> العمل بالجيش فى أى دولة فى العالم شرف كبير
> ومهنة يتشرف بها من يمتهنها حتى وهو خاتى كرسيهو فى خشم الباب يستمتع بالمعاش
> يحكى ليك عن الجيش والبطولات
> وطبعاً كعادة كل السودانيين
> جياشتنا بتاعين المعاشات بشوفوا إنوأجمل فترات الجيش كانت فى زمنهم
> جدى كان ضابطاً بالجيش
> أيام جيش وادى النيل
> الجيش السودانى المصرى
> ويقال إنو أول سودانى يصل رتبة العقيد بلغة اليوم
> إنه المأمور والعمدة عبدالمجيد على طه
> الوكت داك الجيش إسمو ديش
> والدى كان ضابطاً بالجيش وكذلك خالى عليهم رحمة الله جميعاً
> جدى كان يرى ان الجيش فى زمنو كان جيش جدجد
> لكن الجيش بتاع ناس أبوى وخالى ده جيش ما أصلى
> بعد داك خالى الصغير وعمى الصغير دخلوا الجيش
> الوكت داك أبوى وخالى الكبير كانوا ضباط كباااااااااار
> وبرضو بعد المعاش كانوا بقولوا الجيش فى زمنهم كان جيش
> مازى الجيش بتاع زمن خالى الصغير وعمى الصغير
> المهم
> مهما الناس تقول الجيش مستمر
> خاص صفحة الأحمر الوهاج
> زمان الرائد إسمو صاغ
> وكان فى باش وبيك باش
> فى الرتب دى فى رتب أخرى بالقديم
> أسى الرقيب أول بالجديد موش ياها أم باشى بالقديم؟؟؟
> المهم الجيش هو واجهة الدولة ورمز قوتها ووحدتها
> ويتطور ويأخذ مكانه فى المجتمع مشرفاً ومتشرفاً
> وفى أغانى البنات وجد حظه
> يجوا عايدين إن شاء الله عايدين يا الله
> جياشه والجيش نقلوا فتاشة كر على أنا
> ربنا ما يحرمنا الجيش يا رب
> المهم
> يستمر الجيش
> وتستمر علاقة أسرتنا بالجيش
> وهاهو كولى قريبى يدافع عن ألوان العلم تحت راية قواتنا المسلحة
> كولى ضابط وجواهرجى
> يؤمن بالجوهرة الكاردينالية
> قابلتوا أمس
> قال لى حظكم السمح ده يرميكم مع الحمام المغربى؟؟
> قلت ليهو الكوكب المغربى ما حمام
> قال لى كيف ما حمام؟؟
> خاص صفحة الأحمر الوهاج
> قلت ليهو الكوكب المغربى مسجل فى لوح الشرف الأفريقى لأنه أحرز بطولة الإتحاد الأفريقى قبل كده
> يعنى عندو إنجاز
> قال لى برضو ما عندو شئ
> قلت ليهو الكوكب بى كاس الإتحاد الأفريقى الشالو ما عندو شى وإنت بى صفرك الأفريقى عندك شئ؟
> قال لى كيف يعنى؟
> قلت ليهو أفهمك بلغة الجيش يا جنابو
> كاس الإتحاد الأفريقى هو دبورة وفى كتف الكوكب وصفرك ده أزبليطة سااى يا جنابو
> زلبطة
> يبقى بعرف إحترام الرتب عند الجياشة المستجد بى أزبليطة لايحق له التطاول على ملازم
> وجياشة والجيش نقلوا فتاشة كر على انا
> المهم
> على مجلس التسيير أن يعمل على لم الشمل فى هذه المرحلة الهامه
> البلد دى أنديتها كلها فى وضع الطيران للسنه الجاية
> الجواهرجى فى وضع طيران وشبع طيران
> أهلى شندى فى وضع الطيران
> الفريق الوحيد الشبكتو شغالة هو الزعيم
> وعشان يبقى عندنا وسيلة إتصال بالخارج
> لازم الزعيم يظل جوة الشبكة
> وعشان الزعيم يظل جوه الشبكة لابد من تجمع أولادو على قلب رجل واحد
> عشان المعسكر
> خاص صفحة الأحمر الوهاج
> عشان الإعداد لى سفرة المغرب
> عشان شكل التشجيع
> وعشان مواعيد نفرة القروبات الشهرية جات
> أيها الناس
> ناس القروبات
> إنكم تدعمون كياناً لا تدعمون إنساناً
> ومن كان يفهم غير ذلك
> دعموا لا يلزم الزعيم
> المهم
> كولى الجواهرجى تانى رجع لى وقال: مافهمت دبورة وأزبليطة دى؟
> قلت ليهو خلى بالك
> فى الحرب المشاة قدام
> آليات وضباط صف وقادة
> الجربندية القدام لو فى لغم بقون بيهم
> ولذا قام اللغم بالخرطوم والهلال والأهلى
> بدرى بدرى لغم الهلال والخرطوم قام
> ناس شندى اللغم ما قام بيهم مع الجربندية
> الجماعة برضك رتبة
> كملت الألغام والآن القائد الزعيم يدخل المجموعات رافعاً راية السودان
> يقاتل من أجله
> خاص صفحة الأحمر الوهاج
> ليعود بغنيمة كبيرة كما عاد بها سنة 1989م
> بدرى بدرى يا كولى اللغم قام بالحمام
> أيها الناس
> الليلة كلنا فى إستقبال الزعيم
> منها إستقبال وتحية
> ومنها سند للنصر
> أولتراسات الأربعة على قلب أولتراس واحد
> الروابط وتجمع الروابط حضور مبكر
> والشفوت ما بتوصوا
> روشا
> عاملين كشافاتكم الشينات ديل
> وكت قاعدين ساى جيبوا دلوكتكم وغنوا
> جياشة والجيش نقلوا فتاشة كر على انا
> أيها الناس
> إن تنصروا الله ينصركم
> أها
> نجى لى شمارات والى الخرتوم
> أكان شفت يا والينا
> شهر تلاتة ترخيص المحاماة علينا
> شهر اربعة ترخيص العربة يجينا
> شهر خمسة عواسة حلو مر لأنو رمضان قرب علينا
> شهر ستة رمضان بجينا
> شهر سبعة العيد والمدراس بفتح علينا
> شهر تمنية عيد الضحية يا والينا
> شهر تسعة قسط المدارس بدخل علينا
> شهر عشرة الخريف والبيوت بتقع علينا
> شهر حداشر ناس العوائد بقبلوا علينا
> شهر إطناشر الفلس مع نسواننا بخرب علينا
> شهر واحد عيد الإستقلاق يا والينا
> شهر إتنين البرلمان والزيادات الجديدة بجيزه علينا
> لرفع المعاناة عن كاهلنا يا والينا
> حقوا تنقصوا السنه شهر وبى شهر عسل تبدلوهوا لينا
> أو تلغوا ستة شهور وسنتنا تبقى خفيفة وسريعه يا والينا
> تقول للزول عمرك كم سنه يا أخينا
> بالقديم ولا الجديد يقول لينا؟
> خاص صفحة الأحمر الوهاج

سلك كهربا
>> ننساك كيف والكلب قال ستة سنه بالجديد كفاية جداً على عمرنا فى ظرفنا؟!!