• ×
الأربعاء 28 يوليو 2021 | 07-27-2021
محمد الطيب الامين

ببقي ليك شاي الصباح وبترص جمبك بسكويت !!

محمد الطيب الامين

 0  0  7772
محمد الطيب الامين



* واحدة من أكثر المقولات نفاقا هى (خير خلف لخير سلف) ..
* في كثير من المنابر يطلقون هذه المقولة من باب (كسير التلج) للخلف وللسلف ..
* ولعل هذه المقولة تنتشر بشكل كبير جدا في عالم السياسة ..
* يقول ليك : المعتمد ده خير خلف لخير سلف ..
* بينما الحقيقة تقول أن المعتمد (الخلف) كعب ، والمعتمد (السلف) كعب تربيع ..
* المهم ..
* من الآن وصاعدا تشكيلة الهلال كلها ستكون (خير خلف لخير سلف) ..
* حاليا يملك الهلال تشكيلتين
* وكل تشكيلة تملك (إحتياطي) منفصل عن التشكيلة الأخرى ..
* وهذه الوفرة لم تتوفر للهلال طوال السنوات الماضية ..
* إذا إعتبرنا الثعلب (خير سلف) فأن وليد علاء الدين خير خلف ..
* وإذا إعتبرنا شيبوب (خير خلف) فأن أبوعاقلة خير سلف ..
* وقس على ذلك ..
* في المريخ مهما إجتهدت ما بتقدر تعرف منو السلف ومنو الخلف ..
* مصعب عمر (سلف) وعلى جعفر (خلف) ..
* ومنو العوض وعليهو العوض ..
* حاجة تكسف ..
* تعريف (الميتة وخراب الديار) هو : أن يصدر (الكاف) عقوباته ضد المريخ في هذه الأيام ..
* هذا هو تعريف (الميتة وخراب الديار) ..
* (خراب الديار) حاليا حاصل ، باقي (الميتة) بس ..
* باقي الميتة يا عيسي حياتو ..
* غايتو السنة دي يا متنا من الضحك ويا كمان الضحك كتلنا ..
* لاعب الهلال (ألوك أكينج) إنخرط أمس الأول في تدريبات المريخ ..
* وقد أسعدنا هذا الخبر لان (الوقفة ممكن تضر ألوك) ..
* ألوك أول لاعب في العالم تتم إعارته من الهلال إلى (تمارين المريخ) ..
* وديناهو ليهم إعارة عشان يتمرن معاهم وبس ..
* أمضى ألوك (6) شهور أولى مع المريخ دون أن يشارك في أى مباراة ..
* وسيمضي الـ(6) شهور الثانية ولن يشارك في أى مباراة ..
* قلنا ليكم الزول ده (ورقو) عندنا ماسمعتو الكلام ..
* الورق في العرضة شمال والجسد في العرضة جنوب ..
* الكاردينال قفل ورق ألوك في الخزنة وجدع المفتاح في أبعد حتة ..
* زي لما الزول يكون عندو (فرخة) في التلاجة ويقفل التلاجة بالمفتاح ويرفع المفتاح في رأس الدولاب ..
* لكن عندي ليكم مقترح ..
* مش إنتو قبل كده جبتو زول (بصم) إنابة عن علاء الدين يوسف ؟؟
* هسه جيبو ورق ريتشارد جاستن إنابة عن ورق ألوك ..
* هكذا أقترح ..
* وأى زول طبعا حر في (إقتراحاتو) ..
* وتبكو بس .. عين قطرة وعين مس ..
* كثير من المتابعين يخافون على الهلال من الأرهاق ، لا سيما وأن الفريق لم يرتاح بين الدورتين ..
* فكرة جيدة أن يتعرف بيلاتشي على إمكانيات اللاعبين قبل إنطلاقة التنافس ولكن هذا ربما يضعف تركيز النجوم الذين ظلوا في حالة ركض مستمر دون توقف ..
* لا أعرف هل بالأمكان ان يمنح بيلاتشي اللاعبين راحة لأسبوع يعودوا بعدها لمواصلة التدريبات أم أن ذلك سيخل بالعمل الفني ؟؟
* عموما نتمنى أن يتجاوز نجوم الهلال كل الصعاب من أجل تقديم أنفسهم بشكل مختلف في الدورة الثانية ..
* سعادة الوزير قال إنه يخشي على المريخ من مصير الموردة ..
* كده يا سعادتو إنت ظلمت الموردة ..
* والله صحي ..
* ظلمت الموردة جدا يا سعادتك ..
* إعلام المريخ زعلان من الوزير ..
* الوزير يعمل ليكم شنو ؟؟
* الوزير طالب لجنة التسيير بإكمال دورتها ..
* وبعدين ياخ إنتو مستعجلين لشنو ؟؟
* دي لجنة تسيير والجاية برضو لجنة تسيير ، يبقى الإستعجال في شنو ؟؟
* هسه لو كان الجاي مجلس منتخب معليش ممكن أقول ليكم تستعجلوا وتزعلوا من الوزير ..
* لكن ماشة لجنة تسيير وجاية لجنة تسيير ..
* خلفك لجنة تسيير وأمامك لجنة تسيير ..
* وسيروا و(جيب) جمال الوالى يرعاكم ..
* غايتو جنس غايتو !!
* في ثقافة التربية السودانية كان في حاجة إسمها (دفعنا ليكم فلان) ..
* يقول ليك (البت دي دفعوها لعمتها من وهى صغيرة) ..
* العمة تقوم بتربية البت وتعتبرها واحدة من بناتها ..
* الحياة السودانية كانت بهذا الطعم العجيب ..
* هسه طبعا كثير من الأهل ما بعرفو بعض الأهل ..
* في زمنا ده الأهل ما بتعارفو ..
* المهم ..
* بنفس النظرية دي إحنا (دفعنا) صلاح الجزولي لمازدا ..
* دفعنا ليك عديل ..
* إعتبره هدية من الهلال للمنتخب ..
* مش قبل كم يوم الكاردينال إتبرع للمنتخب بـ(10) ألف دولار ؟؟
* خلاص الـ(10) ألف دولار دي إعتبروها حافز تسجيل صلاح الجزولي في المنتخب لأربعة سنوات قابلة للتجديد ..
* قلنا للكاردينال شوف إعارة لصلاح الجزولي ومحمد عبد اللطيف هارون ولكنه لم يهتم بحديثنا ..
* وبصراحة يا كردنة إنت عصرت علينا عديل بالاتنين ديل ..
* محمد عبد اللطيف هارون وصلاح الجزولي أصلو ما ممكن يكونو الأتنين في نادي واحد ..
* كان تعير واحد وتخلى واحد ..
* لكن ما مشكلة شهر أطناشر قريب ..
* ما علينا ..
* الأيام دي لو عندك قروش عادي ممكن تبقي رئيس المريخ ..
* والله صحي ..
* ناس المريخ ما مهم عندهم الزول يكون هلالابي ولا موردابي ولا جزيرة الفيل ..
* المهم إنك تكون عندك قروش ..
* لو عندك قروش إن شاء الله تكون بتشجع الوحدات الأردني ما مهم ..
* لو عندك قروش (ورثة) معقولة كده ممكن رئيس المريخ ..
* أنا متأكد ناس المريخ ممكن يقبلوا بصلاح أدريس ..
* متأكد بنسبة مليون في المية ..
* وبكرة يقول ليك صلاح أدريس أصلا كان مريخاب زمن الجامعة ..
* عندهم الحركات دي ..
* من زمن أبو العائلة (الهلالابي) هم في الحالة دي ..
* لكن طبعا مستحيل ناس الهلال يقبلوا بجمال الوالى مهما كان ..
* وده الفرق بين الهلال و(الإصيفر) ..
* وإحنا يا جماعة لما نشكر أسامة ونسي ده ما معناها إننا ما عايزين ليكم جمال الوالى ..
* بالعكس والله ..
* جمال الوالى ده الخدمة البيقدمها للهلال أكبر من الخدمة البقدمها للمريخ ..
* نحن بنستنكر الطريقة الرخصية التى يتوسل بها إعلام المريخ لجمال الوالى ..
* بصراحة طريقتكم بايخة جدا ..
* طريقة ما بتشبه نادي ترتيبه رقم (2) في البلد دي ..
* والله صحي ..
* المفروض جمال الوالى هو اليسعى للمريخ مش المريخ يسعى لجمال الوالى ..
* بالطريقة دي عملتو المريخ (هين) عشان كده يسهل الهوان عليه ..
* شوية كده المفروض تكون في خجلة ..
* خجلة بـ(الناء) ..
* ونركب صافنات ونجيبة (دارفورية) وأصلو الزول بيموت والذكرى تفضل حية ..
* و..و..
* وببقي ليك شاي الصباح وبترص جمبك بسكويت !!
امسح للحصول على الرابط
بواسطة : محمد الطيب الامين
 0  0
التعليقات ( 0 )
أكثر

للمشاركة والمتابعة

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019