• ×
الجمعة 18 يونيو 2021 | 06-18-2021
شوربجي

والله خسارة فيكم النفره

شوربجي

 9  0  1500
شوربجي


((())) فريق المريخ لا يستحق قروش النفره :

والاولي بها فقراء بلادي في الحاج يوسف والكلاكلات وديم مايو وغيرها

واولي بها اهلي الذين يكابدون لقمة العيش في كل مكان

واولي بها مرضي السرطان

واولي بها المشردون

واولي بها اليتامي والارامل وابناء الشهداء

واولي بها مرضي الغسيل الكلوي

واولي بها اولاد المايقوما المساكين

لا يستحقها هؤلاء المصارعون

ولا يستحقها فريق ادارته حاتم محمد احمد

ولا يستحقها فريق يقوده ابو جريشه

فكم اخوتي تحسرت علي حال علاء شلاليت وهو يعتدي علي الصحفي المغربي

وكم حزنت وانا اري حاتم يضرب الحكم امام الكاميرا عيانا بيانا

اي اخلاق هذه يا نادي ( الصفوة ) . قال صفوه قال انهم كفوه

هؤلاء بالتأكيد لا صفوه ولا يحزنون لانهم لا يمثلون اخلاق اهل السودان

هم في الحقيقه فريق من المصارعين خرجوا عن الخلق الرياضي وخارج البلاد

ظلوا يطاردون الحكام ويعتدون عليهم بطريقة سافره

وشلاليت وبونيات والفاظ نابيه وشد وجذب

وخسارة للنتيجه بطريقه بليده

وان كان لا غبار البته علي ضربتي الجزاء فهما صحيحتين مائه في المائه

وكان الحكم ممتازا وصارما

وكما هو معروف فان قرارت الحكام نهائيه ولا رجعة فيها

ويوم الجمعه اكيد سيخرج علينا خبيرهم العجيب سيحه ليدافع عنهم

وسيخرج علينا مزمل ابو القاسم ليدافع عنهم في الصدي المصديه

وسيدافع عنهم سلك وينعتهم بالشفوت ( نعم هم شفوت بسوء السلوك )

وسيدافع عنهم ابو شيبه ويطلع الحكم ظالم وكأنه قد شاهد مباراة اخري

وسيدافع عنهم كابو بآغنيه لندي القلعه

انها حقا فضيحه كرويه سودانيه اساءت كثيرا لهذا الشعب الكريم

وقبل المباراة قلناها صراحه اننا لن نشجع المريخ

لمعرفتنا التامه بنفسية هذا الفريق وسوء نظامه وعدم قدرته علي تمثيل السودان

لقد توقعنا هذا الضعف وهذا الهوان والفريق يعاني صراعا اداريا ما بين الوالي والتسيير

وتوقعنا خروجه المذل وسلوكه المشين بعد فقدانه لبوصلة الانضباط والتنظيم

هي مهزلة كرويه مريخيه كان سببها شح المال وضعف الاعداد

وهي مهزلة كرويه مريخيه كانت اسبابها النفخ الاعلامي المريخي

عقوبات صارمه يجب ان تطول فريق المريخ وادارته عند عودتهم الي الخرطوم

لقد عكسوا وجها قبيحا للسودان في هذا المحفل الاقليمي الهام

كنت اتمني ان يتم اعتقال بعض لاعبي المريخ في المغرب والتحقيق معهم ومحاكمتهم

واتوقع ان يحرم فريق المريخ من المشاركه في البطولات الافريقيه كلها ولفترة من الزمان

وقد تناله غرامات ماليه ضخمه او قد تشطبه الفيفا ان علمت بالامر

لا نريد جوديات او عفا الله عما سلف

طهروا المجتمع من هذه الظواهر السلبيه القبيحه التي في المريخ

لقد دمر المريخ كل تاريخه الكروي في مراكش

ودمر كذلك ما بناه الهلال في افريقيا من سمعه طيبه للسودان

عشرات السنين كان الهلال خير سفير للسودان في افريقيا

وبصراحة خربت بعد ان التحق المريخ بهذه البطوله

في النهايه الهلال هو الغلطان لانه تسبب في ان يحطي السودان بالتمثيل باربعه فرق


((())) قطر عجيب :

المريخ يتجه للانسحاب من بطولا الكاف

أدلي الصادق حاج علي رئيس بعثة المريخ للمغرب بتصريحات ساخنة شن فيها هجوما عنيفا علي حكم مباراة المريخ والكوكب المغربي .. واكد ان الحكم احتسب ركلتي جزاء لا وجود لهما وان ما قام به الحكم ليس غريبا علي التحكيم الافريقي وقال ان المريخ ستكون له ردة فعل قوية بعد تلك الاحداث بالانسحاب من كافة بطولات الكاف التي لا تتوفر فيها اي عدالة والمريخ لا شرفه اللعب في هذه البطولات المشبوهه

انتهي :

تعليق :

١ـ شروط شرط المريخ في البطولات الافريقيه ان تحكم جميع مباريات المريخ بواسطة حكام يعينهم مجلس الاداره

٢ـ ان يمنح المريخ عدد من ضربات الجزاء



((())) شعرائنا والخروج المذل :

سوهندا عبدالوهاب:
كانت شكله ،،، او بالأحرى ،،عكه قويه
وإندق الحكم ،،،بي بنيه خطاافية
ضلنا يا جميل ،،، ياها القبيل محرية
وإستمعتنا غايتو ،، بي سهره (جونسينيه )
******
ودالبشرى :
قالوا عليك بطل ،،، قالوا انت اجمل ، درة
سموووك الاسد ،،،، لكن ،، مجرررد ،،، برة
تعبااااان انت ،،،، بس غايتو الحقايق مرة
بدل الكورة ،،،، شوفولكم ،،، مصااارعة حرة
******
ودالمجذوب :
يا اسد الجريدة ،،،،، اليوم طلعتا فراشة
خطافية كانت ،،،،وفي الحقيقة معاشة
شدة ما قوية ،،، وفي الصميم دشداشة
يا سوهندا ،،،،،،لما مسكتا ليها الشاشة
*******
سوهندا :
قلتو قبيييل شفوت،،،،، وعلينا إتجدعتو
إلا مشيتو بي البنج الكتييير ،،، بدعتو
وين الصفوه ؟؟؟ لي الجمهور تملي خدعتو
والأمر المهم ،،،،،، طرتو وخلاص ودعتو
*******
ودالبشرى :
مريخكم حماااام ،،،، مااا عندو حبة كورة
لا نص لا دفاع ،،،، حتى الهجوم ماسورة
يا ريت الامور ،،،، هسع بقت مستورة
بس ضرب الحكم ،،،، والله خرب الصورة
******
ودالمجذوب :
الناس حقو تبقي دوام قنوعة راضية
وتتناسي الهموم ،،،، أو بالاصح متغاضية
وبي غض النظر ،، عن الهزيمة الماضية
ايه ذنب الحكم ،،،، لو ينضرب بالقاضية
*******
سوهندا :
بنقول لي الحكم ،،، كفاره ليك وسلامه
يا الأسد النتر ،،، يا الديمه عالي القامه
تتعلا الحروف ،،،، ليك انت يعلا مقامه
والنجمات فداك ،،،، يبقولك انت كرامه
*****
ودالبشرى :
طار اب نجمة ياااا حليلو ،، وسمعنا العوة
قونين من لهب ،،،، خلو ،، الوصيف يتلوى
الكوكب ظهر في استااادو ،،،، نور وضواا
بس ياخي الحكم ،،، وروني بس شن سوى ؟؟
******
ودالمجذوب :
قال ليك الحكم ،،،، قال لي زميلو هناي
ما شايفك عديل يا صاحبي قرب جاي
لمن صاحبو قرب ..قالو اسكت ساي
لاقيت ليكا تايسون ،،، وجمبو ماشي كلاي
********
سوهندا :
دام طار الهلال ،،، معروف اكيد ح تطيرو
مريخكم خلاص ،، وصلت حرارتو الزيرو
نقترخ إنقلب حلبه ،،،،ويتم تغيييييرو
شيلو الفاتحه فيهو ،،،، علي لجان تسييرو
*****
ود البشرى :
يوم طار الهلال ،،،، النجمة نفشت ريشا
تشمت في الهلال ،،، جابت كلاااام نبيشة
طارت هسسة في المغرب ،،، بقت مااافيشة
قالولنا الكواكب ،،، ، كرهوها العيشة

******
ودالمجذوب :
ليه الانفعال ،،،، يا اخوانا والعصبية ؟؟؟
الناس تبقي ،،رايقة وروحا سامية ابية
حاتم موهبة ،،،،، ولكماتو اولمبية
لو شارك اكيد ،،،،،، بيحقق الدهبية


((())) واجب الاعتذار للشعب المغربي :

نعتذر نحن ابناء الشعب السوداني لكل الشعب المغربي الشقيق علي ما بدر من فريق المريخ من سلوك غير راضي مرفوض من كل اخوانكم السودانيين

ونؤكد لكم ان لا تتأثر العلاقات الاخويه بين شعبينا


محمد حسن شوربجي



امسح للحصول على الرابط
بواسطة : شوربجي
 9  0
التعليقات ( 9 )
الترتيب بـ
الأحدث
الأقدم
الملائم
  • #1
    هلال الملايين 05-20-2016 06:0
    لكمة البرير خطافية وتحت الخزام اتحدى اخرف بتاع كاميرا يكون صادها
    بس حاتم محمد احمد خمستاشر لكمة ولا واحدة ادت غرضها
    يجلي ويرجع يجلي ويرجع ياخي ختها صاح لمن يقع والزارعة الله في الزلط بتقوم
    العقوبة جاية جاية على الاقل اتعاقب وانا مسوي حاجة
  • #2
    Talal 05-20-2016 06:0
    أضرب الدلاقين ياشوربجي وماترحمهم...فضحونا وشرطوا عينا محل ماوديناهم ... غير ضيعوا قريشات الشعب المسكين ماشفنا منهم أي حاجة !!!
  • #3
    ابو علي 05-20-2016 03:0
    ياناس كفر ووتر لماذ تحجبوا تعليقاتنا هذه المرة العاشرة
  • #4
    ابو علي 05-20-2016 01:0
    وكم حزنت وانا اري حاتم يضرب الحكم امام الكاميرا عيانا بيانا
    تستطيع ان تجاهر بحزنك الآن ياشوربة فهي فرصة ان تبوح بأحقادك ولكن الذي متأكدين منه انك لم تستطيع البوح بهذا الحزن عندما لكم كبيركم الحكم امام اعين العالم كله ومثلا هذه الأفعال القبيحة من افضال خيركم
  • #5
    بكري عبده 05-20-2016 01:0
    الليله م اديت الجماعه قصة القعونجه والابريق مالك !! والله خائف تجيك لكمه خطافيه ؟
  • #6
    alyyas 05-20-2016 11:0
    د.شوربجي كفيت و وفيت اموال النفرة حرام على الملاكمين لأن الملاكم قوي يكسر الجبل وما محتاج للمساعدة ( رجعوا فلوس الشعب) ، اللكم و الشلاليت هل محتاجات ل نفرة ؟! كل مداخلة وكل سطر من كبيرهم لصغيرهم تريقة على الهلال الصفر الكبير و... . للعلم كورة القدم التحكيم فيها جزء من اللعبة زي ما فيها الخسارة والفوز والتعادل ،التحكيم يوم عادلونزيه ويوم عليك ويومليك . النفرة ترجع .
  • #7
    EzzSudan 05-20-2016 09:0
    ما في اي واحد من الجماعة لافي ساي بيجاي, يعني مافي شوربة و لا الصفر الدولي الغليد, (حمد لبد), تاني تجو.
  • #8
    النازف 05-20-2016 06:0
    والله خسارة للسودان أن منحك جنسيته الشريفة
    من خان مسقط رأسه وركل إنتمائه له لا يؤتمن
  • #9
    بندق 05-20-2016 02:0
    ان شاء الله قطر عجيب أشيلك انت يا متخلف يا أهبل ويريحنا من خلقتك دي مزمل وأبو شيبه وسلك ديل هارنك وانت طول عمرك ماح تجي جمبهم والفرق بينك وبينهم كبير
       الرد على زائر
    • 9 - 1
      alyyas 05-20-2016 06:0
      ي بندق اتق الله ، الكلام في الكورة يتطلب اخلاق وتربية دينية وهذا مجرد تريقة بين الفريقين . استغفر ربك ي بندق وأدحر الشيطان .
أكثر

للمشاركة والمتابعة

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019