• ×
الجمعة 29 مارس 2024 | 03-28-2024
الرشيد علي عمر

شريان رياضي

الرشيد علي عمر

 0  0  15106
الرشيد علي عمر

المسامير طلعت مواسير...!
 فيلم لذيذ وحلو وكمان جديد...
 عاد يا جماعه حسن عبد السلام دا سرو باااااااتع...
 وحقاً دعوة المظلوم بينها والسما ماااافي حجاب....
 حاربوه...
 أذوه...
 نجضوه..
 كرهوه عيشته...حفروا ليهو حفر الحفر...وفي النهاية طفشوه...
 وعندما تقدم لمنصب سكرتير اتحاد الخرطوم جوهو بام دلدوم وخلوا الجنيد يشتغل بالطبلة ايقاعات العرضه والتُم تُم والمردوم...
 كبعوه كبع الكبع...حدروا ليهو في الضلمه شايلين السواطير...
 قروشه طلعوها غسيل...
 ما نفعت الفرماله ولا الشمار الحار...
 قالوا لاطشها من بلد الحديد والنار...
 ما نفع الحنك...
 قالوا لهف ليهو لهفة من رأسمالي عربي الكنجالات عنده زي التراب...
 والصاقعة احتسب وصبر وسكت...
 الصاقعة عمل فيها نايم وقال حسبي الله ونعم الوكيل...
 ودندن الصاقعة مع شاعر المهجر والمعاناة جبران خليل جبران: ( ثاوٍ على صخر اصم وليت لي قلباً كهذه الصخرة الصماء)..اتفسبكي وكده...
 وتجي عناية السماء عشان توريهم النجوم عز النهار...
 صاقعه جد الجد...صاقعه نيرانا التقول قذيفه ماركة تورا بورا البتخلي الكهف قطعة بسكويت...
 يااامنت كريم يارب...
 قلنا ليكم قبل كده من ضحك أخيراً ضحك كثيراً لمن اتفنقل واتكوم في الواطه...
 قالوا ايييه..؟ ما بنطير برااانا....تتذكر يا حماده ولا نكُب السخانه...؟
 ناس حماده ما بنطير برانا ضحكوا علينا وجروا عشان نطير معاهم...
 سكتنا...صبرنا...وقعدنا وطارووووا براااااهم...
 البطولات بقت ليهم زي حكاوي الحبوبات...
 حبوبة (اثلام) بت (ثلك) كل يوم تحكي ليها حجيتكم ما بجيتكم خيراً جانا وجاكم...
 أها يا بتي زماااااااان مريريخنا دا كان مع البنكرهو الاسمه الهلال في بطولة الابطال...
 يا يمه كدي ما خلينا لينا اذاعة ما اتحكرنا فيها ...
 ما خلينا لينا سيد اذاعة ما ملينا ليهو كرشه ضورارات عشان يدينا اكبر المساحات...
 تلفزيون كده خليناهو مافي..
 كملنا الجوه ومشينا لي ناس بره...
 شفتي يا بتي القناة بتاعت السعوديين الاسمها ام بي سي دي لقينا لينا عضه في واحد فيهم جبنا مرتو شغلناها عندنا وخليناهو يتونس بينا وينقز ...
 اثلام تقاطع حبوبتا بينقز ليييه يا حبوبه..؟
 يا بتي عاد الضورارات دي ما بتسوي العجب..اريتو حال ابوك الما ورثناهو غير الصلعة دي البتلمع زي قصرية اخوك الصغير دا...
 عارفه يا بتي الكرسي القاعد فيهو دا بدل القطن حشيناهو ليهو ضورارات عشان كده كلو ما يتذكر تشوفيهو بينقز زي حرجل لمن يخبت البنقز في التم تم...
 اها يا بتي ملينا الدنيا جوه وبره وما خلينا لينا جريدة ما عسكرنا فيها وهاك يا دش معنويات حيّر دش الدش والدش بتاع الفضائيات ذااااتو...
 بس يا بتي عاد المقدر ما اتأخر...اهىء اهىء اهىء..
 عاد يا بتي ما اتهردت كبدتنا ووليداتنا رقدوا لينا دلاقين دبلان كايسه المكوة..اهىء اهىء اهىء..
 عاد يا بتي ضوراراتنا راحت شمار في مرقه وطلعنا الطيش البدقوهو بال....الطرابيش ..(وتتلفت الحبوبه مذعورة ) ابوك ما يسمعني اصلو السيرة دي لمن تجي بينقلب زي الكلب السعران يهوهو من الزعل...اهىء اهىء اهىء
 عاد يا بتي عشا البايتات لمن هرب مننا ومشى يكوس البرلمان بعد ما طممنا بطنه من المواسير الخربانات...
 يا حبوبه عليك الله ما تبكي قطعتي قلبي ...اهىء اهىء
 عاد يا بتي باقي ليك وليدنا جمال قلبه بيحن علينا تاني ويرجع لينا...؟
 هوي يا حبوبه دا كلام خرف ساي...بابا قال جيمي دا تاني الا نشوفه في السينما الهنديه...
 وتواصل الحبوبه حكاية الطيران من الكونفدرالية ونرجع لي موضوعنا...
 قالوا ليك حوض المتعافي الفيهو الدعم كابي خلتو ليك الصاقعة في الهوا هابي...
 السقف بقى بس هبابه...
 صحن فضائي يا بعيد..؟
 قولة دولللللودوووول دي التقول فكوه بي نبله فيييييييوووووو طار في الهوا وبقى يدور زي السورو..
 قالوا ليك ناس البقالة الجنب النادي وقفوا يتشارطوا..
 طُره ..
 كتابه...
 طُره..
 كتابه..
 أُمك دقه الدلجه.... الكترااااابه....
 الصاقعة ضربت الحوض ضرب غرائب الابل..
 الصاقعة خلت سقف الحوض يعمل باكورد على اصله...
 الصاقعة صقعت الحوض فقام اتصقع صقع الصقع وقالوا ليك المسامير اتطايرت زي شرار اللهب...منقد وهبت عليهو كتاحه...
 هو كمال دحية بكون جاب المسامير دي من وين...؟
 غايتو الطاهر احمدون بتاع اشهر دكان مسامير في المنطقه الصناعية قال في دكان جنبهم بجيب مسامير ماركة المواسير تدقو في الحيطه بي جاي تلقاهو طلع في المروحه..
 أكيد ود دحيه اشتراهو ليهم من هنوووك...
 طيب كان تجيبهم مقلوظين يا دحيه عشان ساي يكنكشوا في السقف زي كنكشة التيجاني ابوسن في كراسي مجلس الهلال...
 الخبرة مطلوبه يا دحيه..
 العجلة من الشيطان يا أخوي...
 وبعدين قلبتوا علينا المواجع بتاعت المظلة الراحت في حق الله..
 فينك يا عصام مسكين...؟ ألحقنا وأفزعنا يا مسكين...؟ المظلة تروح في حق الله وسقف الحوض في الهوا يسوط...
 يدفع المتعافي يا البلا تبعد عننا وكمان تتجازى ما تتكافي..؟..
 حوض المتعافي راح في حق الله ...
 حوض المتعافي لحق ايداهور...
 يكون الصنايعي الدقه المسامير من عشاق الامل العطبراوي..؟
 ما تستبعدوا كله ممكن يكون...!
 ------------------------------
طريقنا كده..!
 البعض فزع من نقدنا للمجلس الجديد...
 وقبل أن يدلفوا الى الاستنتاجات عبر الخيال العريض نكتل الدش قي يدهم بالقول نحن اول من أيَّد هذا المجلس..
 ومن قبل نحن اكثر من نادينا بالتعيين ونضيف بقوة لا تقبل الشك ولن نتخلى عنهم مالم يشكلوا ضرراً على المسيرة..
 وفرمالة اهلية وديمقراطية الهلال القادم من جوف مؤتمر الخريجين هي عندنا مكمن فخر واعتزاز ولكن لا نؤمن بها في ظل عهود تقودها عقول لا تفقه الا سياسة العضويات المستجلبه...
 ومكاسب كثيرة تحققت لنا في ظل السياسة العامة التى انتهجناها في (حبيب البلد) لاجل مصلحة الهلال...ونحن لا نتخلى عن مكاسبنا ولا نفرط فيها ونعض عليها بالنواجز..
 وبمثلما يجدوننا وهم يقدمون العطاء الجيد أيضاً يجدون سيوفنا مشهرة عند السلبيات...
 ولن يعني اذا كنا من المساندين لهم أن نصمت على السياسات التى تورد موارد الهلاك وتقود الى الفرقة والشتات...
 ورفض دعوة الكاردينال هو عداء صريح بلا اي مسوغ واضح سوى انه نوعية استهداف جديد...
 مجلس يتحسس الخطى يفكر بهذه الطريقة العدائية تجاه قطب كبير بقامة اشرف هذا يعني انه يقود الهلال الى الحريق...
 ومجلس يتحسس الخطى يبدأ المشوار برفض مصافحة اليد التى تمتد اليه يقترف خطأ عظيماً في حق كيان ما تعود ان يعادي اقطابه الا لماماً بهذه الكيفية المقيتة...
 ومن سلك هذه السياسة من قبل فشل ولم ينجح لأن المبادرة بالعداء تجاه الايادي الممدودة غير مقبولة على الاطلاق..
 قرار غريب وتبريراته واهنة وغير منطقية ولا تعني سوى انهم صنفوا اشرف معارضة أو يدفعونه لكي يعارضهم مع إنه اتاهم يبشر بعهدهم الجديد ويحمل ماله ليحفز الابطال...
 ثم من الطبيعي أن تكون دعوة اشرف في بيته اذا كان هو المضيف ..
 وحتى وان رفضوا دعمه واشترطوا أن يتم داخل النادي فان الدعم هنا لا علاقة له بضيافته...
 ويمكن أن يؤجل دعمه الى حين لأن لا غبار على التقيد بمؤسسية الطرح...
 ومن قبل رفض الارباب الدعم خارج النادي وقبل اشرف ذلك بكل اريحية اتساقاً ومبادىء الهلال العظيم...
 والفهم هنا لا يحتاج لفهامة لأن الغاية هي اقرب لتبخيس جهد الرجال ...
 وهل استلموا دعم والي الخرطوم داخل جدارن النادي..؟
 اذن فلنبشر جميعنا بتدفق النقد..والكاش البيقلل النقاش..
 ابشروا يا اخوة سيدا فالمال لا يشكل عقبة في طريق هذا المجلس بدليل رفضهم لدعم الكاردينال...
 ونأمل بأن نسمع عن حل الازمة الحالية الطاحنة حتى نريحهم ونرتاح ويرتاح الهلال...! ابقوا معي...!
و...للشريان ختام...!
 يبدو ان مجلس يوسف يسير على درب مجلس صلاح في سياسة الاقصاء..وكدا ما كويس ...
 كاشك بيقلل نقاشك..سياسة حلوة بس بلا اقصاء وبالبحث الجهير عن العداء..
 وزيادة الخير خيرين ما كعبه...
 موقف اشرف موقف الرجال...ودعوته انموذج حي للتجرد لاجل الهلال..
 وبنفس القدر من الانتقاد هنا.. يستوجب علينا أن نشيد بالمؤسسية التى انتهجها المجلس بعيداً عن سياسة العداء المبتدرة..
 فواضح جداً من طريقة التدبير وسياسة الصرف انهم يخططون للقيام بالعمل المؤسس عبر الطريقة السليمه وهي حساب الهلال..
 فلقد علمنا ألا صرف الا عبر المستندات وان كان قرشاً واحداً...
 وستكون ضربة البداية بحل التزامات اللاعبين من متأخرات حوافز..
 برضو خير وبركه..
 والساقية مدورة..
 إتدوري..!
امسح للحصول على الرابط
بواسطة : الرشيد علي عمر
 0  0
التعليقات ( 0 )
أكثر

للمشاركة والمتابعة

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019