* كثير من الجدل دار حول مقولة : (ورا كل رجل عظيم إمرأة) ..
* البعض ذهب إلا أن المرأة المقصودة هى (الزوجة) والبعض الآخر يرى إنها (الأخت) ..
* ولكن الثابت في الأمر إنها (الأم) ..
* تضع (الأم) بذرة النجاح الأولى في الرجل وتأتي من بعد ذلك الأخت والزوجة لتكمل نواقصه فيصبح عظيما بفضل الله وفضل أمه من بعد ذلك ..
* وإذا كان ورا كل رجل عظيم إمرأة فنحن نقول : (ورا كل رجل ناجح تلفون ربيكا) ..
* والله صحي ..
* كل ما تلفونك كان (أخرس وأطرش) كلما إقتربت درجة من النجاح ..
* زي (تلاتين عشرة ده) مثلا ..
* تلاتين عشرة عمرو ما خش النت ولا حمل صور ولا شاف الواتس ..
* تلاتين عشرة عاش شريف ومات شريف ..
* وكلما كان تلفونك ذكيا ومتطورا كلما شغلك عن عملك ..
* الآن المريخ وبقيادة جمال الوالى مثل الذي يحمل (آيفون) بإمكانيات (تلاتين عشرة) ..
* إدارة المريخ (آيفون) وفريق الكرة (ربيكا ساكت) ..
* تشوف الأسماء الموجودة في لجنة تسيير المريخ الحكومية تحلف تقول فريق الكرة بيعرف يلعب كورة ..
* (28) عضوا في الإدارة والفريق ما قادر يلعب تلاتة باصات ملمومة مع بعض ..
* غايتو الله يكفينا شر (المُصدِي) اللمعتو الأيام !!
* أمس الأول بكى كريستيانو رونالدو مرتين ..
* المرة الأولى بكى بسبب الإصابة ..
* والمرة الثانية بكى إبتهاجا بـ(برأس الأميرة الأوروبية) ..
* وفي كادوقلي بكى المريخ مرتين ..
* مرة عشان مصعب عمر كان مشارك أساسيا ..
* ومرة عشان التعادل ..
* وتبكو بس .. عين قطرة وعين مس ..
* الـ(9) هى نصف الـ(18) ..
* ومباراة المريخ أمس الأول كانت في ختام الدورة الأولى وفارق النقاط (9) ، وفي الدورة الثانية التى ستنطلق بعد أيام سيكون فارق النقاط (9) أيضا ، ومجموع الفارق في الدورتين ح يكون (18) ..
* يعني في الدورة الأولى سابقنهم بـ(9) وفي الدورة الثانية سنسبقهم بـ(9) ..
* هذا الفارق الكبير سيكلف المريخ (لقيمات) لا تقل قيمتها عن مليار ..
* بفريقكم ده والله الدورة التانية إلا تتموها لقيمات وبسبوسة وفطير باللبن ..
* فريق (بيفقد) لكن ما (بكسب) ..
* زي (القربة المقدودة) ..
* وغايتو الله يكفينا شر (المُصدِي) اللمعتو الأيام ..
* حاجة تكسف ..
* إعترف عدد من الخبراء الأفارقة والعرب بأن خروج الهلال ومازيمبي من أبطال أفريقيا قد (قتل البطولة) ..
* والله صحي ..
* الهلال بثقله الفني والإعلامي والجماهيري يمنح أبطال أفريقيا كثير من الضوء والإهتمام والحراك وكذلك مازيمبي ..
* الآن الناس ما عارفين أبطال افريقيا وصلت وين ؟؟ والمتصدر منو ؟؟ والمتذيل منو ؟؟
* الأبطال بدون الهلال ومازيمبي أضحت مثل سيكافا (مجهولة) ..
* بمناسبة مجهولة ..
* عملتو شنو في شكوى شيبوب ؟؟
* ملف شيبوب ده ما تهملوا يا متوكل محمد على ..
* الملف ده يرجى منه وإنتو يا متوكل قلتو بتصعدو الشكوى لحدى الفيفا وإحنا أهو منتظرين ..
* حكمة الله .. المريخ كل ما يمشي كادوقلي بيشتكي ..
* المريخ في كادوقلي قبل ما يلعب المباراة لازم يشتكي ..
* عندهم إحساس إنو ناس هلال كادوقلي شغالين (كيري ساكت) ..
* عشان كده بسافروا من هنا بشكوتهم ..
* لكن في الحقيقة ما في فريق في الممتاز ده شغال (كيري) غير المريخ ..
* هسه قالوا إشتكوا برضو ..
* وأكيد بيكون عندهم مستندات من مريخاب الجنوب ..
* يقول ليك : مريخاب الجنوب قالوا لينا فلان ده من (أبيي) ودرس في (بابنوسة) وإتزوج في (راجا) ..
* دي بس شغلتم .. قلنا وقالوا لينا ..
* السنة كلها شغالين كده ..
* لكن والله مريخاب الجنوب المرة دى ما فاضين ليكم ..
* الظروف صعبة في الجنوب هذه الأيام ونسأل الله أن يهدي نفوسهم ويعيدهم لمربع الأمن والأمان ..
* عشان كده إنتو أحسن تشوفوا مريخاب (الدلنج) يمكن تكون عندهم مستندات ..
* وغايتو الله يكفينا شر (المُصدِي) اللمعتو الأيام ..
* مساعدات الحكام للمريخ هى عبارة عن (ألوان وأشكال) تنقسم على ثلاثة (حالات) ..
* تختلف هذه المساعدات حسب (مكان المباراة) و(نوع الجمهور) و(التلفزة) ..
* الحالة الأولى .. لو المباراة خارج ملعب المريخ سيكون شكل المساعدة قاصرا على حرمان الفريق الخصم فقط ..
* يعنى زي مباراة كادوقلي دى الحكم ممكن يحرم صاحب الأرض من هدف لكن ما ممكن يحتسب هدف غير صحيح لصالح المريخ ..
* الحالة الأولى شكل المساعدة يقوم على حرمان الخصم دون مساعدة المريخ بطريقة مباشرة ..
* دي الحالة الأولى من المساعدة ..
* الحالة الثانية وهى الأصعب تتعلق بالمباريات التى تلعب بإستاد المريخ ، وفي هذه الحالة يحتسب الحكم ركلات جزاء وأهداف غير صحيحة للمريخ ويحرم الخصم من حقوقه أيضا لان كل الجمهور داخل الاستاد هو جمهور مريخي ..
* يعني يسرق من عرق الخصم ويدي المريخ دون ان يعرق ..
* أما الحالة التالتة وهى تتعلق بالمباريات غير المتلفزة ، وفي هذه الحالة تجد الحكم يعتبر أن المريخ هو المنافس وهو الخصم ..
* المباراة لما تكون ما متلفزة الحكم ممكن يشيل كرسي ويقعد على الخط في المباريات التى طرفها المريخ ..
* وهسه أنا بقول ليكم ملاحظة وبطلب منكم تتابعوها في المباريات القادمة ..
* أى مباراة للمريخ ما فيها تلفزة بتلقي شبكة المريخ نضيفة ..
* والله صحي ..
* وأنا بصراحة ما عرف دى (صدفة) ولا (ميعاد) ..
* اللهم انها ملاحظة ..
* وأى زول طبعا حر في (ملاحيظو) ..
* وغايتو الله يكفينا شر (المُصدِي) اللمعتو الأيام ..
* عطرون ، نمر ، أبراهيم ، محمد الرشيد هذه أسماء في تشكيلة المريخ الأساسية والله أعلم ..
* بمناسبة الأسماء دى ..
* إنتو المفروض باقي السنة دى والسنة الجاية تعملوها تعارف ..
* إتعرفو على لاعبينكم ديل بعد داك فكروا في الإنتصارات ..
* دايرين ليكم سنة ونص عشان تفرزو محمد الرشيد من صابر عطرون ..
* معقولة فريق جمهورو ما حافظ أشكال اللاعبين عايزين إنتصارات ؟؟
* هى الإنتصارات دي غيروها ولا شنو ؟؟
* غايتو جنس غايتو !!
* ونركب صافنات ونجيبة (عطبرواية) وأصلو الزول بيموت والذكرى تفضل حية ..
* و..و..
* والحنان الفي قلوبنا أصلو نابع من .(مريخاب الجنوب) !!