• ×
الثلاثاء 22 يونيو 2021 | 06-21-2021
معاذ ابو مؤيد

شاشه مصفرنة واداء مصفرن وتخبطات ادارية وتفاقم الإصابات

معاذ ابو مؤيد

 0  0  514
معاذ ابو مؤيد


تاني وافقو علي البرمجة الضاغطة
وتاني قولوا المصلحة العامة!!!
اداء مابشبهنا
واصابات بالجملة
من المسؤل في البحصل للمريخ
السؤال موجه الي حضرات الساده التيسيرين؟؟
سفر ومباريات وضغط نفسي وبكل برود موافقة علي البرمجة الضاغطة!!!
والبرمجة دي بسبب معسكرات لم نجني منها غير خلافات وتمرد فيها !!
معسكر القاهرة بالذات التمرد بسبب المستحقات اكتر من التدريبات !!!
عايزين شنو تاني توصلونا ليه ؟؟
كل شي معاكم بالنازل
الاداء في النازل
الترتيب في النازل
البطولة الافريقية برضو في النازل
كونفدرالية!!
حتى صحتنا في النازل بسببكم
ارحمونا يرحمكم من في السماء!!!

إجتهادات من اللاعبين في ارضاء الجماهير
وانتو ماعندكم اي دخل فيها
لا إشراف ولا رفع روح معنوية
لاعبين يقاتلو في الميدان عشان حب الجماهير واصلهم
لكن غضب الجماهير شكلو
اصلا ماواصلكم !!!!
مجاملات حتى في التشكيلة !!!
تسجيلاتكم لم تمثل اضافة للفريق !!
وروني منو من تسجيلاتكم مشارك اساسي في معظم المباريات!! لاحافظتو علي عضم الفريق
ولاحافظتو علي استقراره!!!
تسجيلات خصم علينا وعلي خزينة النادي واولهم كريم الحسن !!!
لاعب يلعب ويدسي دا اصلو ماادونا ليها !!!
طالما قروشو مدفوعة شغلوه في عربية الإسعاف يسوقها علي الاقل يحلل راتبو!!!
لاعب يجري ورا اللاعبين ويتلبد وراهم سبحان الله !!
لاعب وزنو في زيادة وحضراتكم تتفرجوا ياساده
انهوا عقدوا ولا كمان عنده شرط جزائي ضخم من السمسار الجابوا!!
انتو الكوره دي في التلفزيون مابتحضروها عشان تقيموا اللاعب من الفشنك !!!

لحدي يوم سبعة وعشرين شكلو في ناس حتدخل العناية المكثفه وفي ناس ممكن تتوفى !!
اي حاجه ممكن تحصل!!
شكلنا حنغني ونقول كما صدح الحوت
كلو من ديل !!!!
اي والله كلو من ديل ،،،
اللاعبين ماعندهم اي ذنب في تخباطاتكم الادارية وفلسكم !!
انتو عارفين الند التقليدي اقرب مباراه لاعبها يوم كم !!
راجعوا البرمجة تعرفوا انتو وافقتوا علي شنو !!

البينا بينكم عمل
عشان ماتقولو ماعندنا شغلة غير التسيير !!
عملكم لايشفع لكم
وتصرفات بعض اعضاء لجنتكم غير مهضومة لنا !!!
الوضع حاليا لايسر الا اعداء الكيان فقط !!
اي زول يقول ليكم براڤو ولا انجزتو ولا اي كلمه ثناء دا بينفخ فيكم ساكت ،،،
الزول البكون ممتاز دا البشكل اضافه للعمل مابكون خصم عليه ،،،

نتيجة المباراة مرضية عكسا علي الارهاق والتعب،،،
نتيجة كانت محصلة تخبطات ادارية !!
نتيجة لايتحملها اللاعبين ،،،
حتقولو علاء الدين ضيع ضربة جزاء !!!
حاقول التوفيق وعدم التوفيق
حاقول قله التركيز
حاقول ضعف تدريب
حاكوس ليه عزر
عشان وضعتوه ووضعتونا في الموقف دا
عشان قاتل رغم التعب المفروض عليه فرض!!
منتظرين شنو من لاعبين من وصلو لحدي مالعبو المباراة ستة وخمسون ساعة فقط اي والله ستة وخمسون ساعة !!!
احسبوها براكم وصلو الخميس الساعه ١١ص ،،،
ومع جيتهم شفنا عدد الشاشات المحملة مع البعثة اكتر من البعثة !!!
من المستفيد من الحمولات مع اللاعبين !!
هل اللاعبين يترزقون من اجل سد رمق عيشهم،،،،
ام التجاره لجهات اخرى !!!!!

ختاما
ارحمونا يرحمكم الله والإستقالة هي المخرج للوضع الحالي المداقشة بتاعة كرة القدم لاتليق بحضراتكم !!

ونحن علي المدرج نشجع وندعم ونتفرج
وامبارح مدرجنا كان ناقص كتير من الشفوت !!
ناس الولايات الحوبتين الجايات حقتكم،،،
والزعيم منتظركم
منتظر حناجركم
نعاين للكيان ونشجع من اجله
وندعوا سرا وجهرا يايوم الإنتخابات ماتسرع تخفف لينا من زنقتنا دي ،،
وتشيل عن كاهلنا الألم المتراكم دا
وبالمناسبة ظهرت اللافتات المطالبة بابعادكم ودا القلناه من زمن !!
استقيلوا قبل تطور الاحداث ،،
احفظوا ماء وجه الكيان ،،
المريخ معاكم اصبح مخيف ونحيف !!
الجمهور معاكم يلوك في القرض ويمشي الايام من اجل الكيان ،،

همسة اخيرة
نفسي اعرف ناس لجنتنا المحترمين مين بيكون حضور في المقصوره في المباريات؟؟
وهل بيحضرو التدريبات
ولا قاعدين خلف الشاشات!!!
الادارة والقيادة من واجباتها حضوركم ياساده ،،،
المريخ يعاني بسببكم
والجمهور يعاني من حضراتكم
والمحصلة معانأة شعب كامل
اسمه شعب المريخ العظيم
ترجلوا واتركوا لنا المركب هنا
سنقودها الي بر الامان بإمتياز
مركبنا حتغرق !!!!!

خارج النص
المريخ مريخ الشعب والشعب هو الجمهور والجمهور هم شفوت المدرجات،،،
لاكبير علي الكيان إلا الكيان نفسه
ربنا يستر من الإصابات !!
ربنا يستر من ضغط المباريات
ربنا يستر من فشل الإدارات !!!
بالمناسبة شهر ابريل قرب يخلص ورواتب اللاعبين كبست
ووراها التسجيلات
ووراها الانتخابات
هل تمتلكون الجنيهات والدينارات والدراهم والدولارات
سؤال الي حضراتكم
هل انتم قدر الشهر الجاي دا ولاحتتلفتوا ؟؟....
امسح للحصول على الرابط
بواسطة : معاذ ابو مؤيد
 0  0
التعليقات ( 0 )
أكثر

للمشاركة والمتابعة

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019