• ×
السبت 23 أكتوبر 2021 | 10-22-2021
محمد عثمان الجعلي

هلال المقدرة يبسط السيطرة

محمد عثمان الجعلي

 10  0  2938
محمد عثمان الجعلي


أحباب الرحيق الكرام والله مشتاقين ليكم شوق شديد وحبسنا عن الكتابة فى الشهور الماضية حابس الفيل وإذا القدم ليه رافع ( برضو القلم ليه رافع ) وحالت ظروف العمل بين لقياكم ، حيث إنتقلنا من طيبة الطيبة قبل شهرين للعمل بمكة المكرمة وهذا أول رحيق نكتبه من جوار البيت العتيق ، وفى هذا جملة من تعليقات القراء الظريفة سوف نفرد لها مساحة ، طبعاً البداية فى أول إسبوع من شهر رمضان الكريم أعاده الله على الجميع بالخير العميم ، أول حاجة عن إذنكم نطلع فاصل ونواصل ونظبط الرأس بى كباية ( حلو مر مثلج ) --- عدنا ليكم ياحبايبنا ما أجمل أن يكون أبو الهل متصدر دورى الوطن الممتاز وبفارق 4 نقاط عن أقرب وصيف ( ده بإفتراض أن المريخ سوف يكسب مباراة الآرسنال فى شندى العزيزة ونقاط أسود الجبال فى كادوقلى الصامدة ) --- الحمد لله هلال المقدرة يبسط السيطرة حيث تصدر هلال العشق الجميل ساحة الوطن الرياضية برصيد 40 نقطة نالها من 15 مباراة كسب 13 مباراة وخسر واحدة وتعادل فى واحدة ونال رماته 34 هدف وولجت شباكه 5 أهداف ، أما الند التقليدى المريخ ( محافظ على مستواه ) فى ظل الوصافة الدائمة برصيد 33 نقطة كسبها من 14 مباراة حيث فاز فى 10 مباريات وتعادل فى 3 وخسر واحدة وأحرز رماته 23 هدف وولجت شباكه 5 أهداف وفارق صافى الأهداف 11 هدف لصالح سيد البلد ، يعنى الأزرق العملاق يتصدر بفارق النقاط والأهداف ( صلاة محمد ) وعينى باردة ومانى حاسد وربنا يتم المقاصد ، بالمناسبة متصدرين بفارق النقاط والأهداف قبل وصول سادومبا !! لذا لزم التنويه
*** الخرطوم الوطنى مباراة الإحتراف المهنى
خيراً فعل رومانى الهلال المدرب القدير بلاتشى وهو يشاهد مباريات فريق الخرطوم الذى يستضيفه الهلال يوم الأربعاء 15 يونيو وفريق الخرطوم فريق عنيد وإحترامه واجب ولقد شاهدنا كيف لعب أمام المريخ والإستخفاف بالخصم سوف يوردنا المهالك ولكم فى المريخ الأسوة والقدوة حيث كال الإعلام الأحمر أطنان الشماتة للأزرق البراق بعد خروجه الأفريقى وزعم القوم أن فريقهم سوف يهزم وفاق سطيف ويسير فى مشوار الأبطال فكانت النتيجة ( المريخ عودوه فى سنة تانية ) وأيضاً زعم الإعلام الأحمر أن فريقه سوف يمشى بعيداً فى مشوار ( بنى كونفد ) لأن خصمهم ضعيف هو كوكب مراكش تانى الطيش فى بلده !! وشاهدنا كيف أن الكواكب إحتفلوا بالقمر --- لذا إحترام الخصم واجب ولله در القائل
*** لا يستخفنّ الفتى أبداً بعدوه --- وإن كان العدو ضئيلا
*** إن القذى تؤذى العيون عليلة --- ولربما جرح البعوض الفيلا
مش ملاحظين الهلال أصبحت فيه ثنائيات عجيبة بشة الكبير وبشة الصغير وإدوارد سادومبا والطاهر سادومبا وشيبوب وشيبولا ، أنا عندى إحساس هلال ناس مساوى ونزار وكاريكا وأبوعاقلة وبشة وسادومبا والدمازين وبقية النجوم الميامين قد رفع شعار ورونى العدو وأقعدوا فراجة ---- عجبنا للمريخ عودة جمال الوالى قائداً لمجلس التسيير نحن عايزين المنافسة تكون حلوة شوية ، غايتو لو ما الوزير اليسع لحق مجلس المريخ كانت الصفوة عملت ( للغلابة ) ضيق فى بنك الثواب
*** تعليقات الأحباب أثناء فترة الغياب
تلقيت العديد من تعليقات الإخوة الكرام قراء رحيق الختام وهى تعليقات ظريفة تنتزع الضحكة من الأعماق فمن هلالاب جدة قال فيصل الأقرع غايتو بعد سكنت مكة تانى كل همسة وداع كفارتها عمرة --- أما أستاذنا إبراهيم عوض فقد نصحنى بأن أراجع الرحيق 10 مرات قبل إرساله للصحيفة ثم أضاف ضاحكاً --- لكن لو عايز تكتب الرحيق الأنا بعرفه تعال عندى فى المكتب عشان أنا ساكن خارج حدود الحرم ، والرسالة التى هزتنى من عمنا محمد حسن الزين أبو الفاروق من هلالاب الرياض حيث قال --- يازول إنت حكايتك شنو لا عجبك تصدر الهلال ولا عودة سادومبا ولا التعاقد مع بلاتشى !! ثم أضاف بعفوية ( حلفناك بالله تكتب لينا رحيق ختام أو مفكرة ) --- أما صاحب القلم الأنيق الأستاذ محمد الفاتح ( كتاحة ) فقد فتح خط ساخن مع خلف الله بلة من مريخاب خيبر وقال له --- صاحبك الجعلى بقى رحالة زى إبن بطوطة حايم بين الرياض والمدينة ومكة ---ونقول للحبيب كتاحة لقد ودعتنى طيبة الطيبة قبل شهرين بالدعوة لحضور مباراة بين فريقى الأصدقاء والتضامن فى ملعب الهاشمية الذى يطل على جبل أحد وكان ذلك بحضور ثلاثى الهلال الأساتذة محمد الامين التنى وشيخنا فيصل عبد المنعم والمهندس بابكر عوض الشيخ ، وبينى وبينكم أنا كنت منحاز ( تحت تحت ) لفريق الأصدقاء الذى يرتدى الأزرق الكامل بينما فريق التضامن العريق بالزى البرتغالى وكسب أزرق طيبة المباراة بثلاثية مقابل هدف ، وكان فريق التضامن يضع نجمة حمراء صغيرة ( على الشورت ) فحاول بابكر على الشبخ أن يداعب مدرب الفريق المريخابى عزالدين بابكر حيث خاطبه --- ياعزالدين كان ماشلتوا النجمة دى من الشورت فريقكم ده مابمشى لى قدام فأجابه عزالدين ضاحكاً ( إنتوا ياهلالاب النجمة دى عقدتكم ) --- ومن المناظر الجميلة أن الأساتذة التنى وفيصل كانا يرتديا جلاليب بلون أزرق أخاذ وزاد محمد الأمين الشال به خطوط زرقاء وحتى الطاقية بها خط أبيض وآخر أزرق --- إنه جمال الإنتماء عند عظماء الهلال ، وبمناسبة المدينة المنورة نرسل أحر التعازى للأخ بدرالدين حسن ملاح من هلالاب الدمام فى وفاة شقيقه طارق الذى حضر لعمرة رمضان ووافقته المنية بطيبة الطيبة ودفن بالبقيع نسأل الله له الجنة والمغفرة وأن يلهم أهله الصبر الجميل وإنا لله وإنا إليه راجعون
*** حكمة الوداع
كما تعودنا خلال شهر رمضان الكريم أن نستبدل همسة الوداع بحكمة الوداع ويكون الموضوع حديث أو آية عن فضل الشهر الكريم فقد روى الطبرانى عن عبادة بن الصامت رضى الله عنه عن رسول الله صلوات ربى وسلامه عليه أنه قال --- أتاكم رمضان شهر بركة يغشاكم الله فيه فينزل الرحمة ---ويحط الخطايا ويستجيب الدعاء --- ينظر الله تعالى إلى تنافسكم فيه ويباهى بكم الملائكة --- فأروا الله من أنفسكم خيراً --- فأن الشقى من حرم فيه رحمة الله ، نسأل الله أن يحعلنا وإياكم من أهل الصيام والقيام إنه جواد كريم رؤوف رحيم -
امسح للحصول على الرابط
بواسطة : محمد عثمان الجعلي
 10  0
التعليقات ( 10 )
الترتيب بـ
الأحدث
الأقدم
الملائم
  • #1
    ابوحسن 06-13-2016 10:0
    لك التحية استاذنا محمد عثمان ورمضان كريم عليك ومتعك الله بصحة والعافية وجميع قراء رحيق الختام من الاحباب الكرام
    نسال الله قيول صالح الاعمال في هذا الشهر الكريم وجزاك الله خيرا ورحم الله اخونا طارق واسكنه فسيح جناته مع الصدقين
    والشهداء وحسن اولئك رفيقا ولا تنسوا الدعوات له ***
  • #2
    ابو حامد 06-12-2016 11:0
    عودا حميدا حبيبنا الجعلي وكل سنة وانت طيب وتصوم وتفطر علي خير ، وحقيقة افتقدنا الرحيق في الفترة الماضية ونتمنى ان لا ينقطع في مقبل الايام، والهلال دائما في العلالي والصدارة وساحق لمنافسيه، وكل التوفيق للازرق بتحقيق الفوز في مباراتيه القادمتين وأيضا قلوبنا مع اهلينا أهلي دار جعل في مباراته المقبلة امام الحمر .
    وهنيالك التواجد في مكة المكرمة ومجوارة البيت العتيق وان شاءالله نلتقيك في هذا الشهر المبارك
    وتحياتي لك ولابي روعة
  • #4
    بابكرعوض الششيخ 06-11-2016 05:0
    والله يالجعلي بقيت زي هلال رمضان يظهر مرة بالسنة بعد البحث عنه بالمناظير وعيون الزناطير الحمراء فقد مسخت علينا الحلة بكسر الحاء وصرنا نقرأ أخبار التسيير الما بتسير وأنت الآن ف مكة ويتوجب عليك هدي يوزع على فقراء مكة بمناسبة أنقطاع الرحيق وبعدين ناس كتاحة والاقرع وسيف الدين خواجة والامين عبد القادر صاروا لا يظهروا الا
    معك عايزين نعرف السر في ذلك
  • #5
    ودعقيده خلف 06-11-2016 05:0
    استاذي الفاضل لك التحية ومشتاقين والله وعودا حميدا للمحبوبه كفرووتر ورمضان كريم وتقبل الله منا ومنكم صالح الأعمال ولاتنسانا من صالح الدعوات وانت جوار بيت الله العتيق وكفرووتر براء همساتك زي الحلو مر براء ثلج وسكر اما بالنسبه لجماعتك رمضان كريم نخلي الكلام بعد رمضان لان الكلام في الشهر الفضيل ما بصح
  • #6
    ابوموفق 06-11-2016 04:0
    عودا حميدا استاذنا الجعلي لكن وصيتي ليك ابقى10علي وصية الاستاذ ابراهيم وانت بالبلد الحرام،،لاتنسانا من صالح الدعوات وانت حل بالحرم
  • #7
    فيصل الاقرع 06-11-2016 02:0
    اهلا وسهلا مين انت اوه جعلينا المره دي ما سلام المره نحن اصحاب البيت وانت الضيف فمرحبا بك جعلينا انت والرحيق ما بتتنسوا لكن ولم نخف عليكم من الصدي لان المعدن الاصيل لا يصدا
    اولا الزول وقت اطول من الاكل يا الجعلي والاقي صنيه مليانه بالمطايب ما بقدر اركز يهبش هنا وهنا وهنا لكن انت سويت حلة مشكل وريحت نفسك لا خليت دوري لا تسجيلات لا والي وعرجت علي الحديث الشريف خوفا من الهمسه التي تؤدي الي القضاء والكفاره مكه ما زي الرياض
    وفي الختام نسأل الله لطارق الرحمه والمغفره ولود ملاح تعازينا
    مرحبا بالعوده ونحن لا نقبل انقطاع مره اخري
  • #8
    سيف الدين خواجة 06-11-2016 12:0
    اهلا حبابك مع رمضان عالي جنابك زي الهلال في السما وفي الواطه بين هضابك !!! اهو كدا الرحيق ولا بلاش !!!غايتو استعدوا كويس الاولاد دايما عنكليته والقمة عايزين نشوف زيتا !!!ورمضان كريم
  • #9
    الامين 06-11-2016 12:0
    التحية والسلام اخوى الجعلى والحمد لله بالسلامة ورمضان مبارك وربنا يتقبل الطاعات وربنا يزيدكم من نعيمة وانت من المدينة المنورة (طيبة الطيبة ) الى مكة المكرمة اطهر البقاع فى احسن من كدة وخليك من نكد الكورة فى هذا الشهر الفضيل يا حبيب ---
    وتحياتى عبركم لكل عشاق الرحيق ورمضان مبارك وربنا يجمعنا بكم فى ساعات الخير --
    ودمتم فى حفظ الرحمن ورعايته
  • #10
    عادل سليمان حسين 06-11-2016 10:0
    أخونا ( محمد عثمان ألجعلى ) ألسلام عليكم ورحمة ألله وبركاته وبعد ، حمدآ لله على سلامة ألعودة للكتابة ورمضان كريم وتصوموا وتفطروا على خير.وألله أنا قلت ألزول ده إلا مشى ألسودان،ألحكاية شنو يا زول،وألله مشتاقين كتير ووحشنا عامودك ونفحاته ألجميلة. هنيآ لكم جوار ألبيت ألحرام ، وما تنسونا من ألدعوات ألصالحات . أخوك عادل سليمان حسين ألدمام :0508123129 .
أكثر

للمشاركة والمتابعة

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019