• ×
الثلاثاء 21 سبتمبر 2021 | 09-20-2021
معاذ ابو مؤيد

رجال اعمال المريخ حالفين وشباب القروبات شغالين مدربين

معاذ ابو مؤيد

 1  0  1050
معاذ ابو مؤيد


معقولة لكن ماعندنا ناس مرطبين غير الوالي!!
ورجال اعمالنا ماعايزين يديرو النادي!!!
القصة شنو كرسي الرئاسة طارد للجلابه ومكنكشين فيه الغلابه!!
الناس في انتظار الوالي صحفيين ومشجعين وفنيين وحتي رجال الأعمال المرطبين كلهم في انتظار الوالي!!
والله عيب ياشباب ،،،
نقول الوالي حرد وفات مافي زول غيرو عندو دولارات !!
الناس مفروض تدرس الوضع دا
كرسي رئاسة المريخ ليه طارد لرجال الأعمال والميسوريين !!
هناك شي خفي !!
نحن قبل ماننتظر واحد من الميسورين مفروض نطرد السماسره والناس المحبطين والناس المرتزقة البتحارب كل ادارة ،،
مفروض نخلي كرسي الرئاسة جاذب للجميع ،،
لكن تأكدو تمام طالما في ناس المصالح وصحفي التطبيل والمعارضة المحتاجة تشتهر علي ضهر الغلابة!!
نضفو البيئة المحيطة بالمجالس والادارات !!
المريخ عالم جميل
لكن في ناس للنادي محتكريين !!
اي راس مالي حيجي حيشرد عشان في ناس ماعايزين لينا مصلحة او فائدة للكيان ،،
انفضوا ذاكرة الاسماك الفي جماجمنا وحتكتشفوا انو شخصيات معينة متعاقبة علي معظم الإدارات !!
معقولة مافي كوادر غير الناس دي!!!
نظفوا البيئه المحيطه بالإدارة ياشباب عشان كرسينا يكون جاذب للمستثمرين والمرطبين ،،

وجوه معينة مسيطرة علي الساحة المريخية إداريين وحتى صحفيين !!
التجديد مطلوب في كل اركان البيت المريخي،،
لو عايزين مصلحة المريخ ابعدوا الناس المكررة دي !!
مامكن كل مجلس ادارة وكل دورة نفس الوجوه!!
ونفس الناس !!
يعني مافي كوادر غيرهم ؟؟
ولا هم المريخ دا حكرا عليهم!!
نظفوا ياشباب التكرار دا ،،
الجديد شديد
ماعايزين نعيش نفس الافلام كل عام!!
وحتى الاقلام والاعلام مافي إضافة نفس الصحف والكتاب !!
حنضمن كيف سيوف النقد والتصحيح طالما نفس الاقلام والاعلام م في حاله إعادة ومتعاقب علي كل الإدارات!!
نظفوا ياشباب عشان الكيان يعاني من نفس الاخطاء كل عام
نظفوا ياشباب عشان المريخ يعيش اجمل واحلى الليالي،،،،
النظافه بالمحاربة العلنيه لكل الشخصيات المكررة !!
في شخصيات حققت نجاح نشد علي كتفهم لكن في شخصيات خصما علي الكيان !!
بالله راجعوا الذاكرة مرة واتنين وثلاثة،،
في ناس مكررين في اكتر من مجلس وادارة !!
مامليتوا من المسلسل المعاد دا ؟؟

حليفة رجال الاعمال بالابتعاد عن رئاسة الكيان عشان البيئة مليانة منتفعين وناس نميمة وفاسدين !!
ابعدوهم وجددوا دماء الادارات يامتعلمين وياشفوت القروبات الواعين ،،
عندنا اكتر من رجل اعمال وصاحب مال لكن حالفين مايدخلوا مجالس المريخ عشان شايفين الحاصل بعيونهم !!
شجر اللبلاب الحولين الإدارات مليان ثعابين سامة وحشرات!!
تعالوا ننظف عشان بدل والي يجونا كل جلابة وفطاحلة الكيان !!
ناس اللهط والسمسرة ديل ابعدوهم وهم كتاااااار
بس من الافضل نظافة المكان قبل انتظار وتحنيس رجال الاعمال ،،،

حبايبنا في القروبات شغل التسجيلات والمدربين دا ماوقتوا والله لانو اصلا مافي قروش تسد حوجة النادي وتجيب لينا أفضل الخيارات!!
لجنة عدمانة وماعندها اي دراهم ودينارات،،
قروش النفرة الجاية دي احسن نسجل بيها صانع العاب حتى لو من الدوري المحلي ،،
كل الوظائف في الميدان موجودة ماعادا صانع الالعاب !!
ومشكلة الوك مامعروف حتفرج من ياتو باب!!
نعمل احتياطتنا ياشباب ،،
نص مليار بالامكان تجيب صانع العاب من دوري سوداني الممتاز
لجنة التسيير لو انتظرنها شفنا شكل تسجيلاتها وانتظارنا الفات !!!
كل الاخبار المتناولة في القروبات عن التسجيلات بشغلوها لينا وبشغلونا بيها ياشباب عشان كنكشتهم مدتها تزيد !!
وعشان مانركز علي السلبيات وعشان النقد علي التسيير ذاد
سمعتوا ليكم واحد من ابناء المريخ المتخصصين فنيا او مدرب رشح اي لاعب؟؟
معناه الترشيحات دي كلها ترشيحات ادارية ومعظمها شتلات !!
نظبط نفرتنا ونجيب صانع الالعاب باقي الخانات متوفرة حتي لو كبكابات !!
ختاما
ارحمونا يرحمكم الله
المريخ عندو اكتر من شفت محب وعاشق مافي داعي لتكرار اللاعبين والإداريين والصحفيين

ونحن علي المدرج ندعم ونشجع ونتفرج
بس مع واجباتنا دي محتاجين ننظف البيئة المحيطة بالنادي ونخلي كوكب المريخ جاذب وماطارد ،،
عيب جلابتنا حردانين وشايفين فريقنا يعاني الامرين !!
والعامل المشترك بينهم كلهم انو البيئة مامساعدة علي الاستثمار التماسيح قاعدين ومستنذفين جيوب الغلابة والمستثمرين!!
يلا يشفوت المدرجات شعارنا المرحلة الجاية
ممنوع التكرار في مجالس الادارات ومحاربة الوجوه المكرره في عالم المريخ الجميل،،،،

همسة اخيرة
عندنا اكثر من رجل اعمال وعندما بدل الجلابي الف
لو نظفتوا المكان حيكونوا حضور
ابعدونا من عالم الحيتان والسماسره والمحتالين !!
وبعديها ارض المريخ ستنبت الف والي ،،،
لاتحلموا بمريخ جاذب في وجود الوجوه المكررة والثعالب !!
نجمع نفراتنا عشان نسجل لاعب يريح الهجوم ويريح الاعصاب،،
ماتخلونا نقول ياريت لو كان!!صانع الالعاب مريح للجميع
جمهور واداره ولاعبين ،،،
نجتمع كلنا عشان المريخ محتاج لينا ومحتاج لوقفتنا ونفرتنا ،،

خارج النص
المريخ مريخ الشعب والشعب هو الجمهور
جمهور المريخ يعاني والمريخ يعاني !!
معقولة ماقادرين ننظف بيئتنا ياشفوت !!!
بالمناسبة حتي لجنة التسير برغم فقرها المالي برضو الثعالب شغالين فيها لبع وامتصاص !!
لم يسلموا من الوجوه المكرره!!!
خلونا مع وظيفة صانع الالعاب وماننتظر غير ذلك واكثر من ذلك
ترشيحاتنا حدها قروباتنا دي فقط!!
ادركوا المريخ ياأهل المريخ
والمراكشي الناس الشافوه قالو خطير وخطير جدا،،،،،
بالتوفيق للمريخ اليوم ضد هلال الابيض،،،،
وياشفوت الابيض المريخ محتاج التشجيع والمساندة من المدرجات تعال ومعاك اخوك ياصفوه ،،،
وربنا يسترنا مع الغيابات !!

( المريخ مشلول ومحارب بايادي بعض ابناء المريخ )

دعواتكم للزعيم ياصفوه
بالنصر ولابديل غير النصر
المريخ بيعاني وحيفضل يعاني في وجود هؤلاء الوجوه المكرره !!!!!!
النظافة من الايمان ولابد من نظافة الايادي المتسخة حول ادارات الكيان !!!
امسح للحصول على الرابط
بواسطة : معاذ ابو مؤيد
 1  0
التعليقات ( 1 )
الترتيب بـ
الأحدث
الأقدم
الملائم
أكثر

للمشاركة والمتابعة

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019