• ×
الجمعة 26 فبراير 2021 | 02-24-2021
محمد الطيب الامين

دي حاجات ما بتتنسي !!

محمد الطيب الامين

 0  0  1705
محمد الطيب الامين



*اسوأ (10) حاجات في الدنيا دي (7) هي :
1- الشاكوش العاطفي في رمضان
2- رمضان في السجن
3- السجن في الغربة
4- الغربة داخل الوطن
5- والدوري البتتحكم فيهو اللقيمات
* الإتحاد العام في كل عام يرفع شعار (دوري بلا تأجيل) ..
* وقبل ان ينتهى النصف الأول من الدوري يقوم الإتحاد بتأجيل المباريات تقديرا لظروف المريخ (الفنية) ..
* الإتحاد يعلم ان خسارة المريخ في الأبيض وخسارته في كادوقلي تعني ان المريخ سيكون (مساعد وصيف) هذا العام ..
* أجلوا للمريخ مبارياته (المؤجلة اصلا) حتى يقوى عوده ويعود لسكة الإنتصارات ..
* ولكن أعتقد ان الإتحاد لم يكن ذكيا هذه المرة ..
* كان يمكن ان يلعب المريخ كل مبارياته المعلنة وإذا خسرها في الميدان يكسبها بالشكوى من داخل المكاتب ..
* في الموسم الماضي النقاط التى كسبها المريخ بالشكاوى أكتر من النقاط التى كسبها داخل المعلب ..
* إنها اللقيمات يا مولانا ..
* أكتر (7) حاجات بتجيب ليك أخلاقك في طرف نخرتك (5) هي :
1- البواب بتاع المستشفي الحكومي
2- الشماعة في بص الوالي والكبري فيهو حادث
3- رسالة (الرقم أعلاه يطلب الإتصال به)
4- والإداري الفرحان البحب الصور أكتر من إيمان لندن
* الوسط الرياضي ده فيهو إداريين بيحبوا الصور أكتر من إيمان لندن ..
* الواحد لو (صلح العمة والشال) بيأخد ليهو صورة ..
* لو غير النضارة بيأخد صورة ..
* مرات أنا بحس إنو في ناس بيشتروا ملابس جديدة عشان تكون بالنسبة ليهم مبرر للصورة ..
* والله صحي ..
* الإداري البيحب الصور في الغالب كيسو بيكون زي كيس العشري ..
* نحن نبحث عن إداري الصور بتحبو وليس العكس ..
* غايتو جنس غايتو !!
* أكتر (5) كلمات الواحد بيحب يسمعها (3) هي :
1- جمال سالم لا يسأل عن الهدف الذي ولج مرماه
2- والهدف الذي ولج مرمي جمال سالم مسؤولية الدفاع
* نفسيا والله يا جماعة أنا برتاح جدا لما أشوف الكرة جوة شبكة المريخ ..
* الحاجة دي بتبسطني جدا ..
* لما أشوف الكرة جوة شبكة المريخ زي لما أسمع عثمان حسين او زي لما يدوك حافز مع المرتب ..
* بحب أشوف الكرة جوة الشبكة الحمراء ..
* ولذلك من أسعد الأيام في حياتي يوم (الوقفة) ويوم (المرتبات) ويوم (شلباية) ..
* كل ما أحس بالدنيا ضايقة وكل ما أحس بالزهج بعمل تلاتة حاجات ..
* الحاجة الأولي : بحضر فيلم لمحمد هنيدي ..
* ولو الفيلم ما فكه لي الضيق بفتح ملخص مباراة المريخ والوحدات الاردني علي اليوتيوب ..
* ولو أهداف شلباية ما فكت الزهج طوالي بطلع جرايد المريخ وبقرأ ما كتبه إعلام المريخ قبل سفر الفريق إلي الكنغو لمواجهة مازيمبي في المربع السنة الفاتت ..
* لما أقرأ الجرايد التي سبقت مباراة المريخ ومازيمبي بالكنغو بحس بشعور عجيب ..
* تقرأ الجرايد التى كتبت عن الطيارة الخاصة والبودي قاردات العشرة والطباخين الأربعة و(الفني) الساقوهو معاهم عشان يفحص هواء مكيف الفندق في الكنغو ..
* بالذمة في زول بيصدق إنو المريخ ساق معاهو (فني) لفحص هواء المكيف بالفندق ؟؟
* في زول بيصدق إنو المريخ سافر الكنغو ومعاهو الفني ده ؟؟
* قالوا إحتمال مازيمبي يعمل ليهم (مخدر في المكيف) ..
* هو وينو عليك الله الفريق البيعملوا ليهو (مخدر) ؟؟
* مخدر ما عملوا للهلال يعملوا ليكم إنتو ؟؟
* دنيا والله ..
* ولما المباراة بدت الجماعة إكتشفوا إنو (المخدر) ما في المكيف ، المخدر في كراع ساماتا ..
* والله فعلا مرات نبكي من كفرنا ومرات كفرنا يبكي الكافر ..
* المهم ..
* أكتر (5) حاجات بتخليك تضحك من الضرس للضرس (3) هي :
1- الرصيد البيجيك عن طريق الغلط
2- الغلط البيجيك عن طريقو الرصيد
3- ولما الكهربا تقطع وتعاين لتلفونك تلقي نسبة شحن البطارية (92%) ..
* والله صحي ..
* بتحس انك بطل لما الكهربا تقطع وتلفونك يكون فيهو (92%) ..
* وطبعا يا جماعة موضوع الكهربا ده زي ما قالوا بيكشف ليك إنو إحنا السودانيين ديل بنحب لأنفسنا كما نحب للآخرين ولكن بالعكس ..
* قول لي كيف ؟؟
* لما الكهربا تقطع في البيت أنت بتزعل جدا ولما تطلع الشارع وتلقاها قاطعة عامة بتفرح وإحتمال كبير تبتسم ..
* بنتكيف لما المصيبة تكون جماعية ..
* غدا الخميس ، وأكتر (6) شخصيات مهمة ليوم غدا (4) هم :
1- مهند الطاهر
2- وردة
3- والغزال
*كل آمال وتطلعات جمهور كردفان الراقي معلقة علي النجم الكبير مهند الطاهر ..
* الغزال مؤهل ليكون عريسا أمام المريخ إذا أحسن التركيز والتهديف ..
* ومهند أصلا متعود علي الحراس الأجانب ولذلك نتوقع منه زيارة أو زيارتين لشبكة جمال سالم ..
* أكتر (6) حاجات ما بتتنسي (4) هي :
1- الكلب البيسكك في شارع مليان بنات سمحات
2- والمثل البيقول : (العارف عزو مستريح) ..
*ديل ما بتنسو نهائي ..
* وأكتر (4) حاجات تؤكد سوء حظك (3) هي :
1- تهبط للكنفدرالية ومازيمبي يهبط معاك
2- وتسقط من الأبطال ومازيمبي يسقط معاك
* والله صحي ..
* ده سوء حظ عجيب وغريب ..
* يعني في حالة زي دي المريخ لا عارف يهزم مراكش المغربي عشان يقابل مازيمبي في المجموعات ولا عارف يتغلب من مراكش ويطير وبالتالي يرتاح من مازيمبي ..
* بالجد حاجة صعبة ..
* وصعوبة الحاجة دي إنو مازيمبي السنة الفاتت (لبعهم لبعة جامدة جدا) ..
* مازيمبي ضاق المريخ وتاني ما بخلي ..
* مش زمان بيقولوا ليك (الضاق أيدك ببقي رفيقك) ؟؟
* هسه مازيمبي ضاق الجماعة ديل وتاني ما بخليهو ..
* مازيمبي ح يبقي ليكم في العزيزة ..
* وأنا والله خايف لو هبطوا سيكافا مازيمبي يهبط معاهم ..
* عشان كده أفضل حاجة إنكم تتخارجوا من بدري ..
* الحل الوحيد مراكش يغلبكم هنا وهناك ..
* وتجوا تشاركوا في دورة دبي الرمضانية ..
* في الحالة دي مازيمبي بيخليكم ..
* غير كده والله العيظم أنا شامي لي ريحة (سبعات) ..
* سبعات بـ(الواء) ..
* و..و..
* ومزروعة في جواي وأنا (بسقي فيها موية صحة ليل ونهار) ..
امسح للحصول على الرابط
بواسطة : محمد الطيب الامين
 0  0
التعليقات ( 0 )
أكثر

للمشاركة والمتابعة

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019