* الأصعب من المرض هو (إنتظار نتيجة فحص المرض) ..
* والأصعب من (الشغب) هو (إنتظار نتيجة عقوبات الشغب) ..
* واليوم المريخ ينتظر (الكاف) بإعصاب تألفة تشبه أعصاب الذي ينتظر نتيجة فحص مرض خطير ..
* وما زلت عندي قناعتي أن أفضل عقاب للمريخ هو إجباره على المشاركة في النسخة القادمة من الأبطال ..
* والله صحي ..
* المريخ لو عفيتو من المشاركة الخارجية بتكون ريحتو ..
* أفضل عقوبة أن يشارك المريخ حتى (يتمرمط) أمام صغار أفريقيا (زي كل مرة) ..
* نتمنى أن تكون العقوبة (مالية) حتى نرى (الإصيفر) في النسخة القادمة من الأبطال (صحبة راكب) كما العادة ..
* حاجة تكسف ..
* بدون خجل .. قال حارس مرمى المريخ (الخفيف) جمال سالم أنه أصبح يخاف على حياته من جمهور المريخ بعد حادثة الإعتداء اللفظى على مصعب عمر ..
* جمال سالم ما خايف على حياتو لكن بيكون عندو باقي متأخرات ..
* والله صحي ..
* شكلو كده ناوى على السفر ..
* داير المخارجة ..
* الزول من يقول ليك حياتي وما حياتي طوالى تقنع منو ..
* هو مصعب ما خاف على حياتو تخاف أنت ؟؟
* غايتو جنس غايتو !!
* إذا كانت أفريقيا قد ودعت مقولة (الأرض تلعب مع أصحابها) فأن الهلال لم يزل وفيا لهذه المقولة ..
* الهلال تاريخيا يحرر إنتصاراته من المدرجات وتلعب تلك الحناجر دور (رأس الحربه) ، وفي كثير من الأحيان تلعب دورا يتجاوز حتى دور رأس الحربه ..
* وإذا إردت أن تُعرف الهلال يمكنك أن تختصر التعريف وتقول : (الهلال جمهور والجمهور هلال) وهذا يكفي ..
* وما كان لمجموعة (اولتراس الأسود الزرقاء) أن تبلغ ما بلغته من مجد إلا بعد أن توفر لها (الحب الصادق والخالى من الغرض) ..
* هؤلاء مصلحتهم الهلال وحبهم الهلال وحياتهم الهلال فهنيئا للهلال بهذا الحب العظيم ..
* أنا دائما أقول أن جمهور الهلال أصدق منا في الحب والوفاء ، ولقد أكدت مجموعة اولتراس الأسود الزرقاء ذلك وزادت عليه بالعطاء ..
* والحب حينما يقترن بالعطاء يصل درجة كماله وهؤلاء الشباب وصلوا (آخر الحب) فكان طبيعيا أن يكونوا ضمن أفضل خمسة اولتراس على مستوى العالم العربي ..
* كل من يتابع مباريات الهلال من داخل الإستاد يلفت نظره هذا الجهد الكبير الذي يبذله شباب الاولتراس .. جهد بدني وفكري وفني ..
* هم أسود وفنانين ومبدعين وأصحاب فكرة وقضية ومحبة وعطاء ..
* ولعل ما كتبه عمنا سيف الدين الدسوقي في حبيبته ينطبق عليهم : (كنت تمنحنى السعادة وليا تتفجر عطايا) ..
* الاولتراس .. تمنح الهلال السعادة وتنفجر عطايا وتتفجر هدايا مع كل يوم جديد فنحن سعداء بهذا العشق الخرافي ..
* حينما تذهب لتتابع إحدي مباريات الهلال ستجد نفسك مجبرا على متابعة فنون الاولترس قبل فنون فريق الهلال ..
* عين في المستطيل الأخضر وعين في مدرج الاولترس ..
* وتبقى كل كلمات الغزل فاشلة في تسطير ما يليق بهؤلاء الشباب الذين منحوا الهلال قوة وجمال ولفتوا أنظار كل العالم ..
* وقطعا تكريم الاولتراس هو تكريم لكل جمهور الهلال العظيم ولكل روابط الهلال الوفية ..
* لا نملك ما نقول بخلاف : (إن شاء الله يا ناس الاولتراس البتأكلوهو ينفعكم وربنا يحفظكم ويحفظ الهلال عشان يسعدكم) ..
* عزة جد والله ..
* أهلنا بيقولوا : (القلب كان أباك الوش بديك خبر) ..
* لكن لو كنت (منافق جيد) تسطيع أن تخفى الخبر من الوش (ولا كتر خير القلب) ..
* وبما أن ذلك كذلك أعتقد أن معظم وجوه لاعبو المريخ تحتشد بالأخبار الآن فقط تحتاج لمن يجيد القراءة ..
* وما كان لعلاء الدين وبكري المدينة أن ينفجران لولا أن (القلب أبى المريخ) ..
* وناس علاء لما شافوا ما في زول في المريخ بيعرف يقرأ (خبر الوش) قاموا صرحوا ، ولذلك إحنا نرى أن تغيير المثل واجب حتى يصبح (القلب كان أباك اللسان بديك خبر) ..
* خبر بـ(الغاء) ؟؟
* الإهمال الشديد الذي وجده أتير توماس مع كل المدربين أفقده الثقة المطلوبة فأصبح على قوته هش عند العثرات ..
* أتير هو أكثر لاعب جلس على كنبة الهلال بصبر عجيب ويحتاج فعلا للثقة والتشجيع حتى يقدم كل ما عنده في الدورة الثانية ..
* الأخطاء التى وقع فيها توماس سابقا مغفورة وسنفتح معه صفحة جديدة لأن الهلال يحتاج لخدماته في المرحلة المقبلة ..
* شد حيلك يا كابتن ..
* الناس المفتحين بيشتروا (ملابس العيد بعد العيد) ..
* والناس المفتحين شديد بغسلوا ملابس العيد الفات عشان يعيدوا بيها العيد ده ..
* والكويس في الموضوع إنو (العيد) عند جمهور الهلال كان يوم (15) رمضان بأمر من شيبولا ..
* يعني أول يوم في العيد بالنسبة لناس المريخ سيكون هو يوم (16) في عيدنا إحنا ..
* غدا الذكرى الأسبوعية الثانية لضرب (الإصيفر) ..
* بمناسبة الإصيفر ..
* حتى شهر (11) الماضي كان في المريخ (4) إرتكازات ..
* وهم : جابسون ، فييرا ، شيبوب وعمر بخيت ..
* والآن يسعى المريخ جاهدا لتوليف عنكبة وعبده جابر في محور الإرتكاز بعد أن أصيب شيبوب بالرباط الصليبي أثناء محاولة (نطه) من إحدى الفنادق بدولة الجنوب وغادر وتعالج في تونس ثم عاد قائدا لعمليات وسط الهلال ..
* شيبوب بحركة بهلوانية مرق زي الشعره من العجين ..
* وجابسكون عمل المتأخرات سبب وفضل التسكع بقهاوى لاغوس النيجيرية ورفض العودة ..
* عمر بخيت متوقف بالأصابة والله أعلم ..
* فييرا أبو (بصمة) هو الآخر توقف وقال ليهم (اعفوني من إرتداء شعار المريخ) ..
* وعلى فكرة ..
* معروف إنو (العين لا تعلا على الحجاب) ..
* وإذا فعلت العين ذلك فتأكد أن ما قاله علاء الدين يوسف صحيح ..
* علاء في رده لناس المريخ قال : (الهلال أكبر من المريخ) ..
* وهذا يؤكد أن العين عين والحاجب حاجب ولو إحتجت (الخدود) ..
* المريخ حاليا محتاج لإرتكاز ..
* والهلال يعانى من (ورم حميد) في منطقة الإرتكاز ..
* عندنا شيبوب وأبوعاقلة والشغيل ونزار حامد ..
* وبصراحة كده لو دايرين تمشوا كادوقلي بدون إرتكاز معناها الرماد كال حماد ..
* أقل حاجة المفروض يكون عندكم تلاتة إرتكازات حتى تفكروا في السفر إلى كادوقلي ..
* خلاف ذلك أحسن تنسحبوا وفي النهاية ربنا ما أمر بالهلاك ..
* والسنة دى بالذات يا متنا من الضحك ويا كمان الضحك كتلنا ..
* ونركب صافنات ونجيبة (هدندوية) وأصلو الزول بيموت والذكرى تفضل حية ..
* و..و..
* ونحن الزمن شقانا وأنت زي (الما نطيت من الطابق الرابع) ..