• ×
الأربعاء 28 يوليو 2021 | 07-27-2021
معاذ ابو مؤيد

السودان الخريف فيه بتين؟؟؟ انقذوا رديف النادي ياحلوين

معاذ ابو مؤيد

 0  0  829
معاذ ابو مؤيد


اصغر طالب في مرحلة الاساس لو سالتو خريف السودان بتين يجاوب
واصغر طالب في الوطن العربي لو سالتو مناخ افريقا والسودان كيف يجاوب
لكن ماعارف المسؤلين في البلد دي ماعارفين خريفنا بتين معقولة بس !!!
الدول الحولينا برغم البنية التحتية عندهم لكن بتماشوا مع المناخ الا نحن !!!
كتبنا قبل مدة ولاحياة لمن تنادي ،،،
تاني حنكتب وباكر حنكتب ياجماعة نحن مشاترين في كل المنظومات
مدارسنا تفتح مع بداية الخريف!!
ودورينا يلعب في عز الخريف!!
ومؤسساتنا تعمل دوام واحد!!
وكورتنا تلعب بالليل واضاءتنا تعبانة!!!
مطرة واحدة تدي المدارس اجازة اسبوع!!
ومطرة واحدة احسن استاد ارضيتو ماتنشف الا بعد خراج الروح
ومافي مسؤل واحد حاول يقلب الحسبة !!!!
ياحكومتنا انتو قلبتو الزمن اقلبو لينا الخارطة عندنا !!!
مافي تصريف في الخريف
والتوقف والاجازات بدال الشتاء خلوها في الصيف
يعني المدارس مامؤهله ولا الملاعب مؤهلة ولا المواصلات مؤهلة ولا الاسواق مؤهلة!!!
المؤهل شنو بالله عليكم ؟؟؟
نقبل جاي نعاين جاي نصنقر جنب جنى الهبباي
ولانسوى شنو
العالم ماشي قدام ونحن ماشين للخلف ماشين بسرعة الصاروخ
كان تعليمنا ولا دورينا
مابنفعوا في الخريف
حيط مدارسنا وحماماتها واقفة علي الهبشة
وملاعبنا وتصريفها مانافع بقشه
ولو الاتنين تمام
كل الطرق المؤدية الي (روما)
اقصد اليهم مغلقة !!
تمشي للملعب او المدرسة او العمل بمركب ،،،،،
ولسه الغريق قدام
اقصد الخريف قدام

نشرت صورة اللاعب بطة في الرديف في اكثر من قروب
قليل من اتعرف علية
وقليل من اتحسر علي رديفنا
المشكلة ليست في عدم معرفة الجماهير باللاعب!!!
المشكلة انو فريق الرديف فيهم ناس انتهاء عقدهم وفيهم واحدين عقدهم علي مشارف الانتهاء
ولاحس ولاخبر
نبعثر قروشنا في الخارج
والرديف مليان مواهب
بالله دا يسموه شنو!!!!
ندفع بالملايين ورديفنا فيه مواهب ممكن تخدم المريخ من غير ماندخل في ديون!!!
انتو قايلين الديون من وين
ماياها منصرفات التسجيلات
او عقود لاعبين!!!
انا مابتكلم لكن حانقل تعليق واحد قريب من الرديف في قروب من القروبات
اخليكم مع التعليق المبكي جدا واتمني يوصل الادارة والقطاع الرياضي
الي تعليق المشارك بعد مشاهدة الصورة:
(ده بطه والذي شارفت فترته القانونيه علي الانتهاء كما انتهت فترة حسن سفاري تماماً بانقضاء الشهر الماضي وتبقت لنمر لاعب الرديف ثلاثه أشهر وهو الآن بالسعوديه رفض العوده ويقال وراء سفره الي السعوديه رئيس الهلال الكاردينال. .. حررنا عدة خطابات لمجلس ونسي بحالات الثلاثي لمعالجة أوضاعهم اما بالتصعيد أو التسجيل والاعاره لكن لم يفعلو شيئا حيال هذا الموضوع حتي انقضت فترة المجلس وفقدنا حسن سفاري الأقرب لأهلي شندي في التسجيلات القادمه. .. جددت طلب توفيق أوضاع نمر وبطه الذي يربطهما عقد مع المريخ حتي الآن تبقت للأول شهرين والثاني 3 أشهر. .. أيضاً لا حياة لمن تنادي. .. والرسالة دي فرصه طيبه اذا لا قدر الله انتقل اللاعبين الي الهلال لتكون شاهدة علي ذلك!!!)
انتهت الرسالة والتعليق
ساكرر نفس طلب صاحب التعليق للمسؤلين انقذوا الرديف ياناس
كشف الهلال حتى الان فيه اكثر من خمسة من رديف المريخ
الي متى هدر الموارد
والي متى نزرع نحن ويحصد غيرنا
سؤال مطروح الي كل الناس
الا نتعلم من تجاربنا مطلقا

مسك الختام
كرة القدم حاليا عبارة عن ربح وخسارة وتجارة
ونحن حاليا صفر في تجارتنا
لم نسمع قريبا بيع عقد اي لاعب
او دخلت خزينة النادي اي مبالغ مالية من صفقة لاعب
كل اندية العالم عندها مدارس لتعليم كرة القدم ومنها تفريخ لاعبين وانتاج مواهب لدعم الفريق وبيع عقودات البقية
الا عندنا ننتج لنوزع مجاني ونشتري من الاخرين بالغالي
واحتمال نفس اللاعب المتعاقدين معه خريج رديف النادي
في خسارة اكتر من كدة

ونحن علي المدرج ندعم ونشجع ونتفرج
معظم المتفرجين علي الرديف او رواد التدريبات والتمارين
يتحسرون علي اسماء معينة ملحقة بكشف الرديف وعدم اعطاءها الفرصة
وبعضهم الان يبكي في داخلة لعدم اعطاء الشباب فرصة
قبل مباراة المريخ والهلال
كانت الفرصة متاحة للشباب واعتمد عليهم محسن وبرهان
لكن اتت مباراة القمة ودخلتهم فوبيا مباريات القمة طبعا قاصد الجهاز الفني والاداري
مع العلم ان الشباب اجادوا في مباراة شندي ومباريات كاس السودان
من العبقري صاحب فكرة توقيف الشباب من المباريات
ها نحن ندق ناقوس الخطر لمن اراد الاستماع والاستمتاع بعطاء شباب يسدو عين الشمس
افيقوا قبل فوات الاوان يامجلس الادارة
وافيقوا ياقروبات فان موعد نفرتنا قد حان
الزمان ٢٠١٦/٨/١٠
المكان نادي المريخ
تحت شعار بنفرتنا نسددغرامتنا

همسة اخيرة
تأجلت مباراة المريخ والرابطة عشان الامطار
طبعا خبر غير جديد
ومعاد هذا الموسم كالموسم الفات
كل التمنيات لشباب مريخ السودان العودة بالثلاث نقاط
وان تعطى الفرصة للشباب لاثبات الذات طالما بعيدين عن ضغط الاعلام والمدرجات
ونفكر الناس
انو ناس عيسى صباح الخير عرفناهم وهم في مباريات دولية وليس مباريات دورية
اعطوهم فرصتهم كاملة
نحن الان نبحث عن ثلاثه نقاط وليس علينا اكثر من ذلك
لاتوجد ضغوط او تحديات
صغلهم الان في المباريات سيفيدنا جدا فيما هو آت
سامعني يالجنة التسير بكل قطاعاتها ،،،،،
كل شاب فيهم يثبت جدارتة الان سيدخل القلوب من اوسع الابواب
امنحوهم الفرصة الان قبل فرات الاوان

خارج النص
والشتل يستمر وشعب المريخ متعطش لتلقي الاخبار
وكل خبر ينتشر بسرعة البرق
وكل واحد عايز يكون الحصري والسباق
وجمهور المريخ معزور محتاج لجرعة تفاؤل
لكن ماكل مايكتب حقيقة
ياشعب المريخ
في اخبار من مصادر
وفي اخبار جايانا من ال.........
عشان كدة لاتستعجلوا في نقل الاخبار
وخلونا من اتفاق فلان مع علان
ونركز في نفراتنا
وكان فلان جا ولاماجا
مايهمنا الان مساندة الكيان
ورسالتنا لمجلس الادارة
عند التعاقد مع مدرب فكروا في تسليمه كل ملفات كرة القدم في النادي
ناشئين وشباب ورديف وفريق اول
نمتلك كثير من الخامات
دي رسالتنا

المريخ مريخ الشعب والشعب هو الجمهور
المريخ وطن للشعب والشعب هو الجمهور
المريخ وطن مساحاته شااااسعة وابداعاتة كثير لايتنفس هواءه النقي الي صاحب الرئة التي تنبض وتنطق بكلمة (نحن)
اصحاب رئة (انا) كالمتناول للدخان رئته يكسوها السواد لانها استنشقت كتير من حب الذات

(القصة ماقصة بطولة القصة عشق لكيان ونادي منذ الطفولة)


# هاشتاق طبي
اذا شفيت بإذن الله من اي مرض فاحمد الله أولاً على شفائك ثم تذكر ألا تعيد صرف التذكرة الطبية من تلقاء نفسك فهذا خطأ شائع يقع فيه الكثيرون ظناً منهم أن الأعراض هي هي و لكن الأصح اعادة العرض على طبيبك فربما الأعراض في هذه المرة أخف وطأة و لا تحتاج قوة العلاج الأول و ربما أصبت بمرض آخر متشابه في الأعراض فتناولك للعلاج الأول يؤخر فرصة شفائك و لا يعرضك إلا للأعراض الجانبية فقط بدون فائدة

وربنا ينعم عليكم بالصحة والعافية

# هاشتاق عام ومقولات مشهورة

في اليوم الذي لا تواجه فيه أية مشاكل, تأكد أنك في الطريق الغير صحيح

(سوامي فيفيكاناندا)


هذه اراء التغريدة اقبل منها ماتشاء وارفض منها ماشئت..
التغريدة تنقل نبض المدرج والقروبات وتقف في مسافة واحدة من الاحداث ،،،،،
نحاول ان نلفت الانتباه لبعض الاحداث والنقاط بواقعية........
التغريدة لن تخرج خارج نطاق المجتمع المريخي نهائيا الا ماندر
ونقد الذات يوصلنا الي الامام والي المنصات باذن الله ،،،،،
ادعمونا بالنصح والارشاد وصححونا إن اخطأنا في يوم من الايام ،،،،،،،،
***تغريدتنا ونسة وحكاوي ونقاط بصوت مسموع***
امسح للحصول على الرابط
بواسطة : معاذ ابو مؤيد
 0  0
التعليقات ( 0 )
أكثر

للمشاركة والمتابعة

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019