات للاهلي ومن بينها بطولة غائبة منذ اكثر من ثلاثون عام
وهل تعلم حينما اتى الي الاهلي من القادسية السعودي حضر بسعر ارخص محترف في دورينا!!!
وسعره الان يتجاوز الملايين من الريالات!!!
الاحتراف عندهم تسويق واستثمار وعندنا مامعروف عشان نسد الخانة ولا بضاعة بايرة وخربانه!!!
واحسرتاه علي النهائيات بيننا وبينهم
وكاس مصر برغم غياب الجمهور المتعة كانت حاضرة والكل مبسوط
كرة القدم متعة تنتظرها النفس
ومرات نحن حكم مباراة كفيل يسد النفس،،،،
كل الدوريات تستعين بحكام اجانب الا عندنا
حكم مغمور يتلاعب بمشاعر ملايين الجماهير ويفسد حلاوة الدوري كااااااملة وممكن تشوفو محكم لنفس الفريق المباراة القادمة
لالجنة حكام ولالجنة انضباط
ماعندنا غير ضباط اتحاد!!!!!
همهم ليس تطوير كرة القدم
همهم تدمير كرة القدم،،،،،
هذا ماصار عشية امس تناولنا وجبة كاملة الدسم من متعة كرة القدم حتى اصبحنا نحلم ونحن في استيقاظ تام
هل سنرى يوم من الايام دورينا بنفس الملاعب والاهتمام والاعلام
وحين يحصل كل ذلك اين سيكون وصل العالم من تقنيات واحتراف،،،،
استيقظ صديقي المشجع فالوجبة التي تناولتها غير متوفرة في الملاعب السودانية،،،،،
حنمسك البطولتين والمبارتين في نقاط
ونشوف نحن وين وهم وين
ابتداء بارضية الملاعب
لن نقول ملعب لندن او عاصمة الضباب
لكن مقارنة بملاعب الدوري السعودي ايضا هناك اختلاف
من ملاعبنا وحتى ارضية كاس مصر كانت مخضرة ،،،،
الحضور الجماهيري بالرغم من اقامة المباراة خارج المملكة الملعب مليان ومباراة كاس مصر برغم الحرمان الا تواجد الفئة القليلة ادانا احساس انو الاستاد ملان
ونحن الكورة في امدرمان وواحد ساكن بانت يقول ليك الكورة منقوله ولا مذاعه،!!!
نمسك النقل التلفزيوني
كورهم منقوله باكثر من عشره كميرات ونحن اربعه او خمسه كميرات وكل كميرا الوانه مختلفه من الثانيه!!!!!
الاستديو التحليلي ضيوف في فمة الروعه وفيه اكثر من محلل ونحن محلل واحد وناسي تلفونه فاتح ومرات يجيك متاخر والاستديو التحليلي يكون قبل المباراة بخمسه دقايق !!!
فقرات تحكيمية لنفس المباراة في اكثر من قناة ونحن محللين اتنين واحتمال ممنوعين من التحليل في مقبل المباريااااات!!!!!!
المدربين علي كفاءه عاليه وغوميز كمثال في الاهلي تم التعاقد معاه في الاهلي بمبلغ خرافي
بعد ان قاد التعاون من فرق الوسط والمؤخره الي الترتيب الرابع في الدوري،،،،
وصنع من سكري القصيم احلى حلاوة،،،،،
كل شي كان عشرة علي عشرة
لكن هل قادتنا ديل بتفرجوا معانا
هل بتحسروا مثلنا ولانحن برانا نتحسر ،،،،،،
ولا الفهم شنو،،،،،
خلاصة القول وسؤال للجمهور
اين هم واين نحن
نبارك للاهلي عشان ضرب اللون
ونبارك لمريخ مصر البسر العيون
همسة اخيرة
فاتنا ان نبارك لصغار السودان امس وللكابتن محسن هذا التعادل بطعم الفوز وانشاء الله في تقدم في البطولات الافريقية،،،،
نرجع لعالم المريخ حيث يؤدي الفريق تدريباته في الساحة الشعبية في الديوم وسط اجواء اسرية وروح معنوية
والحمد لله كل المصابين تعافوا من الاصابه اخرهم حماد بكري
ولاننسي ان نشكر المعد البدني واللياقي الكابتن عبد العظيم جابر
ونحن نرى بصمتك من مباراة الي اخرى
شكرا ياكابتن علي مجهوداتك
لن نقول غيرالامور تسير من افضل لافضل
الحمد لله
علينا بالصبر ودعم الشباب
وسياتي اليوم ونصفق لمجلس الوالي
علي الجميع ان يعلم ان هناك ملفات تدار في السر ولمصلحة المريخ الكيان
علينا بالصبر والدعم
ونحن ندعم ونشجع ونتفرج
وامس فرجتنا كانت خارجيه
ومتعتنا كانت حاضرة
البث الفضائي جلب الينا المتعة الي المنازل
متعة كرة القدم متعة خاصة لايحسها الي المشجعين وجماهير المدرجات
وعندنا متعة جاي اسمها متعة النفرات
علي الجميع الاستعداد جيدا عشان نحافظ علي لياقتنا يوم النفرة
وعشان يستمتع المجلس برقم مبلغ النفرة
الكرة امامنا والتحضيرات فقط هذا الاسبوع ،،،،
كملوا الربط ياقروبااااات
فقط اثنان مليون لكل قروب ،،،،
خارج النص
تلقينا خبر وفاة والد اخونا هجام ابراهيم بالشريف يعقوب له الرحمه
والمغفرة وربنا يسكنه فسيح جناته
انا لله وانا اليه راجعون
هجام من الاعضاء الناشطين في الصفوه ٣
تعازينا ليك وللاسره الاخ هجام
هذه اراء التغريدة اقبل منها ماتشاء وارفض منها ماشئت..
التغريدة تنقل نبض المدرج والقروبات وتقف في مسافة واحدة من الاحداث ،،،،،
نحاول ان نلفت الانتباه لبعض الاحداث والنقاط بواقعية........
التغريدة لن تخرج خارج نطاق المجتمع المريخي نهائيا الا ماندر
ونقد الذات يوصلنا الي الامام والي المنصات باذن الله ،،،،،
ادعمونا بالنصح والارشاد وصححونا إن اخطأنا في يوم من الايام ،،،،،،،،
***تغريدتنا ونسة وحكاوي ونقاط بصوت مسموع***
