> الذين ينادون بعودة جمال دون تفكير في كيفية دعم جمال > لا بحسوا ولا بشعروا > لأن الاعتماد على جمال كممول وحيد > يجعل من جمال صراف آلي يلجأ له الناس كلما ضاق الظرف > وطوالي الظرف ضيق > للدرجة التي أجبرت جمال على التنحي مرات عديدة > الكل يريد جمال رئيساً لينفرج حال المريخ ويتفرج هو دون التفكير في دعم جمال > لذا ننادي بالاستثمار > والدايرين عودة جمال بدون تفكير في استثمار حقو يخجلوا شويه > الدولار طار > المريخ انهار > ومحمد جمال سيد المال > يبقي لابد من الاستثمار > زمان قالوا في زول مغندل شديد > ولادتو كلها بنات «لاحقني» > في كل ولدة السماية بتكون أسبوع > شيء ولائم وشيء حفلات وشيء يوم مفتوح > بعد ست بنات جابوا ليهو ولد > الناس قالوا بالولد ده الحفلات حاتكون سنة > والمفاجأة كانت لما زولنا ضبح خروف واحد في السماية وقسمو كيمان على سبعة جيران وقفل بابو عليهو > قالوا ليهو بالغت > سماياتك دي كلها بهلتها للطيش > المرة دي قلنا الحكاية دبل.. مالك؟ > قال ليهم المرة دي سيد المال جا > لذا أتوقع من جمال حتى في حال عودتو > أن يأتي بتغيير كبير > ولا استبعد منه قصة الحلاق > قالوا في ملياردير كبير > بحلق عند الحلاق الجمبو > بعد يحلق بغمت للحلاق اتنين جنيه > ولد الملياردير بحلق عند نفس الحلاق > وبعد يحلق بغمت للحلاق مليون > يوم عمك حلق وقام > غمت للحلاق الاتنين جنيه المعتاده > الحلاق قال ليهو > ياحاج اتنين جنيه شنو؟؟ > ولدك يا حاج بدفع مليون في الحلاقة > عمك قال ليهو أنا ولدي أبوهو ملياردير > أنا أبوي ملياردير؟ > ولفح عمتو ختاها في كتفو وفحط > يبقى الاستثمار الاستثمار سواء كان القادم جمال أو الكاردينال > أيها الناس > ما كتبته فطومة اختي يحير > وكأن الهلال لم يستلم مليماً من الحكومة > يعني على أقل تقدير عشرات المليارات الدعمت بها الدولة وحزب فطومة الحاكم مجلس عطا المنان > كأنها كانت من تركة الطيب عبد الله طيب الله ثراه > وكأن دهشة الفريق المدهش في حينها كانت من خزائنه الخاصة > وكأن عشرات المليارات ديك كانت في زمن يرفل فيه الشعب في نعمة > فحينها كانت حاجيات رمضان موفره بتراب القروش للشعب الفضل أقصد البطل > > ووقتها كان الشعب معافى لا يعاني من أمراض > وبالتالي ما كان محتاج لمستشفيات علاج السرطان والكبد الوبائي > وكلية الشعب كانت نضيييييفه لا تحتاج لغسيل > فطومة > نحنا خواجات > نحنا قاعدين في البلد دي وعارفين كلو شي > المهم > داير فطومة توريني بياتو قانون تم وضع الطبل على دكاكين استادهم الشرقية برغم قرار النائب العام باعتبار تلك الدكاكين ليست من المباني العامة التي تخضع للإخلاء بالطريقة التي أرادها كردنه > وورينا يا فطومة ما هي الجهة التي وضعت تلك الطبل؟ هل هي حكومية ام حزبية ام شي تاني > وورينا يا فطومة قصة لي ذراع المستأجرين في رفع الأجرة وإجبارهم على سداد مقدم سنوات والتبرع غصباً عنهم > القصة دي حقيقتها شنو يا فطومة؟ ومن لوى ذراع التجار الشرفاء؟؟ > نحنا خواجات؟؟ > نحنا قاعدين في البلد دي وعارفين كلو شي يا فطومة يا اختي > المهم > الحل يا فطومة في الاستثمار > لو لي جمال أو للكاردينال > وحقو الحكومة الماشغالة بالرياضة على حد تعبيرك أو كما قلتي > حقو تشجع الأندية على الاستثمار عشان الأندية تعتمد على روحها > لكن طبعاً إنت قلتي في مقالك البدفع مفروض يقرر > فهل تقبل الحكومة بالاستثمار البمنعها التدخل في الاندية وإصدار ما تراه من قرار؟؟ > أسأليهم وكلمينا > أيها الناس > إن تنصروا الله ينصركم > أها > نجي لي شمارات والي الخرتوم > كان شفت يا والينا > والا أقول ليك > خليك يا اخينا > لو قلنا أو ما قلنا شنو البتغير لينا سلك كهربا ننساك كيف والكلب قال ننبح سااااي والجمل ماااااااش وإلى لقاء سلك
x
إغلاق