• ×
الثلاثاء 2 مارس 2021 | 03-01-2021
معاذ ابو مؤيد

كل شئ تقليد ومولف الا الجمهور

معاذ ابو مؤيد

 0  0  632
معاذ ابو مؤيد

واعلام يبيع لينا في التروماااااي،،،


ايام حزينة علي المدرج والجمهور
بامر الادارة مش بامر اللعيبة
نحارب كيف في ادغال افريقيا
ونحن شغالين توليف وقطع غيار تقليد!!!
نبداها من وين
من الادارة!!
الادارة ذاتها مولفة من موظفين دولة ماعندهم علاقة بالرياضة!!
فجاءة كدة جاتهم تلفونات انصاص الليالي
وجميعهم قال حاضر
مافي واحد قال ماداير
في واحدين نفضو البدل من الدواليب ومشوا الحلاق
وفجاءة لقو نفسهم مولفين لمنصب ادارة نادي المريخ
واااااااه يامريخ
توليف اجباري
وتغيير في المباريات اجباري!!!

ننزل تحت حبة للقطاع الفني والرياضي!!!
برضو توليف وقطع غيار تقليد
مدرب تقليد وفيه ملامح ناس الشام وتركيا !!
في زول اتأكد من الاصول البلجيكية؟؟
ننزل تحت منو حبة
ولفو امير دامر مساعد مدرب
المكينة جابت صوت قاموا ركنو امير دامر!!
بقت العربية ماشة من غير مساعد ياي اقصد مدرب!!
ننزل تحت حبة المشاعد الاجنبي بقوة مترجم !!
مش قلنا ليكم توليف !!
الخوف كانو يبقوه مدرب عام ولاكمان ناطق رسمي!!

ننزل تحت للاعبين
نصهم توليف في توليف
الفي دفاع ودوه النص
والفي النص جابوه دفاع
والفي طرف مرات نص ومرات جناح
والكبتنية ذاتها كل يوم في يد زول!!
في توليف اكتر من كدة!!
ادارة استلمت تيم ناقص لاعب او لاعبين والامور تبقى تمام،،،
مسكوه وشلعوه التسيراب؟؟؟؟؟
ننتظر شنو من توليف وقطع غيار مقلدة!!!!
جابو مكينة للدفاع طلعت المكينة ذاتها مولفة وماكل وش مكينة وعايزة عمرة وعايزة مكينة جديدة!!
وسلام ياعمو كريم!!
بالله الجابك دا بخاف ربنا فينا!!

ويجيك اعلام يقول ليك ظلم الحكم؟؟؟؟
بالله اعلام شنو
مافي مبررات تاني تقنعونا بيها!!
حكم شنو
وفريق سافر مهزوم اداريا
وانتم مافاضين من مجاراة كتاب العرضة شمال؟؟
اعلام يخدر فينا وشغال يلولي فينا !!
وين الاعلام من نقد الذات
وين اعلامنا من بلاوي التسيراب؟؟
وين اعلامنا من حرب الروؤس الكبيرة!!
وين اعلامنا من قضايا المدرج والجمهور؟؟
وين اعلامنا من الاخفاقات؟؟
وين اعلامنا والكابتنيةًذي كرسي النص كل يوم في يد زول ؟؟
وين اعلامنا من اللاعبين المصابين!!
ماشافو رابطة الامارات تكفلت بعلاج المصابين !!
ماعندكم قروش ماتعالجو الكابت واللاعبين البلعبو مخدرين!!
ماتضغوط علي الادارة لتفعيل وظيفة مدير الكرة وترشحو مساعد من ابناء النادي المخلصين !!
وينكم من ده كلو ؟؟
يعني عايزين تقنعونا انو التحكيم هزمنا؟؟
انتو قايلين المدرج دا لسه في زمن الكورة منقولة في الاذاعة!!
ولا قايلين الجماهير ماواعية!!
عناوين صحفكم تخجل !!
بدل تعالجو المشكلة الادارية تفتشوا لمبررات واهية!!
الاقلام الماسكنها دي
والمسميات الصحفية
دي امانة عند رب العباد
ياتواكبوا الاحداث وتمارسوا سلطتكم الرابعة ياكمان تعالو علينا في المدرج!!!

مسك الختام
الكيان يعاني من التوليف والمجاملات والشلليات
وصاحبي وصاحبك
ودفن الروؤس في الرمال
المريخ كيان كبير علي الجميع
لو ماعالجنا جروحنا حاليا حتبقي سرطان وتحتاج للبتر ،،،
وبعديها العلاج حيكون حار ومصاريفو بااااااااهظة!!!!!!

ونحن علي المدرج ندعم ونشجع ونتفرج
انتظرنا الشوري يطلع لينا بي شي يضمد جراحنا
لكن الشوري محتاج تجديد
واشتراكاتهم وعضويتهم محتاجة تفعيل؟؟
ياكبارنا ويااعمامنا
لو مافي زول داقي صدروا للرئاسة كونوا مجلس منكم والجمهور يدعمكم
وبعديها استقطبوا رجال المال في شكل اعضاء شرف
عشان المركب دي لو وقعت في يدين ناس مابترحم
مريخنا حيروووووح
فكرو فيها ،،
كونوا مجلس من حضراتكم مدعم بكفاءت ادارية من العندهم رغبة للترشح،،
واستقطبوا الدعم من الجلابه والمدرج بيتم الباقي ،،
لجنة التسيير المرفوضه من المدرج جابت نفرات بنص مليار
كيف حيكون الحال مع كبارنا!!!!
دوروها في راسكم ياعمنا ودالياس ،،،

همسة اخيرة
لم صحيفة في نادي منافس تشيد بعضو مجلس ادارة !!!
تبقي القصة عايزة مراجعة
ونبقي نحن علي حق
بس عليك الله غير الصورة
عشان تاني اي اشادة تكون بصورة تاني !!
الصورة الواحدة دي بتهيج المصران
والمشكلة والادهى والامر انو بيدافعوا عنك ويشتموا في اعلام الكيان ؟؟
والامر شديد انك محسوب علي الكيان !!
سقطة جديدة محسوبة علي سعادتك !!
وتحياتي لمارك مؤسس الفيس بوك

خارج النص
كل مرة يمدوا في اجل الجمعية العمومية ؟؟
اخر تاريخ ٦/٤ دا برواية مجلس الادارة
و٦/٧ برواية مجلس الشورى
ننتظر تاريخ برواية المفوضية!!
السر شنو؟؟
دا كلو حنعرفوا في الايام القادمة!!!
اليوم اخر يوم في التسجيلات
يالحقنا ولا مالحقنا
الاخيرة هي الاقرب
والمحترفين شكلهم لنهاية الموسم الا يحصل جديد في اخر الساعات!!!
وامس سجلو حماد بكري
كل الاضافات الجديدة وجوه شابة
نتمني ليهم الخير
بس كل التسجيلات دفاعية
بس في مثل بيقول خير وسيلة للدفاع الهجوم !!!
وهجومنا صايم من الاهداف؟؟؟؟؟؟

جون سينا استقال في المغرب
مامعروف الاستقالة حتستمر لحدي السودان؟؟
ولا في الطيارة حتتغير اراء
كلو شي وارد
يخبر بفلوس باكر يوزعوه مجاني واغاثه سااااااكت !!!!
حننتظر علي المدرج ونتفرج!!
ولنا عودة لادب الاستقالة
بس لجنتنا ومدربنا تخصص كنكشكه ،،،،،

تغريدة مرورية
اصل وبعديها اتصل
لاتجازف بحياتك وحياة الاخرين بسبب رنة موبايل
لو مستعجل شديد جنب علي طرف الشارع وكمل اتصالك
القيادة فن وذوق وادب

للتغريدة نقاط واراء اقبل منها ماتشاء وارفض منها ماشئت،،،
تغرديتنا عبارة عن ونسة وراي بصوت مسموع فقط،،،،،،


امسح للحصول على الرابط
بواسطة : معاذ ابو مؤيد
 0  0
التعليقات ( 0 )
أكثر

للمشاركة والمتابعة

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019