• ×
الأحد 19 سبتمبر 2021 | 09-19-2021
شوربجي

يفضلون المريخ عن مساكين الولايه

شوربجي

 6  0  1336
شوربجي


((())) والي الخرطوم شغال بالكوره فقط :

والي الخرطوم ومع اقتراب الشهر دائم الهروب من مسؤلياته الجسام

ويتفرغ تماما للمريخ ومشاكل المريخ

واجتماعات وتجهيز معينات للمريخ وقروش ونفرات

كان اولي بها هذا الشعب المسكين

فمائدة رمضان تحتاج الشيئ الفلاني 6

حلو مر وكبكبي وعصيرات ودقيق وبلح وتلج ومويه وكهربا

ولا اظن ان والي الخرطوم قد جهز هذا المطالب لاهل الخرطوم

وقاعد يتصور لينا سلفي مع وفد المريخ الباحث عن قروش الحكومه

وما تخافوا برجع ليكم جمال الوالي

والدفاع حيكون بالنظر

والطيارات الاسرائيليه كانت مطفيه الانوار يومتها

الله اكبر ولله الحمد

ويا سلام لقد رجع منقذ المريخ الوحيد

ولقد بدأت ثورة الانقاذ الوصيفي في العرضه جنوب

ويا دوب حنشم النفس

وحيرجع المريخ فريق غني من تاني

وحمامات سباحه وباسطه وطياره وحج

وحيكتب مزمل عن الكاش يقلل النقاش

ويا دوب بكري المدينه حيجري جري الوحوش

لانو في الايام الفاتت كان جاري ورا البنوك

ولا اهداف ولا يحزنون

ومن بنك لبنك

ولسه الشيك طاير

والصراف الآلي لم يعمل بعد

ومن فضلك اتصل بالهاتف المصرفي

وعايد عايد يا جمولي

وسوف يكون الهتاف الجديد لاهل المريخ

ادفع ادفع يا جمال مريخ بت فرح في الميدان

وفي المريخ بالمال وحده يحيا الانسان

وقد كانوا علي شفا حفرة من ديوان الزكاة

وخلاص رجعت كل (القرعات) الي المخازن

وتوقف تحويل الرصيد

وقروش الحكومه ستنهمر من كل حدب وصوب

ولو ما في ثروة حيوانيه في بنك المزارع

بس ما تكملوا لينا علي بنك المزارع كمان

ونتوقع ان ترتفع اسعار الطماطم الي ٣٠٠٠ جنيه بدل الف

ويصل سعر جوال العجور إلى (٢٠٠٠ ) جنيه بدل ٥٠٠ ،

وجوال البصل إلى ٣ الف جنيه بدل الف

وربطة جوز الجزر إلى (١٢٠ ) جنيهاً بدل ٤٠ جنيه

وكيس الخيار الي (٩٠٠) جنيه بدل ٣٠٠ جنبه

وجوال البطاطس الي ٩٤٠ جنيهاً بدل ٣٢٠ جنيه

وربطة الخضرة الي ١٠٠ جنيهاً بدل ٣٠ جنيه

والرجلة الي (٥٠ ) جنيه

وربطة الجرجير الي ١٥ جنيها،

وكيس البامية (٢٠٠) جنيهاً ،

وجوال البازنجان (٢٤٠ ) جنيهاً

يعني ٣ اضعاف ليس بسبب رمضان بل بسبب حلحلة جميع ديون المريخ

لان بكوري براهو داير ٣ مليار

وجمال سالم داير ٢ مليار

وديدا داير ٢ مليار

والكاف دايره

والفنادق دايره

وايميل داير

وغارزيتو داير

لا تصدقوا انها اسعار شهر رمضان

انها اسعار نفرة جديده للمريخ

وسيقودها والي الخرطوم ووالي المريخ

المهم رجعوا الوالي رئيس طوالي

وتوقعوا بيان هام برفع جميع الاسعار ورفع الدعم من اجل المريخ


((())) التسميات القبيحه قد ترتد علي مصر :

مساعد وزير البيئه المصري ( الغبي ) اثار ضجة كبيره في القارة الافريقية بعد وصفه للافارقه للافارقة بأنهم كلاب وعبيد وباللغة العربية، وذلك في حالة غضب انتابته خلال مؤتمر دولي انعقد في نيروبي، ومطالبة مندوبة كينيا منسقة لجنة الخبراء الافريقية في الامم المتحدة، مصر بالاعتذار، وحرمانها من تمثيل افريقيا في المحافل الدولية اثر ذلك.

انها حقا ثقافة شعب جاهل ظل طيلة حياته يوسم السودانيين خاصة بالعبيد والبوابين وقد ظهر ذلك جليا في الكثير من افلامهم الابيض والاسود و (عثمانه ) الاسود الذي كانوا يقصدون به السودان ابن جنوب الوادي

وان كانت هذه النبره العنصريه قد تلاشت كثيرا الا ان بعض الممثلين مازالوا يسخرون منا في اعمالهم الهابطه والتي هجرها الناس الي الاعمال التركيه الرائعه وغيرها

مصر الآن تعيش ضياعا ويتملكهم الخوف بعد ان انحسرت مياه النيل بسبب سد النهضه

واظن ان هذه التسميات القبيحه قد تتحول عليهم بالعكس وخاصة انهم في الطريق الي فقدان دورهم الريادي والتاريخي

افريقيا الآن تصطف ضد مصر


((())) لسان حال كجبار يقول : هذه الارض لنا :

فلماذا يريدون طمس هذه الحضارة الموغله في القدم

هل ليقولوا ان تاريخ السودان يبدأ من معركة المك نمر واسماعيل باشا

الدائرة تدور علي اهل الشمال

وما زالوا يقولون ان السودان بلد تعايش وتمازج ( هو علي كيفكم )

من قبل هجرتم اهالي حلفا فعادوا الي موطنهم الاصلي وعمروه من جديد

الآن تريدون تهجير نوبة الشمال الي الصحاري بحجة توليد الكهرباء

نتمني اقامة سدود في حوش بانقا لكي تنعم الشمالية كلها بالكهرباء والتنمية!!؟

لماذا التعدين في اراضي النوبه وحدها

لماذا السدود في اراضي النوبه وحدها

خلاص فرطتم في النص التحتاني وقبلتوا علي ارض النوبه

هذه الارض لنا

و لكل بطاح من الناس له يوم بطوح

وهي مقولة شهيره لابي العتاهيه

فحين حضرت المهدي الخليفة العباسي الوفاة وقد كان في رأي الناس بطاح الملوك:

نح على نفسك يا مسكين إن كنت تنوحُ

لتموتن وإن عمــــــــرت ما عمر نوح

كل بطاّح من الناس له يوم بطوحُ

ستر الله بنا أن الخطايا لا تفوح


محمد حسن شوربجي
امسح للحصول على الرابط
بواسطة : شوربجي
 6  0
التعليقات ( 6 )
الترتيب بـ
الأحدث
الأقدم
الملائم
  • #1
    عزالدين ابرايم عبدالرحمن حاج موسي 06-05-2016 05:0
    وقتين ادوكم 2 مليون دولار لي لاعب الاتحاد السكندري ماكانو في مساكين وقتين استلم عطاء المنان 13 مليار كنا نحن من سكان جزر السيشل والله ما كان في مساكين اتقو الله خلي العاطفه وتكلم بلسان الصحفي لو انت تحمل هذه الصفه لا تتكلم بلسان المشجع الهلالي عيب والله عيب من اي صحفي احمر او ازرق يتكلم بمثل المشجعين العادين ويتكلم بلونيتو عيب عيب عيب عيب
  • #2
    نجم 06-05-2016 02:0
    الخوف ظهر وتغيرت اللهجة.. وجع وجع الوالي رجع... الوالي رئيس طوالي
  • #3
    احمد 06-05-2016 10:0
    ما تزعل الوالي حيعينك طباخ لموائد رمضان بس زبط الشوربه تمام ماوكون ماسخه زي بتاعة الجريده
  • #4
    Mustafa A. Osman 06-05-2016 09:0
    يا شوربة انت ناغم على الثقافة العربية و اللغة العربية الجابك شنو لناس المهدي و ابو العتاهية و أشعار العرب؟ خليك في رطانتك وحقو تكتب بالنوبي عشان واحد من العرب يقرأ لك مافي ده لو كانت اللغة النوبية ما زالت لها حروف معروفة لديكم.
أكثر

للمشاركة والمتابعة

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019