• ×
السبت 25 سبتمبر 2021 | 09-24-2021
معاذ ابو مؤيد

صحيفة المريخ الراعي الاعلامي لمنتخب السودان ومريخنا لاعب اليوم في ملعبة بامدرمان

معاذ ابو مؤيد

 4  0  1489
معاذ ابو مؤيد


نبارك للمنتخب الشاب الصعود للنهائيات بعد ان رمى كثيرا من القائمين علي الامر الراية!!!
نبارك لكم وانتم تحققون المستحيل الذي تفوه به الكثير
شكرا شباب المنتخب
شكرا امير دامر
ولاعزاء للاخوة المتشائمون!!!!!!!

طبعا امس لم زكرنا الاعلام الشايت شمال والعناوين التي تغرد خارج السرب
انطبقت الحنة اليوم علي المنتخب
المنتخب اليتيم
عشرمية صحيفة سودانية لم يفتح الله عليهم بعنوان واحد يرفع الهمه او يزكر الشعب بعض ابناءه الذين يمثلون في محافل قارية !!
ماعد صحيفة المريخ
اين انتم !!!
تعرفون جيدا للعناوين الرنانة وصاحبة الشمارات الحراقة
طيب منتخبنا دا ماينفع خبر!!!
والسفرية لو كانت لدولة قطر او اي دولة اخري نشاهد جموع من الصحافة والمطبوعات في مقدمة الركب شايلين جوازاتهم!!
طيب نجيريا دي مادولة ؟؟؟
ماعلينا!!
طبعا التلفزيون في ثبات عميق كالعادة
ويوم وصول البعثة لقاءت وكميرات في المطار!!
واخونا رضا يخصص نص البرنامج للوصول !!!
وخبر المباراة يتقال في سطور يرم الجمعة!!
برضوا ماعلينا!!!
الجمهور الرياضي مقسوم عليه مشاهدة المباريات في الBN
زمان قلنا ليكم القنوات الخارجية تسرق الجماهير السودانية
ورونا دولة واحدة ماتنقل كوره منتخبها غيرنا
الدوري عرفنا النقل فيه تعبان
كمان دا منتخب السودان ولاكيف!!!
ماعلينا برضوا
طبعا اليوم سيظهر الف اب شرعي للمنتخب
وسنشاهد صالة كبار الزوار تفتح
والبدل والعمم في الاستقبال!!!
وكل شخص محتاج ليه صوره صورتين عشان يتلمع
بقيادة ضباط الاتحاد العام
بس هل تصدق عزيزي رئيس الاتحاد والضباط الاربعة
ان امير دامر هو المدير الفني لمنتخب الشباب وبدون مساعد مدرب او مدرب حراس ولا مدرب لياقة .. اتخيلوا انجاز وسط هذه الظروف فقط مازدا لحق به قبل المباراة بساعات كمستشار فقط ..
ماذا انتم قائلون غدا
دا المنتخب اليتيم ودي قصة اعلامنا واتحادنا
من الاب الشرعي للمنتخب
وكم راعي اعلامي سيحتفل غدا
وكم مانشت رئيسي في الصحف!!!
شكرا صحيفة المريخ
انتقدناكم في العهد السابق لعناوينكم الخجولة واليوم نعطيكم التحية لعنوان الرجولة،،
سروا علي النهج واختاروا عناوينكم بكل عناية حتى تضعون قدما في السوق المفتوح للصحافة (الورقية)
ونقول
( اووووو اووووو سودان)

يصارع المريخ اليوم الامير البحراوي في ملعبة في امدرمان
الامير الان يختلف عن امير الدورة الاولي
مطلوب حضور جماهيري ضخم للمساندة حتي تتجمع النقاط
لابديل للجمهور الا الجمهور
الامير الان يضم نجوم لها وزنها
لذلك لابد من التعامل بكل احترام
حضورك يعني مساندتك
حضورك يعني دعمك للكيان
حضورك يعني المساهمة في الثلاثة نقاط
كفاية جلوس في منازلكم
كفاية جلوس خلف الشاشات
كفاية جلوس خلف الواتساب
في الاستاد ممكن توتسب!!!
يعني حضورك ممكن يجمع ليك بين الواتس والمؤازرة
تعال ومعك اخرون
هدفنا الثلاث نقاط
متعة المباريات ميزة يفتقدها المغتربون لماذا لاتستمتع بها ياساكن ولاية الخرطوم!!!
منتظرنكم في المدرجات
ياشفوتها
منتظرنكم ومعانا الالتراس
المريخ يحتاجك في الملعب وليس في القروبات والواتس
بالتوفيق للمريخ الزعيم

مسك الختام
الي ملاك الصحف والصحفين والاعلامين في شتي المجالات
ماتقوم به امانة مسؤل عنها امام الله
اتقوا الله في شعب السودان
فيما تكتبون وفيما تقولون
ستسأل عن قلمك ولسانك
وانت تتناول قلمك لتكتب او تعد تزكر انك بتخاطب امة وليس شخصك
الخلاصة
الاعلام امانة اعطي الاعلام حقه وامانتة امام الله والمجتمع

ونحن علي المدرج ندعم ونشجع ونتفرج
اليوم دعمنا سيكون في الميدان
اليوم تشجيعنا سيكون في الميدان
اليوم فرجتنا ستكون في الميدان ونستمتع بالاقوان
الالتراس جاهز والتنظيمات جاهزه
يارب لاعبي المريخ يكون في نفس الجاهزية البدنية والنفسية
نحمد الله نفراتنا شغالة بامتياز
والقروبات الان تعمر بالكشوفات
نفرتنا في ميعادها
الزمان ٢٠١٦/٨/١٠
المكان نادي المريخ
تحت شعار بنفرتنا نسدد غرامتنا
سارع اخي في القروب وانضم للداعمين،،،،

همسة اخيرة
الناس الفي القروبات الصامتون
مالجدوي في تواجدك في القروب وانت لاتتفاعل حتي لو اتى زلزال!!!
مالجدوي في ارسال رقمك وطلبك للانضمام
هل ستظل صامت !!!
ماذا يضيرك في السلام والقاء التحية !!!
ماذا يضيرك وانت ترى كشف النفرة يتجول امامك وانت لاتتحرك
يعني زول بنشط خدمة نت وشايل تلفون جلكسي مابقدر يدفع 10جنيه للمريخ!!!!
مع العلم ان النفرة شهرية وتنشيط النت يوميا او اسبوعيا!!!!
والادهي والامر ان هناك من يتزمت من سيرة النفرة !!!!
لم اقول لك راجع مريخيتك
لكن ساقول لك الدافعون يشعرون بحلاوة المريخ اكثر منك فقط
لم تتزوق حلاوة المريخ مالم تشارك
وتاكد ان فرحتك ستكون ناقصة
المريخ امامك ويحتاجك
ياتقف بجانبة او تساعدنا بالدعوات،،،،

خارج النص
في بادرة نوعية وفي صورة حضارية الساساب يقدمون درسا مجانيا للصحف والكتاب
علي لسان الناطق الرسمي لساس واساس عدنان ابوسفالة
اعضاء مريخاب ساس واساس
يتبنون شراء كل اعداد صحيفة المريخ الصادره اليوم تقديرا منهم لدورها الوطني واهتمامها دونا عن بقيه كل الصحف الرياضيه السودانية بمنتخب السودان الشاب ومباراته مع نظيره المنتخب النيجيري الذي تأهل علي حسابه منتخبنا للشباب لنهائيات امم افريقيا بعد ان انتصر عليه في عقر داره باربعه اهداف مقابل ثلاثه
شكرا ساس واساس
الرسالة وصلت يااعلام
كلمناكم خاطبوا الجمهور بمايرضيهم
الجمهور الان يعرف الغث والثمين
الجمهور الان صاحب عقول كبيرة ويفهم مايدور حوله

ابناء المريخ بصمتهم في كل السودان
خالد احمد المصطفي يدرب الميرغني كسلا
الفاضل سانتو يدرب الفلاح كسلا
ابرهومه يدرب هلال (الاربعة) الابيض
فاروق جبره يدرب مريخ كوستي امير دامر يدرب منتخب الشباب تحت ٢٠ سنه
ماذدا مدرب ومستشار للمنتخبات
والقائمة تطول وتطول
انه المريخ انك مدرسة وزعيم البلد
افتخر انك مريخابي قارئ التغريدة

# هاشتاق طبي
شرب الشاي الاخضر :
ينصح بتناول كوب من الشاي الاخضر يوميا والذي يمنع التاكسد في خلايا الجسم ، ويخفف من امكانية حدوث السرطان .
ربنا ينعم علي الجميع بالصحة والعافية

# هاشتاق عام
من اقوالهم
‏"لو علم المتصدق أن صدقته تقع في يد الله قبل يد الفقير، لكانت لذة المعطي أكبر من لذة الآخذ"
‏( ابن القيم )

هذه اراء التغريدة اقبل منها ماتشاء وارفض منها ماشئت..
التغريدة تنقل نبض المدرج والقروبات وتقف في مسافة واحدة من الاحداث ،،،،،
نحاول ان نلفت الانتباه لبعض الاحداث والنقاط بواقعية........
التغريدة لن تخرج خارج نطاق المجتمع المريخي نهائيا الا ماندر
ونقد الذات يوصلنا الي الامام والي المنصات باذن الله ،،،،،
ادعمونا بالنصح والارشاد وصححونا إن اخطأنا في يوم من الايام ،،،،،،،،
***تغريدتنا ونسة وحكاوي ونقاط بصوت مسموع***
امسح للحصول على الرابط
بواسطة : معاذ ابو مؤيد
 4  0
التعليقات ( 4 )
الترتيب بـ
الأحدث
الأقدم
الملائم
  • #1
    ابراهيم احمد سليمان ابوحجل 07-24-2016 04:0
    والله هذه هي الحقيقه لاكن يا اخي العزيز اين هي الوطنية
  • #2
    ساشا 07-24-2016 01:0
    هههه انت لاعب مع الأمير ولا مازمبي،، استنفار ونفرة وحشد وداعش وعيييك ... ده شنو ده،، والله غايتو دخلتكم جنس خلعة، عارفين اللاعبين كيسهم فاضي ودايرين تتموها هرشة للحكم والخصم كالعادة،كسرة: هاك أب شيبة ده،،
  • #3
    أبوسامي 07-24-2016 11:0
    لافض فوك يا أبا مؤيد ، الانحياز التام للزعيم دون الإسفاف والإساءة للآخرين .هكذا تكون الصحافة .
  • #4
    متفائل 07-24-2016 11:0
    صحيفة المريخ هي صحيفة الصفوة وطبيعي أن تعلي راية المنتخب على اي راية اخري أما صحف الظناطير فهذا طبعهم غارقوووووون في المحلية والكلام الفاضي ..
    حقاً شتان مابين الصفوة والدهماء
أكثر

للمشاركة والمتابعة

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019