* (السحور) بوجبة سمك هو شروع في الأفطار عمدا ..
* ووضع البيض كله في سلة واحدة هو شروع في الخسارة ..
* وتجمع (26) لورد في لجنة تسيير واحدة هو شروع في الإستقالة ..
* (26) عضو ، هذا يعني أن هنالك (26) إستقالة قادمة بواقع إستقالة في كل أسبوع ..
* بعد شهرين سيكون مجلس المريخ هو (جمال الوالى ومزمل وخالد شرف الدين) ..
* شهرين بس ، والـ(26) ديل بيكون الباقي فيهم (3) فقط ..
* حاجة تكسف ..
* في النصف الأول من الدوري الممتاز وقع الحارس الأمين ماكسيم في أخطاء كبيرة جعلته يجلس إحتياطيا ليونس الطيب في أكثر من ثلاث مباريات ..
* وقد وجدنا العذر لماكسيم بعد الخروج الأفريقي سيما وأنه كان يبني كل آماله على بلوغ أدوار متقدمة أفريقيا ..
* الآن وبعد أن تماثل الاسد الكاميروني للشفاء المعنوي والنفسي عليه أن يدهشنا بمستواه المعروف لنبدأ مشوار جديد إعتبارا من مباراة الخرطوم الوطني وحتى مباراة الأهلى المصري في نهائي أبطال افريقيا العام القادم بأذن الله ..
* (السُنة النبوية) تقول أن تحليل الصيام يتم بواسطة البلح ..
* و(العادة البرامجية) عند القنوات الفضائية السودانية تقول أن تحليل الصيام يتم بواسطة الغنا ..
* قنواتنا الفضائية في نهار رمضان بشكل ، وبعد الأفطار بشكل تاني خالص ..
* قنواتنا زي المريخ .. في عهد أسامة ونسي بشكل ، وفي عهد جمال الوالى بشكل تاني خالص ..
* غايتو جنس غايتو ..
* لشئ في نفسه فضل نجم الأهلى شندي كلتشي التسكع في نيجيريا وبالتالى أصبح خارج حسابات مباراة فريقه أمام المريخ ..
* المباراة بعد غد وكلتشي في نيجيريا يضرب في (القورو) حتى يوم أمس ..
* ما نعلمه أن كلتشي ليس له أى مطالب مادية تجعله يتأخر عن إعداد فريقه الذي يستعد لمواجهة المريخ ..
* ترى هل لو كان أهلى شندي يستعد لمواجهة الهلال سيتأخر كلتشي لهذه الدرجة أم أن صلاح أدريس كان سيشدد على النسر النيجيري بالحضور (كسر رقبة) لهزيمة الهلال ؟؟
* الأرباب لما الموضوع يكون عندو علاقة بالحبيب تكعيب بيعمل رايح ..
* عموما كنا نتمنى مشاركة كلتشي لانه هداف الدوري ويمكنه أن يغذي رصيده من الشبكة الصفراء ..
* ده مولد وفاتك يا كلتشيون ..
* لعب شيخ موكورو أربعة أشهر مع الهلال ولم يواجه المريخ وهذا يسمى (تعاسة حظ) ..
* ولعب الآن ساسا شهر مع الهلال وسيواجه المريخ في ثاني المباريات الرسمية له وهذا يسمى (سعادة حظ) ..
* أن تواجه المريخ مبكرا فهذا سيكون فاتحة خير بالنسبة لك ..
* وبما أن ذلك كذلك فأن شيبوب وشيبولا وساسا على موعد مع الخير والخير الوفير بأذن الله ..
* ساسا متعود والخوف شيبوب يتعود ..
* لدغة الما متعود أصعب من لدغة المتعود والله أعلم ..
* والسنة دي بالذات الما بعرف يلدغ بيلدغ ..
* بيلدغ بـ(الفاء) ؟؟
* في رمضان قبل الأفطار (البليلة بتشوفها زي الضلع) ..
* والله صحي ..
* وبعد الأفطار (الضلع بتشوفو زي البليلة والبليلة ما بتشوفها أصلا) ..
* غايتو جنس غايتو !!
* بشكل فيه كثير من الإحترام والوقار إنسحب فيصل العجب من مجتمع المريخ وهو الذى يحق له أن يخلف رجل فوق رجل ويجلس على المقصورة ..
* العجب تسامح مع الذين ظلموه وشطبوه وتسامح أكثر مع الحياة بعيدا عن النجومية وهذا يمثل قمة الأدب والنُبل ..
* لو شاء العجب لزرع فتنة في الوسط المريخي لا يعلم بها إلا الله ولكنه كبير وكبير جدا ..
* نشكر الاخ البرير الذي رفض تسجيل العجب بالهلال حتى لا يحرق تاريخه فأمثال العجب يستحقون أنا نخاف على ما قدموا ..
* وطالما مجتمع المريخ تنكر للعجب فيجب ان يساعده الهلال ويبتعثه لكورس تدريبي يأتي بعده ليأكل عيش مع زملاءه في مجال التدريب ..
* نساعد العجب من باب انه كان نجما بصفوف صقور الجديان ..
* وأنا ما مستغرب والله لهذا الأهمال الذي يجده العجب من المريخ ..
* ما مستغرب نهائي ..
* وعدم الإستغراب سببو إنو المريخ إداريا خالى من المريخاب عشان كده ما بيعرفوا تاريخ العجب ..
* القاعدين في مجلس المريخ ديل جابتهم الحكومة فيهم الهلالاب وفيهم المورداب وفيهم الما عندهم علاقة بالكرة أصلا ..
* عشان كده ما أظن يكونوا سمعوا بالعجب ..
* حاجة تكسف ..
* حسب ما ورد يفترض ان يكون جمال سالم قد وصل أمس ..
* وبكل الحسابات جمال سالم لن يكن جاهزا لمباراة شندي ومباراة الجوهرة ولكنه سيلعب لان المريخ كله هو عبارة عن (جمال سالم) ..
* بدون جمال سالم المريخ زيو وزي أي فريق ..
* المهم ..
* قلنا يوميا وعلى مدار الشهر الكريم سنقدم قصة من قصص جمال الوالى الشهير بـ(عزو) وهى قصص مثيرة للضحك ..
* واليوم سنقدم قصته مع الحضري ..
* يعلم الجميع أن الوالى فاوض الحضري لدواعى تتعلق بجذب الأنظار للمريخ وللوالى ..
* وقد وافق الحضري على اللعب بالمريخ وطاردته الأقلام المصرية بالسخرية ..
* ولكن موافقة الحضري كانت من أجل حل مشكلته مع النادي السويسري ..
* وقد وجد ضمانات من الوالى بالحل النهائي وقد كان ..
* وصفقة الحضري حتى تاريخ اللحظة لا يعلم قيمتها إلا الوالى والحضري ..
* الحضري أول ما ضمن حل المشكلة حاول يستفز المريخ عشان يشطبو ويرجع مصر ليلعب للأهلى (قوة عين عجيبة) ..
* وقد إستغل الحضري السفر إلى مصر كسلاح إستفزاز اول فأصبح يتدرب الصباح مع الفريق ويسافر ليشرب شاي المغرب مع زوجته في الإسنكدرية..
* والله صحي ..
* وفي مرة من السفريات دي الوالى أقال مجاهد القدال لانو كان ماسك جواز الحضري المصري وإبن النيل سافر بالجواز السوداني ..
* الحضري لما شاف السلاح ده ما جايب حقو ولما شاف العربية البرادو الإنتظرتو في المطار عشان توديهو شندي ليعلب أمام الأهلى في نفس يوم وصوله ، لما شاف (الدناوة) دي غير السلاح ..
* أشهر سلاح الاستفزاز بواسطة التصريحات فكان أن قال : (جمال الوالى ما كان بيحلم يسلم لي في يدي ولا بحلم يتصور معاي) ..
* الحضري بعد ما قال الكلام ده لعب للمريخ سنة دون ان يحاسبه أحد ..
* ونحن نقول دى الإدارة يا بلاش ومرحب بالوالى رئيس طوالى ..
* لقصة الحضري بقية سنعود لها ضمن سلسلة القصص لاحقا ..
* ونركب صافنات ونجيبة (أمدرمانية) وأصلو الزول بيموت والذكرى تفضل حية ..
* و..و..
* ويا الله مطرة ..