• ×
الجمعة 30 يوليو 2021 | 07-29-2021
معاذ ابو مؤيد

العالم اصبح قرية صغيرة ياناس

معاذ ابو مؤيد

 0  0  865
معاذ ابو مؤيد
اين هم واين نحن ودورينا محتاج انعاش

جمعتكم مباركة
وتقبل الله من الاعمال
نحن في العام ٢٠١٦
يعني الفية جديدة وبعيدة
يعني بضغطة زر تعرف اسعار حب الشاي في جزر الهاوي
وتعرف زواج جون سينا كان بياتو فنان
ووجبة زواج قنصل الكاريبي كانت جداد ولا بلحم ضان
معقولة حتى الان في مصادرة صحف وايقاف صحف؟؟؟
ياجماعة ياناس الايقاف مامعناه حجبتو معلومة ولا خليتونا في عمانا وغيبوبة !!!
ممكن تخسر الصحيفة ماليا
لكن لاتستطيع حجب المعلومة
لانها في الشبكة العنكوبتية متوفرة بسهولة
وعمنا قوقل لو قحيت يديك اي معلومة
حجب الصحف لاجدوي له في العالم الان!!!
وكل صحيفة تنزل في النت قبل المطبعة وكل صحيفة تستطيع قراتها وانت في بيتك
يعني مشوار المكتبات ممكن يتكنسل
وبعدين !!!
كرة القدم وسيلة ترفية
وعندها اتحاد دولي وقوانين
لاترتبط لا بموطن او لغة او حتى لون سياسي!!!
ومافي زول يقدر يغير في قوانين كرة القدم الا اتحاد اللعبة او الفيفا والصحف الرياضية
والقنوات الرياضية
والبرامج الرياضية الاذاعية
والمنتديات الرياضية
والمواقع الالكترونية الرياضية
دي ادوات مساعدة الي لعبة كرة القدم يعني حجبها اومنعها من الصدور ماحتتغير ابدا خلفها قانون كرة القدم
حجب المعلومة الان اصبح مستحيل
وانا راقد في سريري اعمل قروب واضيف فيه الجيران
وشباب الحلة ممكن تعرف منو المات ومن الطفش ولي جناه فات ومنو الراقد عيان ومنو الجاي يخطب بت الجيران!!!
يعني المعلومة الزمن دا مابتتدسا
قصة حجب الصحيفة او منع مقال اوعمود او حجب معلوم اصبح من (رابع )المستحيلات،،،،،
وبالدارجي اصبح دقة قديمة خلاص

هناك من يستغل العولمة صاح وهناك من يستغل العولمة باندياح
لو سخرنا العولمة في خدمة نادينا
ولو سخرنا العولمة في امانينا
اكيد حتتحقق واكيد سننجح
جهاز الجوال الان
يقوم بوظيفة مدير الاعمال
من موبايل تتكلم وتنظم مواعيد وتعمل تجارة وتقدر تعملو مكتب متنقل وتصبح رجل اعمال
كيف تقدر تستفيد من الموبايل
والبرامج المساعدة علي المتجر في الموبايل اصبحت توصلك الي اعلى الدرجات،،،
وفي زمنا دا موبايلك حصانك ان صنتو صانك وان طلقتو هانك
موبايلك فيه ارقام الاهل والاحباب
فيه صورك والزكريات
وفي سور وايات
وفيه كل اسرار حياتك
لكن استخدام العولمة من انسان لاخر تفرق
الموبايلات نعمة ونقمة
وفي بعض الاحيان ناس مستخدمنها نغمة!!!
استخدموها صااااااح
عشاااااان ترتاااااااااح

مسك الختام
السوشل ميديا الان اصبحت تناطح في كل البلدان
والشوشل ميديا اصبحت في يد اي انسان
كمبيوتر موبايل
كلها تربطك بالعالم
يعني قصة حجب او منع الصحف من الظهور مع عالم الملتميديا الان مستحيل،،،،

ونحن علي المدرج ندعم ونشجع ونتفرج
من موبايلنا ندعم بتحويل الرصيد
ومن موبايلنا نشجع اي فريق
كان في السودان او بلاد الاغريق
من موبايلنا نتفرج علي كرة قدم او اي مقاطع او اخبار
واي واحد فينا داخل المدرج اول حاجه بشحن بطارية الموبايل
ولو مسافر بشحن الموبايل
لو ماشي الشغل الموبايل بايت في الشاحن!!
لو في السوق او محل خضار يتواصل مع ام العيال وممكن يصور الطماطية او الخيار
ويسال
الخضار دا كيف؟؟؟؟
الموبايل اصبح في يد اي انسان
يعني حجب المعلومة كان ممكن سنة تسعين او الفين
لكن الان موباااااااااااايلك في جيبك اكيد تعرف المعلومة بكيف كيفك!!
وطالما موبايلاتنا معانا
يلا مساهم في نفرتنا بحبة رصيد
اصلو الزمن اصبح قاسي وعنيد
نفرتنا هي مبادرتنا
الزمان٢٠١٦/٨/١٠
المكان نادي المريخ
تحت شعار بنفرتنا نسدد غرامتنا

همسة اخيرة
المريخ يؤدي تجربة ودية
المهم والاهم فيها
مشاركة كل ناس الاحتياط
وفي مقدمتهم نجم الجاليات
المريخ يسر العين بالشباب الحلوين
تاني شباب بس
كشفنا حيكون شباب خالي من (الشياب)
جمع شايب يعني الرجل العجوز
نتمني الاستعداد لمباراة الامير بصورة جيدة واتمني الابتعاد من الصغط الاعلامي والجماهيري
اي توتر او ضغط حتنقلب الاية
وحنساهم في تشتت الاذهان
نركز فقط في الميدان
ونبتعد عن نقل الشتلات ومانعمل من المعلومة دخان تحجب الرؤية الحقيقية
ساعدونا بالصبر والدعم
الايام القادمة ستشهد حملة شرسة من العرضه شمال
شتلات ونقل توترهمراليرجماهير المريخ والقروبات
سيسعون باي وسيلة لزعزعة كيان المريخ
تناولنا للاخبار لابد يكون بدقة وبعيد عن النقل الساي
ركزوا في كل مايكتب في قروباتكم
الايام القادمة حتكون حرب شرسة
لابعادنا واضعاف ثقتنا بالادارة واللاعبين والجهاز الفني
انتبهوا وعلي كل مشرف اتخاذ قرارات صارمة حول كل خبر مشتول او نقاش بين الحضور
واحزروا الاصافات العشوائية في مقبل الايام
ستشاهدون كثير من طلبات الاضافة
توخوا الحزر في الاضافات ونقل المعلومة والاخبار
اللهم قد بلغت اللهم فاشهد

خارج النص
الاتحاد السعودي لكرة القدم اليوم يفتح اكبر قضية ويهبط نادي المجزل الصاعد حديثا للمتاز الي الدرجة الثانية
والسبب تلاعب في نتائج المباريات في الاولي
نادي المجزل المنضم حديثا لدوري عبداللطيف جميل وبطل دوري الاولي العام السابق يهبط الي الثانية قبل ملامسة لاعبين النادي الكرة في الدوري الممتاز
اتمني من ادارة النادي اصطياد المحترفين المنضمين للمجزل كصفقات اجنبية وخاصة بعد عدم حوجه النادي اليهم بعد هبوطهم
السؤال هل لو حصلت قضية مشابهه في دورينا نشاهد هذه العقوبات الصارمة وكمية الغرامات التي فاقت المليون ريال؟؟؟؟
ياحليلنا نحن !!!
وياحليل دورينا
اسع بالله عليكم دوري حكامه بعدد اصابع اليد حتقولوا لي كيف
حاقول ليكم هيثم النور حكم الراية حكم كم مباراة لفريق العرضه شمال!!!!!!!
راجعوا شجل مباريتهم وتعرفوا كم مباراة شارك هيثم النور في ادارتها
ودوري مافيه لاحفل افتتاح لاختام
ودوري مافيه اي نقل تلفزيوني تمام
ياجماعة نحن بنضيع ياوديع
كل مقومات كرة القدم في دورينا غير متوفرة
ومختلفين في منظومة اتحادنا
وزير يصدر قرار ومحكمة تنقض قرار ومنع صحف من الاصدار والخ
تجي تتفحص دورينا تلاقينا نحن بعيدين خالص عن المجال !!!!
والي اللقاء في تغريدة اخري ونرجع تاني لكلامنا
اين هم واين نحن من كرة القدم!!!!

المريخ مريخ الشعب والشعب هو الجمهور
المريخ وطن للشعب والشعب هو الجمهور
المريخ وطن مساحاته شااااسعة وابداعاتة كثير لايتنفس هواءه النقي الي صاحب الرئة التي تنبض وتنطق بكلمة (نحن)
اصحاب رئة (انا) كالمتناول للدخان رئته يكسوها السواد لانها استنشقت كتير من حب الذات

(القصة ماقصة بطولة القصة عشق لكيان ونادي منذ الطفولة)

# هاشتاق طبي
‏تعانى من حرقة المعدة؟
‏ينصح بتقسيم الطعام إلى وجبات صغيرة على فترات متباعدة و الاكثار من شرب الماء
ربنا ينعم علي الجميع بالصحة والعافية

# هاشتاق عام وحكم

‏قيل ليوسف عليه السلام وهو في السجن: إنا نراك من المحسنين .. وقيل له وهو على خزائن مصر: إنا نراك من المحسنين.
‏المعدن النقي لا تغيره الأحوال



هذه اراء التغريدة اقبل منها ماتشاء وارفض منها ماشئت..
التغريدة تنقل نبض المدرج والقروبات وتقف في مسافة واحدة من الاحداث ،،،،،
نحاول ان نلفت الانتباه لبعض الاحداث والنقاط بواقعية........
التغريدة لن تخرج خارج نطاق المجتمع المريخي نهائيا الا ماندر
ونقد الذات يوصلنا الي الامام والي المنصات باذن الله ،،،،،
ادعمونا بالنصح والارشاد وصححونا إن اخطأنا في يوم من الايام ،،،،،،،،
***تغريدتنا ونسة وحكاوي ونقاط بصوت مسموع***
امسح للحصول على الرابط
بواسطة : معاذ ابو مؤيد
 0  0
التعليقات ( 0 )
أكثر

للمشاركة والمتابعة

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019