* من كترت (السيئات) أصبح (العادي مدهشاً) و(المدهش عادياً) ..
* ولما الإعتياد يكتل الدهشة يبقي نحن مُقبلين علي التعود لما هو أقل من عادي ..
* وحتى يكون المعنى واضحا نقول : (العادي أن يكون عاطف النور مديرا للكرة) فهذا يليق بعاطف النور ويليق بالهلال ..
* وعودة عاطف ليس مدهشة لانها عادية ، بل المدهش ان يكون عبد اللطيف هارون في هذا الموقع وكذلك الفاضل ..
* ولكن الكاردينال ولشئ في (رأسه) كتل دهشتنا حتي جعلنا نفرح بعاطف النور ..
* وأظن ان الكاردينال نفسه يعتبر ان عودة عاطف النور هي من الإنجازات التي تضاف لانجاز الجوهرة الزرقاء ..
* الكاردينال بقي لما يعمل حاجة صاح بيفرح ..
* من كتر العمايل الغلط بقي يفرح لما يعمل حاجة صح ..
* عاطف النور إبن من أبناء الهلال وهو من الأوفياء ومن الذين يعرفون متلطلبات العمل وعودته طبيعية لانه الرجل المناسب في المكان المناسب ..
* أنا قصدت بهذا الحديث إننا أصبحنا نفرح حينما نجد الرجل المناسب في المكان المناسب وهذا يؤكد ان سيئاتنا في العمل الإداري كتيرة جدا ..
* فرحتنا بعودة عاطف النور تؤكد ان عاطف حاليا هو الوحيد (المناسب في المكان المناسب) أما الباقين فهم في نظر الكاردينال مناسبين ولكنهم ليس في المكان المناسب ..
* ولا نخاف علي الهلال إلا من (غير المناسبين) في المكان (المناسب) ..
* وأنا ما بفسر وانت ما تقصر ..
* المهم ..
* أهلنا بيقولوا : (البرد بفتش الجسم) ..
* أي مرض عندك في جسمك بيظهر في البرد ..
* لو عندك مرض في (الصيف) ما كان ظاهر ، ممكن الشتاء يظهروا ليك وخاصة الأمراض العندها علاقة بـ(العظام) ..
* البرد فتاااااش ..
* وهنا يلعب البرد دور (الجهاز) الذي يبحث عن الذهب في باطن الأرض ..
* الناس المشوا الدهب بيعرفوا إنو (الجهاز) أهم شي في (رحلة الدهب) ..
* في السودان عندنا الهلال بيلعب نفس الدور البيلعبوا (البرد) و(الجهاز) ..
* والله صحي ..
* الهلال فتاااااش ..
* الهلال بيفحص معادن الناس ..
* كل ما نقول الدنيا إتغيرت والسودان إتغير والناس بقت ما زي زمان نكتشف ان هذا كلام ساكت ..
* بنلقي لسه البلد دي فيها خير وفيها ناس يسدوا عين الشمس ..
* وربما ما كان لنا ان نكتشف هذا لولا وجود الهلال في حياتنا ..
* الهلال بالأمس لعب دور (البرد) وفتش العيلفون فخرج لنا بتلك المشاعر التي تؤكد ان البلد بخيرها ..
* أهل العيلفون (بالغوا في الكرم) و(بالغوا في الطيبة) فكانوا عند حسن الظن بهم ..
* إنها عظمة الضيف وعظمة المضيف ..
* ضيف مقامو رفيع زار مضيف مقامه لا يقل عن مقام الزائر ..
* وتبقي زيارة الهلال للعيلفون بالأمس هي من الزيارات التاريخية وفيها تجسيد كبير لمعنى الحب والوفاء والعطاء ..
* العيلفون برمزيتها التاريخية ليس غريبا عليها هذا الكرم وهذه (الرجاله) ، وقد حرمتنا ظروفنا من مرافقة كبير البلد إلي حيث ديار الكرم والأدب ..
* الهلال في العيلفون (وقف البلد برجل واحدة) والمريخ في الأبيض زي (الدخان .. دخل القشة وما قال كش) ..
* بالمناسبة ..
* (الدخان) ممكن يكون لقبا جديدا للمريخ ..
* بالحسابات .. الدخان يوازي الضل ..
* قول لي كيف ؟؟
* الدخان لو دخل القش ما بقول كش ، والضل برضو لو دخل الكش ما بقول كش ..
* والدخان والضل يتشابهان في المعني القريب والمعني البعيد ..
* الدخان إذا إدخلنا عليه (الفلسفة) سنعرفه بأنه : (ضل النار) أو هو (ولد النار) ..
* الدخان في الحقيقة هو (فرع لأصل) والأصل هي النار ..
* والضل أيضا فرع لأصل ..
* وحسب فلسفة صحيفة الهداف الجزائرية فأن المريخ هو ضل الهلال ..
* ويمكنك ان تقول : (المريخ دخان الهلال) ..
* يعني من الآن وصاعدا ألقاب المريخ هي : (الضل ، الإصيفر ، فريق الحكومة ، الدخان ، ومريخ الوالي) ..
* غايتو جنس غايتو ..
* من كوستي وإنت ماشي لحدي نيالا الكل في إنتظار (الهوبا) اليوم ، فهل يدرك مهند الطاهر هذه الحقيقة الغالية جدا ..
* شطارة فاروق جبرة ويسارية الغزال بتعمل شغل الليلة ..
* (تحت تحت) قالوا المريخ عندو نية يرجع الحضري ..
* والخبر إتنشر في صحيفة (اليوم السابع) المصرية ..
* ونحن لا نعرف مدى صحة الخبر ولكن شخصيا لا استبعد ان يفعل المريخ ذلك ..
* في الخبر ورد ان المريخ يريد التعاقد مع الحضري لنصف عام حتى يتمكن من الحصول علي الكونفدرالية ..
* والله العظيم أسمعوها مني ..
* مش لو جبتوا الحضري ..
* لو جبتوا حسني مبارك ما بتشيلوا الكونفدرالية ..
* مازيمبي ده قاعد عوجة تب ما في ..
* طول ما (الخال) ده قاعد جيبوا الدايرين تجيبوا ..
* كمان مازيمبي بعرفو ليكم الحضري ولا ما الحضري ؟؟
* الحضري والمعز في نظر مازيمبي واااااحد ..
* ونحن والله لو في محلكم ما بنتعب في التسجيلات كتير ..
* المريخ لو داير يسجل لاعبين عشان يشيل بيهم الكونفدرالية يبقي بيضيع في قروشو ساكت ..
* أنا بقول ليك الكلام يا أسامة ونسي عشان أنت زول هلالابي ..
* ما ضيع قروشك في تسجيلات لابتودي ولا بتجيب ..
* والله صحي ..
* عندكم مباراتين في الكونفدرالية ألعبوها بناس علي جعفر وشهر أطناشر الله كريم ..
* مدو كرعينكم قدر سيكافتكم ..
* بالمناسبة ..
* صحي المعز قفل تلفونو ورفض يسافر مع البعثة ؟؟
* يعني الليلة جمال سالم لو جاهو (صداع ساكت) ممكن هلال الأبيض يعمل فيكم العملو الوحدات الأردني ..
* هلال الأبيض عليه ان يدرك ان المريخ فريق (خفيف جدا) يمكن الفوز عليه بعدد وافر من الأهداف ..
* معظم الفرق لما تلعب امام المريخ بتتخيل إنو ده المريخ بتاع أبراهومة وفيصل العجب وجندي نميري ومحمد موسى ..
* بتخيلوا كده عشان كده بيخسروا ..
* لكن ناس مهند عارفين إنو ده مريخ على جعفر ومصعب عمر وعنكبة وامير كمال ..
* يعني المريخ زادوهو موية ..
* بقليل من التركيز ممكن مهند الطاهر الليلة يكون (شلباية تو) ..
* والله صحى ..
* عموما .. لو صحي معز قفل تلفونو خشوا ليهو في الإيميل ..
* إيميل بـ(الغاء) ..
* و..و..
* وما زمان وصوك علينا وقالوا ليك (لما تجينا أقلو جيب معاك كيس برتقال) ..