• ×
الأحد 28 فبراير 2021 | 02-27-2021
محمد عثمان الجعلي

من المفكرة ---- زير اللقيمات

محمد عثمان الجعلي

 12  0  3612
محمد عثمان الجعلي

نعود اليوم للمفكرة الإجتماعية وهى أول مفكرة نكتبها من مكة المكرمة ومن جوار البيت العتيق ونبحر بعيداً عن سواحل الرياضة وعن شواطئ الهلال الخصيب ( آسف الهلال الحبيب ) ---- نعود اليوم للمفكرة وبلادنا تنعم بالأمطار العميمة وتقاوم السيول بعزيمة ، جعلها الله سقيا خير وبركة ونفع بها العباد والبلاد والخريف فى السودان يبهر الناظر ويسر الخاطر ، طبعاُ الأمطار عايزة العصيدة الحاااااارة بالتقلية ( أحسن من الفول المصلح ) ---- وبمناسبة العصيدة والفول إن شاء الله تكون الحكومة والمعارضة ومعاهم لجنة حوار 7+ 7 وضعوا من ضمن أجندة العمل تخفيف الأعباء المعيشية للمواطن البسيط وتواصوا على عقد مؤتمر ( قفة الملاح الجامع ) معقول ياحكماء السودان عندنا النيل والنخيل والزرع والضرع ورغم ذلك المواطن يعانى المسغبة فى أرض الخير والطيبة ، وكل يوم نسمع عن تخفيف أعباء المعيشة فى التلفزيون وكل مسؤول حريص على ذلك ورغم ذلك المواطن العادى لما يلقى ليه ( فطرة سمك يعمل سجدة شكر !! ) ياربى هل ممكن يعود مشروع الجزيرة لسالف عهده خاصة والجميع قد إستبشروا بأن ( إيلا سوف يشيل الشيلة ) وهتاك العديد من مشروعاتنا الزراعية التى تحتاج إلى ( إيلات مش إيلا واحد ) ، ونسأل حكومة نهر النيل على سبيل المثال أما آن لمشروع النقع الزراعى أن يترجل !! مع العلم أن مشروع النقع الزراعى يقع على بعد 21 كليومتر من مدينة المتمة وأرضه تمتاز بالخصوبة العالية ويزرع بالرى الطبيعى والصناعى ولقد تمكن المستثمر السودانى ( الشيخ عبد الباسط ) من حفر بعض الآبار وكانت الإنتاجية أكثر من جيدة وإستبشر الناس بأن مشورعاً جديداً نشأ ليساند مشروع الجزيرة ولكن نحن عندنا (عدم ثقافة النهائيات ) حيث مات المشروع ودفن بجوار أستاذه---- شعار ( أن نأكل مما نزرع وأن نلبس مما نصنع !! ) ، نتمنى من ولاة الأمر العودة للجذور وزراعة الأرض الخصبة فى كل أنجاء السودان ويجب ألا ننسى أن بلادنا مازال الأمل معقوداً عليها أن تكون سلة غذاء العالم ، وقوموا لزراعتكم يرحمكم الله .
*** الخريف والمطر عندما كان الزمان أخضر
معليش ياشباب سرحنا مع ( قفة الملاح ) ونسينا عنوان المقال ( زير اللقيمات ) طبعاً كل زول فى باله إن الزير للموية بس !! وحتى زير الموية فى عهد التلاجات تمت إحالته للمعاش ، زمان الحبوبة تقول ( أمشوا يا أولاد جيبوا لى كوز موية سااااقط من زير الرجال ) ـ لكن نقول لجيل الإنترنيت الزير عنده وظائف أخرى غير تبريد الموية !! ففى زمن الخريف والمطر عندما كان الزمان أخضر كنا نمشى الخلاء أو كما يقول أهل الخليج ( البر ) وعندنا من ضمن الخلاء فى بادية المتمة وبالتحديد منطقة إسمها ( الشبكة ) حيث بقية الحبوبات ومن تبعهم بإحسان ، وكان العرس فى الخلاء يكون دائماً زمن الخريف وكان الزواج مبسطاً فى كل شئ ، أما الطعام فكان عبارة عن عصيدة بى ملاح تقلية أو سليقة والعصيدة نفسها كانت تخلط بالعجين المر وتسمى ( لقمة ) طبعاً السليقة ماعندها أى علاقة بالشوربة... سليقة لحم عليها شوية بهارات وخلاص ، أما التحلية فكانت حكاية عجيبة عبارة عن تمر بركاوى ولحمة محمرة ولقيمات تمر والأخيرة يخلط دقيق اللقيمات مع التمر بعد طحنه وغليه فى النار ويكون حجم اللقيمات كبير ولونها أحمر ونسبة لقلة الأوانى كانت هذه اللقيمات توضع فى أزيار ويجلس ( للكفاية ) كبار القوم يوزعون اللحم والتمر واللقيمات على الحضور ، ماعايز ينط لى شافع من جيل الإنترنيت يقول لى الكفاية يعنى شنو !! أسألوا فيصل الأقرع فى جدة وسيف خواجة فى الدوحة ، وأذكر أن كل الذين كانوا يجلسون ويوزعون الكفاية أصبحوا الآن تحت الأرض منهم جدنا شيخ حامد ود التاى وأحمد ود عبدالله ود منصور وعمنا أحمد ضريس وعبدالله ود البشير رحمهم الله أما العم صديق ود عبد الرحمن نسأل الله أن يمد فى عمره ، وكانت لقيمات التمر لها نكهة خاصة حتى وهى فى بطن الزير ، بالمناسبة زير اللقيمات ماله أى علاقة بإتحاد اللقيمات !! لذا لزم التنويه .
*** السيدة خديجة بنت خويلد الزوجة الوفية الحصيفة الذكية
مادام الحديث عن الزواج وإطعام الطعام يجدر بنا أن نتحدث عن أشرف زواج عرفه التاريخ هو زواج الطاهرة العفيفة خديجة بنت خويلد بالصادق الأمين صلوات ربى وسلامه عليه ، والسيدة خديحة بلغة العصر كانت من نساء الأعمال فى مجتمع لا يضع للمرأة وزناً ولكنها شقت طريقها فى التجارة بحكمة وحزم وذكاء ، وكانت تستأجر الرجال فى تجارتها مقابل نسبة من الأرباح وعندما سمعت بالصادق الأمين محمد ( قبل البعثة ) أعجبت بصفاته وعرضت عليه أن يعمل فى تجارتها وأعطته ضعف ماكانت تعطى غيره ، وعندما أخبرها غلامها ميسرة الذى كان يرافقه فى السفر بحسن أخلاق الحبيب لم تتردد فى أن تعرض عليه نفسها أن يتزوجها وهى التى رفضت الزواج من كل أشراف قريش ، وعندما عرض الصادق الأمين الأمر على عمه أبوطالب شحعه وقال له ( إن هذا خير ساقه الله إليك ) وتم الزواج الميمون وإحتفلت به قريش وكان المهر 12 أوقية ذهب وفى رواية 4 ألف دينار ، وعندما نزل الوحى على خير الورى كانت السيدة خديجة أول من آمن به من خلق الله وأول مخلوق توضأ وصلى ، وجاء فى فضلها كثير من الأحاديث منها حديث ( خير نساء العالمين أربع ...مريم بنت عمران وآسيا بنت مزاحم إمراة فرعون وخديجة بنت خويلد وفاطمة بنت محمد ) ، ولقد نزل أمين الوحى جبريل وهو يقول للحبيب المصطفى ( هذه خديجة أتتك بإناء فيه طعام فأقرأ عليها من ربنا السلام وبشرها ببيت فى الجنة من قصب لا تعب فيه ولا نصب ( والقصب هو الدر المرصع بالياقوت ) ويكفيها شرفاً أنها أم لجميع أولاد النبى عدا إبراهيم فهى أم فاطمة وزينب ورقية وأم كلثوم وعبدالله والقاسم ، كان الحبيب المصطفى وفياً لها فى حياتها وبعد مماتها فمكث معها 25 سنة لم يتزوج غيرها وكان يكرم صديقاتها بعد وفاتها وتوفيت عام 620 ميلادية وعمرها 65 سنة وكان ذلك قبل الهجرة بثلاث سنوات ودفنت رضى الله عنها بالحجون ( مقبرة المعلاة الحالية قرب الحرم المكى)
وذلك بعد أن صمدت مع الحبيب المصطفى صلوات ربى وسلامه عليه فى حصار شعب أبى طالب الذى فرضته قريش على بنى هاشم رضى الله عنها وأرضاها .
*** خاتمة قبل الوداع
من طرائف أهلنا ناس المتمة أن حدنا أحمد ود محمد ود حسن كان سريع البديهة وكان يرعى غنمه فى بادية المتمة أيام الخريف وكان معه إبن أخيه سعد ود حسين الشهير بالمليك وكان سعد قد فقد إحدى عينيه وقت شبابه ومعهم العم حسن بلة رحمة الله عليهم وأمد الله فى عمر سعد المليك ، وترك سعد وحسن بلة غنمهم مع جدنا أحمد وذهبا لحضور زواج فى شندى ، وبعد أيام عاد حسن بلة وتخلف سعد فسأله جدنا أحمد ( ود أخوى مالو ماجاء معاك !! ) فأجابه حسن بلة والله سعد قال داير يقعد كم يوم فى الحفلة وشحدنى مركوبى الجديد أديتو ليه وشحدنى العراقى الجديد أديتو ليه ) فأجابه جدنا أحمد ( بارك الله فيه الخلىّ ليك عينك !! ) ، وكما يقول الحبيب محمد الفاتح ( كتاحة ) أقعدوا بالعافية . .. وإلى اللقاء فى مفكرة قادمة نستودعكم الله الذى لاتضيع ودائعه ونترككم فى حفظ الله ورعايته .
امسح للحصول على الرابط
بواسطة : محمد عثمان الجعلي
 12  0
التعليقات ( 12 )
الترتيب بـ
الأحدث
الأقدم
الملائم
  • #1
    ابوحسن 08-09-2016 03:0
    لك التحية استاذنا محمد عثمان وبارك الله فيك علي هذه المعلومات والقصص المفيدة واللي ليك وحشه من نوع زيراللقيمات ههههه
    بعدين وعليه في النار ويكون لونها احمر ههههههه انا هنا اتزوقت طعم اهل الصفوة ههههه
  • #2
    الضرب بالدور 08-09-2016 01:0
    عليك الله يا الجعلي ما تديهو رقمك نهائي ...الزول دا عايز يحسدك من شافني قلت ليك امشي ليهو عايز يثبت لي انو صديقك (اتصل بي فقدت رقمك) هههههه بالله قوم بس ....ويا الجعلي امانه في ذمتك لو عندك اليوزر بتاع الموقع تحذفوا (عاجل غير اجل) خليهو يمشي يشوف ليهو شغله تانيه .
  • #3
    الضرب بالدور 08-09-2016 01:0
    عليك الله يا الجعلي ما تديهو رقمك نهائي ...الزول دا عايز يحسدك من شافني قلت ليك امشي ليهو عايز يثبت لي انو صديقك (اتصل بي فقدت رقمك) هههههه بالله قوم بس ....ويا الجعلي امانه في ذمتك لو عندك اليوزر بتاع الموقع تحذفوا (عاجل غير اجل) خليهو يمشي يشوف ليهو شغله تانيه .
  • #4
    الضرب بالدور 08-09-2016 01:0
    عليك الله يا الجعلي ما تديهو رقمك نهائي ...الزول دا عايز يحسدك من شافني قلت ليك امشي ليهو عايز يثبت لي انو صديقك (اتصل بي فقدت رقمك) هههههه بالله قوم بس ....ويا الجعلي امانه في ذمتك لو عندك اليوزر بتاع الموقع تحذفوا (عاجل غير اجل) خليهو يمشي يشوف ليهو شغله تانيه .
  • #5
    الامين عبد القادر 08-08-2016 06:0
    التحية والسلام اخوى الجعلى اليوم مفكرتك مرصعة بالدرر وبدايتها بقفة الملاح التى اعيت من يداويها وغلبت شيوخ طريقتنا كلهم وعن خريف هذا العام والذى اتى بردا وسلاما على قفة الملاح وان شاء الله كل المواد والخضر والفاكهة تكون بتراب الفلوس كما يطلع ليها ود حنوت يبشتنها !!!!
    بعدين حدثتنا عن زير اللقيمات ونسيت البرميل الذى يكون بجانبه ام عاوز تتركه لسعد وحسن بله لوحدهم واعزم معاك اخونا كتاحة الزعلان عشان نرضية بزير لقيمات مازى لقيمات اصحابنا اتحاد السجم العام بالتاكيد !!!!
    وكان ختام المفكرة مسك بأعظم نساء العالم (وعندما نزل الوحى على خير الورى كانت السيدة خديجة أول من آمن به من خلق الله وأول مخلوق توضأ وصلى ، وجاء فى فضلها كثير من الأحاديث ---)
  • #6
    فيصل الاقرع 08-08-2016 12:0
    سلام جعلينا اليوم عادت المفكره بعد طول غياب وبرضو قفة الملاح حاضره زي الحوار الوطني والما له نهايه لكن يا الجعلي الايام دي الحله بقت نار الله الموقده وساندوتش الطعميه بقي ب15جنيه خليك من السمك وزيرك الليل اللقيمات دا الزمن دا المال البدفعوا كله ما اكفيهو وبمناسبة الكفا دي يا شباب زمان الناس البقيفوا علي الضيوف الفي المناسبات وكل قريه فيها ناس معروفين للمهمه لمن الضىوف اشبعوا تب لمن الواحد اقول خلاص كفاي شبعت وفي سائق الفيات (نسقيك بكفوفنا لما تتكفا )والجعلي قاعد ابحت ساي
    شواطئ الهلال الخصيب ( آسف الهلال الحبيب ) ---- والهلال خصيب وحبيب ما في داعي للاسف
  • #7
    محمد حسن شوربجى 08-08-2016 11:0
    حبيبنا الجعلى
    لك التحيه اتصل بى لانى فقدت رقمك
  • #8
    سيف الدين خواجه 08-08-2016 10:0
    اخي الحبيب ما كنت فاكرك يا يت كنت فاكرك قديم كدي لك لقيمات مع ودي وتزيد ماس الانترنت طابق بعد الكفاية حليل زمن التايات في البوش وحليل زمن الصفاح والعروروووك لما يتم وحليل زمن الزير للمشروبات كافه في الصيف من شراب المكاميس للفقرا وحليل زمن الحسوة في عز الصيف !!!للزير استخدامات كثيرة وكان معالم عربات سكه حديد وانواعة الاحمر والاسود والاسود اسمه البقادي وهو صناعة سودانية خالصه شهدتها بنفسي وصغيره القله ومنه القادوس في الساقية احد اعمامنا صارب لط وتاخر في المشرع بسبب الرئيس نميري فقال يا جماعه رئيسكم القادوس بتين يجي نهارنا راح وانوه لمشروع ناكل مما نزرع ونلبس مما نصنع هو مشروع وضع عام 1987 للاكتفاء من القمح ورفع تقرير في سونا للمدير عن كلام الرئيس وقال بالنص لما عرف انه من ايام الديمقراطية قال (اي حاجه عملوها الجماعة ديك ما عايزنها ومزق التقرير ) ونسي المدير ان الدول عمل تراكمي وشكرا لك
  • #9
    منعم ابوناصر 08-08-2016 10:0
    اخى وحبيبى تحياتى واشواقى والله شى ابداااع واستفدنا من هذه المفكره المفيده حقا وعملت خير انك ابحرت بنا بعيدا من ناس ابوخيبه وناس سلك العريان والداخلين جديد ناس عبدالتام الشغلو ماتمام ووووو المهم انك ابحرت بنا فى المفيد وعلى ذكر امنا خديجه رضى الله عنها انى فى عمرة رمضان حرصت انى ازور قبرها واسلم عليها وقد كان والحمدلله بعدين ضربك تحت الحزام زير اللقمات انا عارفك قاصد منو عشان هو بقت ليهو كرش فى اتحاد اللقمات وكل يوم يصرح ضد سيدالبلد وكل يوم يتوعد وعلى قول المثل يهدر بارك وقال عايز يكون سكرتير الوصيف تخيل يكون مين هذا هو زير اللقيمات نحن عارفين الابر بتاعتك دى ..... تحياتنا لاهلنا فى المتمه وناس جدنا احمد ودمحمد
  • #10
    ابو حازم 08-08-2016 09:0
    سلام عليكم حبيبنا الجعلي وعودا حميدا للكتابة من جديد، وحقيقة افتقدنا ابداعاتك خلال الفترة الماضية واتمنى ان لا تنقطع عنها، ولابد من التواصل خاصة في كتابة المفكرة وطرائف اهلنا في المتمة.
    فعلا الخريف له وقع خاص في بلادنا الحبيبة رغم سوء التصريف والخوف من السيول الجارفة وفيضان النيل الذي يهدد القرى القريبة من مجراه.
    زير اللقيمات الذي تحدثت عنه مازال موجودا في منطقتنا خاصة عند الفادنية شرق مناطق شندي، ومازال صحن اللقيمات واللحمة يقدم للضيوف، وكذلك العصيدة.
    لك التحية مرة أخرى ومتعك الله بالصحة والعافية وما تنسانا من صالح الدعاء عند الكعبة الشريفة، وربنا ينصر سيد البلد ويزيل اتحاد اللقيمات.
    وارقدو عافية وفي امان الله
  • #11
    الضرب بالدور 08-08-2016 07:0
    والله ما شاء الله خيالك خصب بالله دامك في مكة وقريب من جدة ليش ما تروح عزاك الله وتعطي دروس لي الاخ المحسوب عليكم كاتب ولد شوربجي هذا وربي في سماه ما اقول الا الحق ويشهد علي زوار هذا المنبر ان من المعيب والمخزي أن يكون هذا الرجل مع القامات امثالكم وهذا يعد منقصة لكبار الكتاب في هذا المنبر وما احسبه الا انه مدعوم بي واسطه لتلميعه...دام منبر كفر ووتر رايا ومنبعا للفكر..
  • #12
    غاندي احمد بشارة حسين 08-08-2016 06:0
    حمدالله علي السلامة وين الغيبة طلعتنا من الرياضة بس لقيمات الزير دي الظاهر باقي ليها حكاوي
أكثر

للمشاركة والمتابعة

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019