والكل مشارك في المستوى الهزيل
اولا نبارك فقط الثلاثة نقاط
غير كده علي الدنيا السلام
نبتدي من وين ولا وين!!!!
نبتدي بالضلع الاول
الملعب الردئ وعدم الاهتمام
يادحية انت مابتخجل من منظر الاستاد!!!
بالله عليك راتبك دا بضوق حلاوتة
من اخذ اجرا حاسبه الله بالعمل
والشايفنو دا انت مابتشرف الاستاد الا يوم المباراة
معقولة دي القلعه الحمراء
خراطيش مجدعه حول الملعب
ونجيله ضاربها داء الصلع
والمضمار بوهيتو بهتت
ياخينا الاستاد دا استلمتوا كده
ياحبيبنا الملعب دا لو ماعندك مال تسيير ادعوا القروبات للنفرة ليهو
ولو ماقادر علي صيانه الملعب اترك منصبك لشباب مبدعين
تكلفه الحفر دي اصابات في كشف الفريق بالكوم
البندفع في علاج المصابين بسبب اهمال ملعب المريخ
ونحن نسأل الاصابات من وين
مرات يقول فلان مصاب ولم نعمل بحث نلاقية اصيب في التدريبات!!!
تكلفة العلاج الباهظه بسبب الملعب
من المسؤل يامجلس الادارة
كن شجاعا مرة واتخذوا في حق المسؤل الاجراء
يامدير الاستاد
حلل راتبك اثابك الله
ماتضرب التكيف ومخلي لينا الملعب ذي قندول عيش الريف!!!!
نجي للضلع الثاني
للمدرجات الفاااااضية
جمهور منتظر النقاط من منازلهم وفي القروبات يشتم داك واشطبوا داك!!!
انت ماجيت الملعب تنظر لية
انت ماجيت الملعب والمدرجات سكنها الطير!!
وتطالب انت في بيتكم بالتغيير!!!
وكمان زيادة عليها فالح في التنظير
لاقاكم عريس يوم عرسوا يلاقي صيوان العرس من غير معازيم دايرنو يبشر ويفرح ويرقص ويبدع
لاعبين يدخلو الاستاد وهو فاضي يلعب بياتو حماس او غيرة او احساس!!!!!
اي واحد ساكن في الخرطوم ومامشي الاستاد مفروض بعد المباراة يشرب شاي او يتعشي وينوم !!!
المنظر ليها شنو والهائج ليها شنو!!
لاحضور مباراة ولامشاركة في نفرة وتلاقيه اول واحد ينظر في الحفلة!!!
وتاني يوم اول زول يصحى ويسال وين الصحف وين الاعمدة !!!
مريختك دي تقليد ولاشنو يالحبيب!!!
راجع مريختك الاخ الممتنع عن الدعم وحضور المباريات ورجاء ساعدنا (بالسكات والموية الباردة)
حماسك في القروبات لو كان في المدرجات افضل
وحماسك في النقد لو كان مشاركة في النفرة يكون اكرم،،،،،
كمان نجي للضلع الثالث
مابحب اتكلم في تحليل فني لاني مامدرب
لكن الاخوه في مجلس الادارة الرسالة التالية لكم
استفيدو من خانة المحترفين ونسقوهم او اشتروا بقية عقودهم انهم لن يقدموا للمريخ اي اضافة اخري
بدال دولارات ماشه في الهواء ساكت احسن تشتروا بقيه المدة في عقودهم وشكرا
محترف يحصل علي كرت مجاني وطولة المباراة صاري !!!
ومحترف طوالي مابكمل مباراة ومصاب!!
ومحترف يامتسلل او يراوغ في نفسو وفي النهاية الكورة في المدرجات
اها تاني منتظرين شنو!!!!!
والله دي خسارة دولارات ساااااكت
ومشاركة علي شباب يسدوا الخانة ويفيضو،،،
الوضع المالي طالما تعبان اشتروا بقية عقودهم ويشوف ليهم اقامة خارج السودان!!!
مسك الختام
فعلا الدوري نقاط
لكن كمان مالدرجة نسال من الزمن نحن وناس المدرجات!!!
يامجلسنا حاسبوا المقصرين
يامجلسنا حاسب من يتسبب في دمار الفريق
يامجلسنا حاسب من يتسبب في تدهور بعض اللاعبين
يامجلسنا الحق ماتبقي من جمال الاستاد ومنظره
ونحن علي المدرج ندعم ونشجع ونتفرج
لكن مدرجنا اصبح وضعه مريب وخطير
معقولة ياجماهير
والله نعمة دخول المباريات لايشعر بطعمها الا المغتربين وناس الولايات
ناس الخرطوم الف علامة استفهام
شوفوا لم تكون كوره في الولايات الحضور الجماهيري من عصرا بدري
ولم تقام مباراة في اي من دول الخليج الروابط التشجيعية تملا المدرجات وتفيض وتكون حديث اهل البلد
واقرب مثال بطولة جيم للصغار
ورونا عزركم ياناس الخرطوم عشان نسكت !!!
طالما مافي حضور حركوا النفرة مامحتاجة مواصلات او مجهود
الزمان ٢٠١٦/٨/١٠
المكان نادي المريخ
تحت شعار بنفرتنا نسدد غرامتنا
همسة اخيرة
نجي للضلع الرابع
التدريب وماادراك مالتدريب
لاعب يجي جاهز ومدرب بدل يطور من حوكاتو يرجعوا سنة اولي روضة ويعدم لينا مهارتو!!!!
عاد دا كلام دا
يامحسن وبرهان
مباراة تسعين دقيقة الصغير والشايب عارف العلة وين وانت مكتفين بس بتغيريين !!
التغير الثالث دا منتظرين بية شنو مبارة الاياب مثلا
لو قلتوا رؤية فنية اقول ليكم شكر الله سعيكم
عندك مهاجمين في الدكة
ولاعبي وسط في الدكة
ياهي غيروا الحارس عشان ياخد لية شوية جرعة!!!
الغريبة برهان في الدكة ومحسن واقف في الخط!!!
في كل انحاء الدنيا
المدرب في الخط والمساعد يجهز في التبديلات
اوجالس في الدكة!!!
لكن عندنا الوضع مختلف
مورينيهو واقف في الخط ال٩٠ دقيقه
ياكوتش برهان جلوسك في الدكة ماليه معني واحتمال يزيد وزنك!!!
ويامجلسنا التدريب في المريخ ضعيف غيروه قبل مايجي الخريف واللواري تقيف!!!
خارج النص
ياناس قناة النيلين
ارهقتوا نظرنا
واتعبتو طباقتنا
والمحصلة صفر كبير
صورة ردئية
اخراج ردئ
ومعلق صوتوا بعد الكورة تدخل قون
وCCU للاضاءه ضعيف
كميراتكم الوانها مختلفة
ومخرج الرؤية عندو ضعيفة
والمصور يضيق الكادر علي الهواء
ويزبط (الفوكس) علي الهواء
تاني الباقي شنو
اعدمتوا النقل التلفزيوني
ولحقتوه امات طه
صوره ترجف ذي قالب الجلي
وترددكم دا كم ميقا بالله !!!!!
صورة الموبايل انضف من صورتكم
ياخي اعملوا نفرة من المغتربين ذي شريان الشمال واستروا ليكم وحدة نقل تسد العين (HD)
ماعيب استنفروا المغتربين
ساهموا ب١٠ دولار للارتقاء بنقل الدوري الممتاز
بطريقتكم دي المغترب بدل يدفع عشرة دولار يعمل نظارة او عملية نظر باكتر من ١٠٠ دولار
اخير يدفع العشرة من الان
والي لقاء في تغريدة اخري،،،،
# هاشتاق طبي
العسل للقوة والحيوية والنشاط
انها نصيحةذهبية لا تدع يوماَ يمر دون ملعقة من العسل وكأنه الماء
اعتبرها عادة في كل العمر في اي وقت تشاء لا تنس هذه الملعقة من العسل وقد قال
ابن سينا : ان أردت ان تحتفظ بشبابك فأطعم عسلاَ..
توجد فى العسل فيتامينات قد تكون هى كل ما يحتاجه جسم الأنسان من فيتامينات ,
هي أ ب 1 ب 2 ب3 ب5 ب6 د ك و هـ
وفوليك اسيد وحمض البيكوتنيك
وهذه الفيتامينات أقوى وأنقى الفيتامينات التى يحتاجها الجسم ويمتصها بسهولة
ربنا ينعم علي الجميع بالصحة والعافية
# هاشتاق عام
من اقوال الحكماء
المصباح كلما إرتفع كلما إتسع نطاق إضائته ، فإرتفع أنت بإخلاقك وبتفكيرك وبقدراتك لكي يتسع نطاق تأثيرك في الحياة.
هذه اراء التغريدة اقبل منها ماتشاء وارفض منها ماشئت..
التغريدة تنقل نبض المدرج والقروبات وتقف في مسافة واحدة من الاحداث ،،،،،
نحاول ان نلفت الانتباه لبعض الاحداث والنقاط بواقعية........
التغريدة لن تخرج خارج نطاق المجتمع المريخي نهائيا الا ماندر
ونقد الذات يوصلنا الي الامام والي المنصات باذن الله ،،،،،
ادعمونا بالنصح والارشاد وصححونا إن اخطأنا في يوم من الايام ،،،،،،،،
***تغريدتنا ونسة وحكاوي ونقاط بصوت مسموع***
